Kapite 50

Te Teuteu Ki Te Fakataga

ʼI TE ʼosi ʼo tana ako ki tana kau ʼapositolo te ʼu faʼahiga fai ʼo te fai faka mafola, neʼe fakatokaga ia nātou e Sesu ki tonatou ʼu fili. Neʼe ina ʼui age: “Koʼeni ʼe ʼau fekauʼi atu koutou ohage he ʼu ōvi ʼi he lotolotoiga ʼo he faga lupo (...). Koutou nofo tokaga ia koutou ki te hahaʼi; heʼe nātou ʼave anai koutou ki te ʼu telepinale fakapotu fenua, pea ʼe nātou haha anai koutou ʼi tonatou ʼu sinakoka. ʼIo, ʼe toho anai koutou kia muʼa ʼo te ʼu kovana pea mo te ʼu hau ʼuhi ko ʼau.”

ʼE tau anai tana kau tisipulo mo te ʼu fakataga mālohi, kae ʼe ina tuku age te fakapapau fakaloto mālohi ʼaenī: “Kaʼe, ka ʼave anai koutou, ʼaua naʼa koutou tuʼania ʼo ʼuhiga mo te palalau ʼaē ʼe tonu ke koutou fai pe ʼe feafeaʼi hona fai, heʼe ko te palalau ʼaē ʼe tonu ke koutou fai ʼe foaki atu anai kia koutou ʼi te hola ʼaia; heʼe mole ko koutou pe ʼaē ʼe palalau, kaʼe ko te laumālie ʼo takotou Tāmai ʼaē ʼe palalau ʼaki ia koutou.”

Neʼe hoko atu tana palalau ʼo fēnei: “Pea tahi foki, ko te tēhina ʼe ina ʼave anai tona tēhina ki te mate, pea ko te tāmai tana tamasiʼi, pea ʼe fakafeagai anai te fānau ki te ʼu mātuʼa ʼo nātou faka matehi anai.” Pea ina toe hoko atu: “Pea ʼe fehiʼaʼinaʼi anai koutou e te hahaʼi fuli ʼuhi ko toku huafa; kaʼe ko ʼaē ka faʼa kātaki anai ʼo kaku ki te fakaʼosi, ʼe hāo anai ia.”

Ko te fai faka mafola ʼe ko he meʼa maʼuhiga ʼaupito ia; ko te tupuʼaga la ʼaia ʼo te fakatokaga age ʼa Sesu ki te ʼaoga ʼaē ʼo te fakaʼeteʼete ke feala ai te taupau ʼo tokita ʼāteaina moʼo fai ʼo te gāue ʼaia ki tona ikuʼaga lelei. “Ka fakatagaʼi anai koutou ʼi he kolo, koutou feholaki ki he tahi kolo; heʼe ʼau tala moʼoni atu kia koutou: Kailoa, ʼe mole ʼosi anai takotou foliʼi te ʼu kolo ʼo Iselaele ia muʼa ʼo te haʼu ʼo te Foha ʼo te tagata.”

ʼIo, neʼe tuku e Sesu te ʼu fakatotonu ʼaenī ki tana kau ʼapositolo ʼaē e toko 12, te ʼu fakatokaga pea mo te ʼu palalau fakaloto mālohi, kae neʼe palalau foki ia ʼo ʼuhiga mo nātou ʼaē ʼe kau anai ki te fai faka mafola ʼi te malamanei katoa ʼi te ʼosi ʼo tona mate pea mo tona toe fakatuʼuake. ʼE hā lelei te faʼahi ʼaia ʼi tana ʼu palalau totonu, ʼi tana ʼui ʼaē ko tana kau tisipulo ʼe ‘fehiʼaʼinaʼi anai e te hahaʼi fuli’, pea ʼe mole gata ʼaki pe ki te kau Iselaele ʼaē neʼe fakatotonu ki te kau ʼapositolo ke nātou ʼolo ʼo fai faka mafola kia nātou. Pea tahi, ʼe ʼiloga mai neʼe mole toho te kau ʼapositolo kia muʼa ʼo he ʼu kovana pea mo he ʼu hau ʼi te temi ʼaē neʼe teuteuʼi ai e Sesu mo nātou te fai faka mafola nounou ʼaia. Pea, ko te kau kilisitiano, ʼi te temi ʼaia, neʼe mole ʼave ia nātou ki te mate e tonatou ʼu famili.

Koia, ʼi tana ʼui ʼaē ʼe mole ʼosi anai te foliʼi e tana kau tisipulo te ʼatu kolo fuli “ia muʼa ʼo te haʼu ʼo te Foha ʼo te tagata”, neʼe tuku mai kia tatou e Sesu te lea faka polofeta. ʼIo, neʼe ina fakahā ʼe mole ʼosi anai te foliʼi e tana kau tisipulo te kele katoa ʼo faka mafola te Puleʼaga ʼo te ʼAtua ʼaē kua ʼosi fakatuʼu, ia muʼa ʼo te haʼu ʼa ia, te Hau ʼaē kua faka kolōlia, ʼo fakahoko te ʼu fakatotonu ʼa Sehova ʼi Hala-Maketone.

ʼO hoko atu pe tana akonaki ʼo ʼuhiga mo te fai faka mafola, neʼe ʼui e Sesu: “Ko te tisipulo ʼe mole māʼoluga ake ia ʼi ʼaē ʼe ina ako ia ia, pe ko te tagata kaugana ʼi tona ʼaliki.” Ko te kau tisipulo ʼa Sesu ʼe tonu foki ke nātou ʼamanaki ʼe nātou felāveʼi anai mo te ʼu fakataga pea mo tonatou ʼu gaohi koviʼi ohage ko te ʼu meʼa neʼe fai kia te ia ʼuhi ko tana faka mafola te Puleʼaga ʼo te ʼAtua. Kae neʼe ina fai age kia nātou te ʼekenaki ʼaenī: “ ʼAua naʼa koutou manavasiʼi kia nātou ʼaē ʼe nātou tāmateʼi te sino ka mole feala ke nātou tāmateʼi te nefesi; ka ke koutou manavasiʼi age kia ia ʼaē ʼe feala tana fakaʼauha te nefesi pea mo te sino ʼi te Seʼeni.”

ʼI te faʼahi ʼaia, neʼe tuku mai e Sesu te faʼifaʼitaki lelei. ʼAki te lotomālohi, neʼe ina tali tona mate ʼi tana heʼe agatonu kia Ia ʼaē ʼe ina maʼu te mālohi fuli pe, ia Sehova ʼAtua. ʼIo, ko Sehova pe ʼaē ʼe feala ke ina fakaʼauha totatou “nefesi” (ko tona faka ʼuhiga ʼaenī ko te fealagia ʼaē ke kita toe liliu ʼi he ʼaho ko he nefesi maʼuli), peʼe ko he fakatuʼuake ʼo he tahi pea mo foaki age ki ai te maʼuli heʼegata. ʼI ʼofa leva, mo te manavaʼofa ʼo tatatou Tāmai ʼaē ʼi selo ko Sehova!

ʼOsi ʼaia, neʼe fakaloto mālohiʼi e Sesu tana kau tisipulo ʼaki te lea fakatātā ʼe ina fakahā ai te ʼofa lahi ʼo Sehova ʼaē ʼe ina taupau ʼaki ia nātou. “ ʼE mole koa la fakatau he ʼu misi e lua ki he foʼi piesi paʼaga e tahi ʼe mole hona maʼuhiga? ko tana fehuʼi age ʼaia. Kaʼe mole he tahi ia nātou ʼe tō ki te kele ka mole ʼiloʼi e takotou Tāmai. Ko te ʼu fuluʼi ʼulu fuli ʼo tokotou ʼulu kua ʼosi katoa ʼi te lau. Koia, ʼaua naʼa koutou manavasiʼi ʼe koutou maʼuhiga lahi ake koutou ʼi he faga misi tokolahi.”

Ko te logo ʼo te Puleʼaga ʼaē neʼe tuku e Sesu ki tana kau tisipulo ke nātou faka mafola ʼe ina fakamavetevete anai te ʼu loto fale, heʼe ʼi te ʼu famili ʼe tali anai e ʼihi pea ko ʼihi ʼe mole nātou tali anai. ʼE ina fakamahino: “ ʼAua naʼa koutou mahalo neʼe ʼau haʼu ʼo ʼaumai te tokalelei ki te kele; neʼe mole ʼau haʼu ʼo ʼaumai te tokalelei, kae ko te heletā.” Koia, ʼe tonu ai ke lototoʼa ia he tahi ʼe ko ia tokotahi ʼi tona famili ʼe ina tali te moʼoni ʼo te Tohi-Tapu. “Ko ʼaē ʼe lahi ake tona ʼofa ki tana tāmai pe ki tana faʼe ia te ʼau ʼe mole tau ia mo ʼau; pea ko ʼaē ʼe lahi ake tona ʼofa ki tona foha pe ki tona ʼofafine ia te ʼau ʼe mole tau ia mo ʼau.”

Neʼe fakaʼosi e Sesu tana ʼu fakatokaga ʼo ina fakamahino age ko nātou ʼaē ʼe nātou tali tana kau tisipulo ʼe nātou toe tali foki mo ia. “Pea ko ʼaē ʼe ina foaki moʼo ʼinu he ipu vai momoko pe e tahi ki he tahi ia nātou liliki ʼaenī, koteʼuhi he ko te tisipulo, ʼe ʼau tala moʼoni atu kia koutou: kailoa, ʼe mole hala anai ia ʼi tona fakapale.” Mateo 10:16-42.

▪ Koteā te ʼu fakatokaga neʼe fai e Sesu ki tana kau tisipulo?

▪ Ko te ʼu palalau feafeaʼi ʼaē neʼe ina fakaloto mālohiʼi ʼaki pea mo fakaloto fīmālie ʼaki ia nātou?

▪ He koʼe ko te ʼu fakatotonu ʼa Sesu ʼe ʼaoga tuʼumaʼu pe ki te kau kilisitiano ʼo te temi nei?

▪ Koteā te faka ʼuhiga ʼo te ʼui ʼaē ko te tisipulo ʼa Sesu ʼe mole māʼoluga ake ia ʼi ʼaē ʼe ina ako ia ia?