Kapite 30
Te mea ae e tonu keke fai keke mauli ai o heegata
1. a) Kote u ala e lua feafeai ae e tuku atu keke fili? b) E feala feafeai hau fili te ala ae e lelei?
KOTE MAULI heegata i tana tuu foou ae e totonu ote u faahiga mea, koena te mea e momoli atu e Sehova kia koe (II Petelo 3:13)! Kae ki tona mau, e tonu foki keke kamata fai atu nei te finegalo ote Atua. Kote malamanei agakovi ote temi aeni e amanaki atu nei ia ke puli, “kae ko ae eina fai te finegalo ote Atua e nofo ia o talu ai”. (I Soane 2:17.) E tonu foki keke filifili ia ala e lua: kote tahi eina taki ia kite mate pea kote tahi kite mauli heegata (Teutalonome 30:19, 20). Kofea te ala ae ka ke fili anai?
2. a) Kapau eke mau te tui mooni, kotea ae kake tui malohi anai kiai? b) Kotea he faahiga tokoni anai kia koe keke tauhi kia teia iate falala ae kite Atua o hage kohe tamai ofa?
2 Kote mauli koa ae kua ke fili? Faka mooni mai e koe aki tau tui kia Sehova pea mo tana u faka papau. Eke tui malohi koa eiai te Atua “pea e koia ae eina totogi ia natou ae e natou kumi mooni iaia”? (Hepeleo 11:6.) Falala kite Atua o hage ko hau tamai ofa mo manavaofa (Pesalemo 103:13, 14; Taagalea 3:11, 12). I hau mau te tai tui aia, e mole ke toe mahalohalo ai anai kite poto o tana u tokoni pee kote totonu o tona u ala, tatau aipe pee mole mahino katoa tuumau kia koe.
3. a) Aki te tui, kotea te tahi mea ae e toe aoga? b) Kotea te u gaue ae e tonu keke fai moo fakaha aki kua ke fili te mauli?
3 Kae kote tui e mole feauga. E tonu ke iloga mai aki he u gaue (Sake 2:20, 26). Kotea ae kua ke fai moo fakaha aki kua ke faka hemala ki tau u hala afea? Kua ke faka hemala koa pee kua ke fai te u fetogi ae e aoga ke alutahi ai tou mauli mote finegalo o Sehova? Kua ke maliu koa, i tona tahi ui kua ke liaki koa te aga fulipe e kovi neeke fai afea ka ke fakalogo koe kite u faka maua faka atua (Gaue 3:19; 17:30)? Aki te u tai gaue aia e ha mai ai kua ke fili koe te mauli.
TE MOMOLI O KITA PEA MOTE PAPITEMA
4. a) Kotea ae e tonu keina ekenaki koe kite fai ote finegalo faka atua? b) Ite osi o tau kua tonu eke tauhi te Atua, kotea ae e aoga ke fai?
4 Kotea te mea ae e tonu keina ekenaki koe kite fai ote finegalo ote Atua? Kote faka fetai. Ko Sehova nee ina fai he mea ke feala ai hou fakahao mai te mahaki, mai te mamahi o toe feia aipe mote mate. Aki te mea ofa mauhiga aupito o tona Alo, eina faka ui atu pee ke loto kite mauli heegata ihe palatiso kelekele (I Kolonito 6:19, 20; 7:23; Soane 3:16). Kotea te mea e tonu ke fai moka e ekenaki koe ete ofa o Sehova keke toe ofa mo koe kia teia (I Soane 4:9, 10; 5:2, 3)? Ko hau faka ovi kite Atua aki te huafa o Sesu pea ke uiage kia teia ite faikole eke holi keke tauhi pea moke ateaina kia teia. E feia la te faahiga foaki o kita kite Atua. Kote fakapapau aia e a kita tokotahipe tona fai.
5. a) Ite osi o tau foaki ia koe kite Atua, kotea ae e tonu keke fai? b) Kote tokoni mai fea ae e feala keke mau moo fai o tau fakapapau?
5 I tau kua osi foaki anai ia koe kia Sehova, fai ke hoko tau fakapapau. Fakaha e koe ko koe kote tagata e mole ke holo talaga i hau fai leleii tau fakapapau o au ki tou mate (Pesalemo 50:14). Pipiki tuumau aipe kite kautahi ae e ha ate Atua pea eke mau ai anai te u faka loto malohi pea mote tokoni faka tehina o tou u kau mea.—I Tesalonika 5:11.
6. a) Ite kua osi o tau foaki ia koe kite Atua, kotea te tahi mea ae e tonu keke faka laka ai? b) Kotea te faka uhiga ote papitema?
6 Kae mole gata akipe hau ui faka fufu kia Sehova eke fia ateainape kia teia. E tonu keke fakaha kite hahai kua ke foaki ia koe kite tauhi kite Atua. O feafeai? Aki te papitema ite vai. Kote papitema aia e kote fakaha ia i mua ote hahai o faka mooni aki kote tagata papitema kua ina foaki tona mauli kia Sehova pea e hau ia kia teia moo fai o Tona finegalo.
7. a) Kote faifaitakiaga feafeai ae nee tuku e Sesu kite kau kilisitiano? b) He koe kote papitema ae nee faka tuu e Sesu e mole kau ai te tamaliki ae nee hoki tupu?
7 Kote papitema ite vai e kohe mea mauhiga ia, o hage ko tona ha mai ite faifaitakiaga o Sesu Kilisito. Nee mole ina faka gata akipe hana ui ki tana Tamai nee hau moo fai o Tona finegalo (Hepeleo 10:7). I tana kamata tana gaue ae kote tagata faka mafola logo ote Puleaga, nee tuu Sesu ia mua o Sehova moo fai tona finegalo pea nee papitemai ia ite vai (Mateo 3:13-17). Mai tona uhiga ae ko ia ko totatou faifaitakiaga, kote kau kilisitiano ae e natou foaki ia natou kite Atua e maua, mo natou, ke natou papitema (I Petelo 2:21; 3:21). Ko Sesu nee ina faka totonu ke fai he u tisipulo aki te hahai ote u fenua fulipe pea mo papitemai ia natou. Koia e mole foki kohe papitemai ohe u tamaliki nee hoki tutupu, kae kote u hahai kua natou liliu kote hahai tui pea e kua natou tonu e natou tauhi ia Sehova.—Mateo 28:19; Gaue 8:12.
8. Kapau eke loto keke papitema, koai ite kokelekasio ae e maua keke fakaha kiai, pea e kotea tona tupuaga?
8 Kapau leva kua ke tonu osi e koe keke tauhi ia Sehova pea e kua ke loto ke papitemai koe, fakaha kia ia ae e taupau-pelesita ite kokelekasio ote kau Faka mooni a Sehova ae eke tatuu kiai. E fiafia anai ia ia, pea mo ihi age tagata afea, te toe vakai mo koe iate u akonaki ae e tonu keke iloi moo tauhi faka lelei ia Sehova. Eiai anai he u faka tuutuu ka fai o uhiga mo tou papitema.
TE MEA AE E FAKA MAUA KOUTOU KIAI ETE ATUA ITE TEMI NEI
9. Kotea ae nee fai e Noe i mua ote tulivio, gaue aia e loto ete Atua keke fai ite temi nei?
9 I mua ote tulivio, nee faka aoga e Sehova ia Noe, “kohe tagata faka mafola ote faitotonu”, moo fakaha ia te auha faka malamanei pea mo faka hinohino ia te faahiga mea faka mauliagape ae e tahi, ae kote aleka (Mateo 24:37-39; II Petelo 2:5; Hepeleo 11:7). E loto ete Atua keke fai he gaue fai faka mafola logo feia. Nee ui e Sesu: “Kote logo lelei aeni ote puleaga e faka mafola anai ite kele katoa, moo faka mooni kite u puleaga katoa; pea hoki hoko mai ai leva mote faka osi.” (Mateo 24:14). Ke kita hao ite faka osi ote u faahiga mea ote tuu aeni pea mo kita mauli o heegata, e tonu ke kita iloi te u faka tuutuu ate Atua (Soane 17:3). Ko tou loto eina ekenaki koa koe kite fakaha ote ala ote mauli?
10. a) Kote faifaitaki feafeai o Sesu ae e tonu keina ekenaki tatou ke tou mulimuli kiai aki he ofa kite kaiga? b) E feafeai tona fai mahani ote faka mafola evaselio?
10 Sio kia Kilisito, nee mole talitali ia ke hoki olo age te hahai kia ia; nee alu ia o kumi ia natou ae e natou faka logo anai iate fagonogono ote Puleaga. Nee ina ako tana u tisipulo fuli ke natou fai feia (Mateo 28:19; Gaue 4:13; Loma 10:10-15). I tanatou mulimuli kite u faka totonu pea mote faifaitaki kia Kilisito, kote kau uluaki kilisitiano nee natou ahiahi kite hahai i onatou api, o natou olo “ite u fale”. (Luka 10:1-6; Gaue 20:20.) Ia aho nei, kote kau kilisitiano mooni e natou toe fai feiape tanatou gaue faka minisitelio.
11. a) He koe e tonu ke kita loto toa moo faka mafola te Puleaga ote Atua, kae koe e mole tonu ke kita loto vaivai? b) Kotea te tonu ia a Sehova kite gaue aeni e tou fai?
11 E tonu ke kita loto toa moo fai ote gaue aia. O hage pe kote uluaki sekulo, ko Satana pea mo tona malamanei ena faigai anai ke aua naa lava (Gaue 4:17-21; 5:27-29, 40-42). Kae ko Sehova e tokoni anai kia koe pea eina faka malohii anai koe, o hagepe ko tana fai kite kau uluaki kilisitiano (II Timoteo 4:17). Koia keke loto toa foki! Fakaha tou ofa kia Sehova pea mote hahai aki hau kau faka malotoloto kite gaue faka mauli ote faka mafola pea mote fai ako (I Kolonito 9:16; I Timoteo 4:16). Ko Sehova eina tapuaki ai anai ia koe o lahi aupito.—Hepeleo 6:10-12; Tito 1:2.
12. Kotea te ako e mau mai ite talanoa kite ohoana o Lote?
12 Kote malamanei e mole iai hana mea aoga mooni keina momoli atu kia koe; maliu kehe mai ai aua naake faka hemala. Nee ui e Sesu: “Manatui e koutou ia te ohoana o Lote.” (Luka 17:32). I tana osi hola mai Sotoma mo tona famili, nee sio ia aki he faka hemala kite u mea ae nee natou tuku i onatou tua; nee lau ia ete Atua te mea ae e i tona loto, pea nee liliu ai ia kohe maka masima (Senesi 19:26). Aua naa ke faifaitaki kite ohoana o Lote! Taofi mau tau sio kite “mauli mooni” ite tuu foou pea mo totonu ate Atua.—I Timoteo 6:19.
FILI TE MAULI HEEGATA ITE PALATISO KELEKELE
13. E tuku feafeai mai e Sesu ia te filifili ae e tonu ia tatou fuli ke tou fai?
13 Ko aluagape e lua e feala keke fili. E faka tata e Kilisito kia ala e lua. Kote tahi, i tana ui, e “falahi pea atea”. Ko natou ae e olo ai e natou faipe ki tonatou loto faitaliha. Kote tahi e “faveliveli”. Ko natou ae e olo ai e tonu ke natou fakalogo kite u faka totonu pea mote u lao faka atua. I tona ui mai e Sesu, kote tokolahi e natou olo ite ala ae e falahi; kae toko sii ia natou ae e natou fili te ala faveliveli. Kote ala fea anai ae kake fili? Ia mua o tau fai tau filifili, aua naa galo kia koe te mea aeni: Kote ala ae e falahi e tau faka fokifa anai ia kite auha. Kae, kote ala ia ae e faveliveli eina ave anai ia koe o kaku kite tuu foou ate Atua. Iai, e feala ai anai leva hau gaohi te kele ke liliu kohe palatiso aia kake mauli ai anai o heegata ite manuia.—Mateo 7:13, 14.
14. Kotea ae e tonu keke kau ai keke hu ai kite fakatokatoka foou ate Atua?
14 Aua naa ke ui e lahi te u faahiga ala kehekehe e feala ke natou fakatau ai anai koe kite mauli ite fakatokatoka foou ate Atua. E kote alape ia e tahi. Kote alekape e tahi ae nee fakalaka ite tulivio. Kote kautahipe e tahi—te kautahi ae e ha ate Atua—ka faka laka anai ite “mamahi lahi” ae kua vave mai. Koia e hala aupito te ui ae kote u lotu fuli e natou alupe kite mea e tahi (Mateo 7:21-23; 24:21). Kohe mau ote mauli heegata, e tonu keke kau ia koe ite kautahi a Sehova pea mo fai ia te finegalo faka atua.—Pesalemo 133:1-3.
15. a) Kotea ae e tonu keke fai ite aho fulipe? b) Kote falala feafeai ia ae e mole kohe moemisi?
15 Taupau lelei mau i tou atamai pea mo tou loto ia te tuu foou ae nee faka papau mai kiai te Atua. Ite aho fulipe, manatu kite totogi ae e amanaki foaki atu e Sehova kia koe: ia te mauli heegata ite palatiso kelekele. E mole kohe moemisi, kae kohe mea mooni ia! Kote faka papau aeni e hoko mooni anai ia: “Kote hahai agatonu e natou mau anai te kele, pea iai e natou nonofo ai anai o talu ai. (. . .) Ka too kehe anai te hahai agakovi, eke sio anai kiai.”—Pesalemo 37:29, 34.
[Paki ʼo te pasina 251]
Foaki ia koe kia Sehova pea ke papitemai koe
[Paki ʼo te pasina 253]
“Manatui iate ohoana o Lote”
[Paki ʼo te pasina 254]
Taupau mau i tou atamai pea mo tou loto iate tuu foou ae nee faka papau mai kiai te Atua