Kapite 95

Te ʼu Ako ʼo ʼUhiga Mo Te Mavete ʼOhoana Pea Mo Te ʼOfa Ki Te Fānau

KO SESU pea mo tana kau tisipulo ʼe nātou ʼolo ki Selusalemi ʼo kau ki te Pāsikate ʼo te taʼu 33. Neʼe nātou ʼi Solotane pea nātou muliʼi te ala ʼaē ʼe fakalaka ʼi te tisitilike ʼo Pele. Neʼe nofo Sesu ʼi te potu fenua ʼaia ʼi he ʼu vāhaʼa ki muʼa atu, ʼo aʼu ki te temi neʼe koleʼi ai ke haʼu ki Sutea koteʼuhi heʼe mahaki tona kaumeʼa ʼaē ko Lasalo. Pea, ʼi te temi ʼaia, neʼe fai palalau ia ia mo te kau Faliseo ʼo Pele ʼo ʼuhiga mo te mavete ʼohoana, pea ʼi te temi nei kua nātou toe palalau ki te meʼa ʼaia.

ʼI te kau Faliseo, ʼe ʼi ai te ʼu faʼahiga manatu kehekehe ʼo ʼuhiga mo te mavete ʼohoana. ʼI te ʼui ʼa Moisese ʼe feala te mavete ʼa he tagata mo tona ʼohoana mokā ʼe ina maʼu “he meʼa matamatakovi ia te ia”, neʼe manatu ai ʼihi ʼe faka ʼuhiga pe ki hana aga ʼe mole maʼa. Kae, ʼe ʼui e ʼihi “ko te meʼa matamatakovi ʼaia” ʼe ko he ʼu kiʼi hala liliki pe. Koia, moʼo ʼahiʼahiʼi ʼo Sesu, neʼe fehuʼi age e te kau Faliseo ki ai: “ ʼE gafua koa ki he tagata ke mavete mo tona ʼohoana ʼi he faʼahiga meʼa pe?” Ko tanatou tonu, tatau aipe pe koteā he faʼahiga tali ka fai anai e Sesu, ʼe felāveʼi anai ia mo he ʼu faigataʼaʼia mo ʼihi ia nātou ʼaē ʼe mole tonu tahi.

Neʼe tali e Sesu ʼaki te poto lahi ki te fehuʼi ʼaia, ʼo mole ina fakaʼaogaʼi he faʼahiga manatu fakatagata, ka neʼe fakatafito tana palalau ki te tupuʼaga ʼo te fakatuʼu ʼo te ʼohoana ʼi te kamataʼaga. “Neʼe mole heʼeki koutou lau, ko tana tali ʼaia, ko ia ʼaē neʼe ina fakatupu ia nāua, ʼi [te] kamataʼaga neʼe ina fakatupu ia nāua e tagata pea mo fafine, pea ina ʼui: ‘Koia ko te tagata ʼe mavae anai mai tana tāmai pea mo tana faʼe pea ʼe pipiki anai ki tona ʼohoana, pea ʼe nā liliu anai ia nāua ko he kakano pe e tahi’? ʼO mole kei nā toko lua ai, kae ko te kakano pe e tahi. Koia, ko te meʼa ʼaē neʼe fakatahiʼi e te ʼAtua ʼi te ʼakau toho pe ʼaē e tahi, ke ʼaua naʼa veteki e te tagata!”

Ko te finegalo ʼo te ʼAtua ʼi te kamataʼaga, ko tona fakamahino age ʼaia e Sesu, ke pipiki tahi te taumatuʼa, ka mole ke nā mavete. Kapau koia ʼaia, ko te tali age ʼaia ʼa te kau Faliseo, “koteā ʼaē neʼe fakatotonu ai e Moisese ke foaki ki te fafine he tohi fakamavae, pea mo mavete mo ia”?

Neʼe tali age e Sesu: “ ʼUhi ko te fefeka ʼo tokotou loto, neʼe tuku e Moisese kia koutou te fakagafua ke koutou mavete mo ʼokotou ʼohoana, kae ʼi [te] kamataʼaga neʼe mole feiā.” ʼIo, ʼi te fakatuʼu e te ʼAtua te faʼifaʼitaki ʼo te ʼohoana ʼi te ʼōloto ʼo Eteni, neʼe mole ina teuteuʼi ai mo he mavete ʼohoana.

ʼO haga aipe ki te kau Faliseo, neʼe hoko atu te palalau ʼa Sesu: “ ʼE ʼau tala atu kia koutou ko ʼaē ʼe mavete mo tona ʼohoana, gata pe mokā ʼe tupu mai he folonikasio [ʼi te faka keleka: pornéïa], pea toe ʼohoana ia mo he tahi fafine, ʼe tono ia.” Neʼe ina fakahā ai ko te kupu pornéïa, ʼe faka ʼuhiga ki he aga heʼeʼaoga ʼi te felāveʼi fakasino, pea ʼe ko te meʼa pe ʼaia e tahi ʼe fakagafua ai e te ʼAtua te mavete ʼohoana.

ʼI te mahino ʼaē ko te ʼohoana ʼe tonu ko he nonofo fualoa ʼo talu ai ʼaki pe te meʼa ʼaia e tahi ʼe fakagafua ai te mavete, neʼe ʼui ai e te kau tisipulo: “Kapau ko te ʼaluʼaga ʼaia ʼo te tagata pea mo tona ʼohoana, pea ʼe mole ʼaoga ke kita ʼohoana.” Koia, ko te hahaʼi ʼaē ʼe nātou fakatuʼutuʼu ke nātou ʼohoana ʼe tonu ke nātou fakakaukau lelei ko te ʼu noʼo ʼo te ʼohoana ʼe tuʼumaʼu ia.

ʼOsi ʼaia pea palalau ia Sesu ki te nofo selipatea. Neʼe ina fakamahino ko ʼihi tamaliki tagata ʼe tutupu enuke: ʼe mole feala hanatou ʼohoana heʼe ko tonatou ʼu maʼulifaga neʼe mole tuputupu ʼo feʼauga. Ko ʼihi neʼe faka enuke e te tagata, ʼo faka māʼimoaʼi kovi ia nātou. Pea ko ʼihi leva ʼe nātou lolomi tonatou fia ʼohoana pea mo te fai ʼo he ʼu felāveʼi fakasino ke feala ai tanatou tuku katoa tonatou temi ki te fai ʼo te ʼu gāue ʼo te Puleʼaga ʼo selo. “Ko ʼaē ʼe feala ke ina tuku ke hoko te meʼa ʼaia [te nofo selipatea], ke ina tuku ke hoko te meʼa ʼaia!” ko te fakaʼosi ʼaia ʼo te palalau ʼa Sesu.

Neʼe kamata ʼaumai ai kia te ia te ʼu kiʼi tamaliki. Ka, neʼe munaʼi nātou e te kau tisipulo pea nātou faiga ke kapu ia nātou, e lagi ko tonatou loto ke ʼaua naʼa tupu ai he gaʼegaʼe noa ʼo Sesu. Kae neʼe tala age e Sesu: “Koutou tukunoaʼi te ʼu kiʼi tamaliki ke ʼōmai kia te ʼau, pea ʼaua naʼa koutou faigaʼi ke koutou tāʼofi, heʼe ko te puleʼaga ʼo selo ʼe ʼa nātou ʼaē ʼe tatau mo te ʼu kiʼi tamaliki. ʼE ʼau tala moʼoni atu kia koutou: Ko ʼaē ʼe mole ina tali te puleʼaga ʼo te ʼAtua ohage ko he kiʼi tamasiʼi ʼe mole hū anai ia kiai.”

Ko he ʼu ako matamatalelei ʼaē ʼe tuku mai e Sesu ʼi henī! Moʼo hū ki te Puleʼaga ʼo te ʼAtua, ʼe tonu, ohage ko te ʼu kiʼi tamaliki, ke tou agavaivai pea mo lotolelei ʼo tuku ia tatou ke akoʼi. Kae, ko te faʼifaʼitaki ʼa Sesu ʼe hā mai ai te maʼuhiga, tāfito ki te ʼu mātuʼa, ʼo te lahi ʼo te temi ʼaē ʼe tonu ke nātou fakaʼaoga ʼo fakatahi mo tanatou ʼu fānau. Pea neʼe fakahā e Sesu tona ʼofa ʼaē ki te ʼu kihiʼi tamaliki ʼi tana toʼo ia nātou ʼi ʼona nima pea mo ina tapuakiʼi ia nātou. Mateo 19:1-15; Teutalonome 24:1; Luka 16:18; Maleko 10:1-16; Luka 18:15-17.

▪ Koteā te ʼu manatu kehekehe neʼe maʼu e te kau Faliseo ʼo ʼuhiga mo te mavete ʼohoana, pea, neʼe feafeaʼi tanatou ʼahiʼahiʼi ia Sesu?

▪ Neʼe feafeaʼi te tali ʼa Sesu ki te kau Faliseo ʼaē neʼe nātou faiga ke nātou ʼahiʼahiʼi ia ia, pea koteā te meʼa pe ʼaē e tahi ʼe fakagafua ai te mavete ʼohoana?

▪ He koʼe neʼe ʼui e te kau tisipulo ʼa Sesu ʼe mole he ʼuhiga ʼo te ʼohoana, pea koteā te fakatokaga neʼe fai age e Sesu?

▪ ʼAki tana aga ki te kiʼi tamaliki, koteā te ʼu ako ʼe tuku mai kia tatou e Sesu?