Kapite 118

Tona Lavakiʼi Pea Mo Tona Puke

KUA hili te māʼupō ʼi te temi ʼaē neʼe hū ai ia Sutasi ki te ʼōloto ʼo Setesemane, ʼo muli mai ia te ia te hahaʼi tokolahi ko te kau solia, te ʼu pelepitelo pule pea mo te kau Faliseo. Neʼe lototahi te kau pelepitelo ke nātou ʼavage kia ia te ʼu foʼi piesi siliva e 30 ke ina lavakiʼi ia Sesu.

ʼI he temi ki muʼa atu, ʼi tona fakamavae ʼaē ʼi te kaitahi ʼo te Pāsikate, ʼe ʼiloga ia neʼe ʼalu fakahagatonu ki te kau pelepitelo pule. Pea nātou tānaki atu ai pe tanatou kau tagata fekau pea mo te kau solia. Neʼe lagi ʼuluaki taki muʼa ia nātou e Sutasi ki te koga meʼa ʼaē neʼe fakamanatu ai e Sesu pea mo tana kau ʼapositolo te Pāsikate. ʼI tanatou sisio ʼaē kua nātou pupuli, ko te hahaʼi ʼaia kua toʼo mahafu, pea mo tanatou ʼu mālama pea mo tanatou ʼu afi, neʼe mavae ʼi Selusalemi, pea nātou fakalaka ʼi te mafa ʼo Setelone, ʼo taki ia nātou e Sutasi.

Kapau neʼe taki e Sutasi te polesesio ʼaia ki te moʼuga ʼo Oliveto, koteʼuhi heʼe ina ʼiloʼi lelei te potu ʼaē ʼe feala ke maʼu ai ia Sesu. ʼI te vāhaʼa ʼaē ki muʼa atu, ʼi tanatou ʼu feʼaluʼaki mai Petania ki Selusalemi, neʼe tautau tutuʼu ia Sesu pea mo tana kau ʼapositolo ʼi te ʼōloto ʼo Setesemane ʼo mālōlō pea mo fai palalau ai. Kae, ʼi te hola ʼaenī, e lagi ū ia Sesu ʼi te fakapōʼuli ʼo he lalo fuʼu oliveto; ʼe feafeaʼi anai hona ʼiloʼi e te kau solia? E lagi neʼe mole heʼeki nātou sisio ki ai ʼi muʼa atu. Koia neʼe tuku age ai e Sutasi kia nātou te fakaʼiloga, ʼo ʼui maʼana: “Ko ia ʼaē ka ʼau ʼuma anai ki ai, ʼe ko ia ʼaia; koutou puke ia ia pea ke koutou ʼave ia ia mo leʼoleʼo lelei.”

Neʼe taki e Sutasi te hahaʼi ki te ʼōloto, pea ʼi tana sio atu kia Sesu mo tana kau ʼapositolo, neʼe ʼunuʼunu atu ʼo ʼalu hagatonu kia te ia. “Mālo, Lapi!” ko tana ʼui ʼaia, pea mo ʼuma kia te ia.

“Kaumeʼa, he koʼe kua ke haʼu ki henī?” ko te fehuʼi ʼaia ʼa Sesu. Pea ʼi tana tali ʼe ia totonu pe ki te fehuʼi, neʼe ʼui maʼana: “Sutasi, ʼe ke lavakiʼi koa te Foha ʼo te tagata ʼaki he fekita?” Kae kua feʼauga mo te tagata kākā ʼaia! Neʼe ʼunuʼunu ia Sesu ki te mālama ʼo te ʼu afi pea mo te ʼu mālama, pea mo fehuʼi ki te hahaʼi: “Ko ai ʼaē ʼe koutou kumi?”

“Ko Sesu te Nasalea”, ko te tali ʼaia ʼa ʼihi.

“Ko ʼau ia ia”, ko tana ʼui ʼaia kia nātou fuli ʼaki te lotomālohi. ʼI tanatou punamaʼuli ki tona lototoʼa pea ʼi tanatou mole ʼiloʼi ʼaē pe koteā anai he meʼa ka hoko, neʼe holomuli te ʼu hahaʼi pea nātou fetokaʼi ki te kele.

“Kua ʼau ʼui atu, ko ʼau ia ia, ko te hoko atu ʼaia ʼo te palalau ʼa Sesu ʼaki te fakatokatoka. Kapau ko ʼau ʼaē ʼe koutou kumi, koutou tuku ia nātou ʼaenī ke ʼolo.” ʼI he kiʼi temi ki muʼa atu, ʼi te koga fale fata, neʼe faikole ia Sesu ki tana Tāmai ʼo ʼui maʼana neʼe ina taupau tana kau ʼapositolo agatonu pea neʼe mole he tahi ia nātou neʼe puli, “gata pe ki te foha ʼo te fakaʼauha”. Moʼo fakahoko ʼo tana palalau, ʼe ina kole ke tuku tana kau tisipulo ke ʼolo.

ʼI te ʼosi ʼo te punamaʼuli ʼaē ʼa te kau solia, neʼe nātou tutuʼu ake pea nātou kamata haʼi ia Sesu. Kua mahino ki te kau ʼapositolo te meʼa ʼaē ka hoko pea nātou fehuʼi age: “ ʼAliki, ʼe tonu koa ke mātou tā ʼaki te heletā?” Neʼe mole heʼeki tali age e Sesu ka kua ʼosi fā ia Petelo ki te heletā ʼi te ʼu heletā ʼaē e lua neʼe ʼaumai e te kau ʼapositolo pea ʼoho kia Malekusi, ko te tagata kaugana ʼa te pelepitelo lahi. Neʼe ina tāʼi ʼo hala te ʼulu ʼo te tagata kaugana, kae ina tuʼusi tona taliga mataʼu.

“Tuku; kua feʼauga”, ko te ʼui ʼaia ʼa Sesu ʼo tuʼu ʼi te vaha ʼo nāua. Pea, ʼi tana fāfā ki te taliga ʼo Malekusi, neʼe ina gaohi ʼo lelei ai tona lavea. Pea ina fai mai ai te ako maʼuhiga, ʼaki tana fakatotonu ʼaenī kia Petelo: “Toe ʼai tau heletā ki tona ʼaiʼaga, heʼe ko nātou fuli ʼaē ʼe nātou toʼo te heletā ʼe nātou mamate anai ʼi te heletā. Peʼe ke manatu koa la koe ʼe mole feala haku pāui ki taku Tāmai ke ina tuku mai ʼi te moʼi lakaga pe ʼaenī he ʼu lesio ʼaselo ʼe fakalaka ʼi te hogofulu-ma-lua?”

Neʼe lotolelei ia Sesu ke puke ia ia, he ina fakamahino fēnei: “Pea, ʼe feafeaʼi leva anai he fakahoko ʼo te ʼu folafola ʼo te Tohi, ʼaia neʼe fakahā ai ʼe tonu ke hoko feiā?” Pea ina toe ʼui: “Ko te ipu ʼaē neʼe foaki mai e taku Tāmai, ʼe mole ʼau ʼinu anai koa ʼau?” Neʼe mulimuli katoa ia ki te finegalo ʼo te ʼAtua ʼo ʼuhiga mo ia.

Neʼe palalau leva ia Sesu ki te hahaʼi: “ ʼE hage koa ko he ʼolo ki he tagata kaihaʼa ʼaē neʼe koutou ʼōmai ai mo te ʼu heletā pea mo te ʼu ʼakau ko toku puke? ʼI te ʼaho fuli pe, neʼe ʼau heka ʼi te fale lotu ʼo fai akonaki, pea neʼe mole pe la koutou puke ʼau. Kae kua hoko te ʼu meʼa fuli ʼaenī ke fakahoko ia te ʼu meʼa ʼaē neʼe tohi e te kau polofeta.”

ʼI te ʼosi ʼo tana palalau, ko te kau solia, mo te tagata pule ʼo te kau solia pea mo te kau tagata fekau ʼa te kau Sutea neʼe nātou puke ia Sesu pea nātou haʼi ia ia. ʼI tanatou sisio ki te meʼa ʼaia, neʼe siʼaki e te kau ʼapositolo ia ia kae nātou feholaki. Kae, ko te tūpulaga, e lagi ko te tisipulo ko Maleko, neʼe nofo ʼi te lotolotoiga ʼo te hahaʼi. E lagi neʼe nofo ia ʼi te ʼapi ʼaē neʼe fakamanatu ai e Sesu te Pāsikate pea ki muli age, neʼe ina muliʼi te hahaʼi ʼi tanatou ʼolo. Kae koʼeni kua ʼiloʼi ia ia pea ko ʼihi ʼe nātou faigaʼi ke nātou puke ia ia. ʼO ina līaki tona kofu, kae hola. Mateo 26:47-56; Maleko 14:43-52; Luka 22:47-53; Soane 17:12; 18:3-12.

▪ He koʼe ʼe ʼiloʼi lelei e Sutasi ʼe ina maʼu anai ia Sesu ʼi te ʼōloto ʼo Setesemane?

▪ Neʼe fakahā feafeaʼi e Sesu tana tokaga ʼaē ki tana kau ʼapositolo?

▪ Koteā te meʼa ʼaē neʼe fai e Petelo moʼo hāofaki ʼo Sesu, kae koteā te meʼa ʼaē neʼe ʼui age e Sesu kia ia?

▪ Neʼe fakahā feafeaʼi e Sesu ʼe mulimuli katoa ia ia ki te finegalo ʼo te ʼAtua ʼo ʼuhiga mo ia?

▪ ʼI te siʼaki ʼaē e te kau ʼapositolo ia Sesu, ko ai ʼaē neʼe nofo, pea koteā te meʼa neʼe hoko kia ia?