Kapite 103

Te Tahi ʼAʼahi Ki Te Fale Lotu

KO SESU pea mo tana kau tisipulo kua po tolu nei tanatou nonofo ʼi Petania talu tanatou ʼōmai mai Seliko. ʼI te temi nei, ʼi te mōnite ʼaho 10 ʼo Nisani, ʼe nātou toe ʼolo ki Selusalemi ka kei hegihegi. Kua fia kai ia Sesu. Koia, ʼi tana sio ki te fuʼu fiku ʼe ʼi ai tona ʼu lau, neʼe ʼalu kiai ʼo vakaʼi peʼe ʼi ai hona ʼu fua.

Ko te ʼu lau ʼo te fuʼu ʼakau ʼaia neʼe tupu fakatomuʼa, heʼe ko te taʼukai ʼo te ʼu fiku ʼe mole hoko ia ʼi muʼa ʼo te māhina ko sūnio, pea ʼe kei tou nofo nei pe ʼi te fakaʼosi ʼo malesio. Kae, neʼe lagi manatu ia Sesu kapau ʼe fakatomuʼa te tupu ʼo te ʼu lau, pea ʼe feala pe ke toe feiā mo te ʼu fuaʼi fiku. Kae ko tana ʼamanaki neʼe mole koia: ko te ʼu lau neʼe nātou tuku ki te fuʼu fiku he agaaga ʼe fakatupu faihala. Koia neʼe fakamalaʼia ai e Sesu te fuʼu fiku: “Ke ʼaua naʼa toe kai e he tahi he fuaʼi ʼakau mai ia te koe!” ʼI te ala uhu ake ʼe tou ʼiloʼi ai leva te fua pea mo te faka ʼuhiga ʼo te fakamalaʼia ʼaia.

ʼI te hoko atu ʼo tonatou fagona, neʼe kaku ia Sesu pea mo tana kau tisipulo ki Selusalemi, pea neʼe ʼalu ia Sesu ki te fale lotu, ʼaē neʼe kua ina fakasiosio ʼi te ʼanāfi hili hoʼatā. Kae, ʼi te ʼaho nei leva, ʼe ina fai te gāue, ohage ko te meʼa neʼe kua ina fai kua ʼosi kiai taʼu e tolu, ʼi te taʼu 30, ʼi tana haʼu ki te Pāsikate. Neʼe ina kapu ia nātou ʼaē neʼe totogi mo faifakatau meʼa ʼi te fale lotu pea ina holoʼi te ʼu laupapa ʼo te kau fetogi paʼaga pea mo te ʼu hekaʼaga ʼo te kau fakatau lupe. Neʼe mole ina fakagafua pe la ki he tahi ke ina fetuku he meʼa ʼi te fale lotu.

ʼI tana fakaʼāgaʼi ia nātou ʼaē ʼe fetogi paʼaga pea mo fakatau te ʼu manu ʼi te fale lotu, neʼe ʼui maʼana: “ ʼE mole tuʼu koa la ʼi te tohi: ‘Ko toku fale ʼe fakahigoa anai ko te fale faikole ki te ʼatu puleʼaga katoa’, kae kua gaohi ia e koutou ko he ʼana ʼo he kau kaihaʼa.” ʼE ko te kau kaihaʼa ia nātou heʼe nātou fakamaʼua te ʼu totogi e lahi fau ki te hahaʼi ʼaē ʼe mole feala ke nātou fai he tahi age meʼa ʼi te totogi ʼo tanatou ʼu manu ʼaē ʼe ʼaoga ki tanatou ʼu sakilifisio. Koia ko te ʼu faifakatau ʼaia ʼe ko he faʼahiga toʼo fakamālohi ʼo he meʼa ʼaki he kākā peʼe ko he kaihaʼa ia mata ʼo Sesu.

ʼI te logo ʼa te kau pelepitelo pule, te kau sekelipa pea mo nātou ʼe pule ki te hahaʼi, ki te meʼa ʼaē neʼe fai e Sesu, neʼe nātou toe faigaʼi ke matehi ia Sesu. ʼOnatou fakahā ʼaki ai ʼe mole pe feala ke fetogi ia nātou. Kae mole nātou ʼiloʼi peʼe feafeaʼi he matehi ʼo Sesu, heʼe ko te hahaʼi katoa ʼe nātou fagono lelei kia te ia.

ʼO mole gata ʼaki pe te kau Sutea, ka neʼe toe ʼōmai foki mo te kau Senitile ki te Pāsikate. ʼE ko te kau poloselite ia nātou, ko tona faka ʼuhiga ko te hahaʼi neʼe nātou tafoki ki te lotu faka sutea. Koʼeni te kau Keleka, ʼe ʼiloga mai ko te kau poloselite, ʼe nātou fakaōvi atu kia Filipo pea nātou kole age ke nātou felāveʼi mo Sesu. Pea ʼalu ia Filipo kia Atelea, ʼo lagi fehuʼi age peʼe ko te taʼi felāveʼi ʼaia ʼe tonu ke fai. E lagi kei nofo pe ia Sesu ʼi te fale lotu, ʼi he faʼahi ʼe feala ai te sisio ʼa te kau Keleka kiai.

ʼE ʼiloʼi pe e Sesu kua nounou tona maʼuli; koia neʼe ina fakaʼaogaʼi ai te lea fakatātā matalelei moʼo fakamatala ʼo tona ʼaluʼaga ʼo ia: “Kua haʼu te hola ʼaē ʼe tonu ai ke faka kolōliaʼi te Foha ʼo te tagata. ʼE ʼau tala moʼoni atu kia koutou: kapau ʼe mole tō te tegaʼi fulumeto ki te kele pea mo mate, ʼe nofo ai pe ia ko te tegaʼi fulumeto e tahi; kae kapau ʼe mate, pea e lahi ai tona ʼu fua.”

Ko he tegaʼi fulumeto e tahi ʼe mole faʼa maʼuhiga. Kae, koteā te meʼa ka hoko mokā ʼe tūtū ia ki te kele pea “mate”, ko tona faka ʼuhiga ʼe mole kei ko he pulapula? ʼE homo ia pea ʼi te temi totonu, ʼe liliu ia ko he kauʼi fulumeto ʼe ina fakatupu he ʼu tegaʼi fulumeto e lahi. ʼE toe fakatatau feiā pe mo Sesu, ko ia ko te tagata haohaoa pe ʼaia e tahi ʼe maʼuli. Kae, kapau ʼe mate agatonu ki te ʼAtua, ʼe liliu anai ia ko he meʼa ʼe fakaʼaogaʼi moʼo foaki ʼo te maʼuli heʼegata ki te hahaʼi agatonu ʼaē ʼe tatau tonatou loto faka sakilifisio mo ia. Ko te tupuʼaga la ʼaia ʼo te ʼui ʼa Sesu: “Ko ʼaē ʼe ʼofa mamahi ki tona nefesi ʼe ina fakaʼauha ia, kae ko ʼaē ʼe fehiʼa ki tona nefesi ʼi te mālama ʼaenī ʼe ina taupau anai ki te maʼuli heʼegata.”

ʼE hā mai neʼe mole manatu pe ia Sesu kia ia totonu, heʼe ki muli age neʼe ina fai age te fakamahino ʼaenī: “Kapau ʼe fia kaugana he tahi kia te ʼau, ke muli mai ia te ʼau, pea ko te potu ʼaē ʼe ʼau ʼi ai, ʼe toe ʼi ai anai mo taku tagata kaugana. Kapau ʼe fia kaugana he tahi kia te ʼau, ʼe faka maʼuhigaʼi anai ia e te Tāmai.” ʼI fakapale fakatalakitupua leva ki he muliʼi ʼo Sesu pea mo te kaugana kia te ia! Ko te fakapale ʼaia e ko te maʼu mai te Tāmai, te maʼuhiga ʼaē ʼo te fakatahi mo Kilisito ʼi te Puleʼaga.

ʼI tana manatu ki te ʼu mamahi lahi pea mo te mate fakamataku ʼaē ka hoko kia ia, neʼe toe ʼui age e Sesu: “ ʼI te temi nei kua hoha toku nefesi, pea koteā te meʼa ke ʼau ʼui? Tāmai, hāofaki ʼau mai te hola ʼaia.” ʼIo, ka na pau la ʼe feala ke hāo ʼi te meʼa ʼaia ka hoko! Kae kailoa, he neʼe ina ʼui: “Ko te tupuʼaga la ʼaia ʼo taku aʼu ki te hola ʼaia.” ʼE pipiki ia Sesu ki te ʼu fakatuʼutuʼu fuli kua fai e te ʼAtua, ʼaē ʼe kau ai mo tona mate faka sakilifisio. Mateo 21:12, 13, 18, 19; Maleko 11:12-18; Luka 19:45-48; Soane 12:20-27.

▪ He koʼe neʼe ʼamanaki ia Sesu ʼe feala ke ina maʼu he ʼu fuaʼi fiku ka mole heʼeki hoko tona taʼukai?

▪ He koʼe neʼe fakahigoaʼi e Sesu ia nātou ʼaē ʼe faifakatau ʼi te fale lotu ko te kau “kaihaʼa”?

▪ Koteā te faka ʼuhiga ʼo te fakatatau ʼaē ʼo Sesu ki he tegaʼi fulumeto ʼe mate?

▪ Koteā te meʼa neʼe logosino ia Sesu ʼi tana manatu ki te ʼu mamahi pea mo te mate ʼaē ka hoko kia te ia?