Kapite 110

ʼE Ina Fakaʼosi Tona Minisitelio ʼi Te Fale Lotu

NEʼE hā fakaʼosi ia Sesu ʼi te fale lotu. Koia, kapau ʼe tou tuku kehe te ʼu faʼahiga meʼa neʼe hoko, ia ʼaho e tolu ki muli age, tona fakamāu pea mo tona matehi, ʼe fakaʼosi pe ʼi ai tona minisitelio ʼi te kele. ʼI te lakaga nei, ʼe kei hoko atu pe tana fakaʼāgaʼi te kau sekelipa pea mo te kau Faliseo.

Neʼe tuʼa tolu te ʼui ʼa Sesu: “Malaʼia kia koutou, kau sekelipa mo koutou kau Faliseo, kau malualoi!” ʼUluaki, ʼe ina fakahā te malaʼia ka hoko kia nātou koteʼuhi ʼe nātou fakamaʼa pe “te tuʼa ʼo te ipu pea mo te pa, kae [ʼi] loto ʼe fonu ko te kaihaʼa mo te fakavalevale”. Koia neʼe ina ʼekenaki ai ia nātou ke nātou ‘fakamaʼa muʼa ʼi loto ʼo te ipu pea mo te pa, ke feala ai foki he maʼa ʼo tuʼa’.

ʼOsi ʼaia, pea ina fakahā te malaʼia ka hoko ki te kau sekelipa pea mo te kau Faliseo ʼuhi ko tanatou agakovi pea mo tanatou kākā mo malualoi, ʼaē ʼe nātou faigaʼi ke fufū ʼaki he faʼahiga aga faka lotu. “ ʼE koutou hage ko he ʼu falemaka kua pena hina, ko tana ʼui age ʼaia, ʼe hage mai ʼe matamatalelei ʼi tuʼa, kae ʼi loto ʼe fonu ko te hui ʼo te hahaʼi mate pea mo te faʼahiga meʼa heʼemaʼa kehekehe.”

Pea, ʼe hā tanatou malualoi ʼi tanatou faiga fakavilivili ʼaē ke nātou laga he ʼu falemaka moʼo te kau polofeta pea mo teuteuʼi, koteʼuhi ke fakatokagaʼi tanatou ʼu aga faka manavaʼofa. Kae, ohage ko tona fakahā e Sesu, ko nātou ko te ʼu “foha ʼo nātou ʼaē neʼe nātou fakapogi te kau polofeta”. Koteʼuhi, ko ʼaē ʼe toʼa ʼo fakahā tanatou malualoi ʼe nofo ia ʼi te tuʼutāmaki.

Neʼe hoko atu te palalau ʼa Sesu, ʼo ina fakahā tana faka lākahalaʼi ia nātou ʼaki te ʼu palalau ʼe toe mālohi ake: “ ʼAē faga gata, faga ʼuhiʼi gata kafokona, ʼe feala feafeaʼi anai hakotou hola ʼi te fakamāu ʼa te Seʼeni?” Ko te Seʼeni ko te faʼahi ʼaia neʼe tutu ai te ʼotaʼota ʼa te hahaʼi ʼi Selusalemi. Koia neʼe fakatokaga ai e Sesu te kau sekelipa pea mo te kau Faliseo, kapau ko tanatou haga nonofo ʼaē ʼi tanatou agakovi, pea ʼe hoko anai kia nātou te fakaʼauha heʼegata.

ʼI tana palalau ʼo ʼuhiga mo nātou ʼaē ʼe ina fekauʼi ohage ko hana kau fakafofoga, ʼe tala fēnei e Sesu: “Pea ʼe koutou matehi anai pea mo haʼi anai ʼihi ki he ʼu pou, pea ʼe koutou haha anai ʼihi ʼi ʼokotou sinakoka pea ʼe koutou fakatagaʼi anai mai he kolo ki he tahi kolo; koteʼuhi ke haʼu kia koutou te toto agatonu fuli pe kua liligi ʼi te kele, mai te toto ʼo te agatonu ko Apele ʼo kaku ki te toto ʼo Sakalia, foha ʼo Palakia, [ʼaē ʼe fakahigoa ko Seoiata ʼi te lua tohi ʼo te Fakamatala], ʼaē neʼe koutou fakapogi ʼi te vaha ʼo te sagatualio pea mo te ʼaletale. ʼE ʼau tala moʼoni atu kia koutou: ko te ʼu meʼa fuli ʼaia ʼe haʼu anai ki te taʼiake nei.”

ʼI te fakaʼāgaʼi ʼaē e Sakalia te ʼu pule ʼo Iselaele, “neʼe nātou fonofono ai ʼo ʼuhiga mo ia, pea neʼe nātou tuki makaʼi ai ia ia, ʼaki te fakatotonu ʼa te hau, ʼi te lotoʼā ʼo te fale ʼo Sehova”. Kae ohage ko tona fakakikite e Sesu, ʼe totogi anai e Iselaele ʼo ʼuhiga mo te toto agatonu fuli pe kua liligi. Neʼe ina totogi ʼi te ʼosi ʼo taʼu e 37 ki muli age ʼi te taʼu 70 ʼo totatou temi, ʼi te maumauʼi ʼo Selusalemi e te ʼatu kautau ʼo Loma pea mo te matematehi ai ʼo te toko miliona tupu ʼo te hahaʼi Sutea.

ʼI tana manatu ki te meʼa fakamataku ʼaia, neʼe lotomamahi ʼaupito ai ia Sesu. “Selusalemi, Selusalemi”, ko tana toe ʼui ʼaia, “kua tuʼa fia taku fia tānaki ʼau fānau ohage ko he matuʼa moa ʼe ina tānaki ʼona ʼuhi ʼi tona ʼu lalo kapakau! Kae neʼe mole koutou loto kiai. Koʼeni ko tokotou fale kua siʼaki atu kia koutou”.

ʼOsi ʼaia pea ina toe tala fēnei: “Kailoa, ʼe mole koutou toe sisio anai kia te ʼau, ʼo kaku ki takotou ʼui: ‘Manuʼia ia ia ʼaē ʼe haʼu ʼi te huafa ʼo Sehova!’ ” Ko te ʼaho ʼaia ʼe hoko anai lolotoga te ʼafio ʼa Kilisito, ʼi te temi ʼaē ka hū ai anai ki tona Puleʼaga ʼi selo pea mo sisio anai ki ai te ʼu hahaʼi ʼaki te ʼu mata ʼo te tui.

ʼI te temi nei, ʼe ʼalu ia Sesu ki te faʼahi ʼe feala ai tana sio ki te ʼu puha tānaki paʼaga ʼo te fale lotu pea mo te hahaʼi ʼaē ʼe tuku paʼaga kiai. Ko te hahaʼi maʼu meʼa e lahi tanatou paʼaga ʼe nātou ai kiai. Kae neʼe haʼu te fafine vitua masiva, ʼo ina tuku kiai tana ʼu kiʼi foʼi piesi veliveli e lua ʼe mole faʼa maʼuhiga.

ʼI tana pāuiʼi tana ʼu tisipulo ke ʼolo age kia ia, neʼe ʼui age e Sesu: “ ʼE ʼau tala moʼoni atu kia koutou: ko te fafine vitua masiva ʼaenī kua lahi age te meʼa ʼofa ʼaē neʼe ina foaki ia nātou fuli ʼaē neʼe nātou tuku paʼaga ki te ʼu puha tānaki paʼaga.” E lagi ʼe nātou feʼuiʼaki peʼe feala feafeaʼi te meʼa ʼaia. Neʼe fakamahino age e Sesu kia nātou: “Neʼe nātou ʼai tanatou ʼu paʼaga ʼaē ʼe mole loko ʼaoga tāfito kia nātou, kae ko ia, ʼi tona masiva, neʼe ina tuku kiai te meʼa katoa ʼaē ʼe ina maʼu, tana ʼu paʼaga fuli.” Pea ʼi tana ʼosi tala te ʼu meʼa ʼaia, neʼe mavae fakaʼosi ai ia Sesu ʼi te fale lotu.

ʼI tana ōfo ki te lahi pea mo te matalelei ʼo te fale lotu, neʼe ʼui age e te tahi ʼi tana ʼu tisipulo: “Faiako, sio age, ʼi ʼu taʼi maka leva pea mo te ʼu taʼi fale!” ʼIo, ko te ʼu maka ʼaia, ʼe ʼui, ko tona lahi ʼe laka ia meta e 11 tona loa, pea ko tona laulahi ko meta e 5 pea ko tona māʼoluga ko meta e 3!

‘ ʼE koutou sisio ki te ʼu fale lalahi ʼaia?’ ko te tali age ʼaia ʼa Sesu. “Kailoa, ʼe mole toe ʼi ai anai ʼi henī he maka ʼi ʼoluga ʼo he tahi maka neʼe mole holoʼi ki lalo.”

ʼI tana ʼosi tala te ʼu meʼa ʼaia, neʼe fakalaka ia Sesu pea mo tana kau ʼapositolo ʼi te mafa ʼo Seletone pea nātou hahake ki te moʼuga ʼo Oliveto. ʼI te koga meʼa ʼaia, ʼe nātou sio lelei ai ki te fale lotu. Mateo 23:25 ki te 24:3; Maleko 12:41 ki te 13:3; Luka 21:1-6; 2 Fakamatala 24:20-22.

▪ Koteā te meʼa neʼe fai e Sesu ʼi tana ʼaʼahi fakaʼosi ki te fale lotu?

▪ Neʼe feafeaʼi te hā ʼo te aga malualoi ʼa te kau sekelipa pea mo te kau Faliseo?

▪ Koteā ʼaē neʼe fakatātā e te “fakamāu ʼa te Seʼeni”?

▪ He koʼe neʼe ʼui e Sesu ko te fafine vitua neʼe lahi ake te meʼa ʼofa ʼaē neʼe ina foaki ʼi te meʼa ʼofa ʼo te hahaʼi maʼu meʼa?