Kāpite 5

ʼE Sio Ia Soane Kiā Sesu ʼi Tona Kolōlia

Te meʼa ʼaē neʼe hā 1​—Fakahā 1:10–3:22

Te manatu tāfito: ʼE ʼaʼahi e Sesu ia te Iselaele fakalaumālie ʼi te kele pea ʼe ina foaki age he ʼu tokoni fakaloto mālohi

Te temi ʼaē ʼe hoko ai: Te agaaga ʼo te ʼaho ʼaia ʼo te ʼAliki ʼe kamata mai te taʼu 1914 ʼo kaku ki te mate pea mo te fakatuʼuake ʼo te tuku muli ʼo te kau fakanofo

1. Neʼe hā feafeaʼi ia te ʼuluaki meʼa ʼaē neʼe hā, pea neʼe hinoʼi feafeaʼi e Soane ia te temi ʼaē ʼe fakahoko moʼoni ai te meʼa ʼaia neʼe hā?

KO TE meʼa ʼaē neʼe ʼuluaki hā ʼi te tohi ʼo te Fakahā ʼe kamata ʼaki te kāpite 1, ʼi te vaega 10. Ko te meʼa ʼaia neʼe hā, ohagē ko te tahi ʼatu ʼu meʼa ʼaē neʼe hā ʼi te Fakahā, ʼe kamata ʼaki he ʼu palalau neʼe logo kiai ia Soane peʼe ko he meʼa fakatalakitupua neʼe sio kiai. (Fakahā 1:10, 12; 4:1; 6:1) Ko te ʼuluaki meʼa ʼaia neʼe hā, neʼe fakahā ʼo mulimuli ki te ʼaluʼaga ʼi te ʼuluaki sēkulō, pea neʼe fakahā ai ia te ʼu logo ki te ʼu kōkelekāsio e fitu ʼi te temi ʼo Soane. Kae neʼe fakahā mai e Soane ia te temi ʼaē neʼe hoko tonu ai te meʼa ʼaia neʼe hā, ʼo ina ʼui fēnei: “ ʼAki te laumālie neʼe au ʼi te ʼaho ʼo te ʼAliki.” (Fakahā 1:10a) Ko ʼāfea koa ia te “ ʼaho” ʼaia? Ko te ʼu ʼaluʼaga fakamataku ʼo te ʼu temi maveuveu ʼaenī, ʼe ʼi ai koa honatou pikipikiga mo te ʼaho ʼaia? Kapau koia, pea ʼe tonu ke tou tōkakaga fakalelei ki te lea faka polofetā, heʼe fakalogo kiai totatou maʼuli pea mo totatou haofaki.​—1 Tesalonika 5:20, 21.

ʼI Te ʼAho ʼo Te ʼAliki

2. Ko te temi fea ʼaē ʼe kamata ai ia te ʼaho ʼo te ʼAliki, pea ko ʼāfea ʼaē kā fakaʼosi ai?

² Ko te temi fea ʼaē ʼe hinoʼi e te ʼaho ʼaia ʼo ʼuhiga mo te ikuʼaga ʼo te Fakahā? Koteā koa te ʼaho ʼo te ʼAliki? ʼE palalau kiai te ʼapositolo ko Paulo ʼo ina ʼui ʼe ko te temi ʼo te fai fakamāu pea mo te fakahoko ʼo te ʼu fakapapau fakaʼatua. (1 Kolonito 1:8; 2 Kolonito 1:14; Filipe 1:6, 10; 2:16) ʼAki te hoko mai ʼo te “ ʼaho” ʼaia, ʼe hoko māmālie pea mo iku lelei anai ia te ʼu fakatuʼutuʼu maʼuhiga ʼa te ʼAtua. Ko te “ ʼaho” ʼaia ʼe kamata ʼaki te fakanofo ʼo Sesu, ko te Hau ʼi te lagi. Māʼiapē lā peʼe kua ʼosi fakahoko e Sesu tana fakamāu ki te mālama ʼa Satana, kae ʼe toe hoko atu anai ia te ʼaho ʼo te ʼAliki, ʼaki te fakatuʼu ʼo te Palatiso pea mo te fakaliliu ʼo te mālamanei ki te maʼuli haohaoa, pea ʼi te fakaʼosi ʼe “fakatoʼo anai [e Sesu] te puleʼaga ki tona ʼAtua pea mo Tamai.”​—1 Kolonito 15:24-26; Fakahā 6:1, 2.

3. (a) E tokoni feafeaʼi mai ia te lea faka polofetā ʼa Taniela ʼo ʼuhiga mo “te ʼu temi e fitu” ke tou mahino pē neʼe kamata ʼanafea ia te ʼaho ʼo te ʼAliki? (b) Koteā te ʼu ʼaluʼaga ʼaē neʼe hoko ʼi te kele ʼe natou fakamoʼoni ai neʼe kamata te ʼaho ʼo te ʼAliki ʼi te taʼu 1914?

³ Ko te fakahoko ʼo ʼihi ʼatu ʼu lea faka polofetā ʼo te Tohi-Tapu ʼe tokoni mai kiā tātou ke tou mahino pe neʼe kamata ʼanafea ia te ʼaho ʼo te ʼAliki. Ohagē lā ko Taniela, neʼe ina fakamatala mai ia te pulihi ʼo te ʼuhiga pule ʼo te hōloga hau ʼo te Hau ko Tavite; hili anai kiai “temi e fitu” ʼe hoki ʼiloʼi anai “ko te Māʼoluga ʼe Pule ʼi te puleʼaga ʼo te tagata, pea ʼe ina foaki te puleʼaga kiā ia ʼaē ʼe ina loto ki ai.” (Taniela 4:23, 24, 31, 32) Ko te fakahoko tāfito ʼo te lea faka polofetā ʼaia neʼe kamata ʼaki te fakaʼauha ʼo te puleʼaga ʼo Suta, ʼaē ʼe fakamoʼoni mai ʼi te Tohi-Tapu neʼe hoko kātoa ʼi ʼOkotopeli ʼo te taʼu 607 ʼi muʼa ʼo totatou temi. Ko te Fakahā 12:6, 14 ʼe ina fakahā mai ko temi e 3 vaelua ko tona fakatatau ko ʼaho e 1 260; koia, ko temi e fitu (tuʼa lua ia te nūmelo ʼaia) ko tona fakatatau ko ʼaho e 2 520. Kapau ʼe tou lau ko “he ʼaho e tahi ʼe ko te taʼu kātoa” pea ko te loaloaga ʼaia ʼo te ʼu “temi e fitu” ʼe ko taʼu e 2 520. (Esekiele 4:6) Koia, ko Kilisito Sesu neʼe kamata tana pule ʼi te lagi ʼi te fakaʼosi ʼo te 1914. Ko te hoko ʼa te ʼuluaki tau faka mālamanei ʼi te taʼu ʼaia neʼe ko “te kamataʼaga ʼo te ʼu nunuʼa ʼo te tuʼania” ʼaē neʼe mole gata tanatou faka mamahiʼi ia te mālamanei. Talu mai te taʼu 1914, ko te ʼu ʼaluʼaga ʼaē neʼe maveuveu pea mo fakatupu ai te ʼu ligi toto ʼi te kele, neʼe natou fakamoʼoni ʼe ko te taʼu ʼaia ʼaē neʼe kamata ai ia te “ ʼaho” ʼo te ʼi te henī ʼa Sesu!​—Mateo 24:3-14.a

4. (a) Koteā ʼaē ʼe fakahā mai ʼi te ʼu folafola ʼa te Fakahā ʼo ʼuhiga mo te temi ʼaē kā hoko ai anai ia te ʼuluaki meʼa ʼaē neʼe hā? (b) Ko ʼāfea ʼaē ʼe fakaʼosi ai ia te hoko ʼo te ʼuluaki meʼa ʼaē neʼe hā?

⁴ Koia, ko te ʼuluaki meʼa ʼaē neʼe hā pea mo te tokoni ʼaē ʼe maʼu ai, ʼe faka ʼuhiga ia ki te ʼaho ʼo te ʼAliki, ʼaē neʼe kamata mai te taʼu 1914. ʼE fakamoʼoni kiai te ʼu kāpite ʼaē ʼe hoa mai ʼi te Fakahā, heʼe fakamatala ai te fakahoko ʼo te ʼu fakamāu moʼoni pea mo faitotonu ʼa te ʼAtua, ʼaē ʼe kau tāfito kiai te ʼAliki Sesu. (Fakahā 11:18; 16:15; 17:1; 19:2, 11) Kapau neʼe kamata fakahoko te ʼuluaki meʼa ʼaē neʼe hā ʼi te taʼu 1914, ko ʼāfea ʼaē kā fakaʼosi ai? Ohagē ko tona fakahā mai ʼi te ʼu logo, ko te kautahi ʼaē neʼe fakahā kiai, ʼe ko te kōkelekāsio ʼa te ʼAtua ʼaē ko te kau fakanofo ʼaē ʼe kei māʼuʼuli ʼi te kele. Koia, ʼe fakaʼosi anai te hoko ʼo te ʼuluaki meʼa ʼaē neʼe hā, mokā mate anai pea mo fakatuʼuake ki te maʼuli ʼaē ʼi te lagi, ia te fakanofo fakamuli pea mo agatonu. Kae ko te ʼAho ʼo te ʼAliki, mo te ʼu tapuakina ʼaē ʼe ina foaki ki te tahi ʼu ovi ʼo te kele, ʼe hoholo atu anai ʼo kaku ki te fakaʼosi ʼo Te ʼu Taʼu e Afe ʼo Te ʼAfio Hau ʼa Sesu Kilisito.​—Soane 10:16; Fakahā 20:4, 5.

5. (a) Koteā ʼaē neʼe kole age e te leʼo kiā Soane ke ina fai? (b) He koʼe neʼe lelei te tuʼulaga ʼo “te ʼu kōkelekāsio e fitu” ʼo ʼuhiga mo te feʼāveʼaki ʼo te takaiga tohi?

⁵ ʼI te ʼuluaki meʼa ʼaia neʼe hā, ʼi muʼa ʼo he sio ʼa Soane ki he meʼa, neʼe logo ia ki te ʼu palalau ʼaenī: “Pea neʼe au logo mai ʼoku tuʼa ki te leʼo mālohi ohagē ko te mālohi ʼo he puhi fakatagi, neʼe ina ʼui fēnei: ‘Ko te meʼa ʼaē ʼe ke sio kiai, tohi ʼi te takaiga tohi ʼo ʼave ki te ʼu kōkelekāsio e fitu, ki Efesi mo Simenia mo Pelekame mo Tiatile mo Sāte mo Filatelefia pea mo Laotisē.’ ” (Fakahā 1:10b, 11) Ohagē ko te tatagi mālohi ʼo he puhi fakatagi ohagē ko he fakatotonu, neʼe ʼi ai te leʼo neʼe ina kole age kiā Soane ke faitohi ki “te ʼu kōkelekāsio e fitu.” Neʼe foaki kiā te ia te ʼu tuʼuga logo pea neʼe tonu ke ina fakahā ia te ʼu meʼa ʼaē neʼe sio pea mo logo kiai. Kotou fakatokagaʼi, ko te ʼu kōkelekāsio ʼaē ʼe talanoa kiai ʼi henī neʼe kei tutuʼu ʼi te temi ʼo Soane. Neʼe natou tutuʼu fuli ʼi Asia Veliveli, ʼaē ʼe haga mai ki Patemosi. Neʼe faigafua takita feʼaluʼaki ʼi te ʼu kolo ʼaia, he neʼe ʼi ai te ʼu ala neʼe fakatokatoka lelei e te kau Loma. Neʼe mole faigataʼa ki he tagata ʼave logo, hana feʼāveʼaki te takaiga tohi mai he kōkelekāsio ki he tahi age kōkelekāsio. ʼE feala ke fakatatau te ʼu kōkelekāsio ʼaia e fitu ki he koga ʼo he silikō ʼa te kau Fakamoʼoni ʼa Sehova ʼo te temi ʼaenī.

6. (a) Neʼe koteā “te ʼu meʼa ʼaē [neʼe] hoko”? (b) He koʼe ʼe feala ke tou tui papau ko te ʼu meʼa ʼaē ʼe hoko ʼi te kōkelekāsio ʼo te kau Kilisitiano fakanofo iā ʼaho nei ʼe tatau mo te ʼu meʼa ʼaē neʼe hoko ʼi te temi ʼo Soane?

⁶ ʼE lahi te ʼu lea faka polofetā ʼi te Fakahā, neʼe tonu ke hoko ʼi te hili ʼo te temi ʼo Soane. ʼI te ʼu lea faka polofetā ʼaia, neʼe talanoa ai ʼo ʼuhiga mo “te ʼu meʼa ʼaē kā hoa mai anai ki te ʼu meʼa ʼaia.” Kae ko te tokoni ʼaē ki te ʼu kōkelekāsio e fitu ʼe ʼalutahi ia mo “te ʼu meʼa ʼaē [neʼe] hoko,” te ʼu ʼaluʼaga ʼaē neʼe hoko moʼoni ʼi te ʼu kōkelekāsio ʼaē e fitu ʼo te temi ʼaia. Ko te ʼu logo ʼaia neʼe ko he ʼu tokoni ʼaoga ki te kau tagata ʼāfea ʼaē neʼe hinoʼi ʼi te ʼu kōkelekāsio ʼaia e fitu, pea neʼe toe ʼaoga ki te ʼu kōkelekāsio fuli ʼo te kau Kilisitiano fakanofo ʼo te temi ʼaia.b Logopē lā ko te meʼa ʼaē neʼe hā, neʼe ʼuluaki hoko ʼi te ʼAho ʼo te ʼAliki, ko te meʼa ʼaē ʼe ʼui e Sesu ʼe ʼaoga ke tou fakatokagaʼi heʼe feala ke tou toe sisio ki te ʼu meʼa ʼaia ʼi te kōkelekāsio ʼo te ʼu Kilisitiano fakanofo ʼo totatou temi.​—Fakahā 1:10, 19.

7. Ko ai ʼaē neʼe sio ki ai Soane ʼi te ʼuluaki meʼa ʼaē neʼe hā, pea he koʼe ʼe maʼuhiga pea mo fakaloto fiafia kiā tātou iā ʼaho nei?

⁷ ʼI te ʼuluaki meʼa ʼaia neʼe hā, neʼe sio ia Soane ki te ʼAliki ko Sesu Kilisito ʼe gigila ʼi Tona kolōlia ʼi te lagi. ʼE tāu mo feʼauga te meʼa ʼaia neʼe hā, mo he tohi ʼe tou maʼu ai he ʼu lea faka polofetā ʼo ʼuhiga mo te ʼaho lahi ʼo te ʼAliki ʼaia neʼe fekauʼi mai te lagi. Pea ʼe toe maʼuhiga ʼaupitō age kiā tātou ʼaē ʼe tou lolotoga māʼuʼuli nei ʼi te temi ʼaia, pea mo tou mulimuli ki tana ʼu fakatotonu fuli. Tahi ʼaē meʼa, ʼe ko he meʼa fakaloto fiafia kiā nātou ʼaē ʼe natou lagolago ki te pule faʼitaliha ʼa Sehova, hanatou ʼiloʼi ko te Hako Faka Mēsia ʼaē neʼe ina kātakiʼi ia te ʼu ʼahiʼahi fuli pea mo te ʼu fakataga ʼaē neʼe fakatupu e Satana, pea mo tana mamahi ʼaē ʼi he mate fakamataku ʼi te temi ʼaē neʼe maumauʼi ai Tona “muli vaʼe” kua hili nei kiai ia taʼu e 2 000 tupu, ʼe kua maʼuli nei ʼi te lagi pea kua ina maʼu te pule kātoa moʼo fakaiku lelei ia te fakatuʼutuʼu lahi ʼa te ʼAtua!​—Senesi 3:15.

8. Ko te gāue fea ʼaē kua tokalelei ki ai Sesu ke ina fai?

⁸ ʼE mahino papau ia, kua tokalelei ia Sesu ki te fakahoko ʼo tana gāue ʼi tona ʼuhiga Hau. Neʼe fakanofo ia ke ina fakahoko te ʼu fakamāu fakaʼosi ʼa Sehova ki te tuʼu ʼaenī pea mo tona ʼatua agakovi ʼaē ko Satana. Pea kua toe tokalelei foki moʼo fakamāuʼi ia te kau fakanofo ʼo tana kōkelekāsio pea mo te toe hahaʼi tokolahi ʼaē kua gāue fakatahi mo nātou, ʼo toe feiā mo te mālamanei.​—Fakahā 7:4, 9; Gāue 17:31.

9. (a) E feafeaʼi te fakamatalatala mai e Soane ia Sesu ʼi tona kolōlia ʼi te lotolotoiga ʼo te ʼu tuʼulaga mālama ʼaulo? (b) Koteā ʼaē ʼe tou mahino ai ʼaki te teuteuʼi ohagē ko te fale lotu pea mo te kofu ʼaē ʼe kofuʼi e Sesu? (c) Koteā te faka ʼuhiga ʼo tona kiliʼi pipi ʼaulo?

⁹ Neʼe maliu ia Soane ki te potu ʼaē neʼe haʼu mai ai te leʼo pea koʼenī te meʼa ʼaē neʼe sio kiai: “Neʼe au maliu ke au sio ki te leʼo ʼaē neʼe palalau mo au, pea ʼi taku maliu atu, neʼe au sio ai ki te ʼu tuʼulaga mālama ʼaulo e fitu.” (Fakahā 1:12) Ki muli age, neʼe mahino ai leva ia Soane peʼe koteā ʼaē ʼe fakatātā e te ʼu tuʼulaga mālama ʼaulo ʼaia e fitu. Kae neʼe ina tokagaʼi tāfito ia ia ʼaē ʼe tuʼu ʼi te lotomālie ʼo te ʼu tuʼulaga mālama. Neʼe tuʼu “ ʼi te lotomālie ʼo te ʼu tuʼulaga mālama te tahi ʼe hagē ia ko he foha ʼo he tagata, neʼe teuteu ʼaki he kofu ʼe kaku ki ʼona vaʼe, pea neʼe nonoʼo tona fatafata ʼaki te kiliʼi pipi ʼaulo.” (Fakahā 1:13) Ohagē ko he tagata taulekaleka pea mo gigila, ko Sesu, te ‘foha ʼo te tagata,’ neʼe hā totonu kiā Soane ʼaē neʼe nofo ʼi te mataku. Neʼe ʼasi mai te gigila ʼo tona kolōlia ʼi te lotolotoiga ʼo te ʼu tuʼulaga mālama ʼaulo ʼaē neʼe mū. Ko te teuteuʼi ʼaia ohagē ko te fale lotu, neʼe mahino ai kiā Soane, ko Sesu ʼe lolotoga ʼafio ai ʼi tona ʼuhiga Pelepitelō Lahi ʼa Sehova, ʼaki te fealagia ʼaē ke fai fakamāu. (Hepeleo 4:14; 7:21-25) Ko tona kofu loa pea mo fakaofoofo, ʼe ʼalutahi pea mo tona tuʼulaga faka pelepitelō. Ohagē ko te ʼu pelepitelō lalahi Sutea ʼo te temi muʼa, ʼe ina nonoʼo te kiliʼi pipi ʼaulo ʼi tona fatafata, ʼi te faʼahi ʼaē ʼe tuʼu ai tona mafu. Ko tona faka ʼuhiga, ʼe ina fakahoko anai ʼaki he loto kātoa ia tana gāue ʼaē neʼe tuku age e Sehova ʼAtua.​—Ekesote 28:8, 30; Hepeleo 8:1, 2.

10. (a) Koteā ʼaē ʼe fakatātā e te ʼu fuluʼi ʼulu ʼo Sesu ʼaē neʼe hihina ohagē ko te nive pea mo tona ʼu mata ʼaē ʼe ʼuloʼi afi? (b) Koteā ʼaē ʼe fakatātā e te ʼu vaʼe ʼo Sesu ʼaē ʼe gigila ohagē ko he kapa?

¹⁰ Neʼe toe hoko atu te fakamatala ʼa Soane: “Ko tona ʼulu pea mo tona ʼu fuluʼi ʼulu neʼe hihina ia ohagē ko te hihina ʼo te fuluʼi ʼakeno, ohagē ko te nive, pea ko tona ʼu mata neʼe hagē ia ko he ʼuloʼi afi.” (Fakahā 1:14) Ko tona ʼu fuluʼi ʼulu neʼe hihina ia ohagē ko te nive, ʼe ina fakatātā tona poto ʼuhi ko te lahi ʼo tona ʼu taʼu maʼuli. (Vakaʼi ia Tāʼaga Lea 16:31.) Pea ko tona ʼu mata ʼe hagē he ʼuloʼi afi, ʼe ina fakatātā ia tana sio mamaʼo, mo tana loto tokaga mokā ina sivisivi, mo ʼahiʼahi pea mo tauteaʼi. ʼE toe fakatokagaʼi e Soane mo te ʼu vaʼe ʼo Sesu: “Pea ko tona ʼu vaʼe neʼe hagē ia he kapa ʼe maʼa mokā kakaha ʼi he gutuʼumu; pea ko tona leʼo neʼe hagē ia ko he gugulu ʼo he tuʼuga vai.” (Fakahā 1:15) ʼI te meʼa ʼaia neʼe hā, ko te ʼu vaʼe ʼo Sesu neʼe hagē ko he kapa ʼe kakaha pea mo gigila, pea ʼe tāu mo feʼauga moʼo fakatātā ki he tahi ʼe haʼele ʼaki he loto faʼafai iā muʼa ʼo te ʼafioʼaga ʼa Sehova ʼAtua. Tahi ʼaē, logolā ʼi te Tohi-Tapu ʼe ko he agamāhani te fakatātā ʼo te ʼu faʼahi fakaʼatua ki te ʼaulo, kae ʼi ʼihi temi ko te ʼu faʼahi ʼaē ʼe pipiki ki te tagata ʼe fakatātā ia ki te kapa.c Koia, ko te ʼu vaʼe ʼo Sesu ʼaē ʼe gigila ohagē ko he kapa, ʼe ina fakamanatuʼi mai kiā tātou neʼe “matalelei” ʼaupitō tona ʼu vaʼe ʼi tana feʼaluʼaki ʼi te kele ʼo faka mafola ia te logo lelei.​—Isaia 52:7; Loma 10:15.

11. (a) Koteā ʼaē ʼe ina fakamanatu mai kiā tātou ia te ʼu vaʼe faka kolōlia ʼo Sesu? (b) Koteā ʼaē neʼe hā mai ai ko te leʼo ʼo Sesu “neʼe hagē ia ko te gugulu ʼo he tuʼuga vai”?

¹¹ ʼE moʼoni, ko te tagata haohaoa ko Sesu, neʼe hā lelei tonā kolōlia ki te kau ʼāselo pea mo te tagata. (Soane 1:14) Ko tona ʼu vaʼe faka kolōlia ʼe natou fakamanatuʼi mai, ʼe haʼele ʼi te kele taputapu ʼo te kautahi ʼa Sehova, ʼaē ʼe Pelepitelō Lahi ai. (Vakaʼi mo Ekesote 3:5.) Tahi ʼaē, ʼe logo mālohi tona leʼo ohagē ko he mapeʼe ifo ʼo he ʼu toe tōʼaga vaitafe. ʼE fakaofoofo pea mo fakatupu manavasiʼi, pea ʼe tāu mo feʼauga kiā te ia ʼaē ʼe fakahigoaʼi ko te Folafola ʼa te ʼAtua, ʼaē neʼe haʼu “moʼo fakamāuʼi ʼo te kele kātoa ʼi te faitotonu.”​—Gāue 17:31; Soane 1:1.

12. Koteā ʼaē ʼe fakatātā e “te heletā loa ʼe māsila mo mata lua”?

¹² “Pea ʼi tona nima mataʼu neʼe ʼi ai te ʼu fetuʼu e fitu, pea neʼe haʼu mai tona gutu te heletā loa ʼe māsila mo mata lua, pea ko tona fofoga neʼe hagē ia ko te laʼā ʼi te temi ʼaē ʼe gigila mālohi ai. Pea ʼi taku sio ʼaē kiā te ia, neʼe au tō ifo ki ʼona vaʼe ohagē he mate.” (Fakahā 1:16, 17a) Ki muli mai, neʼe fakamahino e Sesu totonu ia te faka ʼuhiga ʼo te ʼu fetuʼu ʼaē e fitu. Kae kotou fakatokagaʼi peʼe koteā ʼaē ʼe haʼu mai tona gutu: “Te heletā loa ʼe māsila mo mata lua.” ʼE tāu mo feʼauga ia te meʼa fakatā ʼaia! He neʼe fakanofo ia Sesu moʼo fakahoko ia te fakamāu fakaʼosi ʼa Sehova ki Tona ʼu fili. Ko te ʼu fakamāu ʼaē ʼe haʼu mai tona gutu ʼe iku anai ki te fakaʼauha ʼo te kau agakovi fuli.​—Fakahā 19:13, 15.

13. (a) Koteā ʼaē ʼe fakamanatuʼi mai e te gigila ʼo te fofoga ʼo Sesu? (b) Koteā te meʼa ʼaē ʼe tou tokagaʼi tāfito ʼi te fakamatalatala ʼa Soane ʼo ʼuhiga pea mo Sesu?

¹³ Ko te gigila ʼo te fofoga ʼo Sesu, ʼe ina fakamanatuʼi mai kiā tātou te gigila ʼo te fofoga ʼo Moisese ʼi tana ʼosi fai palalau ʼaē mo Sehova ʼi te moʼuga ʼo Sinai. (Ekesote 34:29, 30) Tou toe manatuʼi foki, ko Sesu neʼe liliu ʼo gigila faka milakulo iā muʼa ʼo tana kau tisipulo ʼaē e toko tolu, kua hili kiai taʼu e 2 000, “neʼe gigila tona fofoga ohagē ko te laʼā, pea ko ʼona kofu tuʼa neʼe liliu ia ʼo gigila ohagē ko te mālama.” (Mateo 17:2) ʼI te lakaga ʼaenī, ʼi te meʼa ʼaē neʼe hā mai ai ia Sesu ʼi te lolotoga ʼo te ʼaho ʼo te ʼAliki, ʼe gigila tona fofoga ohagē ko te gigila ʼa he tahi neʼe tuʼu iā muʼa ʼo te ʼafioʼaga ʼo Sehova. (2 Kolonito 3:18) Kae ʼi te meʼa ʼaia neʼe hā kiā Soane, ʼe tou tokagaʼi tāfito te gigila ʼo tona kolōlia: te hihina ʼo tona ʼu fuluʼi ʼulu ohagē ia ko te nive, tona ʼu mata ohagē he ʼuloʼi afi, te gigila ʼo tona fofoga, mo te gigila ʼo tona ʼu vaʼe. Ko te meʼa fakaofoofo ʼaia neʼe hā ʼo ʼuhiga mo Ia ʼaē ʼe nofo nei “ ʼi he mālama ʼe mole kakusia.” (1 Timoteo 6:16) ʼI te moʼoni ʼo te meʼa ʼaia ʼaē neʼe hā, neʼe malave ʼaupitō ai kiā Soane, pea neʼe ʼui māʼana: “Pea ʼi taku sio ʼaē kiā te ia, neʼe au tō ifo ki ʼona vaʼe ohagē he mate.”​—Fakahā 1:17.

14. ʼE tonu ke malave feafeaʼi kiā tātou ia te fakamatala ʼa Soane ʼo ʼuhiga mo te hā ʼa Sesu ʼi tona kolōlia?

¹⁴ ʼI te temi nei, ko te fakamatalatala lelei pea mo fakaofoofo ʼo te meʼa ʼaē neʼe hā kiā Soane, ʼe ina fakafonu te loto ʼa te hahaʼi ʼa te ʼAtua ʼaki he loto fakafetaʼi. Kua hili atu nei kiai taʼu e 90 tupu ki te ʼaho ʼo te ʼAliki, ʼaē ʼe kei lolotoga ai te hoko fakaofoofo ʼo te meʼa ʼaē neʼe hā. Ko te pule ʼo te Puleʼaga ʼo Sesu ʼe ko he ʼaluʼaga moʼoni kiā tātou ʼi te temi nei, kae ʼe mole ko he ʼamanaki ki he temi kā haʼu. Koia, ʼe ʼaoga kiā tātou hahaʼi fakalogo agatonu ʼo te Puleʼaga ke tou sio mamaʼo ʼaki he manavasiʼi ki te meʼa ʼaē ʼe talanoa mai ki ai ia Soane ʼi te ʼuluaki meʼa ʼaē neʼe sio ki ai, pea ʼe tou talagafua anai ʼo fakalogo ki te ʼu palalau ʼa Sesu Kilisito ʼi tona kolōlia.

[Kiʼi nota]

[Paki ʼo te pasina 23]

Te ʼAlekeolosia: Ko te ʼu toega kolo ʼaē neʼe tuʼu ai ia te ʼu kōkelekāsio e fitu, ʼe natou fakamoʼoni mai ia te fakamatala ʼa te Tohi-Tapu. Neʼe ko te ʼu kolo ʼaia ʼaē neʼe foaki ai e Sesu ki te ʼu Kilisitiano ʼo te ʼuluaki sēkulō ia te ʼu folafola fakaloto mālohi ʼaē ʼe natou fakaloto mālohiʼi ʼi te temi nei ia te ʼu kōkelekāsio ʼaē ʼi te mālamanei kātoa

PELEKAME

SIMENIA

TIATILE

SĀTE

EFESI

FILATELEFIA

LAOTISĒ