Kapite 87

Teuteuʼi Tokotou Maʼuli Ki Te Temi Ka Haʼu ʼAki Te Poto ʼAē ʼe ʼAoga

KO TE hoki ʼosi pe ʼaenī ʼo te fakamatala e Sesu te hisitolia ʼo te foha maumau koloā ki te hahaʼi tokolahi, neʼe faʼufaʼu ʼaki tana kau tisipulo, te kau tānaki tukuhau aga kākā pea mo te kau agahala ʼaē kua ʼiloʼi māhani, ʼo kau ai mo te kau sekelipa pea mo te kau Faliseo. ʼI te temi nei ʼe palalau ia ki tana kau tisipulo pea ʼe ina fai age kia nātou te tahi lea fakatātā: ʼo ʼuhiga mo te tagata neʼe logo ki he fakamatala ʼe mole lelei ʼo ʼuhiga mo te tagata pule ʼo tona ʼu koloā, tana tagata taupau koloā.

Ko te tagata maʼu koloā, ko te ʼui ʼaia ʼa Sesu, neʼe ina pāui tana tagata taupau koloā pea ina fakahā age ki ai ʼe ʼamanaki kapu ia. “Koteā te meʼa ke ʼau fai, ko tana ʼui ʼaia ʼi tona loto, heʼe ko toku pule ka ina toʼo ia te ʼau te taupau ʼo tona ʼu koloā? Ke ʼau laga kele? ʼE mole ʼau lavaʼi; ke ʼau kainono? ʼE ʼau ufiufi. Â! ʼe ʼau ʼiloʼi te meʼa ʼaē ka ʼau fai, mokā hoko mai te temi ʼaē ʼe toʼo ai ia te ʼau te taupau ʼo tona ʼu koloā, ke tali ai ʼau e niʼihi ʼi ʼonatou ʼapi.”

Kae koteā koa te fakatuʼutuʼu ʼa te tagata taupau koloā ʼaia? Neʼe ina pāui te hahaʼi ʼaē ʼe tuʼu maʼua ki tona pule. “E fia tou maʼua?” ko tana fehuʼi ʼaia ki te ʼuluaki.

‘Ko lite lolo oliva e 2 200’, ko te tali age ʼaia ʼa te tagata ki ai.

‘Toe toʼo tou maʼua ʼaē kua tohi, pea ke heka, pea ke foimo tohi ko lite e 1 100’, ko tona ʼui age ʼaia ki ai e te tagata taupau koloā.

Pea ina fehuʼi age ki te tahi: “Pea ko koe, e fia tou maʼua?”

‘Ko lite fulumeto e 22 000.’

‘Toe toʼo tou maʼua ʼaē kua tohi, pea ke tohi ko te 18 000.’

ʼE feala ki te tagata taupau koloā tana fakahifo te lahi ʼo te ʼu maʼua ʼaē ki tona pule, heʼe ʼi te temi ʼaia ʼe kei ina taupau tona ʼu koloā. ʼI tana fai te meʼa ʼaia, neʼe ina fai tona ʼu kaumeʼa ʼaki ia nātou ʼaē ʼe feala ke tokoni anai kia ia ʼi te temi ʼaē ka mavae ai anai ʼi tana gāue.

ʼI te fakahā ki ai ʼo te meʼa ʼaia, neʼe punamaʼuli ai te tagata pule, ʼo tupu ai tana ‘vikiviki te tagata taupau koloā, — kae ʼe heʼe faitotonu foki la ia, — koteʼuhi he neʼe ina fai ia ʼaki te poto ʼaē ʼe ʼaoga’. Koia neʼe toe ʼui ai e Sesu: “Ko te ʼu foha ʼo te tuʼu ʼaenī ʼe popoto age nātou ʼi te fai puleʼaki ki tonatou taʼiake ʼi te ʼu foha ʼo te mālama.”

ʼE toʼo mai leva e Sesu ʼi te temi nei te ako mai te lea fakatātā ʼaia maʼa tana kau tisipulo. Neʼe ina fai age kia nātou te fakaloto mālohi ʼaenī: “Koutou fai hokotou ʼu kaumeʼa ʼaki te ʼu koloā heʼe faitotonu, koteʼuhi ke hoko mai la te temi ʼaē ʼe puli ai te ʼu koloā ʼaia, pea ʼe feala ke nātou tali koutou ʼi te ʼu nofoʼaga heʼegata.”

Neʼe mole vikiʼi e Sesu te tagata taupau koloā ʼuhi ko tana heʼe faitotonu, kae ʼo ʼuhiga mo tana fakafuafua fakatomuʼa, mo tona poto ʼaē ʼe ʼaoga. Ko te meʼa ʼe tautau hoko, “ko te ʼu foha ʼo te tuʼu ʼaenī” ʼe nātou faiva ʼi te fakaʼaogaʼi ʼo tanatou falā peʼe ko tonatou tuʼulaga moʼo faigaʼi ke nātou maʼu ai honatou ʼu kaumeʼa ʼe feala ke nātou toe tokoni age kia nātou ʼi he tahi temi. Ko te kau kaugana ʼa te ʼAtua, “te ʼu foha ʼo te mālama”, ʼe tonu foki ke nātou toe fakaʼaogaʼi mo nātou ʼaki he poto ʼonatou ʼu koloā fakamālama, tonatou “ ʼu koloā heʼe faitotonu”, ke feala ai hanatou maʼu he ʼu lelei.

Kae, ʼi te ʼui ʼa Sesu, ʼe tonu ke nātou fakaʼaogaʼi te ʼu koloā ʼaia ke maʼu ai honatou ʼu kaumeʼa ia nātou ʼaē ʼe feala ke nātou tali ia nātou “ ʼi te ʼu nofoʼaga heʼegata”. Ki te kiʼi faga ōvi, ko te ʼu nofoʼaga ʼaia ʼe ʼi selo; kae ki te “tahi ʼu ōvi”, ko te Palatiso ʼi te kele. Kapau ko Sehova ʼAtua pe pea mo tona ʼAlo ʼe feala ke nā tali tatou ʼi te ʼu nofoʼaga ʼaia, pea ʼe tonu ke tou faigaʼi ke tou kaumeʼa mo nāua ʼo fakaʼaogaʼi totatou ʼu “koloā heʼe faitotonu”, he faʼahiga koloā pe, moʼo lagolago ki te ʼu meʼa ʼaē ʼe ʼaoga ki te Puleʼaga. Ka ʼosi anai te ʼu koloā fakamālama ʼaia peʼe puli anai, ko te meʼa ʼaia ʼe hoko anai, ko totatou maʼuli heʼegata ʼi te temi ka haʼu ʼe kua ʼosi ʼiloʼi papau anai ia.

Neʼe hoko atu te palalau ʼa Sesu ʼo ʼui fēnei ko nātou ʼaē neʼe agatonu ʼi te ʼu kiʼi meʼa veliveli ʼaia, te ʼu koloā fakamālama, ʼe nātou toe agatonu anai ʼi te ʼu meʼa ʼaē ʼe maʼuhiga ake. Pea neʼe ina toe ʼui age: “Kapau neʼe mole koutou agatonu ʼo ʼuhiga mo te ʼu koloā heʼe faitotonu, ko ai ʼaē ka ina foaki atu anai te meʼa ʼaē ʼe moʼoni [te ʼu meʼa fakalaumālie ʼaē ʼe ʼaoga, ʼi tona tahi faʼahiga ʼui ko te ʼu meʼa ʼaē ʼe ʼaoga ki te Puleʼaga]? Pea kapau neʼe mole koutou agatonu ʼo ʼuhiga mo ni meʼa ʼa he tahi kehe [te ʼu meʼa ʼaē ʼe ʼaoga ki te Puleʼaga ʼaē neʼe foaki e te ʼAtua ki tana kau kaugana], ko ai ia ʼaē ka ina foaki atu anai te meʼa ʼaē maʼa koutou [te fakapale ʼaē ko te maʼuli ʼi te ʼu nofoʼaga heʼegata]?”

ʼE mole feala ʼaupito hatatou liliu ko he kau kaugana moʼoni ʼa te ʼAtua pea mo kaugana ki te ʼu koloā heʼe faitotonu, te ʼu koloā fakamālama. Neʼe ko te manatu ʼaia ʼaē neʼe fakaʼosi ʼaki e Sesu tana palalau ʼo ʼui maʼana: “ ʼE mole he tagata kaugana ʼe feala ke kaugana ki he ʼu pule e lua; koteʼuhi heʼe fehiʼa anai ia ki he tahi kae ʼofa ia ki te tahi, peʼe pipiki anai ia ki he tahi kae ina vaʼiganoaʼi ia te tahi. ʼE mole feala hakotou kaugana ki te ʼAtua pea mo te ʼu Koloā.” Luka 15:1, 2; 16:1-13; Soane 10:16.

▪ Neʼe feafeaʼi te faiga ʼa te tagata taupau koloā ʼo te lea fakatātā ʼa Sesu ke maʼu hona ʼu kaumeʼa ia nātou ʼaē ʼe feala ke nātou tokoni anai kia ia ʼi he temi ki muli age?

▪ Koteā te ʼu “koloā heʼe faitotonu”, pea e feafeaʼi hatatou fakaʼaogaʼi ke maʼu ai hotatou ʼu kaumeʼa?

▪ Ko ai ʼaē ʼe feala ke ina tali tatou ʼi te “ ʼu nofoʼaga heʼegata”, pea koteā te ʼu nofoʼaga ʼaia?