Kapite 66

ʼI Te Lafeti ʼo Te ʼu Tapenakulo

ʼI TE lolotoga ʼo taʼu e tolu ʼaē neʼe hoko atu ki tona papitema, neʼe logona ia Sesu. Neʼe lauʼi afe te hahaʼi neʼe mamata ki tana ʼu milakulo, pea ko te ʼu fakamatala ʼo tana ʼu gāue neʼe mafola ʼi te fenua katoa. Ko te hahaʼi ʼaē ʼe kua fakatahi nei ʼi Selusalemi ki te lafeti ʼo te ʼu Tapenakulo ʼe nātou kumi ia ia. Neʼe fefaiʼaki te fehuʼi ʼaenī: “ ʼE ʼifea koa te tagata ʼaia?”

Neʼe fai te fihi ʼo ʼuhiga mo Sesu. “ ʼE ko he tagata lelei ia”, ko te ʼui ʼaia ʼa ʼihi. “Kailoa, ʼe ina fakahēʼi te hahaʼi”, ko te fakamoʼoni age ʼaia ʼa ʼihi. Neʼe lahi te ʼu meʼa feiā neʼe femumuhuʼiʼaki lolotoga te ʼu ʼuluaki ʼaho ʼo te lafeti. Kae, neʼe mole he tahi neʼe toʼa ʼo ina fakahā fakalelei tana kau kia Sesu, ko te tuʼania ʼaē naʼa felāveʼi mo te ʼita ʼo te kau takitaki lotu faka sutea.

ʼI te vaelua ʼo te lafeti, neʼe kaku mai ai Sesu. Neʼe hake ia ki te fale lotu ʼo ōfo ai te hahaʼi ʼi tana faʼahiga akonaki fakatalakitupua. ʼI tona ʼuhiga ʼaē neʼe mole ako ia Sesu ʼi te ʼu faleako lotu, neʼe punamaʼuli ai te kau Sutea: “Neʼe ʼiloʼi feafeaʼi e te tagata ʼaenī te ʼu tohi, ia ia ʼaē neʼe mole ako ʼi te ʼu faleako?”

“Ko te meʼa ʼaē ʼe ʼau akonakiʼi ʼe mole ʼaʼaku ia, ko tona fakamahino age ʼaia e Sesu, kae ʼa ia ia ʼaē neʼe ina fekauʼi mai ʼau. Kapau ʼe fia fai e he tahi Tona finegalo, pea ʼe ina ʼiloʼi anai, ʼo ʼuhiga mo te akonaki, peʼe haʼu mai te ʼAtua peʼe ʼau palalau pe ʼau ʼi taku pule ʼaʼaku totonu.” Ko te akonaki ʼa Sesu ʼe pipiki ʼosi ki te lao ʼa te ʼAtua. Koia neʼe tonu ai foki ke mahino lelei ki te hahaʼi fuli ʼe kumi e Sesu te kolōlia ʼo te ʼAtua kae mole ko tona kolōlia ʼoʼona. “Neʼe mole foaki atu koa la kia koutou e Moisese te Lao?” ko te fehuʼi ʼaia ʼa Sesu. Moʼo valoki ʼo nātou neʼe ina toe ʼui age: “ ʼE mole he tahi ia koutou ʼe fakalogo ki te Lao.”

“He koʼe ʼe koutou faiga ke koutou matehi ʼau?” ko tana fehuʼi age ʼaia kia nātou.

Ko te hahaʼi ʼaē ʼe nātou fakalogo tana akonaki, ʼaē e lagi ko he hahaʼi haʼu neʼe ʼōmai pe ki te lafeti, ʼe mole nātou ʼiloʼi he meʼa e tahi ʼi te ʼu meʼa ʼaē ʼe fonofono kia Sesu. ʼE mata faigataʼa ki tanatou fakakaukau te manatu ʼaē ʼe fia matehi ia te tagata faiakonaki ʼiloa ʼaia. Koia neʼe nātou manatu ai ko Sesu ʼe hahaku noa. “ ʼE ʼi ai tau temonio, ko tanatou ʼui age ʼaia. Ko ai ʼaē ʼe faiga ke ina matehi ia koe?”

Peʼe mahino ki te hahaʼi peʼe kailoa, ko te kau takitaki lotu ʼo te kau Sutea ʼe nātou fakatuʼutuʼu ke matehi ia Sesu. ʼI he taʼu e tahi mo te vaelua ki muʼa atu, neʼe kua nātou ʼosi faigaʼi ai ke nātou matehi ia ia ʼi te ʼosi ʼo tana fakamālōlō te tagata ʼi te ʼaho ʼo te sapato. ʼE fakatokagaʼi age e Sesu ʼi te temi leva ʼaē te fakavale ʼo tanatou manatu ʼi tana fehuʼi age ʼaenī kia nātou: “Kapau ʼe tali e he tagata te silikosisio ʼi te ʼaho ʼo te sapato, ke ʼaua naʼa maumauʼi te lao ʼa Moisese, ʼe koutou ʼiʼita kovi koa kia te ʼau koteʼuhi neʼe ʼau fakamālōlō te tagata ʼi te ʼaho ʼo te sapato? Tuku takotou fakamāu ʼo fai ki te meʼa ʼaē ʼe hā mai, kae ke koutou fakamāu ʼaki he fakamāu ʼe tonu.”

Ko te hahaʼi ʼo Selusalemi, ʼaē ʼe nātou ʼiloʼi te ʼu meʼa ʼaia neʼe nātou fai te ʼu fehuʼi ʼaenī: “ ʼE mole koa la ko te tagata ʼaenā, ʼaē ʼe nātou faigaʼi ke matehi? Pea koʼeni ia ʼe palalau ʼi te hahaʼi, pea ʼe mole nātou ʼui age he meʼa kia te ia. Naʼa kua ʼiloʼi moʼoni koa la ia e te ʼu pule ko ia ko Kilisito?” ʼOsi ʼaia pea nātou fakamahino te tupuʼaga ʼo tanatou mole tui ko Sesu ko Kilisito: “Kae mātou ʼiloʼi te potu ʼaē ʼe haʼu mai ai te tagata ʼaenā; kae ka haʼu anai ia Kilisito, ʼe mole ʼiloʼi anai e he tahi peʼe haʼu ia maifea.”

Koʼeni te tali age ʼa Sesu: “ ʼE koutou ʼiloʼi ʼau pea ʼe koutou ʼiloʼi te potu ʼaē ʼe ʼau haʼu mai ai. Pea tahi ʼaē meʼa, neʼe mole ʼau haʼu ʼi haku tonu tokotahi neʼe ʼau fai, kae ʼe maʼuli moʼoni ia ia ʼaē neʼe ina fekauʼi mai ʼau, pea ʼe mole koutou ʼiloʼi ia ia. Ko ʼau, ʼe ʼau ʼiloʼi ia ia, koteʼuhi heʼe ko ʼau ko tana fakafofoga, pea ko Ia ʼaia neʼe ina fekauʼi mai ʼau.” ʼI tanatou logo ki te ʼu palalau ʼaia neʼe nātou faigaʼi ai ke nātou puke ia ia, ke lagi ʼave ʼo pilisoniʼi peʼe ke matehi. Kae neʼe mole nātou lavaʼi te meʼa ʼaia, koteʼuhi ko te hola ʼo te mate ʼo Sesu neʼe mole heʼeki hoko mai.

Kae, neʼe tokolahi neʼe tui kia Sesu, pea neʼe ʼi ai te ʼu tupuʼaga lelei ʼo te faʼahi ʼaia. Neʼe mole haʼele koa la ia Sesu ʼi te fuga tai, mo ina faka gona te matagi, mo fakatotofu te tai neʼe tokakovi ʼaupito, mo fafaga faka milakulo te hahaʼi ʼe lauʼi afe ʼaki te ʼu kiʼi foi pane pea mo te ʼu kiʼi ika? Neʼe mole ina toe fakamālōlō koa la te ʼu mahaki, mo fakahaʼele te ʼu ketu, mo fakaāva te ʼu mata ʼo te ʼu kivi, mo fakamālōlō te ʼu tagata kilia pea mo fakatuʼuake mo te ʼu mate? Neʼe feʼuiʼaki fēnei e te hahaʼi: “Ka haʼu anai ia Kilisito, ʼe ina fai anai koa he ʼu fakaʼiloga ʼo lahi ake ʼi te ʼu meʼa ʼaē neʼe fai e te tagata ʼaenī?”

ʼI te logo ʼa te kau Faliseo ki te muhumuhu ʼaia ʼa te hahaʼi ʼo ʼuhiga mo te ʼu meʼa ʼaia, ko nātou pea mo te kau pelepitelo pule neʼe nātou fekauʼi te kau tagata fekau ke ʼolo ʼo puke ia Sesu. Soane 7:11-32.

▪ Neʼe aʼu mai ia Sesu ki te lafeti ʼi te temi fea, pea koteā te ʼu palalau neʼe fai ʼo ʼuhiga mo ia?

▪ Koteā te tupuʼaga, ʼo te lagi ʼui ai e ʼihi ʼe ʼi ai te temonio ʼa Sesu?

▪ Koteā te manatu ia ʼa te hahaʼi ʼo Selusalemi ʼo ʼuhiga mo Sesu?

▪ He koʼe neʼe tokolahi neʼe tui kia Sesu?