Kapite 22

Neʼe Fakaafe e Sesu Te ʼu Tisipulo e Fā

ʼI TANA hāo mai te tuʼutāmaki ʼaē neʼe meʼa ke hoko kia ia ʼi tona kolo ko Nasaleti, neʼe ʼalu ia Sesu ki Kapenaume, ʼe ōvi ki te tai ʼo Kalilea. ʼO fakahoko ai te tahi lea faka polofeta ʼa Isaia, ʼaē neʼe ina fakahā ko te hahaʼi ʼo Kalilea ʼaē ʼe nonofo ōvi ki te tai ʼe nātou sio anai ki he mālama lahi.

ʼI te lolotoga ʼo tana fakagigila tona mālama ʼaki tana faka mafola te Puleʼaga ʼi te koga meʼa ʼaia, neʼe sio ia Sesu ki tana ʼu tisipulo e fā. Ko nātou ʼaia neʼe kau fagona fakatahi mo ia ʼi te temi ki muʼa atu, kae ʼi te temi leva ʼaē, kua nātou toe liliu ʼo toe fai tanatou gāue ʼaē ko te tautai talu tanatou toe liliu mai Sutea pea mo ia. ʼE mahino neʼe lagi kumi nātou e Sesu, heʼe kua hoko te temi ʼaē ʼe tonu ke ʼi ai hona ʼu tokoni ʼe nonofo tuʼumaʼu mo ia ʼe feala ke ina ako nātou ke nātou hoko atu tona minisitelio mokā mavae.

Neʼe haʼele Sesu ʼi te matatai, pea sio ia kia Simone Petelo pea mo ʼona kau feʼao ʼe nātou fakalanuʼi tonatou ʼu kupega, pea ʼalu atu kia nātou. Pea heka ia ki te vaka ʼo Petelo pea ina kole age ke nātou mavae mai te matatai. ʼI tanatou kua mavae siʼisiʼipe mai te matatai, neʼe heka Sesu ʼi te loto vaka ʼo kamata fai akonaki ki te hahaʼi ʼaē neʼe nonofo ʼi te mataʼone.

ʼOsi ʼaia, pea ina fakatotonu age kia Petelo: “Hoho atu ki te loloto, pea ʼaʼau tokotou ʼu kupega moʼo gelu.”

“Tagata faiako, ko te ʼui age ʼaia ʼa Petelo, neʼe mātou kinakina ʼi te po katoa ʼo mole maʼu hamatou meʼa, kae, ʼaki tau fakatotonu mai, ʼe ʼau ʼaʼau te ʼu kupega.”

Neʼe ʼaʼau te ʼu kupega ki te tai pea ʼaki te lahi ʼo te ʼu ika neʼe maʼu ai neʼe kamata mahaehae ai te ʼu kupega. Neʼe nātou pāuiʼi fakavilivili atu aipe ki tonatou ʼu kaumeʼa ʼi te tahi vaka ʼe ōvi mai kia nātou ke ʼōmai ʼo tokoni kia nātou. ʼI te lahi ʼo te ʼu ika neʼe kamata moū ai te ʼu vaka ʼaia e lua. ʼI te sio ʼa Petelo ki te meʼa ʼaia, neʼe tō ifo ai ia ʼo tuʼutuli ia Sesu pea ina ʼui age ki ai: “Fakamamaʼo atu ia te ʼau, ʼAliki, heʼe ko ʼau ko te tagata agahala.”

“ ʼAua naʼa ke mataku, ko te tali age ʼaia ʼa Sesu. Heʼe ko te temi leva ʼaē ko te ʼu tagata ʼaē ka ke puke maʼuli.”

Pea neʼe ina fakaafe foki mo Atelea, te tēhina ʼo Petelo. “Koulua muli mai ia te ʼau, ko tana ʼui age ʼaia kia nāua, pea ʼe ʼau fakaliliu anai koulua ko te ʼu tautai tagata.” Ki tonatou ʼu kaugā gelu, ia Sake pea mo Soane, te ʼu foha ʼo Sepeteo, neʼe toe fakaafe foki mo nāua e Sesu, pea neʼe nā tali vave atu aipe ʼo muli ia ia. Ko te ʼu tagata ʼaia neʼe nātou tuku tanatou gāue ʼaē ko te tautai, kae nātou liliu ko te ʼu ʼuluaki tisipulo toko fā ʼaē neʼe muli tuʼumaʼu ia Sesu. Luka 5:1-11; Mateo 4:13-22; Maleko 1:16-20; Isaia 9:1, 2.

▪ He koʼe neʼe fakaafe e Sesu tana ʼu tisipulo ke muli ia te ia? Ko ai koa te ʼu tisipulo ʼaia?

▪ Ko te milakulo fea ʼaē neʼe manavahe ai ia Petelo?

▪ Ko te faʼahiga gelu fea koa ʼaē neʼe fakaafe kiai e Sesu tana ʼu tisipulo?