Kapite 3
Ko takotou lotu e mauhiga aupito
1. Kotea te tonu a ihi kite lotu?
“KOTE U lotu fuli e lelei, ko tona tautau ui aia. Kote u faahiga ala kehekehe pe e alu pe kite mea e tahi.” Kapau e lelei ia fuli ete Atua, ko takotou filifili mole hoona mauhiga. Kae koia koa aia?
2. a) Kotea te faahiga aga ia ate kau Faliseo kia Sesu? b) Koai ia ae nee natou lau ko tanatou tamai?
2 Ite i malamanei a Sesu, kote kau Faliseo nee natou faka tuu tanatou faahiga tauhi o natou ui e lelei ia ete Atua. Ka nee, ko natou pe ae nee natou faigai ke matehi Sesu! Koia foki nee ina ui age ai kia natou: “E koutou fai, koutou, te u gaue a takotou tamai.” Kae tali e natou: “Ko tamatou Tamai pe e tahi, te Atua.”—Soane 8:41.
3. Kotea ae nee ui e Sesu o uhiga mote tamai ate kau Faliseo?
3 Ko tanatou Tamai mooni koa te Atua? Eina tali koa tana tou tauhi? Kailoa! Mooni pe, kote kau Faliseo e natou mau te Tohi-Tapu pea e natou ui e natou mulimuli kiai, ka nee natou tuku ke kakai natou ete Tevolo. Koia nee toe hoko atu ai e Sesu: “E koutou hau, koutou, mai takotou tamai, te Tevolo, pea e koutou fia fai te loto o takotou tamai. Nee kohe fakapo ia i tana kamata, pea nee mole haga nofo ia ite mooni, (. . .) e gutu loi ia pea e kote tamai ote loi.”—Soane 8:44.
4. Kotea te tonu ia a Sesu kite lotu ate kau Faliseo?
4 Kote lotu ate kau Faliseo nee hala ia. Nee tauhi ia kite u mea ia ae e aoga kite Tevolo. Kote tupuaga aia, o tona mole lelei ia, kae faka laka halai ia e Sesu. Nee ina ui kite kau Faliseo: “E koutou pupunu te puleaga o selo kite hahai; koteuhi e mole koutou hu koutou kiai, pea e ko natou ae e kamata hu kiai, e mole koutou faka fealagia ke natou hu kiai.” (Mateo 23:13). Nee lau e Sesu ko natou kote kau malualoi pea kote u gata kafo kona, o ina toe hoko atu ai ko natou aki tanatou aga kovi, e natou iku ai kite mate.—Mateo 23:25-33.
5. E fakaha feafeai mai e Sesu kote u lotu e mole kohe u ala pe e alu kihe kogamea e tahi?
5 Koia, nee mole ako ia e Sesu Kilisito kote u lotu kote u faahiga ala kehekehe e alu ia kite mauli. I tana Akonaki ite mouga, nee ina ui: “Koutou hu ite matapa fa veliveli; koteuhi e laulahi mo atea ia te ala e faka tau kite mate, pea e toko lahi ia natou e hu ai; kae fa veliveli ia te matapa pea mo lau veliveli ia te ala ae e faka tau kite mauli, pea e toko sii ia natou e natou mau.” (Mateo 7:13, 14). I tanatou mole atolasio kite Atua aki te aga ae e tonu ke fai, e toko lahi te hahai e mulimuli pe ite ala ote mate. Toko sii ia natou e nofo ite ala ote mauli.
6. Kotea e ako mai ete lotu a Iselaele?
6 Aki te aga ate Atua kite kau Iselaele e ha mai ai foki e tonu ke tou foaki kia teia te tauhi ae eina lelei ia. Nee ina akonakii foki ia natou ke natou faka mamao mai te lotu hala ate u fenua i onatou tafa (Teutalonome 7:25), aia e natou momoli anatou tamaliki ki onatou atua pea mo natou fai te u aga hee aoga, o hage kote manako pe ahe tagata kihe tahi tagata (Levitike 18:20-30). Nee faka totonu kia natou ete Atua ke natou litua kite u faahiga aga aia. I tanatou talagataa leva pea mo tanatou atolasio leva ki ihi atua, nee ina tautea ia natou (Sosue 24:20; Isaia 63:10). Ko tanatou lotu eiai foki tona mauhiga aupito.
TE LOTU HALA IA AHO NEI
7, 8. a) Kotea te faahiga aga ia nee fai ete lotu ite lolotoga ote u tau lalahi ote malamanei? b) Ki takotou tonu, kotea ape te manatu ia ate Atua o uhiga mote aga ate lotu ite lolotoga ote tau?
7 Kaea te u faahiga lotu kehekehe e fai ia aho nei? E koutou faka mooni pe kiai e lahi te u mea e fai aki o natou higoa e mole lelei ia ete Atua. Ite lolotoga ote u tau lalahi e lua o malamanei, ae e kei manatui ete u miliona hahai, nee faka loto malohii ete lotu ia te kau lotu ote u faahi lualua ke natou fe tamatei aki. “Koutou matehi te kau Siamani—koutou matehi foki ia natou!”, kote kalaga aia ate epikopo o Lonitoni, kae ui ia ete epikopo o Kolone kite kau Siamani: “E matou faka totonu atu, ite huafa ote Atua, ke koutou tau kite gataaga o tokotou toto moo te matagafua pea mote kololia ote fenua.”
8 Kote kau katolika pea mote kau polotesita nee natou fe fe tamatei feia foki aki te faka totonu o onatou pelepitelo. Kote pasitea ko Harry Emerson Fosdick nee ina faka mooni kiai o fenei: “O feia pe ki omatou loto ekelesia, nee matou lagai ai amatou u fuka. (. . .) Mai te gutu pe e tahi e hau ai te u vikiviki kite Aliki ote toka lelei pea mote u ekenaki kite tau.” I takotou tonu, kotea te manatu ia ate Atua o uhiga mohe lotu eina lau e faka logo ia kia teia, kae ina vikiviki ia te tau?
9. a) Kotea te mea e fai ete hahai tokolahi uhi pe kote u fakapo e fai e natou e kau ite u lotu? b) Ka faiga he lotu ke kau ite malama aeni, kotea leva te ui kiai?
9 E toko miliona te hahai nee maliu mai te Atua pea mo Kilisito uhi pe kote u fakapo nee fai aki ona huafa ete u lotu. E natou tuku te hala kite Atua o uhiga mote u tau faka lotu, ae nee faka feagai ai te kau katolika kite kau mahometa, pea mote u tau ate kau initia mote kau mahometa pea mote kau katolika kite kau polotesita. E natou faka manatu foki te matematehi ote kau Sutea, aki te huafa o Kilisito, pea mote fekai ate Inikisisio katolika. Koia, logope tanatou lau ko tanatou Tamai te Atua, kote u pule faka lotu ae nee tupu ai te u fakapo aia mole koa kohe u tamaliki ate Tevolo, o hage pe kote kau Faliseo ae nee faka laka halai e Kilisito? Kapau ko Satana kote atua ote malama aeni, e mole koa tonu ke tou amanaki eina toe pulei foki mote u lotu?—II Kolonito 4:4; Fakaha 12:9.
10. Koutou lau mai te u ihi faahiga mea e fai aki te higoa ote lotu pea e mole koutou lelei ia.
10 E mahino ia e koutou laka hala ia te u mea e lahi aupito tona fai aki te higoa ote lotu. E lagi e koutou iloi pe ni hahai e, logope tanatou mauli kovi, kae faka mauhiga ia i tonatou Ekelesia. E feala pe foki kohe u pule faka lotu. Ko ihi ia natou e natou faka mooni mai kote momoe ate tagata mohe tahi tagata pea mote u felavei i tua ote nofo ohoana e mole kovi. Kae koutou iloi koa kote Tohi-Tapu e mole ina ui feia? Ko toona totonu, nee tautea ete Atua aki te mate ia Iselaele he nee ina fai ia te u faahiga mea feia. Nee ina molehi ia Sotoma mo Komola uhi pe kote u aga feia (Suta 7). Kua ovi pe tana tautea anai te lotu hala ote temi nei. E faka tata ete Tohi-Tapu kihe fafine paumutu koteuhi ko tana feauaki mote u “hau ote kele.”—Fakaha 17:1, 2, 16.
TE TAUHI AE E LELEI IA ETE ATUA
11. Kotea te mea ae e feala ai ke lelei ia tatatou tauhi ete Atua?
11 Kapau e mole lelei ia ete Atua te atu lotu fuli, e tonu leva ke tou eke: “Kote tauhi koa aeni eau fai kite Atua eina lelei ia koa?” E feafeai tona iloi? A te Atua pe, kae mole ate tagata, tona faka mauii. Ke ina lelei ia, ko tatatou tauhi e tonu ke nofo ona aka ite Folafola faka atua ote mooni. E tonu ia ke tou mau te manatu ae ate tagata fai tohi-tapu ae ia nee ina ui: “Ke iloi e mooni te Atua, kae iloi e loi te tagata fuli pe.”—Loma 3:3, 4.
12. He koe e ui e Sesu e kovi ia ete Atua te tauhi ate kau Faliseo?
12 Nee mole kote tonu ia aia ate kau Faliseo. Nee mulimuli pe natou ki anatou u akonaki pea mo anatou talatuku kae tuku te Folafola ia ate Atua. Kotea tona u fua? Nee ui e Sesu kia natou: “Kua koutou faka alunoa te folafola ate Atua uhi pe ko takotou talatuku. Hahai malualoi! Nee lea tonu ai ia Isaia kia koutou, i tana ui aeni: ‘Kote hahai nei e faka apaapa mai pe kia teau aki o natou laugutu, kae ki onatou loto e mamao aupito ia ia teau. Kote maumau temi pe tanatou tauhi tuumau kia teau, koteuhi e natou ako te u akonaki kote u faka totonu faka tagata pe.’ ” (Mateo 15:1-9; Isaia 29:13). Kapau leva e tou loto ke lelei ina tatou ete Atua, pea e tonu ke tou vakai pee felogoi atatou u tui mote Tohi-Tapu.
13. I tona ui mai e Sesu, kotea ae e tonu ke fai ke lelei ia ete Atua?
13 E mole gata aki pe te lau e kita tui kia Kilisito kae fai ia e kita te mea ia ae e kita ui e lelei. E tonu aupito ke iloi pe kotea te finegalo ote Atua. Nee faka iloga mai e Sesu aki te u palalau aeni: “E mole ko natou ae e natou fenei mai kia teau: ‘Aliki, Aliki,’ ka natou hu anai kite puleaga o selo, ka ko ae eina fai te finegalo o taku Tamai i selo.”—Mateo 7:21.
14. He koe e feala anai ke higoa tatou e Sesu kote u “tagata e natou mea noai te lao,” logope pee tou fai anai ni “gaue lelei”?
14 Tatau aipe kite u gaue lelei e tou manatu ke tou fai aki te huafa o Kilisito e mole hoona kii uhiga e tahi mo kapau mole tou fai te finegalo faka atua. E tou hage ai leva ko natou ae nee toe ui e Sesu kiai: “Tokolahi e natou ui mai anai kia teau ite aho-aia: ‘Aliki, Aliki, nee mole koala matou lea faka kikite aki tou huafa, pea mo kapu te u temonio aki tou huafa, pea mo fai te u mea manamana o lahi aupito aki tou huafa?’ Kae kia natou e hoki au fakaha age ai leva: Nee heeki au iloi au koutou! Koutou faka mamao atu ia teau, ia koutou e aga hage ni tagata e natou mea noai te lao.” (Mateo 7:22, 23). Koia, e feala ke tou fai he mea e tou ui e lelei, pea e feala ai foki ke vikiviki ia mo faka malo kia tatou ni ihi uhi kote mea aia, kae kapau mole tou fai te mea ae e lelei o hage kote loto ote Atua, pea e sioi ai anai tatou e Sesu o hage ni “tagata e natou mea noai te lao.”
15. He koe e faka potopoto ia ke tou faifaitaki kite kau Pelea?
15 Kapau e toko lahi te u lotu e mole natou fai te finegalo ote Atua, e mole gata aki pe takita ui kote u akonaki o takita lotu e alu tahi mote folafola ate Atua. Ite faka aoga ehe lotu te Tohi-Tapu e mole leva faka mooni ai ko ana akonaki mo ana aga mahani e faka tafito kiai. E mauhiga ia ke vakai tonu e kita pee kotea tona faka alu ote potu aia. Ko ihi hahai o Pelea nee vikiviki natou i tanatou vakai ite Tohi-Tapu pe ko Paulo, ae nee hoki osi ifo tana akonaki kia natou te Folafola, pe nee ina tala tonu age kia natou te mooni (Gaue 17:10, 11). Kote lotu ae e lelei ia ete Atua e tonu ia ke alu tahi ite mea fuli pe mote Tohi-Tapu; e mole tonu keina faka aoga ni ihi koga kae ina siaki ni ihi potu.—II Timoteo 3:16.
KOTE FAKA MALOTOLOTO E MOLE FEAUGA
16. Kotea ae nee ui e Sesu e ha mai ai e mole feauga te faka malotoloto ke lelei ia he tahi ete Atua?
16 “Kae, toe ui anai, kapau e faka malotoloto he tahi i tana u tui, e mole lelei ia anai koa ete Atua, logope pee hala tana lotu? Nee ui lelei mai e Sesu eina siaki anai te “hahai ae e natou mea noai te lao,” logope tanatou ui e natou fai te mea ae e tonu (Mateo 7:22, 23). Kote faka malotoloto atea pe e mole foki feauga ia ke lelei ia ai kita ete Atua. Kohe aho, nee ui ai e Sesu ki ana tisipulo: “E hau te hola ae ka haga anai he tahi o faka pogi koutou o ina ui anai ia kua tauhi ia kite Atua aki he gaue tapu.” (Soane 16:2). Ko natou ae nee natou faka pogi ni kilisitiano nee lagi natou ui faka malotoloto pe e natou tauhi te Atua, kae nee nofo natou ite faihala. Nee mole lelei ia ia ete Atua anatou gaue.
17. Kotea ae nee fai faka malotoloto e Paulo ia mua o tana liliu o kilisitiano?
17 Ia mua o tana liliu o kilisitiano, nee kau te apositolo ko Paulo ite faka pogi o Etieni pea nee toe faiga foki keina faka pogi mo niihi age tisipulo (Gaue 8:1; 9:1, 2). Nee ina faka mahino fenei: “Nee au faka tagai alukehe age te kokelekasio ate Atua pea mo maumaui ia, pea (. . .) nee au fai eau te u mea lalahi ite lotu faka-sutea o lahi ake ia ite tokolahi o toku tai tagata mo toku lanu, koteuhi nee au faka malotoloto au kite u talatuku o aku kui.” (Kalate 1:13, 14). Kote faka malotoloto a Paulo nee mole lava ia ke puli ai te kovi o tana lotu.
18. a) Nee kotea te lotu a Paulo lolotoga tana faka tagai te kau kilisitiano? b) Kotea te tupuaga ote fetogi lotu a Paulo pea mo ihi?
18 Ko Paulo nee tauhi ia kite lotu faka-sutea ae nee ina siaki ia Sesu pea nee liaki leva ia ete Atua (Gaue 2:36, 40; Taagalea 14:12). Ke lelei ina ia ete Atua, nee ina haga ai leva o fetogi tana lotu. Nee toe fai tohi foki o uhiga mote kau Sutea ae e tauhi “faka malotoloto kite Atua,” ae e faka malotoloto, ka mole lelei ina ete Atua, koteuhi ko tanatou lotu e mole takoto ia kite malama totonu ote u faka tuutuu faka atua.—Loma 10:2, 3.
19. Kotea ae e ha mai ai kote mooni e mole ina tali te u akonaki faka lotu ae e fe faka tau aki?
19 Kote atu akonaki faka lotu fuli pe e mole feala ia ke mooni. Ko mea e lua kohe tahi: pee kote hahai eiai honatou laumalie e mauli pe ia ite kua osi ote mate ote sino, pee mole iai; pee kote kele e tuu ia o heegata, pee puli anai ia; pee haga anai te Atua o pulihi te aga kovi, pee ina tuku ai pe ia. Ka fe faka tau aki ni faahiga tui e lua, e maua ia kohe tahi ia naua e hala. Ko hata tui faka malotoloto kihe mea pea mo kita fai kiai e mole feala ai ia ke mooni mo kapau e hala ia.
20. O uhiga mote lotu, e feafeai hata mulimuli kite “mape lelei ote u ala”?
20 Kotea te faahiga mea e tonu ke koutou fai mo kapau e fakaha atu ko akotou tui e hala? O hagela e koutou olo ihe motoka kihe kogamea nee heeki koutou olo kiai. E iai takotou mape kite u ala, ka nee heeki koutou vakai. O faka hinohino atu leva ehe tahi te ala pea koutou manatu leva e feala ke koutou falala kiai. Fokifa foki la ia nee faihala ia. Kotea anai he mea ka koutou fai mo kapau e fakaha atu i takotou mape e mole kote ala totonu aia? Kote mole fia to ki lalo pee kote faka kinau ae ka mole koutou tali ai anai ke lau nee koutou fai hala? Kapau leva e koutou iloi, aki te Tohi-Tapu, ko takotou lotu e mole lelei, koutou teuteu o fetogi. Koutou mavae mai te ala-lahi ote mate pea koutou alu ite ala fa veliveli ote mauli.
E TONU KE FAI TE FINEGALO OTE ATUA
21. a) Ite kua iloi ote mooni, kotea ia ae e aoga? b) Kotea nai te mea ka koutou fai mo kapau e koutou iloi kote Atua e mole ina lelei ia akotou ihi gaue?
21 E mauhiga te iloi ote u mooni faka tohi-tapu; kae, kote malama aia e noa mo kapau e mole koutou atolasio kite Atua ite mooni (Soane 4:24). E mauhiga te mea aeni: fai te mooni pea mo fai te finegalo ote Atua. “Kote tui kae mole iai he u gaue e mate ia,” ko tona ui aia ete Tohi-Tapu (Sake 2:26). Ke lelei ina ete Atua, ko takotou lotu e mole tonu pe ke alu tahi fuli mote Tohi-Tapu, kae tonu foki keina taki tokotou mauli. Kapau leva e koutou iloi ko akotou gaue e kovi ia ete Atua, e feala anai ke koutou fetogi?
22. Kotea te u lelei e feala ke tou mau nei pea ite temi ki amuli mo kapau e tou fai te lotu mooni?
22 Kapau e koutou fai te finegalo ote Atua, e koutou mau ai anai te u lelei neinei pea mohe temi ka hau. Kote fai ote tauhi mooni eina faka liliu ai anai koutou o agalelei. Eina faka tuputupu ia koutou te u lelei o kotou makehe ai ite hahai fuli pe, hee koutou fai anai te mea ae e lelei. Pea eiai mo ihi tapuakina e kotou amanaki kiai: te fimalie, he mauli haohaoa pea mote mauli heegata ite palatiso ae nee faka papau mai kiai te Atua (II Petelo 3:13). Mole he toe mahalohalo ia, ko takotou lotu eiai tona mauhiga aupito!
[Paki ʼo te pasina 25]
Kote u pule faka lotu ae nee natou faigai ke matehi Sesu e natou tauhi koa kite Atua?
[Paki ʼo te pasina 27]
I tona ui mai e Sesu, e tokolahi te hahai e olo ite ala ote mate. Kae toko sii pe natou e mulimuli ite ala fa veliveli ote mauli
[Paki ʼo te pasina 29]
Tanatou u palalau
[Paki ʼo te pasina 29]
Tanatou u gaue
[Paki ʼo te pasina 29]
“E natou lau ia mua ote hahai e natou iloi te Atua, kae natou litua kiai aki anatou gaue.”—Tito 1:16.
[Paki ʼo te pasina 30]
Ko Paulo, nee sio tonu ite matehi o Etieni, nee tuki makai uhi pe kote mole felogoi ite u mea faka lotu
[Paki ʼo te pasina 33]
Kapau e koutou alu ite ala ae e hala, kote mole fia to ki lalo pee kote faka kinau ae ka mole koutou tali ai anai ke lau nee koutou fai hala?