Kapite 81

Ko Te Toe Faigaʼi Ke Matehi Ia Sesu

KO TE temi nive. ʼE feʼaluʼaki ia Sesu ʼi te fakaheketālaʼa ʼo te fale lotu ʼaē ʼe fakahigoa ko te fua pou ʼo Salomone. ʼI te faʼahi ʼaia, neʼe ʼa takatakai ia ia e te kau Sutea pea nātou ʼui age ki ai: “ ʼE aʼu koa ki ʼafea tau tuku ʼomātou nefesi ke nofo ʼi te lotolotolua? Kapau ko koe ko Kilisito, fakahā fakahagatonu mai.”

“Neʼe kua ʼosi ʼau ʼui atu, ko te tali age ʼaia ʼa Sesu, kae neʼe mole koutou tui.” Ko Sesu, ʼe moʼoni, neʼe mole ina fakahā fakahagatonu age ko ia ko Kilisito, ohage ko tana ʼui age ki te fafine Samalitana ʼi te vai keli. Kae, neʼe ina fakahā age pe ko ai ia ia ʼaki tana fakamahino age kia nātou, ʼe haʼu ia mai te ʼu potu fenua ʼi ʼoluga, pea neʼe tupu ia ʼi muʼa ʼo te tupu ʼa Apalahamo.

Neʼe loto ia Sesu ke mahino ki te hahaʼi ko ia totonu ko Kilisito ʼaki hanatou faka ʼalutahi tana ʼu gāue pea mo te ʼu gāue ʼaē, neʼe tuʼu ʼi te Tohi-Tapu, ʼaē ʼe tonu ke fai e Kilisito. Koʼena la te tupuʼaga ʼaē ʼo tana ʼui age ki tana ʼu tisipulo ke ʼaua naʼa nātou fakahā ki he tahi ko ia ko Kilisito. Pea ko te tupuʼaga foki ʼaia ʼo tana toe ʼui age ki te kau Sutea agakovi ʼaia: “Ko te ʼu gāue ʼaē ʼe ʼau fai ʼaki te huafa ʼo taku Tāmai, ko te ʼu gāue ʼaia ʼe fakamoʼoni kia te ʼau. Kae ʼe mole koutou tui koutou.”

He koʼe neʼe mole tui te kau Sutea? Neʼe mole feʼauga koa la he ʼu fakamoʼoni ko Sesu ʼe ko ia ko Kilisito totonu? Neʼe feʼauga pe, kae neʼe fakahā age e Sesu te tupuʼaga moʼoni ʼaē ʼo tanatou mole tui: “ ʼE mole ko haku ʼu ōvi ia koutou. ʼE fagono taku ʼu ōvi ki toku leʼo, pea ʼe ʼau ʼiloʼi ia nātou, pea ʼe nātou muli ia te ʼau. Pea ʼe ʼau foaki age kia nātou te maʼuli heʼegata, pea ʼe mole fakaʼauha anai ia nātou, kailoa, — pea ʼe mole he tahi ʼe ina faʼao anai ia nātou ʼi ʼoku nima. Ko te meʼa ʼaē neʼe foaki mai kia te ʼau e taku Tāmai ʼe ko he meʼa e lahi ake ia ʼi te tahi ʼu meʼa, pea ʼe mole he tahi ʼe feala ke ina faʼao mai te nima ʼo taku Tāmai.”

ʼOsi ʼaia pea fakamahino age e Sesu te ʼu felogoi lelei ʼaē ʼe fakatahi ai mo tana Tāmai: “Ko ʼau pea mo te Tāmai, ʼe ma tahi pe.” Neʼe mole ina ʼui mai ia ʼi henī ko ia, ʼaē ʼe nofo ʼi te kele, pea mo tana Tāmai, ʼaē ʼi selo, ko nāua ʼe ko he tokotahi pe ia. ʼE ina fakahā mai ia ʼe tatau tanā fakatuʼutuʼu, ʼe nā logo tahi.

Ko tana ʼu palalau ʼaia neʼe fakatupu ʼaki ai te ʼiʼita ʼo te kau Sutea, ʼonatou tae ai te ʼu maka ke tuki makaʼi ʼaki, ohage ko te meʼa neʼe kua hoko lolotoga te lafeti ʼo te ʼu Tapenakulo, peʼe ko te ʼu Fale lau. ʼAki te lototoʼa, neʼe tali age e Sesu kia nātou ʼaē ʼe nātou fia matehi ia ia: “Kua lahi te ʼu gāue matamatalelei mai taku Tāmai neʼe kua ʼau fakahā atu kia koutou. Ko te gāue fea ʼi te ʼu gāue ʼaia ka koutou tuki makaʼi ai ʼau?”

“ ʼE mole mātou tuki makaʼi koe, ʼuhi ko he gāue matalelei neʼe ke fai, ko te tali age ʼaia ʼa te kau Sutea, kae ʼo ʼuhiga mo tau laukovi ki te ʼAtua, ʼio, koteʼuhi ko koe, logope ko koe ko te tagata, kae ʼe ke fakaʼatuaʼi ia koe.” He koʼe ʼe nātou palalau feiā, kae neʼe mole heʼeki he manatu feiā ʼa Sesu?

Koteʼuhi ʼe hage ia kia nātou, neʼe ʼui e Sesu ʼe ina maʼu te ʼu mālohi, kae ʼi te manatu ʼo tona ʼu fili, ʼe tau pe ia mo te ʼAtua. Neʼe hoki ʼosi ifo pe nei tana talanoa ki tana “faga ōvi”: “ ʼE ʼau foaki kia nātou te maʼuli heʼegata”, ko te meʼa ʼaia ʼe mole feala ke fai e he tagata. Kae neʼe galo ki te kau Sutea te fakamahino ʼaē e Sesu ko tona mālohi neʼe ina maʼu mai tana Tāmai.

ʼAki he fehuʼi, neʼe fakahā lelei ai e Sesu ʼe mālalo ia ʼi te ʼAtua. Neʼe ina fehuʼi age: “Neʼe mole tohi koa la ia ʼi takotou Lao [ia Pesalemo 82:6]: ‘Neʼe ʼau ʼui: “Ko koutou ko te ʼu ʼatua” ’? Kapau neʼe ina fakahigoaʼi ko te ‘ ʼu ʼatua’ ia nātou ʼaē neʼe haʼu ki ai te folafola ʼa te ʼAtua, (...) ʼe koutou ʼui mai koa la koutou, kia te ʼau ʼaē neʼe tāpuhā e te Tāmai pea mo fekauʼi mai ki te mālama: ‘ ʼE ke laukovi ki te ʼAtua’, koteʼuhi neʼe ʼau ʼui: Ko ʼau ko te ʼAlo ʼo te ʼAtua?”

Kapau neʼe fakahigoaʼi e te Tohi-Tapu te ʼu tagata tuʼi fakamāu heʼe faitotonu ko te ʼu “ ʼatua”, ko te lākahala fea ia ʼaē ʼe maʼu e te kau Sutea ia Sesu, ʼi tana ʼui pe ʼaē: “Ko ʼau ko te ʼAlo ʼo te ʼAtua”? Neʼe toe ʼui age e Sesu: “Kapau ʼe mole ʼau fai te ʼu gāue ʼa taku Tāmai, ʼaua naʼa koutou tui mai kia te ʼau. Kae kapau ʼe ʼau fai, tatau aipe peʼe mole koutou tui mai kia te ʼau, kae kehe pe la ke koutou tui ki te ʼu gāue, koteʼuhi ke koutou ʼiloʼi ai pea mo koutou haga faka tui ai ko te Tāmai ʼe logo tahi mo ʼau pea ʼe ʼau logo tahi mo te Tāmai.”

ʼI tanatou logo ki te meʼa ʼaia, neʼe faiga te kau Sutea ke nātou puke ia ia, kae neʼe hola ia, ohage ko te meʼa ʼaē neʼe hoko lolotoga te lafeti ʼo te ʼu Tapenakulo. Pea mavae ai ʼi Selusalemi pea ʼalu ia ki te tahi kauvai ʼo Solotane, ʼaia neʼe kamata fai papitema ai ia Soane kua teitei ʼosi ki ai taʼu e fā. Ko te koga meʼa ʼaia, e lagi tuʼu ōvi ki te kauvai ʼi te potu toga ʼo te tai ʼo Kalilea, e ʼaho lua te ʼalu lalo kiai mai Selusalemi.

Tokolahi te hahaʼi neʼe ʼōmai kia Sesu ʼi te koga meʼa ʼaia pea nātou fakamoʼoni ki te meʼa ʼaenī: “Ko Soane ʼe moʼoni neʼe mole ina fai he fakaʼiloga, kae ko te ʼu meʼa fuli ʼaē neʼe talanoa ki ai ia Soane ʼo ʼuhiga mo te tagata ʼaenī neʼe moʼoni ia.” Pea ʼi te koga meʼa ʼaia, neʼe tokolahi te hahaʼi neʼe tui kia te ia. Soane 10:22-42; 4:26; 8:23, 58; Mateo 16:20.

▪ Neʼe loto ia Sesu ke ʼiloʼi feafeaʼi e te hahaʼi ko ia ko Kilisito?

▪ Koteā te faka ʼuhiga ʼo te ʼui ʼaē ko Sesu mo tana Tāmai e nā tahi?

▪ He koʼe neʼe ʼui e te kau Sutea ko Sesu ʼe ina fakaʼatuaʼi ia ia totonu pe?

▪ Neʼe fakahā feafeaʼi e Sesu, ʼaki tana lau te ʼu Pesalemo, neʼe mole ina lau ʼe tatau ia mo te ʼAtua?