Kapite 131

Ko Te ʼu Hā Fakaʼosi Pea Mo Te Penikosite ʼo Te Taʼu 33

ʼI TE tahi moʼi temi, neʼe fai e Sesu te ʼu fakatuʼutuʼu ke fakatahi age tana ʼu ʼapositolo ʼaē e toko 11 kia te ia ʼi te moʼuga ʼi Kalilea. Kae ʼiloga mai ia neʼe logo te tahi ʼu tisipulo ki te fakatahi ʼaia, koia neʼe fakamulimuli ʼo fakakatoa ko te toko 500 hahaʼi ʼaē neʼe fakatahi kiai. ʼI meʼa fakafiafia leva kia nātou te hā age ʼaē ʼa Sesu pea mo tana fai akonaki age ʼaē kia nātou!

ʼI tana ʼu akonaki ʼaia, neʼe fakamahino age e Sesu kia nātou ko te ʼAtua neʼe ina foaki age kia te ia te pule katoa ʼi te lagi pea mo te kele. “Koutou ʼolo, ko tana ʼui ʼaia, (...) pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou.”

Koteā leva takotou ʼui? Ko te ʼu tagata mo te ʼu fafine pea mo te ʼu tamaliki ʼe tuku kia nātou te maʼua ʼaia: ʼaē ko te fai ʼo he ʼu tisipulo. Neʼe fakaloto fīmālieʼi ia nātou e Sesu, heʼe faiga anai te ʼu fili ke nātou tāʼofi tanatou fai faka mafola pea mo tanatou fai akonaki. Neʼe ina ʼui age kia nātou: “Pea koʼeni, ʼe ʼau nofo mo koutou ʼi te ʼaho fuli pe, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” ʼE nofo ia Sesu mo tana kau tisipulo ʼaki te laumālie maʼoniʼoni, moʼo tokoni kia nātou ke nātou fai tonatou minisitelio.

ʼI te hili ʼo tona fakatuʼuake, neʼe hā ia Sesu ki tana kau tisipulo lolotoga te ʼu ʼaho e 40. ʼI tana ʼu hā ʼaia, neʼe palalau age kia nātou ʼo ʼuhiga mo te Puleʼaga ʼo te ʼAtua pea mo tonatou ʼu maʼua ʼaē ʼi tonatou ʼuhiga tisipulo. Māʼia mo tona tēhina ʼaē ko Sake, neʼe hā ki ai ʼi te tahi ʼaho, pea faka tui te tagata ʼaia ʼaē neʼe mole heʼeki tui kia te ia, ʼe ko Ia ko Kilisito totonu.

ʼI te kei nonofo ʼa te kau ʼapositolo ʼi Kalilea, ʼe ʼiloga mai ia neʼe kole age e Sesu kia nātou ke nātou toe liliu ki Selusalemi. Pea ʼi te potu ʼaia, neʼe nātou fakatahi ai mo Sesu, ʼo ina ʼui age kia nātou: “ ʼAua naʼa koutou fakamamaʼo ʼi Selusalemi, kae ke koutou haga talitali ki te meʼa ʼaē neʼe fakapapau mai kiai te Tāmai, te meʼa ʼaē neʼe koutou fagono mai neʼe ʼau palalau kiai; koteʼuhi neʼe fai papitema ia Soane ʼaki te vai, kae ko koutou, ʼe kei toe pe te ʼu kiʼi ʼaho siʼi pea papitemaʼi koutou ʼi te laumālie maʼoniʼoni.”

Ki muli age, neʼe toe fakatahi ia Sesu mo tana ʼu ʼapositolo pea ina taki ia nātou ki tuʼa atu ʼo te kolo ʼo kaku ki Petania, ʼaē ʼe tuʼu ʼi te faʼahi ʼo te moʼuga ʼo Oliveto ʼe haga ki te potu hahake. Ko te meʼa leva ʼaē ʼe fakapuna’maʼuli, ko te logope ʼo te ʼu meʼa ʼaē neʼe ina fakahā age kia nātou ʼo ʼuhiga mo tana hake ki selo ʼaē kua ōvi mai, neʼe kei nātou tui aipe ko tona Puleʼaga ʼe fakatuʼu anai ʼi te kele. Koia neʼe nātou fehuʼi age ai ki ai: “ ʼAliki, ʼe ko te temi koa ʼaenī ʼaē ka ke toe fakatuʼu ai te puleʼaga maʼa Iselaele?”

Neʼe mole ina faigaʼi ke ina toe fakatonutonuʼi tanatou manatu hala, ka neʼe ʼui pe ia e Sesu: “ ʼE mole ʼa koutou ia te ʼiloʼi ʼo te ʼu lakaga peʼe ko te ʼu temi ʼaē kua tuku e te Tāmai ki tana fakamāu.” Pea ʼi tana toe fakaʼoʼono ki te gāue ʼaē ʼe tonu ke nātou fai, neʼe ʼui maʼana: “ ʼE koutou maʼu anai te mālohi mokā hifo atu anai te laumālie maʼoniʼoni kia koutou pea ʼe koutou liliu anai ko taku kau fakamoʼoni ʼi Selusalemi, pea mo Sutea katoa pea mo Samalia, pea ʼo aʼu ki te potu taupotu ʼo te kele.”

Pea ʼi tanatou lolotoga sisio, neʼe kamata malaga ake ai ia Sesu ki selo, pea neʼe ʼaofi ia ia e te ʼao ki tanatou mamata. Pea ʼi tana ʼosi fetogi ʼo pulihi tona sinoʼi tagata, neʼe hake ia ki selo ko he tahi ʼe sino fakalaumālie. Neʼe tutuʼu aipe te toko 11, ʼo nātou haga sioʼi te lagi, pea neʼe hā te ʼu tagata e toko lua e kofu hina ʼi ʼonatou tafa. Ko te ʼu ʼaselo neʼe nā fakaliliu ia nāua ko te ʼu tagata ʼo nā ʼui age kia nātou: “ ʼU tagata ʼo Kalilea, koteā ʼaē ʼe koutou tutuʼu ai ʼi henā ʼo sioʼi te lagi? Ko te Sesu ʼaia ʼaē neʼe ʼave ki selo, ʼi te lotolotoiga ʼo koutou, ʼe toe haʼu feiā pe anai ohage pe ko takotou mamata ʼaē ki tana hake ki selo.”

Neʼe feafeaʼi koa te mavae ʼa Sesu ʼi te kele? Neʼe mole fai ai he puhi fakatagi pea neʼe ko tana kau ʼapositolo agatonu pe ʼaē neʼe mamata ki te meʼa ʼaia. ʼE toe feiā pe anai mo tana toe liliu mai: ʼe mole fai ai anai he puhi fakatagi, pea ko tana kau tisipulo agatonu pe ʼaē ka nātou ʼiloʼi anai kua toe liliu mai pea kua kamata ʼafio ia ʼi te mālohi ʼo te Puleʼaga.

Pea hihifo ifo ai te kau ʼapositolo mai te moʼuga ʼo Oliveto, ʼonatou fakalaka ʼi te mafa ʼo Setelone pea nātou ʼolo ki Selusalemi, ʼonatou nonofo ʼi ai, ke nātou fakalogo ki te fakatotonu ʼa Sesu. Hili ia ʼaho e hogofulu, ʼi te lolotoga ʼo te lafeti ʼa te kau Sutea ʼi te Penikosite ʼo te taʼu 33, neʼe fakatahitahi te ʼu tisipulo e toko 120 ʼi Selusalemi ʼi te koga fale ʼi fata. Pea fokifā pe, ko te loto fale katoa kua logoaʼa ohage ko he logoaʼa ʼo he toe matagi lahi. Pea hā te ʼu ʼaleloʼi afi, pea tuʼu takitahi ki te kau tisipulo; ʼonatou palalau fuli ai ʼi te ʼu lea kehekehe. Ohage pe ko te fakapapau age ʼaē ʼa Sesu, ʼe ko te folahi ʼaia ʼo te laumālie maʼoniʼoni! Mateo 28:16-20; Luka 24:49-52; 1 Kolonito 15:5-7; Gāue 1:3-15; 2:1-4.

▪ Neʼe fai e Sesu kia ai tana ʼu fakatotonu fakaʼosi ʼi te moʼuga ʼo Kalilea, pea koteā te ʼu fakatotonu ʼaia?

▪ Neʼe feafeaʼi te fakaloto fīmālieʼi e Sesu tana kau tisipulo, pea ʼe feafeaʼi anai tana nofo mo nātou?

▪ Neʼe lolotoga ʼaho e fia ʼi te ʼosi ʼo tona fakatuʼuake ʼaē neʼe hā ai ia Sesu ki tana kau tisipulo, pea koteā te meʼa neʼe ina akoʼi age kia nātou?

▪ Ko ai te tagata ʼaē neʼe hā ki ai ia Sesu ka neʼe mole heʼeki liliu ko he tisipulo ʼi muʼa ʼo tona mate?

▪ Koteā te ʼu felāveʼi fakamuli e lua ʼaē ʼa Sesu mo tana kau ʼapositolo, pea koteā te meʼa neʼe hoko ai?

▪ ʼE faka ʼuhiga feafeaʼi te toe liliu mai ʼa Sesu ohage ko tana mavae?

▪ Koteā te meʼa neʼe hoko ʼi te Penikosite ʼo te taʼu 33?