Kapite 31
ʼE Nātou Fusi Te ʼu Kauʼi Fulumeto ʼi Te ʼAho ʼo Te Sapato
KO SESU pea mo tana ʼu tisipulo kua mavae ʼi Selusalemi ʼo liliu ki Kalilea. ʼE tou nofo nei ʼi te fasiga taʼu mātala ʼo te taʼu, pea ʼi te ʼu gāueʼaga kua momoho te ʼu kauʼi fulumeto. Kua fia kakai te kau tisipulo. Neʼe nātou fusi ai leva te ʼu kauʼi fulumeto pea nātou kai. Kae, ʼi te ʼaho ʼo te sapato, neʼe mole ū te meʼa ʼaē neʼe nātou fai.
ʼI muʼa atu, ʼi Selusalemi, neʼe faiga te kau takitaki lotu ke matehi ia Sesu he neʼe ʼui maʼa nātou neʼe ina maumauʼi te sapato. Nei leva kua fai e te kau Faliseo te fakakovi ʼaenī: “Koʼena ko ʼau tisipulo ʼe nātou fai te meʼa ʼe mole gafua ke fai lolotoga te sapato.”
Neʼe ʼui e te kau Faliseo ko te fusi ʼaē ʼo te ʼu kauʼi fulumeto pea mo te milihi ʼi te ʼu nima ke kai ʼe tatau mo tona tuʼusi ʼo tānaki pea mo te haha ʼo te tegaʼi fulumeto. Kae, ʼaki tanatou fakamamafaʼi te faka ʼuhiga totonu ʼo te gāue, neʼe nātou fakamamafaʼi ai te sapato, ka neʼe tonu ia ko he ʼaho ʼo te fiafia pea mo te lagalaga fakalaumālie. Koia neʼe fai age ai e Sesu ki te kau Faliseo te ʼu faʼifaʼitaki mai te Tohi-Tapu ʼo fakahā age ai ko te fakatuʼutuʼu ʼa Sehova ʼAtua neʼe mole ko he taupau ke fakamamafa feiāʼi Tana lao ʼo ʼuhiga mo te sapato.
Neʼe fakamahino age e Sesu, ʼi te fia kai ʼa Tavite pea mo tana kau tagata, neʼe nātou hū ki te tapenakulo pea nātou kai te ʼu pane ʼo te fofoga. Ko te ʼu pane ʼaia neʼe kua ʼosi toʼo mai ia muʼa ʼo Sehova ʼo fetogi ʼaki te ʼu pane foʼou, pea ko te agamāhani ʼe tuku te ʼu pane ʼaia ke kai e te kau pelepitelo. Kae ʼi te meʼa ʼaia neʼe hoko, neʼe mole faka lākahalaʼi ia Tavite pea mo tana kau tagata gāue ʼi tanatou kai te ʼu pane ʼaia.
Neʼe toe fai age e Sesu te tahi faʼifaʼitaki: “Pe neʼe mole koutou lau ʼi te Lao, ʼe ko te lolotoga ʼo te ʼu sapato, ko te kau pelepitelo ʼi te fale lotu ʼe mole nātou tokagaʼi te taputapu ʼo te sapato, kae mole nātou lākahala ai?” ʼIo, māʼia mo te lolotoga ʼo te sapato, ko te kau pelepitelo ʼi te fale lotu, ʼe hoholo atu tanatou matehi te ʼu manu pea mo fai niʼihi atu gāue moʼo teuteuʼi ʼo te ʼu sakilifisio. “Kae ʼau ʼui atu kia koutou, ko te ʼui ʼaia ʼa Sesu, ʼe ʼi ai ʼi henī te meʼa ʼe lahi ake ʼi te fale lotu.”
ʼOsi ʼaia pea ina fakatonutonuʼi te kau Faliseo: “Pea ka na pau la neʼe koutou mahino ki te faka ʼuhiga ʼo te lea ʼaenī: ‘ ʼE ʼau loto ki te manavaʼofa ka mole ko te sakilifisio’, ka na ʼaua la neʼe mole koutou faka lākahalaʼi te kau heʼe hala.” Pea ina fakaʼosi fēnei age tana palalau: “Heʼe ko te ʼAliki ʼo te sapato, ʼe ko te Foha ʼo te tagata.” Koteā koa te faka ʼuhiga ʼo tana palalau? ʼE talanoa ia ki tana Hau ʼaē ʼi te ʼu taʼu e afe.
Kua katoa nei taʼu e 6 000, mo te tali e te tagata ʼi te malamanei te mamahi ʼo te popūla ʼa Satana te Tevolo, ko te aga fakamālohi pea mo te tau kua liliu ia ko te meʼa māhani ʼi te ʼaho fuli pe. Kae, ʼi te Sapato lahi, te Hau ʼa Kilisito, ʼe ina fakafimālie anai te hahaʼi mai te ʼu mamahi pea mo te ʼu fakapōpula fuli pe, ʼe tau mo nātou ʼi te temi nei. Mateo 12:1-8; Levitike 24:5-9; 1 Samuele 21:1-6; Faka au 28:9; Osea 6:6.
▪ Koteā te fakakovi neʼe fai ki te ʼu tisipulo ʼa Sesu, pea neʼe koteā te tali ki ai ʼa Sesu?
▪ Koteā te hala ʼa te kau Faliseo ʼaē neʼe fakahāhā e Sesu?
▪ Koteā te faka ʼuhiga ʼo te ʼui ʼaē ko Sesu ko te “ ʼAliki ʼo te sapato”?