Kapite 45

Neʼe Mole ʼAmanaki ʼe Liliu Ia Ko He Tisipulo

KOʼENI te meʼa fakamataku neʼe talitali ʼaki ia Sesu ʼi tana hifo ʼi te vaka! Ko tagata ʼitaʼita kovi e toko lua neʼe fehūfi mai te lotolotoiga ʼo te tānuma ʼe ōvi mai: neʼe ulusino ai te ʼu laumālie kovi. Kae ko te tokotahi ia nāua ʼaē ʼe fakatokagaʼi, e lagi ko ia ʼaē ʼe kovi ʼosi age tona ʼitaʼita pea lagi kua fualoa te ulusino ai ʼa te ʼu laumālie kovi.

Kua lauʼi taʼu te nofo telefua ʼa te tagata fakaʼofaʼofa ʼaia ʼi te lotolotoiga ʼo te ʼu falemaka. ʼI te ʼaho mo te po, ʼe mole tuku tana kalaga pea ʼe ina tafatafa ia ia ʼaki te ʼu maka. ʼI te kovi ʼaupito ʼo tona ʼitaʼita neʼe mole lava he tahi ke ʼalu ʼi te ala ʼaia. Neʼe kua faigaʼi foki ke haʼi, kae ʼe ina motumotuhi te ʼu seini pea mo maumauʼi te ʼu ukamea ʼaē ʼi tona ʼu vaʼe. ʼE mole he tahi ʼe ina lavaʼi tona puke.

ʼI te ōvi atu ʼa te tagata kia Sesu pea tō mapeʼe ʼi ʼona vaʼe, ko te ʼu temonio ʼaē neʼe ulusino ia ia neʼe nātou faka kalaga ia ia: “Koteā te meʼa ke ʼau fai mo koe, Sesu, ʼAlo ʼo te ʼAtua Māʼoluga? ʼE ʼau fakamaʼua kia te koe te fakapapau mai te ʼAtua ke ʼaua naʼa ke fakamamahiʼi ʼau.”

“Haʼu ki tuʼa ʼi te tagata ʼaenā, laumālie heʼemaʼa!” ko te ʼui age ʼaia ʼa Sesu. Kae neʼe ina toe fehuʼi age: “Ko ai tou higoa?”

“Ko toku higoa ko Lesio, koteʼuhi heʼe mātou tokolahi.” ʼE fiafia ʼaupito te kau temonio ʼi tanatou sio ki te mamahi ʼo te hahaʼi ʼaē ʼe nātou ulusino ai, ʼe ʼiloga ia ʼe nātou fiafia ʼi tanatou kau tokolahi ki he tokotahi. Kae, ʼi tanatou felāveʼi mo Sesu, neʼe nātou kole mamahi age ke ʼaua naʼa ina kapu nātou ki te vanu. ʼE hā mai ai ʼe nofo mo Sesu te mālohi lahi; ʼo mālohi age ia ʼi te ʼu temonio fekai. ʼE toe hā mai ai foki ʼe ʼiloʼi e te ʼu temonio te fakamāu fakaʼosi ʼaē ka fai anai e te ʼAtua kia nātou, ʼaē ko tonatou lī ki te vanu mo tonatou pule, ia Satana te Tevolo.

Neʼe mole faʼa mamaʼo mo nātou, ʼi te moʼuga neʼe ʼi ai te faga puaka e 2 000, neʼe lolotoga kakai. Neʼe kole age e te kau temonio: “Faka ʼalu ia mātou ki te faga puaka ke mātou ʼulu kiai.” ʼE ʼiloga ia ko te kau temonio ʼe nātou maʼu te fiafia fakamatakutaku ʼi tanatou ulusino ki he kakano. ʼI te faka fealagia age e Sesu ke nātou ulu ki te faga puaka ʼaē e 2 000, neʼe matataku te faga manu fuli pea nātou fakatō ʼi te potu māʼoluga ʼo te mato ki te tai pea nātou malelemo ai ʼi te tai.

ʼI tanatou sisio ki te meʼa ʼaia, neʼe feholaki te kau tauhi puaka ʼo fakamatala ʼi te kolo pea mo te tuvao te meʼa ʼaē neʼe hoko; koia neʼe ʼōmai ai te hahaʼi ʼo vakaʼi te meʼa ʼaē neʼe hoko. ʼI tanatou aʼu mai, neʼe nātou maʼu te tagata ʼaia neʼe mavae mai ai te ʼu temonio. Neʼe lahi tonatou punamaʼuli, heʼe kua fakavala pea kua ʼatamai lelei, ʼo nofo ʼi lalo ia vaʼe ʼo Sesu!

Ko nātou ʼaē neʼe mamata ki te meʼa ʼaē neʼe hoko neʼe nātou fakamatala ki te hahaʼi pe neʼe feafeaʼi te fakamālōlō ʼo te tagata. Neʼe nātou toe fakamatala foki mo te meʼa faikehe ʼaē neʼe hoko ki te faga puaka. ʼI tanatou logo ki te fakamatala ʼaia, neʼe nātou matataku ʼaupito, pea neʼe nātou kole fakamālohi age kia Sesu ke mavae ʼi tonatou fenua. Neʼe tali e Sesu tanatou kole pea heka ia ki te vaka. Neʼe kole mamahi age e te tagata ʼaē neʼe ulusino ai te ʼu temonio ke ina fakagafua age ke ʼalu mo ia. Kae neʼe ʼui age e Sesu: “ ʼAlu la ki tou ʼapi, ki ʼou kāiga, pea ke fakamatala kia nātou te ʼu meʼa fuli ʼaē neʼe fai e Sehova maʼa koe pea mo tona ʼofa ʼaē kia te koe.”

ʼI te agamāhani, ʼe fakatotonu e Sesu kia nātou ʼaē ʼe ina fakamālōlō ke vakaʼi naʼa nātou fakamatala ki he tahi, heʼe mole ina loto ke maʼu e te hahaʼi he ʼu manatu ʼaki pe hanatou logo ki he ʼu fakamatala fakaofoofo neʼe fai. Kae ko te meʼa leva ʼaenī ʼo ʼuhiga mo te tagata ʼe mole tatau, heʼe ko te tagata ʼaenī kua faka ʼāteaina mai te ʼu temonio ʼe ʼalu anai ʼo fai he fakamoʼoni ki he hahaʼi ʼaē e lagi mole toe feala anai ke felāveʼi mo Sesu. Pea tahi foki, ʼaki pe te mamata ʼa te hahaʼi kia ia, ʼe ina fakamoʼoni ʼaki anai ko Sesu ʼe ina maʼu te mālohi moʼo fai ʼo te meʼa ʼaē ʼe lelei pea ʼe feala ai ke ʼiloʼi te loi ʼo te fakamatala fuli pe ʼe fai anai ʼo ʼave keheʼi ki te mamate ʼo te faga puaka.

ʼO fai pe ki te fakatotonu age e Sesu, neʼe liliu leva te tagata. Neʼe kamata tana faka mafola ʼi te Tekapole te ʼu meʼa fuli ʼaē neʼe fai e Sesu maʼa ia, pea neʼe ōfo ai te hahaʼi. Mateo 8:28-34; Maleko 5:1-20; Luka 8:26-39; Fakahā 20:1-3.

▪ He koʼe e ko te tagata pe e tokotahi neʼe ulusino ai te ʼu temonio ʼaē ʼe fakatokagaʼi, ka neʼe ko tagata e toko lua?

▪ Koteā ʼaē ʼe hā mai ai ʼe ʼiloʼi e te ʼu temonio ʼe laku anai nātou ki he vanu?

▪ He koʼe ʼe ʼiloga mai ia ʼe ko he meʼa fakafiafia ki te ʼu temonio tanatou ulusino ki te hahaʼi pea mo te ʼu manu?

▪ He koʼe neʼe fakakeheʼi e Sesu te tagata ʼaē neʼe ina faka ʼāteaina mai te ʼu temonio, ʼo ina ʼui age ki ai ke ʼalu ʼo fakamatala ki niʼihi te meʼa ʼaē neʼe fai e Sehova maʼa ia?