Kapite 119

ʼI Te ʼApi ʼo Ana, Pea ʼi Te ʼApi ʼo Kaifa

ʼI TONA haʼi ohage he tagata fakapō, neʼe ʼave ia Sesu ki te ʼapi ʼo Ana, ʼaē ko te pelepitelo lahi ʼāfea pea neʼe ko te tagata neʼe tokagaʼi. Neʼe pelepitelo lahi ia Ana ʼi te temi ʼaē neʼe haga ai ia Sesu ʼi tona taʼu 12, ʼi te fale lotu, ʼo fakaofo ai te kau fai akonaki Sutea ʼaki tona poto. Neʼe lahi te ʼu foha ʼo Ana neʼe liliu ko te ʼu pelepitelo lahi ki muli age, pea, ʼi te temi nei, ko Kaifa, ia te tagata ʼaē ʼe ʼohoana mo tona ʼofafine, ʼaē ʼe nofo ʼi te tuʼulaga ʼaia.

Neʼe ʼuluaki ʼave muʼa ia Sesu ki te ʼapi ʼo Ana, lagi heʼe ko te pelepitelo pule ʼaia kua fualoa tana fai te lagiaki maʼuhiga ʼi te maʼuli faka lotu ʼo te kau Sutea. Ko te tutuʼu ʼaia ʼi te ʼapi ʼo Ana, ʼe faka fealagia ai ki te pelepitelo lahi ʼaē ko Kaifa ke ina fakatahitahiʼi te toko 71 ʼo te Sanetualio, te fono lahi ʼo te kau Sutea, pea mo tatānaki he kau fakamoʼoni loi.

Ko Ana, ia te pelepitelo pule, ʼe ina fakafehuʼi nei ia Sesu ʼo ʼuhiga mo tana kau tisipulo pea mo tana akonaki. Kae tali age e Sesu: “Neʼe ʼau palalau fakahāhā ki te malamanei. Neʼe ʼau fai akonaki tuʼumaʼu ʼi te ʼu sinakoka pea mo te fale lotu, te ʼu koga meʼa ʼaia ʼaē ʼe fakatahitahi ai te kau Sutea; pea neʼe mole ʼau tala fakafūfū he meʼa. He koʼe ʼe ke fakafehuʼi ʼau? Fakafehuʼi ia nātou ʼaē neʼe fagono ki te meʼa ʼaē neʼe ʼau ʼui age kia nātou. Vakaʼi, ko nātou ʼaia ʼe nātou ʼiloʼi te meʼa neʼe ʼau ʼui.”

ʼI tana logo ki te ʼu palalau ʼaia, ko te tahi ʼi te kau tagata fekau ʼaē neʼe tuʼu ʼo ōvi kia Sesu neʼe ina paki, ʼo ʼui maʼana. “ ʼE ko tau taʼi tali palalau koa ʼaia ki te pelepitelo pule?”

“Kapau neʼe kovi taku palalau, ko te ʼui age ʼaia ʼa Sesu, fakahā mai tona kovi; kae kapau neʼe tonu taku palalau, he koʼe ʼe ke haga ʼo paki ʼau?” ʼI te ʼosi ʼo te fepalalauʼaki ʼaia, neʼe fekau e Ana ke ʼave ia Sesu ʼaē kua ʼosi haʼihaʼi, kia Kaifa.

ʼI te temi pe ʼaia, ko te kau pelepitelo pule fuli, te kau tagata ʼāfea, pea mo te kau sekelipa, ia te Sanetualio katoa, kua nātou kamata fakatahitahi. ʼE ʼiloga mai ko te fono ʼaia, neʼe fai ʼi te ʼapi ʼo Kaifa. Logope la ʼe mole fakagafua e te lao faka sutea ke fai te taʼi fono faifakamāu meʼa ʼaia ʼi te po ʼo te Pāsikate, ko te kau takitaki lotu ʼe mole nātou situʼa ki tanatou fakatuʼutuʼu kovi ʼaia.

ʼI te ʼu vāhaʼa ki muʼa atu, ʼi te fakatuʼuake ʼaē e Sesu ia Lasalo, neʼe kua ʼosi tonu ia e te Sanetualio ke matehi ia ia. Pea, koʼeni neʼe hoki hili atu pe kiai ʼaho e lua, ʼi te feliafā, ko te ʼu pule lotu neʼe nātou fono ke nātou puke ia ia ʼaki he puleʼaki fakakākā ke feala ai hona matehi. Koutou fakakaukauʼi muʼa: neʼe kua ʼosi fakatūʼa ia Sesu ka mole heʼeki fakamāuʼi!

ʼE faigaʼi nei ke maʼu he kau fakamoʼoni kua feala hanatou fai he ʼu fakamoʼoni loi, ke fakatahiʼi he ʼu fakamoʼoni moʼo faka lākahalaʼi ʼo Sesu. Kae, ko te ʼu fakamoʼoni ʼaia ʼe mole felogoi tahi. Pea, fakamulimuli ʼaia pea ʼōmai te ʼu tagata e toko lua ʼo ʼui maʼa nāua: “Neʼe ma logo ki tana ʼui fēnei: ‘ ʼE ʼau holoʼi anai te fale lotu ʼaenī neʼe laga nima, pea ia ʼaho e tolu ʼe ʼau toe laga anai he tahi age ʼe mole laga nima anai.’ ”

“ ʼE mole ke fai koe hau tali kiai? ko te fehuʼi age ʼaia ʼa Kaifa. Koteā te ʼu meʼa ʼaenī ʼe fakamoʼoni kiai te hahaʼi nei ʼo fakafeagai kia te koe?” Kae neʼe nofo fakalogologo pe ia Sesu. Ko he meʼa faka galivale ia ki te Sanetualio, māʼiape la mo te talaʼakiʼi loi ʼaia ko te ʼu fakamoʼoni ʼa te ʼu tagata ʼaia e lua ʼe mole felogoi. Koia neʼe ʼahiʼahiʼi ai e Kaifa te tahi puleʼaki.

ʼE ina ʼiloʼi lelei ko te kau Sutea ʼe ʼiʼita kovi mokā ʼui e he tahi ko ia ko te ʼAlo ʼo te ʼAtua. Neʼe kua tuʼa lua foki, tanatou ʼui fakavilivili ko Sesu ʼe ko he tagata laukovi ki te ʼAtua pea ʼe tonu ke matehi, koteʼuhi ʼi tanatou manatu hala neʼe ʼui e Sesu ʼe tatau ia mo te ʼAtua. ʼAki tana kākā, neʼe fakatotonu e Kaifa kia Sesu: “ ʼAki te ʼAtua maʼuli ʼe ʼau fakamaʼua atu kia te koe te fakapapau, koteʼuhi ke ke fakahā mai peʼe ko koe ia Kilisito, te ʼAlo ʼo te ʼAtua!”

Tatau aipe pe koteā he faʼahiga manatu ʼa te kau Sutea, ko Sesu e ko te ʼAlo moʼoni ia ʼo te ʼAtua. Kapau ʼe nofo fakalogologo, pea ʼe feala ai leva ke ʼui ʼe fakafisi ia ʼe mole ko ia ko Kilisito. Koia neʼe tali ai e Sesu ʼaki he lotomālohi: “Ko ʼau, ia ia; pea ʼe koutou mamata anai ki te Foha ʼo te tagata ʼe heka ʼi te toʼomataʼu ʼo te mālohi pea ʼe haʼu ia mo te ʼu ʼao ʼo te lagi.”

ʼI tana logo ki te palalau ʼaia, ʼaki hana faiga ke tokagaʼi, neʼe haeʼi e Kaifa tona ʼu kofu tuʼa mo ʼui maʼana: “Kua laukovi ia ki te ʼAtua! Koteā te meʼa ʼaē ʼe kei ʼaoga mai ai kia tatou he kau fakamoʼoni? Koutou vakaʼi! Kua koutou ʼosi logo mai ki te laukovi ki te ʼAtua. Koteā takotou manatu?”

“ ʼE tonu ke mate”, ko te tala ʼaia ʼa te Sanetualio. Pea, neʼe kamata ai tona manukinukiʼi pea mo tona laukoviʼi e te kau tagata ʼaia. Ko ʼihi neʼe nātou fepataki ia ia pea mo ʼanuhi tona fofoga. Ko ʼihi neʼe nātou pūlouʼi tona fofoga katoa pea nātou hokaʼi ia ia pea mo ʼui fakamanuki maʼa nātou: “Fakakikite mai kia mātou, Kilisito. Pe ko ai ʼaē neʼe ina paki koe?” Ko te taʼi agapauʼu ʼaia pea mo hala ʼi te lao ʼaē neʼe fai kia Sesu ʼi te lolotoga ʼo tona fakamāuʼi ʼi te pōʼuli. Mateo 26:57-68; 26:3, 4; Maleko 14:53-65; Luka 22:54, 63-65; Soane 18:13-24; 11:45-53; 10:31-39; 5:16-18.

▪ Neʼe ʼuluaki ʼave ia Sesu kifea, pea koteā te meʼa neʼe hoko kia te ia?

▪ Neʼe toe ʼave ia ia kifea, pea koteā tona tupuʼaga?

▪ Neʼe feafeaʼi te puleʼaki ʼa Kaifa ke tala ai e te Sanetualio ʼe tonu ke matehi ia Sesu?

▪ Koteā te agapauʼu pea mo hala ʼi te lao ʼaē neʼe fai kia Sesu ʼi te lolotoga ʼo tona fakamāuʼi?