Kapite 21

Te Aho ote Fakamau pea mote mea ka hoko ai

1. E feafeai te sio mahani ate hahai kite Aho ote Fakamau?

KOTEA kia koutou te Aho ote Fakamau? Ko ihi e natou manatu kihe foi faka atu atu loaloaga ote hahai ae nee toe faka tuuake i mua ohe toe hekaaga faka hau. Pea kote tagata fulipe e hau ki mua ote hekaaga faka hau aia e fakamaui ki tana u aga ae nee ina fai i mua o tona mate ae ia e tohi ite tohi ate Tuifakamau. Pea mulimulipe kite mea ae nee ina fai e ave ia ki selo pee kihe ifeli kakaha.

2. a) Koai ae nee ina faka totonu te Aho ote Fakamau aia? b) Koai ae nee ina fakanofo ke tuifakamau?

² Kae kote Tohi-Tapu eina tuku mai ia te faka mahino kehe ote Aho ote Fakamau. E mole kohe aho faka mataku. Koutou faka tokagai te mea ae e ui kite Atua: “Nee ina faka totonu te aho keina fakamaui ai te kele katoa ite fai totonu aki ia te tagata ae nee ina faka nofo.” (Gaue 17:31). Kote tuifakamau aia ae nee faka nofo ete Atua ko Sesu Kilisito.

3. a) He koe e tou iloi papau ko Kilisito e fai faka tatau anai tana fai fakamau? b) E fai anai kite a te fakamaui ote hahai?

³ Ke tou iloi papau ko Sesu eina fakamaui anai te hahai aki te faka tatau pea mote fai totonu. Koia e faka mooni kiai te palalau faka polofeta o uhiga mo ia e tuu ia Isaia 11:3, 4. E mole ina fakamaui anai te hahai o hage kote manatu ate tokolahi ki anatou u agahala ae nee fai i mua o tonatou mate, ae nee fai e ihi i tanatou kei fakapouli. E faka mahino mai ete Tohi-Tapu, i tona mate, kote tagata kua mavete tana u agahala. Eina ui fenei: “Ko ae kua mate e kua mavete tana agahala.” (Loma 6:7). Ko tona faka uhiga ko ia ae ka toe faka tuuake e fakamaui anai ki tana gaue ae ka ina fai ite lolotoga ote Aho ote Fakamau, kae mole ki tana gaue ae i mua o tona mate.

4. a) E fualoa feafeai anai te Aho ote Fakamau? b) Koai ia natou ae ka fakatahi anai mo Kilisito kite fai fakamau?

⁴ Kote Aho ote Fakamau e mole kohe aho e 24 hola. E faka mahino lelei mai ete Tohi-Tapu te potu aia i tana palalau kia natou ae ka fakatahi anai kia Kilisito kite fai fakamau (I Kolonito 6:1-3). E ui fenei ete Tohi-Tapu: “Nee au sio kite u hekaaga faka hau, pea nee iai mo natou ae nee heheka kiai, pea nee tuku te fakamau kia natou.” Kote u tuifakamau aia kote u tisipulo fakanofo “ae nee omai kite mauli pea mo natou afio fakahau mo Kilisito lolotoga tau e afe”. Kote Aho ote Fakamau e tau afe anai tona fualoa. Kote tau afe pe aia ae ka hau ai anai Kilisito pea mo tana toko 144 000 tisipulo fakanofo i tonatou uhiga ae kote u “lagi foou” kite “kele foou”.—Fakaha 20:4, 6; II Petelo 3:13.

5, 6. a) E feafeai te faka matalatala ete Pesalemo te “Aho ote Fakamau”? b) E feafeai anai te mauli ite Aho ote Fakamau?

⁵ Koutou faka sisio mua kite u paaki aena, e natou fakaha mai te uhiga anai ote Aho ote Fakamau kite tagata. E ui fenei ete pesalemo: “Ke fiafia te vao, mote mea katoape eiai! Pea ke kalaga faka fiafia fakatahi te u akau katoape ote vao matua ia mua o Sehova! He kua haele mai; he kua haele mai keina fakamaui te kele. Eina fakamaui anai te kele mauli aki te faitotonu pea mote u fenua aki tana agatonu.” — Pesalemo 96:12, 13.

⁶ Ite Aho ote Fakamau, kote hahai ae nee natou hao o mauuli i Halamaketone e natou faka liliu anai te kele kohe palatiso ke natou tali ai te hahai ae ka toe faka tuuake (Luka 23:43). Kohe fiafia lahi anai kite u famili ae nee mavete ite mate tanatou toe faka tahitahi! E kohe mea lave lelei anai ia te mauli ite tokalelei, te mau ohe mauli haohaoa pea mote ako kite iloi ote u faka tuutuu ate Atua! E ui ete Tohi-Tapu: “Ka hoko anai tau u fakamau kite kele, e kote faitotonu ae ka ako mooni anai ete u hahai ote kele mauli.” (Isaia 26:9). Ite Aho ote Fakamau, kote hahai fuli e natou ako anai ke natou iloi Sehova, ke natou faka logo kiai pea mo tauhi kia teia.

7. Ite Aho ote Fakamau, kotea ae ka hoko anai kia natou e fia tauhi kite Atua,pea mo natou e faka fisi kiai?

⁷ Kote palatiso feia ae ka fai ai anai te fakamaui ote tagata e Sesu Kilisito mo tana toko 144 000 hau ae e fakatahi mo ia. Ko natou ae ka natou filifili anai te tauhi kia Sehova e natou mau anai te mauli heegata. Kae logope te u lelei mauhiga ote mauli aia, eiaipe te u hahai e natou fakafisi anai kite tauhi kite Atua, o hage ko tona tala ete Tohi-Tapu: “Tatau aipe pee fakaha te ofa kite tagata agakovi, e molepe ina ako anai ia te faitotonu. Ite fenua ote agatonu eina faipe anai ia te mea ae e hala.” (Isaia 26:10). Koia, ite hili ote temi feauga mo faigamalie ae nee tonu ke fetogi ai anatou aga pea mo ako te fai totonu, kote u tai hahai agakovi aia e matehi anai. Ko ihi e matehi pe ia i mua ote osi ote Aho ote Fakamau (Isaia 65:20). E mole tuku anai ia natou aia ke mauuli o faka kovii te palatiso.

8. Nee feafeai te aga ate hahai o Sotoma?

⁸ E kohe manuia lahi anai ia he toe fakatuuake o kita ite kele ite lolotoga ote aho ote fakamau lahi a Sehova. Kae fakaha ete Tohi-Tapu e mole kote hahai fuli ka natou mau anai te manuia aia. Tou sivisivi mua te faka tata aeni kite hahai o Sotoma afea. E ui ete Tohi-Tapu kote hahai o Sotoma afea nee natou faiga ke natou momoe mote “u tagata” ae nee olo o faka siosio kia Lote. Ko tanatou aga nee fakalialia aupito he nee logope te tai faka milakulo o natou ke kikivi, “nee natou vaivai aipe ite kumi ote matapa” ote fale ke natou momoe mote u tagata ae nee olo o faka siosio kia Lote.​—Senesi 19:​4-11.

9, 10. Kotea ae e fakaha ete Tohi-Tapu o uhiga mote amanaki kite toe fakatuuake ote hahai agakovi o Sotoma?

⁹ E toe fakatuuake anai koa ite aho ote fakamau te tai hahai agakovi faka malotoloto aia? I tona fakaha ete Tohi-Tapu e iloga mai ia e mole toe fakatuuake anai ia natou. Kote tahi ite u tisipulo a Sesu ko Suta, nee uluaki talanoa mua ia kite kau aselo ae nee natou liaki tonatou nofoaga i selo ke feala ai hanatou omai o momoe mote u ofafine ote tagata. Pea ina toe ui fenei: “O hage foki ko Sotoma mo Komola pea mote u kolo iona tafaaki, itanatou osi fai o hagepe ko natou ae, iate folonikasio o faka valevale aupito pea mo mulimuli kite kakano o fai aki he mea heeaoga, kua faka tuu mai kia tatou kohe faifaitaki aga moo faka tokaga, i tanatou tali te tautea faitotonu ote afi heegata!” (Suta 6, 7; Senesi 6:​1, 2) Io, uhipe kote faka lialia aupito o tanatou aga, kote hahai o Sotoma pea mote u kolo itona u tafaaki nee natou tali te auha, e iloga mai ai ia e mole anai toe fakatuuake ai ia natou. II Petelo 2:​4-6, 9, 10a.

¹⁰ Nee toe fakaha foki e Sesu kote hahai o Sotoma e feala ke mole toe fakatuuake natou. I tana talanoa ki Kapenaume, te tahi ote u kolo ae nee ina fai ai te u milakulo, nee ina ui fenei: “Kana nee faila i Sotoma te u gaue faka malohi aeni nee hoko i okoe, kanaaula e kei tuupe nei o kaku mai kite aho nei. Koia eau tala atu kia koutou, ite Aho ote Fakamau, e faigafua anai kite fenua o Sotoma tona tali ia koe”. (Mateo 11:​22-24). Iheni, e faka iloga mai e Sesu te hala ae ate hahai o Kapenaume i tana ui ae e faigafua anai kite hahai o Sotoma tona tali, hee kite atamai ote hahai Iselaele ae enatou fakalogo Sesu, e mole toe iai he toe fakatuuake ote hahai o Sotoma ite aho ote Fakamau.

11. He koe e faigafua ia te fai ote u mea ae e totonu kite hahai “agatonu” ihe tahi age ia ote hahai “heeagatonu” ite Aho ote Fakamau?

¹¹ E mahino papau ia, e tonu ke kita faigai faka malotoloto tokita mauli ke feala ai ha kita kau kihe toe fakatuuake. Kae fealape ke kita fai te fehui aeni: E faigataa ape anai ki ihi mate ae ka toe fakatuuake te ako ote faitotonu i ihi age ? Koutou faka kaukau lelei: I mua ote mamate ote u “hahai agatonu” o hage ko Apalahamo, Isaake, Sopo, Tepola, Luti pea mo Taniela, nee natou talitali fuli kite Hau ate Mesia. I fiafia leva kanatou mau ite aho ote Fakamau i tonatou ako te iloi oia pea mo tanatou kua iloi ae kua afio ite lagi! E faigafua leva anai kite u “hahai agatonu” aia te taupau ote faitotonu ihe tahi age ote u “hahai heeagatonu” ae ka toe fakatuu ake.​—Gaue 24:15.

KOTE U FAKA TUUAKE KITE “MAULI” PE KITE “FAKAMAU”

12. I tona tuu ae ia Soane 5:28-30, koai ae ka kau anai kite “tuuake kite mauli”, pea koai ae ka kau anai kite “tuuake kite fakamau”?

¹² Nee ui e Sesu: “Ko natou fuli e ite loto faitoka e natou logo anai ki tona leo pea natou hu mai anai ki tua, ko natou ae nee natou fai te u mea lelei, kote tuuake kite mauli, ko natou ae nee natou fai te u mea ae e kovi, kote tuuake kite fakamau. (. . .) Eau fakamaui o faipe kite mea eau logo kiai; pea kote fakamau ae eau foaki e totonu, koteuhi, e mole au kumi toku finegalo, kae kote finegalo o ae nee ina fekaui mai au.” (Soane 5:28-30). Kotea iate “tuuake kite mauli” pea mote “tuuake kite fakamau”? Pea koai ae e hoko kiai?

13. Kotea te faka uhiga ote kau kite “tuuake kite mauli”?

¹³ O hage kote mea kua osi tou vakai, kote kau tuuake e mole fakamaui anai natou ki anatou u gaue kua hili, kae kite u mea ae ka natou fai anai ite Aho ote Fakamau. Koia, kite palalau ae a Sesu o uhiga mo “natou ae nee gaue lelei” pea mo “natou ae nee gaue kovi”, e talanoa ia kite u gaue lelei pea mote u gaue kovi ae ka fai ite lolotoga ote Aho ote Fakamau. I tanatou fai anai te mea ae lelei, tokolahi ote kau tuuake e natou alu mamalie anai kite mauli haohaoa ae ka natou mau anai ite hili ote u tau e afe. Koia, ko tanatou toe liliu kite mauli kote “tuuake kite mauli”, koteuhi kua natou au kite mauli haohaoa mo heeagahala.

14. Kotea te faka uhiga ote kau kite “tuuake kite fakamau”?

¹⁴ Kae feafeai anai ia natou ae “nee natou fai te u gaue kovi” lolotoga te Aho ote Fakamau? Ko tanatou toe liliu kite mauli kote “tuuake kite fakamau”. Kotea tona faka uhiga? Kote tautea kite mate. Koia, e matehi anai natou ite lolotoga pee ite hili ote Aho ote Fakamau. Ko tona tupuaga nee natou fai te u mea ae e kovi; nee natou fakafisi malohi kite ako pea mote fai ote u mea ae e totonu.

E KAMATA AFEA TE AHO OTE FAKAMAU?

15. Kotea ae e maua ke uluaki hoko ite Aho ote Fakamau?

¹⁵ Kote apositolo ko Soane nee faka mamata ia kite mea ae ka hoko ite Aho ote Fakamau. “Nee au sio kite hekaaga fakahau e hina pea lahi pea moia ae e heka ai. Pea i mua oia nee feholaki mai ai te lagi pea mote kele. (. . .) Pea nee au sio kite u mate, te hahai lalahi mote hahai liliki, e tutuu i mua ote hekaaga faka hau. (. . .) Pea kote u mate nee fakamaui.” (Fakaha 20:11, 12). Koia, i mua ote kamata ote Aho ote Fakamau, kote u faahiga mea ote tuu aeni ae e fau aki te ‘lagi pea mote kele’ e maua ke pulihi. Kote kau kaugana ateape ate Atua e mauuli anai; kote hahai agakovi fuli e matehi anai natou i Halamaketone.—I Soane 2:17.

16. a) Koai ni ihiage ka fakamaui anai mote “u mate” ite lolotoga ote Aho ote Fakamau? b) E fakamaui anai natou kite a?

¹⁶ Ko natou ae ka fakamaui anai ite lolotoga ote Aho ote Fakamau: kote u mate ae nee fakatuuake, te hahai “mauli” ae nee natou hao i Halamaketone mote u fanau a natou ae ka tutupu anai (II Timoteo 4:1). O feafeai anai tonatou fakamaui ? E ui e Soane: “Kote u takatakaiga tohi nee folahi. (. . .) Pea kote u mate nee fakamaui aki te u mea ae e tohi ite u takataiga tohi, o mulimulipe ki anatou u gaue. Pea kote tai nee ina liufaki te u mate ae nee iaia, pea kote mate mote Hadès nee na liufaki te u mate ae nee ia naua, pea nee fakamaui natou taki tokotahi o mulimulipe ki tanatou u gaue.”—Fakaha 20:12, 13.

17. Kotea te u “takatakaiga tohi” ae ka faka maui anai kiai te hahai “mauli” mote hahai “mate”?

¹⁷ Kotea te u “takatakaiga tohi” aia e fakamaui kiai “te hahai mate” mote “hahai mauli”? E mahino papau ia kote u tohi e faka tahii anai kite Tohi-Tapu. Kote u tohi aia e tuu ai te u lao mote u faka hinohino a Sehova. I tona lau, kote tagata fulipe eina iloi ai anai te finegalo faka atua. Pea e faka maui ai leva te tagata takitokotahi o mulimulipe kite u lao ote u “takatakaiga tohi” aia. Ko natou ae ka faka logo anai kite u faka totonu aia e natou mau anai te u tapuakina ote sakilifisio a Sesu pea e natou au anai kite haohaoa ote tagata.

18. a) Kote mauli feafeai ae ite osi ote Aho ote Fakamau? b) E omai feafeai te kau “mate” kite mauli ite osi ote u tau ae e afe?

¹⁸ Ite hili ote Aho ae e tau e afe ote Fakamau, e mole toe iai anai he tagata e toe mate ite mate ae nee tupu mai te agahala a Atama. E tahi hoko mooni ai leva te tagata kite mauli, o hage ko tona tala ete Tohi-Tapu: “Kote toe ote kau mate [ia natou ae e mole kau kite toko 144 000 ae e olo ki selo] nee mole natou omai kite mauli o au kite hoki osi ote u tau ae e afe.” (Fakaha 20:5). Kote palalau ae ko “te toe ote kau mate” e mole faka uhiga ia kihe tahi u hahai ka toe faka tuuake anai ite hili ote Aho ote Fakamau ae e tau e afe, kae kote hahai fuli e natou omai anai kite mauli mai tona uhiga ae ko tanatou hoki au anai e kite haohaoa ae nee mau e Atama mo Eva. Pea kotea leva e hoko ai?

TE MEA AE E MULI MAI ITE AHO OTE FAKAMAU

19. Kotea ae ka fai anai e Kilisito ite osi ote Aho ote Fakamau?

¹⁹ Ite kua lava lelei ote gaue ae nee tuku age kiai ete Atua, ko Sesu Kilisito “eina faka too leva anai te puleaga ki tona Atua mo Tamai”. E hoko anai te potu aia ite hili ote temi fai fakamau ote tau ae e afe. Ite temi leva aia, kote u fili katoa kua pulihi. Kote fakamuli o natou, kote mate faka atama, e maumaui anai. Pea e liliu ai leva te Puleaga kote api o Sehova, o koiape anai tokotahi tona Hau.—I Kolonito 15:24-28.

20. a) E vakaifeafeai e Sehova pe koai ae e tonu ke tohi ite “tohi ote mauli”? b) He koe e lelei ke fai he ahiahi faka osi kite malamanei?

²⁰ Kotea te mea ae ka faka aoga anai e Sehova ke iloi ai pe koai ae e tonu ke tuu “ite takaiga tohi ote mauli” pee “ite tohi ote mauli”? (Fakaha 20:12, 15.) Aki te ahiahi ka faka maua anai kite hahai katoa. Ke tou manatui ko Atama mo Eva nee mole na lavai te ahiahii o naua, kae ko Sopo nee nofo hagatonu. Kote tui ate tokolahi ite hahai ae e mauuli ite osi ote u tau e afe nee heeki ahiahii. I mua o tonatou faka tuuake, nee natou faka pouli kite u faka tuutuu a Sehova; nee kote u hahai “heeagatonu”, nee natou kau ite malama a Satana. Ite hili o tonatou faka tuuake, nee mole faigataa kia natou te tauhi kia Sehova ite mauli fimalie ite palatiso, ihe mole he faka feagai mai a Satana. Kae kote u toko miliale hahai aia kua natou au kite mauli haohaoa e tuumaupe anai koa tanatou tauhi kia Sehova mo kapau e tuku kia Satana he faigamalie keina faka halai natou? E lavai anai koa e Satana tonatou faka maliu mai te Atua?

21. a) E feafeai anai te ahiahii ote malamanei e Sehova? b) Ka osi anai te ahiahi aia, kotea ae ka hoko anai kia natou ae nee fai kiai?

²¹ Moo faka tokatoka ote u fehui aia, e tukuage anai e Sehova ia Satana mo tana u temonio mai te vanu ae nee pupunu ai natou lolotoga tau e afe. Kotea leva ae ka hoko? E toe lavai foki anai e Satana tana faka maliu he u hahai mai a Sehova. Ko tona lahi e “hage kote fisii one ote tai”, ko tona faka uhiga mole iloi pee tokofia. Hili te ahiahi aia, ko Satana mo tana u temonio pea mo natou fuli nee mulimuli ai e li anai natou kite “ano ote afi” faka tata ae kote lua mate pee mate heegata (Fakaha 20:7-10, 15). Ka kia natou ae e tohi onatou higoa ite “tohi ote mauli”, e natou faka fiafia anai ite kololia ote palatiso. Kote tuu o onatou higoa ite tohi aia ko tona faka uhiga ko Sehova kua ina sivi natou kote u hahai fai totonu i tonatou u loto, tonatou u atamai pea mo tonatou u sino, pea e natou aoga kite mauli heegata ite palatiso moo faka pale o tanatou nofo hagatonu.

TE AHO FAKAMAU AENI E LOLOTOGA NEI

22. Ke tou sio ite Aho ote Fakamau mo kau ite ahiahi faka osi ae ka fai kite malamanei, kotea ae e tonu ke kita hao ai mua?

²² Kote Tohi-Tapu eina fakaha te u mea ka hoko ote u tau e afe ka hau pea eina faka loto fimaliei tatou o uhiga mote temi ki amuli. Kae eiai te fehui e tonu ke fai: E koutou kau ape anai koa ite faka aoga ae ote u tapuakina ae e taofi ete Atua maa te tagata? Kote faahi aia e faka logo anai ki takotou hao ite fakamau ae e fai faka tomua: “te aho ote fakamau aeni e lolotoga nei pea mote tautea ote hahai hee tui”.—II Petelo 3:7.

23. a) Kote hahai ite temi nei kua vahei o kalasi lua; koai te u kalasi aia? b) Kotea ae ka hoko anai kite u kalasi aia takitahi, pea kotea tona tupuaga?

²³ Talu te liliu mai a Kilisito pea mo heka i tona hekaaga fakahau i selo, eina fakamaui te malamanei. Kote “aho ote fakamau” aia e mua ia ite Aho ote Fakamau ae e tau afe. Ite lolotoga ote fakamau aeni e fai nei, kote hahai e vahei: kote u “tao” ite hema o Kilisito pea kote u “ovi” i tona matau. Kote u “tao” e maumaui anai natou he nee mole natou tokoni kite u “tehina” ae kua faka nofo o Kilisito i tanatou gaue faka atua. Kote u “tao” aia e ha mai ia kote kau agahala e mole natou fia faka hemala, kote kau agakovi loto fefeka ia i tanatou fai te u mea ae e mole totonu. Kae, kote u “ovi” e natou mau anai te mauli ite pule ote Puleaga koteuhi he nee natou tokoni tuumau kite u “tehina” o Kilisito.—Mateo 25:31-46.

[Paki ʼo te pasina 178]

“He koe e ui e Sesu e faigafua anai kite hahai o Sotoma ite aho ote fakamau tona tali?”