Kapite 79

Ko He Fenua ʼe Faka Lākahalaʼi, Kae Mole Ko Te Hahaʼi Fuli

KO TE ʼosi pe ʼaenī ʼo te palalau ʼa Sesu ki te hahaʼi ʼaē neʼe fakatahitahi ʼi te muʼa ʼapi ʼo te Faliseo. ʼOsi pe ʼaia, pea fakamatala age ki ai ‘te meʼa ʼaē neʼe hoko ki te kau Kalilea ʼaia neʼe haga [te kovana loma ko Posio] Pilato ʼo fakatahiʼi tonatou toto mo tanatou ʼu sakilifisio’. ʼE feala pe ke fakamahalo ko te kau Kalilea ʼaia neʼe matematehi ʼi te temi ʼaē neʼe tala mālohi ai e te hahaʼi ʼe lauʼi afe ʼi te kau Sutea ʼe mole nātou leleiʼia te laga ʼo he haʼuʼaga vai ke ina ʼave te vai ki Selusalemi, koteʼuhi neʼe fakaʼaoga e Pilato te ʼu paʼaga ʼo te fale lotu ki te gāue ʼaia. Ko te hahaʼi ʼaē neʼe nātou fakamatala te ʼu meʼa ʼaia kia Sesu ʼe hage ia kia nātou neʼe tō te malaʼia ʼaia ki te kau Kalilea ʼuhi ko tanatou ʼu aga kovi.

Kae neʼe fakatonutonuʼi tanatou faihala e Sesu ʼo ina fai age kia nātou te fehuʼi ʼaenī: “ ʼE koutou manatu koa la koutou ko te kau Kalilea ʼaia ʼi te fai ʼo te meʼa ʼaia kia nātou, ʼe hā ʼaki ai ko nātou ko te kau agahala e lahi ake ʼi te kau Kalilea fuli?” “Kailoa”, ko tana ʼui age ʼaia, pea neʼe ina fakaʼaogaʼi ai te faigamālie ʼaia ʼo ina fai ki te kau Sutea te fakatokaga ʼaenī: “Kapau ʼe mole koutou fakahemala, pea ʼe toe fakaʼauha fuli feiā pe anai mo koutou.”

ʼOsi ʼaia pea talanoa ia Sesu ki te tahi tuʼutāmaki neʼe hoko ʼi te fenua, neʼe lagi hoko pe ʼi te temi ʼaē neʼe laga ai te haʼuʼaga vai pe ʼaia: “Peʼe ko te toko hogofulu-ma-valu, ʼaē neʼe tō kiai te tule ʼo Siloame, pea ina matematehi ia nātou, ʼi takotou manatu neʼe ko he kau agahala koa la ia e lahi ake ʼi te kau tagata fuli ʼaē ʼe nonofo ʼi Selusalemi?” Kailoa, neʼe mole mamate te hahaʼi ʼaia ʼuhi ko tanatou agakovi, ko tona fakamahino age ʼaia e Sesu. ʼE ko te ‘ ʼu temi pea mo te ʼu faʼahiga meʼa fakapuna’maʼuli’ ia ʼaē ʼe tonu ke tukugakoviʼi mokā hoko te ʼu faʼahiga tuʼutāmaki ʼaia. Kae, neʼe toe fai age e Sesu te fakatokaga ʼaenī: “Kae kapau ʼe mole koutou fakahemala, pea ʼe toe fakaʼauha fuli feiā pe anai mo koutou.”

ʼOsi ʼaia pea fai e Sesu te lea fakatātā ʼe feʼauga lelei mo nātou: “Ko he tahi neʼe ʼi ai tona fuʼu fiku neʼe to ʼi tana vite, pea neʼe ʼalu ia kiai ʼo kumi he ʼu fuaʼi fiku kae neʼe mole ina maʼu. Pea neʼe ina ʼui age ai ki te tagata gāue vite: ‘Kua katoa nei taʼu e tolu mo taku haʼu ʼo kumi age he ʼu fua ʼo te fuʼu fiku ʼaenī, pea ʼe mole ʼau maʼu. Taʼaga koe ki lalo! Koteā te tupuʼaga anai ʼo tana haga faka gaohaʼa te kele ka mole hona ʼuhiga?’ Neʼe tali age e te tagata gāue vite kia te ia: ‘Pule, toe tuku muʼa ke tuʼu te fuʼu fiku ʼi te taʼu ʼaenī, ʼo aʼu ki taku keli ʼona tafaʼaki pea mo ʼau ʼai kiai he meʼa fakagakokele; pea kapau leva ʼe fua ki muli age, pea ʼe ko he meʼa lelei ia; pea kapau ʼe mole fua, pea ʼe hoki ke taʼaga ai leva.’ ”

Lolotoga taʼu e tolu tupu neʼe faigaʼi e Sesu te gāueʼi ʼo te tui ke tupu ʼi te kau Sutea. Kae ko te fua ʼo tana gāue neʼe ko he ʼu tisipulo pe ʼe lauʼi teau tona hahaʼi. ʼI tana kua aʼu leva ki te taʼu fā ʼo tona minisitelio, neʼe toe makehe ake tana faiga, ohage, ʼe ina keli pea mo ʼai kiai te meʼa fakagakokele ʼi te ʼu tafaʼaki ʼo te fuʼu fiku faka sutea, ʼo fai faka mafola pea mo akonaki ʼaki tona loto katoa ʼi Sutea pea mo Pele. Kae neʼe kinakina noa ʼi te gāue. Neʼe mole fia fakahemala te fenua, ʼo tonu ai ke fakaʼauha. Neʼe ko te tokosiʼi pe ia ʼo te fenua ʼaia neʼe fia logo kia Sesu.

ʼOsi pe ʼaia, pea fai akonaki ia Sesu ʼi te sinakoka, ʼi te ʼaho ʼo te sapato. Neʼe ʼi ai foki te fafine, neʼe gaohi koviʼi e te temonio, ʼo tuʼa piko talu mai ia taʼu e 18. Fonu ʼi te manavaʼofa, neʼe ʼui age e Sesu ki ai: “Fafine, kua faka ʼāteaina koe mai tou mahaki”, pea ina hili ʼona nima ki te fafine. ʼI te temi pe ʼaia, neʼe tuʼu tonu ai te fafine pea faka kolōlia ai ki te ʼAtua.

Kae neʼe ʼita ai foki te pelesitā ʼo te sinakoka. “Ko ʼaho e ono ʼe tonu ke tou gāue ai, ko tana muna age ʼaia; koutou ʼōmai ke fakamālōlōʼi koutou ʼi te ʼu ʼaho ʼaia, kae ʼaua tona fai ʼi te ʼaho ʼo te sapato.” Neʼe ʼiloʼi e te tagata ʼaia ko Sesu ʼe ina maʼu te mālohi moʼo fakamālōlō ʼo te ʼu faʼahiga mahaki kehekehe, kae ʼe mole ina leleiʼia te hahaʼi ʼaē ʼe ʼōmai ke fakamālōlō ia nātou ʼi te ʼaho ʼo te sapato!

“Kau malualoi! ko te tali age ʼaia ʼa Sesu, ʼi te ʼaho ʼo te sapato, ʼe mole koa la koutou veteki takitahi e koutou tana vitulo pe ko tana asino mai te fale manu ʼo ʼave ʼo faka ʼinu? Pea ko te fafine ʼaenī, ʼaē ko te ʼofafine ʼo Apalahamo ʼaē neʼe haʼi e Satana ia taʼu e hogofulu-ma-valu, ʼe mole tonu koa la ia ke veteki ia ia mai te haʼi ʼaia ʼi te ʼaho ʼo te sapato?”

ʼI tanatou logo ki te meʼa ʼaia, neʼe ufiufi ai te ʼu fili ʼo Sesu, kae neʼe fakafiafia te hahaʼi ʼo ʼuhiga mo te ʼu meʼa fakatalakitupua fuli neʼe nātou sisio kiai. Neʼe ina toe fai age te ʼu lea fakatātā faka polofeta e lua ʼo ʼuhiga mo te Puleʼaga ʼo te ʼAtua, te ʼu lea fakatātā ʼaē pe neʼe ina fai ʼi te taʼu kua hili atu, ʼaē neʼe ina fai mai te vaka, ʼi te tai ʼo Kalilea. Luka 13:1-21; Tagata Tānaki 9:11; Mateo 13:31-33.

▪ Ko te ʼu tuʼutāmaki fea ʼaē neʼe hoko ʼaē ʼe talanoa ai ʼi henī, pea koteā te ako ʼe fakahā mai ai e Sesu?

▪ Koteā te fakaʼaoga ʼe feala ke fai kiai te lea fakatātā ʼo te fuʼu fiku ʼaē mole hona ʼu fua pea mo te ʼu meʼa ʼaē neʼe fai ke maʼu ai hona ʼu fua?

▪ Neʼe feafeaʼi te fakahā e te pelesitā ʼo te sinakoka ʼe ina ʼiloʼi te maʼu ʼaē e Sesu te mālohi moʼo fakamālōlō ʼo te ʼu mahaki, kae neʼe feafeaʼi te fakahā e Sesu te malualoi ʼo te tagata ʼaia?