Kapite 84

Ko Te Maʼua ʼo He Tisipulo

ʼI TANA ʼosi mavae ʼi te ʼapi ʼo te Faliseo ʼiloa, ʼaē e lagi ko he tagata ʼe kau ʼi te Sanetualio, neʼe toe hoko atu te fagona ʼo Sesu ki Selusalemi. E tokolahi te hahaʼi ʼe nātou muli ia te ia. Kae koteā koa te tupuʼaga ʼo tanatou muli ai? Ko he liliu ko he tisipulo moʼoni ʼa Sesu, koteā koa tona faka ʼuhiga?

ʼI tanatou fagona ʼi te ala, neʼe maliu ia Sesu ki te hahaʼi pea ina ʼui age kia nātou te ʼu palalau ʼaenī ʼo lagi matamatakovi ʼaupito kia nātou: “Kapau ʼe haʼu he tahi kia te ʼau kae ʼe mole fehiʼa ki tana tāmai, pea mo tana faʼe, pea mo tona ʼohoana, pea mo tana fānau, pea mo tona ʼu tēhina, pea mo tona ʼu tuagaʼane, ʼo aʼu ai foki ki tona nefesi totonu ʼo ia, ʼe mole feala ia ke liliu ko haku tisipulo.”

Koteā te faka ʼuhiga ʼo te palalau ʼa Sesu? Neʼe mole ʼui mai e Sesu ʼi henī ʼe tonu ke fehiʼa moʼoni tana kau tisipulo ki te ʼu hahaʼi ʼo tonatou famili, kae ko te fehiʼa ʼaē kia nātou ko tona faka ʼuhiga ʼe tonu ke veliveli tonatou ʼofa ʼaē kia nātou ʼi tonatou ʼofa ʼaē kia te ia. Ohage la, neʼe ʼui fēnei ʼo ʼuhiga mo Sakopo, ʼaē ko te kui ʼa Sesu, neʼe ‘fehiʼa’ ia Lea ka neʼe ʼofa ia Lasele. ʼI tona tahi faʼahiga ʼui, neʼe veliveli te ʼofainaʼi ʼaē ʼo Lea ʼi tona tēhina ko Lasele.

Tou toe fakatokagaʼi foki neʼe ʼui e Sesu ko he tisipulo ʼe tonu ke fehiʼa “ ʼo aʼu ai foki ki tona nefesi totonu ʼo ia”, peʼe ko tona maʼuli. ʼE toe feiā pe ʼi te faʼahi ʼaia, neʼe ina fia fakahā ko he tisipulo moʼoni ʼe tonu ke ʼofa kia te ia ʼo lahi ake ʼi tona maʼuli totonu ʼo ia. Koia, ʼe fakamahino lelei mai e Sesu, ʼe ko he maʼua mamafa ia te liliu ko hana tisipulo. ʼE mole ko he tonu ia ke fai ka mole fakakaukauʼi lelei.

Ko te liliu ʼaē ko he tisipulo ʼa Sesu, ʼe ko he fakafetaulaki anai ia mo he ʼu faigataʼaʼia pea mo he ʼu fakataga: “Ko ʼaē ʼe mole ina fua tona pou fakamamahi pea mo haʼu ʼo mulimuli ia te ʼau ʼe mole feala ia ke liliu ko haku tisipulo.” Koia, ko he tisipulo moʼoni ʼe tonu ke ina tali lelei te fua ʼo te kavega manukinuki ʼaē neʼe fua e Sesu, te manukinuki ʼaē ʼe feala mo kapau ko he meʼa ʼe ʼaoga ke aʼu ki te mate ʼi te ʼu nima ʼo te ʼu fili ʼo te ʼAtua, pea ʼe ko te meʼa ʼaia ka hoko anai kia Sesu.

ʼO ʼuhiga mo te faʼahi ʼaia, ko te hahaʼi ʼaē ʼe mulimuli ia Kilisito ʼe ʼaoga ke nātou sivi fakaleleiʼi te faka ʼuhiga ʼaē ʼo te liliu ko hana tisipulo. Neʼe toe fakahā fakamālohiʼi e Sesu te manatu ʼaia ʼaki te lea fakatātā. “Koia, ko ai he tahi ia koutou mo kapau ʼe ina fia laga he tule, ʼe mole nofo ifo muʼa ki lalo ʼo lau te paʼaga ka puli anai ki ai pea mo vakaʼi peʼe maʼu hana meʼa moʼona fakaʼosi ʼaki? Koteʼuhi, ʼe feala pe anai hana fakatuʼu te ʼu tafito ka mole ina lavaʼi hona fakaʼosi, pea ko te ʼu hahaʼi ʼaē ʼe nātou mamata ki te meʼa ʼaia ʼe nātou kamata manuki anai kia te ia, ʼo ʼui maʼa nātou: ‘Ko te tagata ʼaenī neʼe ina kamata fakatuʼu, kae neʼe mole ina lavaʼi tona fakaʼosi.’ ”

Ohage ko te fakamahino ʼaē e Sesu ki te hahaʼi ʼaē neʼe muli ia te ia, ʼi muʼa ʼo hanatou liliu ko hana ʼu tisipulo ʼe tonu ke nātou fakapapau fakamālohi ʼi tonatou loto ʼe nātou fai anai te ʼu maʼua ʼo te tisipulo, ohage pe ko he tagata ʼe ina fia fakatuʼu hona tule, ʼi muʼa ʼo tona kamata, ʼe ina fakasiosio lelei muʼa peʼe feʼauga tana falā moʼo fakaʼosi ʼo tana gāue. ʼOsi ʼaia pea toe fai age e Sesu te tahi lea fakatātā:

“Peʼe ko te hau fea, mo kapau ʼe ʼalu ʼo fakafetaulaki ki he tahi ke ina tauʼi, ʼe mole heka ifo muʼa ki lalo ʼo fono pea mo vakaʼi peʼe feala ʼaki he toko hogofulu afe tagata, hana tauʼi ia ia ʼaē ʼe fakafetaulaki mai kia ia mo te toko ʼuafulu afe? Pea kapau ʼe mole feala, pea ʼi te kei mamaʼo ʼo te tahi hau, ʼe ina fekauʼi ai leva he kau fakafofoga ke nātou ʼolo ʼo kole te tokalelei.”

Neʼe toʼo kehe mai e Sesu te ako ʼe maʼu mai ʼi te ʼu lea fakatātā ʼaia ʼaki te ʼu palalau ʼaenī: “Koia, ko ʼaē ia koutou ʼe mole tauʼinē ki te ʼu meʼa fuli ʼaʼana, ʼe mole pe feala ke liliu ko haku tisipulo.” Koʼena la te meʼa ʼaē ʼe tonu ke tali e te hahaʼi ʼaē ʼe muli ia te ia pea, mo nātou fuli pe ʼaē ka nātou ʼiloʼi anai ia Kilisito. ʼE tonu ke nātou lotolelei ki te sakilifisioʼi ʼo tanatou ʼu meʼa fuli — te ʼu meʼa fuli ʼe nātou maʼu ʼo aʼu aipe la ki tonatou maʼuli — mo kapau ʼe nātou fia liliu ko hana ʼu tisipulo. ʼE feala koa ke koutou fai te ʼu sakilifisio ʼaia?

“ ʼE moʼoni, ʼe lelei, ia te māsima”, ko te hoko atu ʼaia ʼo te palalau ʼa Sesu. ʼI tana Akonaki ʼaē ʼi te moʼuga, neʼe ina ʼui ai ko tana kau tisipulo ʼe ko “te māsima ʼo te kele”, mai tona ʼuhiga ʼaē, ko te māsima ʼe ko he meʼa fakatologa, ko tanatou ʼu palalau ʼe feala ke fakatologa ai te maʼuli ʼonatou ʼaē ʼe fagono kia nātou. “Kae kapau ko te māsima ʼe puli tona konakona, ko tana ʼui age fakaʼosi ʼaia, koteā anai te meʼa ia ʼaē ka konakonaʼi ʼaki? ʼE mole kei lelei ia ki te kele peʼe ki te fakagakokele. ʼE lī ia ki tuʼa. Ko ʼaē ʼe ʼi ai hona ʼu taliga moʼo logo, ke logo ia!”

Neʼe fakahā ai e Sesu e māʼiape la mo nātou ʼaē ko tana ʼu tisipulo kua fuafualoa ʼe mole tonu ke nātou vaivai ʼi tanatou fakapapau ʼaē ke nātou haga haʼele ʼi te ala ʼaia. Kae kapau ʼe hoko te faʼahi ʼaia, pea ʼe mole toe ʼi ai leva honatou ʼaoga, ʼo nātou liliu ko he ʼu meʼa vāʼi e te mālama pea mo heʼe tau ia mata ʼo te ʼAtua, ko he meʼa manukinuki ki te ʼAtua. Ohage ko te māsima ʼaē mole kei konakona pea kua ʼulihi, ʼe laku anai ia nātou ki tuʼa, ʼe fakaʼauha anai ia nātou. Luka 14:25-35; Senesi 29:30-33; Mateo 5:13.

▪ Koteā te faka ʼuhiga ʼo te ʼui ʼaē ke “fehiʼa” ki tana ʼu mātuʼa pea mo ‘fehiʼa’ kia kita totonu?

▪ Neʼe fakaʼaogaʼi e Sesu te ʼu lea fakatātā e lua. Koteā te ʼu lea fakatātā ʼaia pea koteā koa tonā faka ʼuhiga?

▪ Koteā te ako ʼe maʼu mai ʼi te ʼu fakatokaga fakamuli ʼa Sesu ʼo ʼuhiga mo te māsima?