Kapite 52

Neʼe Fafaga Faka Milakulo e Sesu Te ʼu Hahaʼi ʼe Lauʼi Afe

KO TE ʼu ʼapositolo ʼaē e toko 12 neʼe lelei tanatou fai faka mafola ʼi Kalilea. ʼI te temi leva ʼaē, ʼi te ʼosi pe ʼo te fakapogi ʼo Soane, koʼeni nātou ʼe toe liliu mai kia Sesu ʼo fakamatala ki ai te ʼu meʼa fakaofoofo neʼe hoko kia nātou. ʼI tana sio ʼaē kua nātou gaʼegaʼe pea mo te mole maʼu ʼaē ʼo honatou temi kai ʼuhi ko te feʼaluʼaki ʼa te hahaʼi, neʼe ʼui age e Sesu kia nātou: ‘Tou ʼolo ki he koga meʼa lāvaki ʼe feala ai hakotou mālōlō.’

Neʼe nātou heheka ki tonatou vaka, ʼi te koga meʼa neʼe lagi ōvi ki Kapenaume, pea nātou folau ai ki te koga meʼa ʼe lāvaki, e lagi tuʼu ʼi te potu hahake ʼo Solotane, ʼi tuʼa atu ʼo Petesaita. Kae neʼe sisio ʼihi ki tanatou mavae, pea neʼe logo ʼihi ki tona lau. Ko nātou fuli ʼaia neʼe nātou lele ʼi muʼa ʼi te kauvai pea, ʼi te tau ʼo te vaka, kua fakatalitali ia nātou ʼaē neʼe heheka ai.

ʼI tana hifo ifo ʼi te vaka, neʼe ʼofa mamahi ia Sesu ki te hahaʼi tokolahi ʼaia, koteʼuhi heʼe nātou hage ko he faga ōvi ʼe mole ʼi ai honatou tagata tauhi. Neʼe ina fakamālōlō ai foki te ʼu mahaki ia nātou pea ina kamata ai tana akonaki kia nātou te ʼu meʼa lahi.

ʼI te haʼele vave ʼo te temi, neʼe fakaōvi age te kau tisipulo ʼa Sesu kia te ia ʼo ʼui maʼa nātou: “Ko te koga meʼa nei ʼe lāvaki pea kua tei ʼosi te ʼaho; fakaliliu ia nātou, ke nātou ʼolo ki te ʼu ʼapi ʼi te ʼu tuvao pea mo te ʼu kolo liliki ʼe ōvi mai ʼo totogi ai hanatou meʼa kai.”

Kae, neʼe ʼui age e Sesu kia nātou: “Foaki age e koutou totonu kia nātou he meʼa ke nātou kai.” Pea, ʼi tana kua ʼiloʼi te meʼa ʼaē ka ina fai, neʼe fehuʼi age kia Filipo: “Ko te koga meʼa fea ʼaē ka tou ʼolo anai kiai ʼo totogi mai ai he ʼu pane ke feala ai te kakai ʼa nātou ʼaenī?”

Kia Filipo ʼe mole feala ke mafai he meʼa. Koteʼuhi, he kua ʼi ai foki te toko 5 000 tagata kua fakatahitahi, ʼo lagi feala pe ke fakalaka ʼi te toko 10 000 hahaʼi mo kapau ʼe lau ai mo te fafine pea mo te tamaliki. Koia neʼe ina tali age ai kia Sesu: “Ko he luageau tenalio moʼo totogi ʼo he ʼu foʼi pane [ko te tenalio e tahi ʼe ko te totogi ʼaia ʼo te gāue ʼi te ʼaho katoa], ʼe mole feʼauga maʼa nātou, ke feala ai hanatou maʼu takitokotahi he kiʼi moʼi pane.”

Moʼo lagi fakahā ʼo te mole feala ʼaē ʼo te fafaga ʼo te toe hahaʼi tokolahi ʼaia, neʼe ʼui age e Atelea: “ ʼE ʼi henī te kiʼi tama ʼe nofo mo ʼana foʼi pane olose e nima pea mo ʼana kiʼi ika e lua”, pea ina toe ʼui age: “Kae koteā tona ʼuhiga ki te toe hahaʼi tokolahi ʼaenī?”

ʼE tou nofo nei ʼi te temi fasiga taʼu mātala ʼo te taʼu, ʼi muʼa ʼo te Pāsikate ʼo te taʼu 32, ko te luna kua maʼuli lelei. Pea, ʼi te kole age ʼa Sesu, neʼe fakaafe e te kau tisipulo te hahaʼi ke nātou nonofo ki te luna ʼo faiʼi kūtuga ke taki toko 50 pea mo taki toko 100. ʼOsi ʼaia, pea toʼo e Sesu te ʼu foʼi pane ʼaē e nima pea mo te ʼu ika ʼaē e lua, pea hiki ake ʼona mata ki te lagi pea ina fai te tapuaki, pea ʼosi ʼaia, pea ina kamata tofitofi te ʼu foʼi pane pea mo tufatufa te ʼu kiʼi ika. Pea ina tuku age te meʼa kai ʼaia ki ʼana tisipulo, pea neʼe tufatufa e te kau tisipulo ki te hahaʼi. ʼI meʼa fakapuna’maʼuli leva, ko te hahaʼi fuli kua kakai ki tonatou makokona ʼosi!

ʼI te ʼosi ʼo te meʼa ʼaia, neʼe ʼui age e Sesu ki tana kau tisipulo: “Koutou tānaki te meʼa kai ʼaē ʼe toe, ke ʼaua naʼa maumau he meʼa.” ʼAki te ʼu toega ʼaia neʼe nātou fakafonu ʼaki te ʼu kato e 12! Mateo 14:13-21; Maleko 6:30-44; Luka 9:10-17; Soane 6:1-13.

▪ He koʼe neʼe kumi e Sesu he koga meʼa lāvaki maʼa tana kau ʼapositolo?

▪ Neʼe ʼave e Sesu tana kau tisipulo kifea, pea logope la te meʼa ʼaia he koʼe neʼe mole feala ai hanatou mālōlō?

▪ ʼI te kua ōvi mai ʼo te afiafi, neʼe uga e te kau tisipulo ia Sesu kiteā, ka neʼe feafeaʼi tana tokaga lelei ki te hahaʼi?