Kapite 51
Ko Te Fakapō Neʼe Fai ʼi Te Lolotoga ʼo Te Lafeti ʼo Te ʼAho Tupu
ʼI TE ʼosi ʼo tana fai age te ʼu fakatotonu, neʼe fekauʼi e Sesu tana kau ʼapositolo taki toko lua ki te telituale. Neʼe lagi ʼalu ia Petelo mo tona tēhina ko Atelea, Sake mo Soane, Filipo mo Paletolomeo, Tomasi mo Mateo, Sake mo Tateo pea ko Simone leva mo Sutasi Isikaliote. ʼI te potu fuli pe ʼe nātou fakalaka ai, ko te ʼu hoa fai faka mafola ʼaia e ono neʼe nātou fagonogono te logo lelei ʼo te Puleʼaga pea nātou fai mo te ʼu fakamālōlō faka milakulo.
ʼI te temi ʼaia, neʼe kei nofo pe ia Soane Patita ʼi te fale pilisoni. Kua teitei katoa nei taʼu e lua mo tana nofo ai. Koutou manatuʼi: neʼe tala e Soane ia muʼa ʼo te hahaʼi te gāue kovi ʼa Helote Atipasi ʼi tana toʼo maʼa ia te ʼohoana ʼo tona tēhina ko Filipo ia Helotiate. Neʼe tonu tana faka lākahalaʼi te nonofo fai feʼauʼaki ʼaia, he neʼe fakamoʼoni e Helote Atipasi ko ia ʼe ina muliʼi te Lao faka moisese. Koia neʼe ʼave ai ia ia ʼo pilisoniʼi e Helote, neʼe lagi fai pe te meʼa ʼaia ʼaki te fakauga ʼa Helotiate.
Neʼe ʼiloʼi lelei pe e Helote Atipasi ko Soane ʼe ko te tagata agatonu pea neʼe ina leleiʼia te fakalogo ʼo Soane. Koia neʼe lotolotolua ai ʼo ʼuhiga mo te meʼa ʼaē ʼe tonu ke fai ki ai. Kae, ko Helotiate neʼe fehiʼa kia Soane pea neʼe ina kumi he faʼahiga puleʼaki ke matehi ai. Pea kua hoko mai leva te faigamālie ʼaē neʼe talitali ki ai.
Siʼisiʼi atu pe ʼi muʼa ʼo te Pāsikate ʼo te taʼu 32, neʼe fai e Helote te lafeti lahi ʼo faka ʼuhiga ki tona ʼaho tupu. Neʼe ina fakaafe mai kiai tana kau maʼu tuʼulaga lalahi pea mo te ʼu pule ʼo te kautau ʼo feiā foki mo te ʼu tagata lalahi ʼo Kalilea. ʼI te lolotoga ʼo te lafeti, neʼe hū mai te taʼahine ʼo meʼe ia muʼa ʼo te hahaʼi ʼaē neʼe fakaafe mai: ko Salome, te taʼahine ʼa Helotiate ʼi tona ʼuluaki ʼohoana, ko Filipo. Ko tana meʼe neʼe mālieʼia e te hahaʼi tagata fuli ʼaē neʼe nonofo ai.
Neʼe mālieʼia ʼaupito e Helote ia Salome. “Kole mai kia te ʼau ia meʼa fuli ʼe ke loto kiai, pea ʼe ʼau foaki atu anai”, ko te fakapapau age ʼaia ʼa te hau, ʼo aʼu ai foki mo tana fai te fuakava ʼaenī: “Ko meʼa fuli ʼe ke kole mai anai kia te ʼau ʼe ʼau foaki atu anai kia te koe, ʼo aʼu ai ki te vaelua ʼo toku puleʼaga.”
ʼI muʼa ʼo te fai ʼo tana kole, neʼe ʼalu ia Salome ki tana faʼe ʼo fehuʼi ki ai pe koteā tana manatu. “Koteā te meʼa ʼe tonu ke ʼau kole?” ko tana ʼui age ʼaia.
Koʼena la te faigamālie ʼaē neʼe talitali kiai! “Ko te ʼulu ʼo Soane Patita”, ko te tali ʼaia ʼa Helotiate neʼe mole toe lotolotolua.
Koia neʼe toe liliu ai ia Salome kia Helote pea ina fai age te kole ʼaenī: “ ʼE ʼau loto ke ke foaki mai nei kia te ʼau ʼi he pa te ʼulu ʼo Soane Patita.”
Neʼe lotomamahi ʼaupito ia Helote. Kae, ʼi te kua logo ʼa te hahaʼi ʼaē neʼe ina fakaafe ki tana fuakava ʼaē neʼe ina fai, ʼe mole faʼa lelei anai kia ia he meʼa mo kapau ʼe mole ina fai tana fakapapau, tatau aipe pe ʼe tonu ke ina matehi he tagata agatonu. Koia neʼe ina fai ai te fakatotonu pea ʼalu atu aipe te tagata, ki te fale pilisoni ʼo fai te gāue fakamataku ʼaia. Neʼe mole tuai te liliu mai ʼa te tagata mo te ʼulu ʼo Soane ʼi te pa ʼo foaki kia Salome; pea ʼalu ai ʼo ʼave ki tana faʼe. ʼI tanatou ʼiloʼi te meʼa ʼaē neʼe hoko, neʼe ʼōmai ai te kau tisipulo ʼa Soane ʼo kumi tona sino ʼi te fale pilisoni ʼo ʼave ʼo tanu, hili ia pea nātou ʼolo ʼo fakahā te logo kovi ʼaia kia Sesu.
Ki muli age, ʼi te logo ʼa Helote ki te talanoa ʼaē ʼo ʼuhiga mo Sesu ʼe ina fakamālōlō te ʼu mahaki pea mo kapu te ʼu temonio, neʼe mataku ia, heʼe ina ʼeke ʼi tona loto peʼe ko te tagata ʼaia ʼe mole ʼapē la ko Soane kua toe fakatuʼuake mai te mate. Ki muli age, neʼe lahi ʼaupito tana fia sio kia Sesu, neʼe mole ko hana fia logo ki tana fai akonaki, kae ko tana fia ʼiloʼi papau peʼe ko tana tuʼania ʼe tonu peʼe kailoa. Mateo 10:1-5; 11:1; 14:1-12; Maleko 6:14-29; Luka 9:7-9.
▪ Koteā te tupuʼaga ʼo te pilisoniʼi ʼo Soane, pea koteā ʼaē neʼe mole loto ai ia Helote ke matehi?
▪ Neʼe feafeaʼi te lavaʼi e Helotiate ke matehi ia Soane?
▪ ʼI te ʼosi ʼo te mate ʼo Soane, he koʼe neʼe fia sio ia Helote kia Sesu?