Kapite 105

ʼI Te Māfoatā ʼo He ʼAho Maʼuhiga

ʼI TANA mavae ʼi Selusalemi ʼi te mōnite afiafi, neʼe ʼalu ia Sesu ki Petania, ʼaē ʼe tuʼu ʼi te faʼahi hahake ʼo te moʼuga ʼo Oliveto. ʼO fakaʼosi ai te lua ʼaho ʼo tona minisitelio fakaʼosi ʼi Selusalemi. ʼE mahino ia ʼe toe ʼalu anai ia Sesu ʼo moe ʼi te ʼapi ʼo tona kaumeʼa ko Lasalo. Ko te po fā leva ʼaia ʼo tana moe ʼi Petania talu mai te feliaono, te ʼaho ʼaia ʼaē neʼe haʼu ai mai Seliko.

ʼE tou nonofo nei ʼi te feliatolu ʼaho 11 ʼo Nisani. ʼI te kei uhuuhu neʼe toe fagona ia Sesu pea mo tana kau tisipulo. Ko te ʼaho ʼaia ʼe ko te ʼaho maʼuhiga kehe anai, ko te ʼaho maʼumaʼua lahi ʼaia ʼo Sesu talu mai te kamata ʼo tona minisitelio. ʼE sisio fakaʼosi anai te hahaʼi kia te ia ʼi te fale lotu. Ko te ʼaho fakaʼosi ʼaia ʼo tona minisitelio ki te hahaʼi ia muʼa ʼo tona fakamāuʼi pea mo tona matehi.

Moʼo ʼalu ki Selusalemi, ko Sesu pea mo tana kau tisipulo neʼe nātou toe fagona pe ʼi te ala ʼaē ʼo te moʼuga ʼo Oliveto. ʼI te vaʼe ala ʼaē ʼe kamata atu ʼi Petania, ʼe fakatokagaʼi e Petelo te fuʼu ʼakau ʼaē neʼe fakamalaʼiaʼi e Sesu ʼi te ʼaho ʼanāfi. “Lapi, sio, ko tana kalaga ʼaia, ko te fuʼu fiku ʼaē neʼe ke fakamalaʼiaʼi kua moamoa.”

Kae koteā te tupuʼaga ʼo te fakamoamoa e Sesu te fuʼu ʼakau ʼaia? Neʼe ina fakahā tona tupuʼaga ʼaki te ʼu palalau ʼaenī: “ ʼE ʼau tala moʼoni atu kia koutou, kapau pe ʼe koutou maʼu te tui pea mo ʼaua naʼa koutou lotolotolua, ʼe mole gata ʼaki pe anai hakotou fai te meʼa ʼaenī neʼe ʼau fai ki te fuʼu fiku, kae kapau ʼe koutou ʼui age ki te moʼuga ʼaenī [te moʼuga ʼo Oliveto ʼaē ʼe nātou tutuʼu ai]: ‘Mahiki ake pea ke fakatō ki te tai’, ko te meʼa ʼaia ʼe hoko anai ia. Pea ko te meʼa fuli ka koutou kole anai ʼi te faikole, ʼaki te tui, ʼe koutou maʼu anai.”

ʼI tana fakamoamoaʼi te fuʼu ʼakau ʼaia, neʼe fakahā e Sesu ki tana kau tisipulo ʼe ʼaoga ke nātou tui ki te ʼAtua. Neʼe ʼui maʼana kia nātou: “Ko meʼa fuli pe ʼe koutou kole ʼi te faikole, koutou tui kua koutou maʼu, pea ʼe foaki atu anai.” ʼE ko he ako maʼuhiga ʼaia ʼe tonu ke nātou taupau, tāfito la ʼo ʼuhiga mo te ʼu fakataga fakamataku ʼaē ʼe tonu ke hoko vave mai. Kae, ʼe ʼi ai te tahi faka ʼuhiga ʼo te mate ʼo te fuʼu ʼakau pea mo te kalitate ʼaia ko te tui.

Ohage ko te fuʼu fiku, ko te puleʼaga ʼo Iselaele ʼe fakatupu faihala tona agaaga. ʼIo, logope la tana fai te fuakava mo te ʼAtua ʼaē ʼe hage ʼe hā ʼaki mai ʼe ina taupau te ʼu fakatotonu, neʼe mole ina maʼu te tui, ʼe mole ina fakatupu he ʼu fua ʼe lelei. ʼI tana mole maʼu te tui, ʼe ina ʼamanaki ia ke lītuʼa ki te ʼAlo ʼo te ʼAtua! Koia, ʼi te fakamoamoa e Sesu te fuʼu fiku ʼaē mole fua, neʼe ina fakatātā ʼaki te meʼa fakaofoofo ʼaia te meʼa ʼaē ka hoko ki te puleʼaga ʼo Iselaele ʼaē ʼe mole ʼi ai hona fua, ʼaē ʼe mole tui.

Ki muli age, neʼe kaku ia Sesu pea mo tana kau tisipulo ki Selusalemi. Ohage ko te agamāhani, ʼe nātou ʼolo ki te fale lotu, ʼo kamata ai te fai akonaki ʼa Sesu. Ko te kau pelepitelo pule pea mo te kau tagata ʼāfea ʼo te hahaʼi, neʼe heʼeki galo kia nātou te meʼa ʼaē neʼe ina fai ki te hahaʼi fakatau koloā ʼi te ʼaho ʼaē ʼanāfi, koia neʼe nātou fai age ai te fehuʼi moʼo ʼahiʼahiʼi ʼo ia: “Ko te pule fea ʼaē ʼe ke fai ai te ʼu meʼa ʼaenī? Pea ko ai ʼaē neʼe ina foaki atu te pule ʼaia?”

Pea neʼe tala age e Sesu: “Mo ʼau foki, ʼe ʼau toe fai atu mo ʼau taku fehuʼi. Kapau ʼe koutou fakahā mai, pea ʼe ʼau fakahā atu anai mo ʼau, peʼe ko te pule fea ʼaē ʼe ʼau fai ai te ʼu meʼa ʼaenī. Ko te papitema ʼa Soane, neʼe haʼu koa maifea? Mai te lagi peʼe mai te tagata?”

Ko te kau pelepitelo pea mo te kau tagata ʼāfea ʼe nātou kamata feʼuiʼaki ʼo ʼuhiga mo te tali ʼaē ka nātou fai. “Kapau ʼe tou ʼui age: ‘Mai te lagi’, ʼe ina ʼui mai anai: ‘He koʼe neʼe mole koutou tui kia te ia?’ Pea kapau ʼe tou ʼui age: ‘Mai te tagata’, ʼe tou manavasiʼi anai ki te hahaʼi, koteʼuhi ko nātou fuli ʼaia ʼe ʼui maʼa nātou ko Soane ko te polofeta.”

ʼI tanatou mole ʼiloʼi ʼaē he tali ke nātou fai, neʼe ʼui maʼa te kau tagata pule ʼaia kia Sesu: “ ʼE mole mātou ʼiloʼi.”

Koia neʼe ʼui age ai e Sesu kia nātou: “Mo ʼau foki, ʼe mole ʼau fakahā atu pe ko te pule fea ʼaē ʼe ʼau fai ai te ʼu meʼa ʼaia.” Mateo 21:19-27; Maleko 11:19-33; Luka 20:1-8.

▪ Koteā te meʼa ʼaē ʼe makehe ai te feliatolu ʼaho 11 ʼo Nisani?

▪ Koteā te ʼu ako ʼaē neʼe fakahā e Sesu ʼi tana fakamoamoa ia te fuʼu fiku?

▪ E feafeaʼi te tali ʼa Sesu kia nātou ʼaē ʼe nātou fehuʼi age pe ko te pule fea ʼaē ʼe ina fai ai niʼihi faʼahiga meʼa?