Koteā ʼAē ʼe Tui Kiai Te Kau Fakamoʼoni ʼa Sehova?

“ ʼE mātou loto ke ke fakahā mai tau manatu, ʼo ʼuhiga mo te magaʼi lotu ʼaia, ʼe mahino kia mātou ʼi te potu fuli pe ʼe palalau te hahaʼi ʼo fakafeagai kiai.” (Gaue 28:22) Neʼe tuku mai e te kau takitaki Loma ʼo te ʼuluaki sēkulō he faʼifaʼitaki lelei. Neʼe nātou fia logo ki te faʼahi ʼaia mai te matapuna tonu, ka neʼe mole nātou tukuʼaki pe ki te ʼu fatufatu ʼa te hahaʼi ʼo tuʼa.

ʼE toe feiā pe ia ʼaho nei, ʼe tautau hoko te fakafeagai ki te kau Fakamoʼoni ʼa Sehova, pea ʼe ko he faihala anai mokā ʼe koutou kumi te moʼoni ʼo ʼuhiga mo nātou mai te ʼu hahaʼi ʼaē ʼe fakafeagai kia nātou. Koia ʼe mātou fiafia ai ʼi te fakamahino atu ʼo ni ʼu akonaki ʼi te ʼu akonaki tāfito ʼaē ʼe mātou tui kiai.

Te Tohi-Tapu, Sesu Kilisito, Pea Mo Te ʼAtua

ʼE mātou tui ko te “Tohi-Tapu katoa ʼe haʼu ia mai te ʼAtua pea ʼe ʼaoga.” (2 Timoteo 3:16) Pea logope la te ʼui ʼa ʼihi, ko mātou ʼe mole ko he kau Kilisitiano moʼoni, ko te manatu ʼaia ʼe hala. ʼE mātou lototahi mo te ʼapositolo ko Petelo ʼaē neʼe ina ʼui ʼo ʼuhiga mo Sesu Kilisito: “ ʼE mole ʼi ai he tahi higoa ʼi te lalo lagi neʼe foaki ki te tagata, ʼe tonu ke tou maʼuli ai.”—Gaue 4:12.

Kae, ʼi te ʼui ʼaē ʼa Sesu ko ia ko te “ ʼAlo ʼo te ʼAtua” pea ko te ‘Tāmai ʼaē neʼe ina fekauʼi mai ia ia,’ ʼe tui te kau Fakamoʼoni ʼa Sehova ko te ʼAtua ʼe lahi age ia, ia Sesu. (Soane 10:36; 6:57) Neʼe ʼiloʼi lelei pe e Sesu te faʼahi ʼaenī: “Ko te Tāmai ʼe lahi age ia te ʼau.” (Soane 14:28; 8:28) Koia ʼe mole mātou tui ai ko Sesu ʼe tatau mo te Tāmai, ohage ko tona ako e te akonaki ʼo te Tahitolu. ʼE mātou tui neʼe fakatupu ia ia e te ʼAtua pea ʼe mālalo age ia ʼi te ʼAtua.—Kolose 1:15; 1 Kolonito 11:3.

ʼI te lea fakaʼuvea, ko te huafa ʼo te ʼAtua ko Sehova. ʼE ʼui fēnei e te Tohi-Tapu: “Ia koe, ʼaē ko tou huafa ko SEHOVA, ko koe tokotahi pe, te Māʼoluga ʼAupito ʼi te kele katoa.” (Pesalemo 83:18, La Sainte Bible [1905], A. Crampon) ʼO mulimuli pe ki te talanoa ʼaia, neʼe lahi te faka maʼuhigaʼi e Sesu te huafa ʼo te ʼAtua, ʼo ina ako ki tana kau tisipulo ke nātou faikole fēnei: “Ko tamatou Tāmai ʼe ʼi selo, ke tāpuhā tou huafa.” Pea neʼe faikole totonu ia ia ki te ʼAtua ʼo fēnei: “Neʼe ʼau fakahā tou huafa ki te ʼu tagata ʼaē neʼe ke foaki mai kia te ʼau.”—Mateo 6:9; Soane 17:6.

Ko te kau Fakamoʼoni ʼa Sehova ʼe nātou tui ʼe tonu ke nātou mulimuli kia Sesu, ʼo nātou fakahā ki te hahaʼi te huafa ʼo te ʼAtua pea mo tana ʼu fakatuʼutuʼu. Neʼe mātou toʼo te higoa ʼaē ko te kau Fakamoʼoni ʼa Sehova koteʼuhi heʼe mātou faʼifaʼitaki kia Sesu, “te Fakamoʼoni Agatonu.” (Apokalipesi 1:5; 3:14) Neʼe tonu te ʼui ʼaē ʼa Isaia 43:10 ki te hahaʼi ʼaē neʼe tuku kia nātou ke nātou fakafofoga te ʼAtua: “ ‘Ko koutou ko taku kau Fakamoʼoni,’ ko te ʼui ʼaia ʼa Sehova, ʼio ‘ko taku kaugana ʼaē kua ʼau fili.’ ”

Te Puleʼaga ʼo Te ʼAtua

Neʼe akoʼi e Sesu ki tana kau tisipulo ke nātou faikole fēnei, “Ke haʼu tou puleʼaga,” pea neʼe ina fai ke liliu te Puleʼaga ʼaia ko te kupu tāfito ʼo tana faiakonaki. (Mateo 6:10; Luka 4:43) Ko te kau Fakamoʼoni ʼa Sehova ʼe nātou tui ko te Puleʼaga ʼo Sehova, ʼe ko te puleʼaga moʼoni ʼe tuʼu ʼi te lagi, pea ʼe ina takitaki anai te kele, pea ko Sesu Kilisito ko tona Hau fakapulipuli. ʼE ʼui fēnei e te Tohi-Tapu: “Ko te pule fakaʼaliki ʼe hili anai ki tona fugaʼuma, ki te lahi ʼo te pule fakaʼaliki pea mo te tokalelei ʼe mole ʼi ai anai hona gataʼaga.”—Isaia 9:6, 7, Jérusalem.

Kae, ko Sesu Kilisito ʼe mole ko ia pe tokotahi ʼaē ka hau ʼi te Puleʼaga ʼo te ʼAtua. ʼE ʼi ai mo te kau takitaki ʼe hau anai mo ia ʼi te lagi. Neʼe tohi fēnei e te ʼapositolo ko Paulo, “Kapau ʼe tou haga faʼa kātaki, pea ʼe tou toe hau foki anai mo ia.” (2 Timoteo 2:12) ʼE fakahā mai e te Tohi-Tapu ko te ʼu hahaʼi ʼaē ʼe fakatuʼuake ke hau mo Kilisito ʼi selo ʼe faka tuʼakoi pe ki “te toko teau fāgofulu-ma-fā afe, ʼaē neʼe totogi mai te kele.”—Apokalipesi 14:1, 3.

ʼE mahino ia, ko he puleʼaga ʼe ʼaoga foki ke ʼi ai mo hona hahaʼi fakalogo, pea ko te kau Fakamoʼoni ʼa Sehova ʼe nātou tui, ko te lauʼi miliale hahaʼi ʼe lagolago ki te puleʼaga ʼaia ʼe nātou maʼu anai te maʼuli heʼegata. Pea ko te kele ʼaē ka liliu anai ko te palatiso, ʼe nofoʼi anai e te hahaʼi ʼe fakalogo ki te Puleʼaga ʼo te ʼAtua, ʼo nātou fakalogo fuli ki te pule faka hau ʼa Kilisito pea mo nātou ʼaē ʼe hau mo ia. Koia ko te kau Fakamoʼoni ʼa Sehova ʼe nātou tui ʼe mole pulihi anai te kele pea ʼe fakahoko katoa anai te fakapapau ʼaenī ʼa te Tohi-Tapu: “ ʼE maʼu anai te kele e te kau faitotonu, pea ʼe nātou nonofo anai ʼi ai ʼo talu ai.”—Pesalemo 37:29; 104:5.

Kae ʼe haʼu feafeaʼi anai te Puleʼaga ʼo te ʼAtua? ʼE hoko koa te faʼahi ʼaia ʼaki te fakalogo katoa ʼa te hahaʼi fuli ki te Puleʼaga ʼo te ʼAtua? Kailoa, ʼe fakahā mai e te Tohi-Tapu ko te haʼu ʼo te Puleʼaga ʼe ʼaoga anai ke gāue te ʼAtua totonu ki te ʼu faʼahiga meʼa ʼo te kele. ʼE ina ʼui fēnei: “Ko te ʼAtua ʼo te lagi ʼe ina fakatuʼu anai he puleʼaga ʼe mole pulihi anai. Pea ko te Puleʼaga ʼaia . . . ʼe ina laliki anai pea mo fakagata te ʼatu puleʼaga fuli ʼaia, pea ko ia totonu ʼe tuʼu anai ia ʼo aʼu ki he ʼu temi heʼegata.”—Taniela 2:44.

Ko ʼafea ʼaē ka haʼu ai anai te Puleʼaga ʼo te ʼAtua? ʼO mulimuli ki te ʼu lea faka polofeta ʼo te Tohi-Tapu ʼaē ʼe lolotoga hoko ʼi te temi nei, ʼe tui te kau Fakamoʼoni ʼa Sehova kua ōvi mai pe te haʼu ʼo te Puleʼaga. ʼE mātou fakaafe koutou, ke koutou tokagaʼi niʼihi lea ʼi te ʼu lea faka polofeta ʼaē ʼe nātou fakamatala te ʼu agaaga ʼo “te ʼu ʼaho fakamuli” ʼo te tuʼu ʼo te ʼu faʼahiga meʼa agakovi ʼaenī. ʼE fakamatala te ʼu agaaga ʼaia ia Mateo 24:3-14; Luka 21:7-13, 25-31; pea mo 2 Timoteo 3:1-5.

ʼI tamatou ‘ ʼofa ʼaē kia Sehova tomatou ʼAtua mo tomatou loto katoa, pea mo tomatou nefesi katoa, mo tomatou ʼatamai katoa, pea mo tomatou mālohi katoa, pea mo tamatou ʼofa ʼaē ki tomatou kāiga ohage pe ko tamatou ʼofa ʼaē kia mātou totonu,’ ʼe mole mātou mavetevete ʼi te faʼahi fakafenua, ʼi te lanu, pea mo te faʼahi faka sosiale. (Maleko 12:30, 31) ʼE mātou ʼiloa ʼuhi ko te ʼofa ʼaē ʼe fefakahāʼaki e tomatou ʼu tēhina Kilisitiano ʼi te ʼu fenua fuli. (Soane 13:35; 1 Soane 3:10-12) Koia ʼe mole mātou kau ai ki te ʼu meʼa faka politike ʼo te ʼu fenua ʼaia. ʼE mātou faiga ke mātou faʼifaʼitakiʼi te ʼu ʼuluaki tisipulo ʼa Sesu, ʼaē neʼe ina ʼui ʼo ʼuhiga mo nātou: “ ʼE mole nātou kau ʼi te malamanei, ohage pe ko ʼau ʼe mole ʼau kau ʼi te malamanei.” (Soane 17:16) ʼE mātou tui ko te mavae ʼaē mai te malamanei ko tona faka ʼuhiga ko te fakamamaʼo mai te aga heʼeʼaoga ʼaē kua māhani ki ai te hahaʼi, ʼo kau kiai mo te loi, te kaihaʼa, te folonikasio, te tono, te momoe pe ʼa he tagata mo he tahi tagata peʼe ko he ʼu fafine pe, te fakaʼaogaʼi kovi ʼo te toto, te tauhi tamapua, pea mo ʼihi faʼahiga meʼa ʼe tapuʼi e te Tohi-Tapu.—1 Kolonito 6:9-11; Efeso 5:3-5; Gaue 15:28, 29.

Ko Te ʼAmanaki Ki Te Ka Haʼu

ʼE tui te kau Fakamoʼoni ʼa Sehova ko totatou maʼuli ʼi te temi ʼaenī ʼe mole gata aipe. ʼE nātou tui neʼe fekauʼi mai e Sehova ia Kilisito ki te kele, ke ina liligi tona taʼataʼa ko he totogi, ke feala ai he hā ʼa te hahaʼi ʼe nātou agatonu ia muʼa ʼo te ʼAtua, pea ke nātou maʼu te maʼuli heʼegata ʼi he tuʼu foʼou. Ohage ko tona ʼui fēnei e he ʼapositolo ʼa Sesu: “Kua faka lākatonuʼi ia tatou ʼi te temi ʼaenī ʼaki tona taʼataʼa.” (Loma 5:9; Mateo 20:28) Ko te kau Fakamoʼoni ʼa Sehova ʼe nātou loto fakafetaʼi ʼaupito ki te ʼAtua pea mo tona ʼAlo, ʼo ʼuhiga mo te totogi ʼaenī ʼe ina faka fealagia ai te maʼuli ki he temi ka haʼu.

Ko te kau Fakamoʼoni ʼa Sehova ʼe nātou falala katoa ki he maʼuli ʼi he temi ka haʼu, ʼaki te fakatuʼuake ʼo te kau mate ʼi te takitaki ʼa te Puleʼaga ʼo te ʼAtua. ʼE nātou tui, ohage ko tona akoʼi mai e te Tohi-Tapu, ka mate he tahi pea ʼe pulinoa ʼosi ia, ʼo mole toe maʼuli ʼi he tahi potu, “ ʼi te ʼaho pe ʼaia ʼe puli ai tana ʼu fakakaukau.” (Pesalemo 146:3, 4; Esekiele 18:4; Tagata Tānaki 9:5) ʼIo, ki te kau mate ko te maʼuli ʼi te ka haʼu ʼe fakatafito ki tonatou manatuʼi ʼaē e te ʼAtua ʼaki tana fakatuʼuake nātou.—Soane 5:28, 29.

Kae, ko te kau Fakamoʼoni ʼa Sehova ʼe nātou tui ʼe kaugamālie te hahaʼi ʼe maʼuʼuli ʼi te temi ʼaenī ʼe nātou hāo anai mokā fakaʼauha e te Puleʼaga ʼo te ʼAtua te ʼu puleʼaga fuli, ohage pe ko Noe pea mo tona famili ʼaē neʼe hāo ʼi te Tulivio; pea ʼe nātou haga maʼuʼuli fiafia anai ʼo heʼegata ʼi he kele kua ʼosi fakamaʼa. (Mateo 24:36-39; 2 Petelo 3:5-7, 13) Kae ʼe mātou tui ko te hāofaki ʼaia ʼe fakalogo ki te fai ʼo te ʼu fakatuʼutuʼu ʼaē ʼe fakamaʼuaʼi mai e Sehova, ohage ko tona ʼui mai e te Tohi-Tapu: “ ʼE mole te malamanei . . . , ka ko ʼaē ʼe ina fai te finegalo ʼo te ʼAtua ʼe nofo maʼu ia ʼo talu ai.”—1 Soane 2:17; Pesalemo 37:11; Apokalipesi 7:9, 13-15; 21:1-5.

ʼIo, ʼe mole feala ke mātou fakahā ʼi henī te ʼu meʼa fuli ʼaē ʼe tui kiai te kau Fakamoʼoni ʼa Sehova, kae ʼe mātou fakaafe atu koutou ke lahi hakotou kumi he ʼu logo ʼo ʼuhiga mo nātou.

Gata pe mokā ʼe fakahā, ko te ʼu vaega ʼo te Tohi-Tapu neʼe toʼo mai te Les Saintes Écritures—Traduction du monde nouveau.

[Fakamatala ʼo te pasina 4]

Neʼe mātou toʼo te higoa ʼaē ko te kau Fakamoʼoni ʼa Sehova koteʼuhi heʼe mātou faʼifaʼitaki kia Sesu