Kapite 121

Ia Muʼa ʼo Te Sanetualio, Pea Ia Muʼa ʼo Pilato

KUA fakaʼosiʼosi te pōʼuli. Neʼe fakafisi tuʼa tolu ia Petelo kia Sesu; ko te kau fono ʼo te Sanetualio kua ʼosi tanatou faifakamāu meʼa loi ʼaē neʼe fai pea kua nātou mavetevete. Kae, ʼi te māfoatā ʼo te feliaono uhu, neʼe nātou toe fakatahitahi, ʼo fai leva ki te fale ʼo tonatou Sanetualio. ʼE ʼiloga mai ia ko tonatou loto ke faigaʼi te fakamāu ʼaē neʼe fai pōʼuli ke hage ʼe mulimuli ki te lao. ʼI te ʼaumai ʼaē ʼo Sesu ki ʼonatou muʼa, neʼe nātou fehuʼi age ki ai, ohage ko tanatou fai ʼaē ʼi te pōʼuli ʼaia: “Kapau ko koe ko Kilisito, pea ke tala mai kia mātou.”

“Tatau aipe pe ʼe ʼau tala atu kia koutou, ʼe mole koutou tui anai kiai, ko te tali ʼaia ʼa Sesu. Pea kapau ʼe ʼau fakafehuʼi koutou, ʼe mole koutou tali mai anai.” Kae, neʼe lotomālohi ia Sesu ʼo fakahā ia ia, ʼo ʼui maʼana. “ ʼI te temi leva ʼaē ko te Foha ʼo te tagata ʼe heka anai ʼi te toʼomataʼu ʼo te ʼAtua.”

“Pea ta ʼe ko koe ko te ʼAlo ʼo te ʼAtua? ” ko tanatou fia ʼiloʼi fuli ʼaia.

“ ʼE koutou ʼui totonu e koutou ko ʼau ʼaia”, ko te tali ʼaia ʼa Sesu.

Ki te kau tagata ʼaia ʼaē ko tonatou loto ke matehi ia ia, ʼe feʼauga ʼaki pe te tali ʼaia. Ki tanatou manatu ko te tali ʼaia ʼe ko he laukovi ki te ʼAtua. “Koteā koa he tahi fakamoʼoni age ke ʼaoga mai kia tatou? ko tanatou fehuʼi ʼaia. Heʼe ko tatou totonu, kua tou logo ki ai mai tona gutu.” ʼO nātou haʼi ai ia Sesu, pea nātou ʼave ia ia ʼo tuku ki te kovana loma ko Posio Pilato.

Ko Sutasi, ia ia ʼaē neʼe ina lavakiʼi ia Sesu, neʼe nofo mo ia ʼi te fakamāu. ʼI tana sio ʼaē kua fakatūʼa ia Sesu, neʼe fakahemala ai. Pea ʼalu ai leva ki te kau pelepitelo pule pea mo te kau tagata ʼāfea ʼo liufaki kia nātou te ʼu foʼi piesi siliva ʼaē e 30, ʼo ʼui maʼana: “Kua ʼau agahala ʼi taku ʼavatu te toto agatonu.”

“Koteā tona maʼuhiga mai kia mātou? ʼA koe pe tona vakaʼi!” ko tanatou tali age ʼaia ʼo mole ia nātou he fakaʼofa. Pea neʼe lī ai e Sutasi te ʼu foʼi piesi siliva ki te fale lotu pea mavae ai, pea ʼalu ai leva ʼo faigaʼi ke ina tautau tona kia. Kae, ko te vaʼa ʼaē neʼe ina haʼi kiai te maea neʼe lagi fasi, pea tō ai tona sino ki te ʼu mata maka ʼaē ki lalo ifo, ʼo mapā ai.

Ko te kau pelepitelo pule ʼe mole nātou faʼa ʼiloʼi he meʼa ke fai ʼaki te ʼu foʼi piesi siliva. “ ʼE mole gafua ke ʼai ki te koloā taputapu, ko tanatou ʼui ʼaia, heʼe ko te totogi ʼo te toto.” Koia ʼi tanatou ʼosi fono kiai, neʼe nātou totogi ʼaki te paʼaga ʼaia te gāueʼaga ʼa te tagata gaohi ipu kele ke tanu ai te kau matāpule. Ko te tupuʼaga la ʼaia ʼo te fakahigoaʼi ʼo te gāueʼaga ʼaia ko te “Gāueʼaga ʼo te Toto”.

Neʼe kei hegihegi ka kua ʼave ia Sesu ki te fale ʼo te kovana. Ko te kau Sutea ʼaē neʼe kaugā fagona mo ia neʼe mole nātou fia hū ki fale, heʼe ki tanatou manatu ʼe nātou ʼulihi ia nātou mokā ʼe nātou fakaōvi ki he kau Senitile. Koia, moʼo fakafimālieʼi ʼo nātou, neʼe haʼu ia Pilato ki tuʼa. “Koteā te meʼa ʼaē ʼe koutou talaʼakiʼi ai te tagata nei?” ko tana fehuʼi age ʼaia.

“Ka na ko te tagata la ʼaenī neʼe mole ko he tagata māmio kovi, ka na ʼaua la neʼe mole mātou ʼaumai ia ia kia te koe”, ko te tali ʼaia ʼa te kau Sutea.

ʼI tana mole fia kau ki te meʼa ʼaia, neʼe ʼui age e Pilato kia nātou: “Koutou toʼo ia ia e koutou totonu pea ke koutou fakamāuʼi ʼi takotou lao.”

ʼO fakahā ʼaki ai tanatou ʼu manatu fakapō, neʼe tali age e te kau Sutea: “ ʼE mole gafua kia mātou ke mātou matehi he tahi.” ʼIo, kapau ʼe nātou matehi ia Sesu ʼi te lolotoga ʼo te Pāsikate, pea e lagi ʼe feala ke ʼi ai anai he muna ʼa te hahaʼi, heʼe tokolahi ʼe nātou leleiʼia ʼaupito ia Sesu. Kae kapau ʼe lava tanatou faiga ʼaē ke matehi ia ia e te kau Loma ʼuhi ko he ʼu meʼa faka politike, pea ʼe nātou ʼāteaina ai leva ia mata ʼo te hahaʼi.

Koia, ʼo mole nātou toe talanoa ki te fakamāu ʼaia neʼe kua nātou ʼosi fakatūʼa ai ia Sesu ʼuhi ko he laukovi ki te ʼAtua, ko te kau takitaki lotu kua nātou fakatupu leva te tahi ʼu fakakovi. ʼE nātou talaʼakiʼi ia Sesu ki te ʼu hala mamafa e tolu: “Neʼe mātou maʼu te tagata ʼaenī ʼe ina lolotoga [1] fakamaveuveu tomatou puleʼaga, [2] ʼo ina tapuʼi te totogi ʼo te ʼu tukuhau kia Sesale pea [3] mo ʼui e ia, ko ia, ko Kilisito, ko te hau.”

Ko te talaʼakiʼi ʼaē ʼo ʼuhiga mo te ʼui ʼa Sesu ʼaē ko ia ko te hau ʼaē ʼe fakatokagaʼi e Pilato. Pea toe hū ai ki te fale faka kovana, ʼo pāuiʼi ia Sesu pea ina fakafehuʼi: “ ʼE ko koe koa te hau ʼo te kau Sutea?” ʼI tona tahi faʼahiga ʼui, ʼe kua ke maumauʼi koa la koe te lao ʼi tau ʼui ʼaē ko koe ko te hau ʼo fakafeagai kia Sesale?

ʼE fia ʼiloʼi e Sesu te meʼa ʼaē neʼe kua logo ki ai ia Pilato ʼo ʼuhiga mo ia, koia neʼe ina fehuʼi age ai: “ ʼE ke ʼui te meʼa ʼaia ʼi tau manatu ʼa koe totonu, pe neʼe ʼui atu e niʼihi kia te koe ʼo ʼuhiga mo ʼau?”

Neʼe fakamoʼoni age e Pilato ʼe mole ina ʼiloʼi he meʼa pea ʼe ina fia ʼiloʼi te ʼaluʼaga totonu ʼo te ʼu meʼa ʼaia neʼe hoko. “ ʼE ko ʼau koa la ko he Sutea, ia ʼau? ko tana tali ʼaia. Ko tou fenua totonu pea mo te kau pelepitelo pule kua nātou ʼaumai koe kia te ʼau. Koteā te meʼa ʼaē neʼe ke fai?”

Neʼe mole faiga ia Sesu ke hāo ia ia mai te fehuʼi ʼaē ki tona ʼuhiga hau. Pea ko te tali ʼaē ka ina fai nei e lagi punamaʼuli ai ia Pilato. Luka 22:66 ki te 23:3; Mateo 27:1-11; Maleko 15:1; Soane 18:28-35; Gāue 1:16-20.

▪ Koteā te tupuʼaga ʼo te toe fakatahitahi ʼa te Sanetualio ʼi te uhu?

▪ Neʼe feafeaʼi te mate ʼa Sutasi, pea koteā ʼaē neʼe fakaʼaogaʼi kiai te ʼu foʼi piesi siliva ʼaē e 30?

▪ He koʼe ʼe faiga te kau Sutea ke matehi ia Sesu e te kau Loma ka mole matehi e nātou totonu?

▪ Koteā te ʼu meʼa ʼaē ʼe talaʼakiʼi ai e te kau Sutea ia Sesu?