Faʼahi 8

Ko Te Fakatuʼutuʼu ʼa Te ʼAtua Kua Vave Tona Hoko

1, 2. Koteā koa te fakatuʼutuʼu ʼaē neʼe fai e te ʼAtua moʼo pulihi ʼo te mamahi?

KO TE famili fakatagata katoa ʼe tau mo te ʼu mamahi talu mai te ʼu sēkulō ʼi te pule ʼa te ʼu tagata agatuʼu pea mo te ʼu temonio. Neʼe mole haga noa te ʼAtua ki totatou ʼu mamahi. Kailoa, lolotoga te ʼu sēkulō ʼaia, neʼe ina fai te ʼu fakatuʼutuʼu moʼo fakahāo te hahaʼi mai te agakovi pea mo te mamahi.

² ʼI te temi neʼe hoko ai te agatuʼu ʼi Eteni, neʼe kamata fakahā e te ʼAtua tana fakatuʼutuʼu ʼaē ko te faʼufaʼu ʼo he puleʼaga ka ina fakaliliu anai te kele ko he palatiso maʼa te hahaʼi (Senesi 3:15). Ki muli mai, ko Sesu, te ʼAve-folafola tāfito ʼa te ʼAtua, neʼe ina fai ʼo ʼuhiga mo te puleʼaga foʼou ʼaia ʼo te ʼAtua ko te kupu tāfito ʼo tana akonaki. Neʼe ina ʼui fēnei ko te falalaʼaga pe ʼaia e tahi ki te hahaʼi. — Taniela 2:44; Mateo 6:9, 10; 12:21.

3. Neʼe fakahigoa feafeaʼi e Sesu te puleʼaga ʼaia ka haʼu ʼo te kele, pea koteā tona tupuʼaga?

³ Neʼe fakahigoaʼi e Sesu te puleʼaga ʼaia ka haʼu ʼo te ʼAtua ko “te puleʼaga ʼo selo”, heʼe pule anai ia mai te lagi (Mateo 4:17). Neʼe ina fakahigoaʼi foki ko “te puleʼaga ʼo te ʼAtua”, koteʼuhi ko te ʼAtua ʼaē neʼe ina Fakatupu (Luka 17:20). Lolotoga te ʼu sēkulō, neʼe foaki e te ʼAtua tona laumālie ki te ʼu tagata ke nātou tohi te ʼu lea faka polofeta ʼo ʼuhiga mo nātou ʼaē ʼe kau anai ki te puleʼaga ʼaia pea mo te ʼu meʼa ka ina fai anai.

Te Hau foʼou ʼo te kele

4, 5. Neʼe fakahā feafeaʼi koa e te ʼAtua ko Sesu te Hau ʼaē ʼe ina leleiʼia?

⁴ Neʼe ko Sesu ʼaē, kua ʼosi ki ai te ʼu taʼu ʼe teitei lua afe, neʼe ina fakahoko te ʼu lea faka polofeta lahi ʼo ʼuhiga mo ia ʼaē ka liliu anai ko te Hau ʼi te Puleʼaga ʼo te ʼAtua. Neʼe ina fakahā neʼe fili ia e te ʼAtua ko te Pule ʼo te puleʼaga ʼaia ka ina taki anai te hahaʼi mai te lagi. Tahi ʼaē meʼa, ʼi te ʼosi ʼo tona mate, neʼe toe fakatuʼuake Sesu e te ʼAtua ʼo ina foaki age te maʼuli ʼi te lagi ko he laumālie mālohi pea mo tuputupua. Neʼe lahi te kau fakamoʼoni ʼo te fakatuʼuake ʼaia. — Gāue 4:10; 9:1-9; Loma 1:1-4; 1 Kolonito 15:3-8.

⁵ Neʼe heka Sesu “ ʼi te toʼomataʼu ʼo te ʼAtua”. (Hepeleo 10:12.) ʼI te fahaʼi ʼaia, neʼe nofo ia ʼo fakalogo ki te temi ʼaē ʼe fakanofo ai ia e te ʼAtua ko te Hau ʼo te Puleʼaga ʼi selo. Koia neʼe hoko ai te lea faka polofeta ia Pesalemo 110:1, ʼaē neʼe ʼui ai e te ʼAtua kia Sesu: “Heka ʼi toku toʼomataʼu ʼo aʼu ki taku tuku tou ʼu fili ohage ko he hekaʼaga ki ʼou vaʼe.”

6. Neʼe fakahā feafeaʼi koa e Sesu ʼe ʼaoga ia ia ke Hau ʼi te Puleʼaga ʼo te ʼAtua?

⁶ ʼI te temi ʼaē neʼe nofo ai ʼi te kele, neʼe fakahā e Sesu tona ʼaoga ʼaē ʼo ia ki te tuʼulaga ʼaia. Logope te ʼu fakataga, neʼe ina fili ia ke nofo agatonu ki te ʼAtua. ʼI te fahaʼi ʼaia, neʼe ina fakahā ko te Tevolo ʼe gutu loi ʼi tana ʼui ʼaē ʼe mole he tagata ʼe nofo agatonu ki te ʼAtua mokā hoko he fakataga kia ia. Ko Sesu, te tagata haohaoa, te ‘lua Atama’, neʼe ina fakahā ko te ʼAtua neʼe mole fai hāla ʼi tana fakatupu te ʼu hahaʼi haohaoa. — 1 Kolonito 15:22, 45; Mateo 4:1-11.

7, 8. Koteā te meʼa lelei ʼaē neʼe fai e Sesu ʼi tana nofo ʼaē ʼi te kele, pea koteā te meʼa ʼaē neʼe ina fakahā ʼaki?

⁷ ʼE ʼi ai koa he tagata takitaki neʼe ina fai he meʼa ʼo lelei age ʼi te ʼu meʼa ʼaē neʼe fai e Sesu lolotoga te ʼu taʼu ʼaē neʼe fai ai tona minisitelio? ʼAki te laumālie maʼoniʼoni ʼo te ʼAtua neʼe liliu ia ʼo mālohi, ʼo fakamālōlō e Sesu te ʼu mahaki, te ʼu ketu, te ʼu kivi, te ʼu tuli, pea mo nātou ʼe ʼalelo mate. Neʼe ina fakatuʼuake foki mo te ʼu mate! ʼAki te ʼu meʼa ʼaia neʼe ina fakahā te meʼa ka ina fai anai ʼi te malamanei katoa mokā haʼu anai ʼi te mālohi ʼo te Puleʼaga. — Mateo 15:30, 31; Luka 7:11-16.

⁸ Neʼe lahi te ʼu meʼa lelei neʼe fai e Sesu ʼi tana nofo ʼi te kele koia neʼe ʼui fēnei ai e tana tisipulo ko Soane: “ ʼIo, ʼe ʼi ai ʼihi meʼa neʼe fai e Sesu. Kapau ʼe tou tohi fuli te ʼu meʼa ʼaia ʼe ʼau mahalo, ʼe mole lavaʼi anai e te malamanei, ke tānaki ʼai te ʼu takaiga tohi ʼaē ka tohi.” — Soane 21:25a.

9. He koʼe neʼe ʼomai te hahaʼi ʼaē ʼe loto fakahagatonu kia Sesu?

⁹ Neʼe agamālu ia Sesu pea mo agaʼofa, neʼe ina maʼu te ʼofa lahi ki te hahaʼi. Neʼe tokoni ki te kau masiva pea mo nātou ʼaē ʼe taʼomia, ka neʼe mole ina fakakeheʼi te hahaʼi paʼaga mo nātou ʼaē ʼe maʼuhiga. Ko te hahaʼi ʼaē ʼe loto fakahagatonu ʼe nātou tali te fakaafe ʼofa ʼaē neʼe fai age e Sesu: “ ʼOmai kia te ʼau, ia koutou fuli ʼe mamahi pea mo ʼaē ʼe mafasia, pea ʼe ʼau fakafīmalie anai koutou. Koutou toʼo taku ʼamo pea ke koutou ako toku ʼuhiga ʼo ʼoku, heʼe ʼau agamalu pea mo agavaivai, pea ʼe koutou maʼu anai he fakafīmalie ki ʼokotou nefesi. He ko taku ʼamo ʼe maʼamaʼa.” (Mateo 11:28-30). Ko te hahaʼi ʼaē ʼe manavasiʼi ki te ʼAtua ʼe nātou ʼomai kia te ia pea ʼe nātou atalitali ki tona temi hau mo te loto fakavilivili. — Soane 12:19.

Ko he ʼu takitaki ʼe hōa ki ai

10, 11. Ko ai ʼaē ka ina vahevahe anai mo Sesu te taki ʼo te kele?

¹⁰ Ko he puleʼaga fakatagata ʼe ʼi ai tona ʼu takitaki pea mo tona ʼu hōa: ʼe feiā foki mo te Puleʼaga ʼo te ʼAtua ʼi selo. ʼE vahevahe anai e Sesu mo ʼihi te takitaki ʼo te kele, he neʼe ina fakapapau ki tana ʼu tisipulo ʼe nātou hau anai mo ia ki te hahaʼi. — Soane 14:2, 3; Fakahā 5:10; 20:6.

¹¹ Koia, ʼo fakatahi mo Sesu, ko he ʼu hahaʼi ʼe tokosiʼi ʼe toe fakatuʼuake ki te maʼuli ʼi selo. ʼE nātou faʼufaʼu te Puleʼaga ʼo te ʼAtua ʼaē ka ina foaki mai anai he ʼu tapuakina heʼegata ki te hahaʼi (2 Kolonito 4:14; Fakahā 14:1-3). Ko Sehova ʼi te ʼu temi neʼe ina gaohi te fakatafito ʼo he pule ka ina foaki mai anai he ʼu manuʼia heʼegata ki te famili fakatagata ʼo te malamanei.

Kua fakaʼosi te pule ʼaē ʼe ʼāteaina mai te ʼAtua

12, 13. Koteā te meʼa ʼaē kua vave fai e te Puleʼaga ʼo te ʼAtua?

¹² ʼI te 20 sēkulō, neʼe kau te ʼAtua totonu ʼi te ʼu meʼa ʼaē ʼe hoko ʼi te kele. Ohage ko te fakamahino mai anai e te fahaʼi 9 ʼo te kaupepa ʼaenī, ko te ʼu lea faka polofeta faka tohi-tapu ʼe nātou fakahā mai ko te Puleʼaga ʼo te ʼAtua pea mo Kilisito neʼe fakatuʼu ʼi te taʼu 1914 pea kua vave nei pe tana faka ʼauha te ʼu faʼahiga meʼa katoa ʼo te tuʼu ʼa Satana. Ko te Puleʼaga ʼaia kua vave nei pe tana ‘pule ʼi te lotolotoiga ʼo te ʼu fili ʼo Kilisito’. — Pesalemo 110:2.

¹³ Ko te lea faka polofeta ʼa Taniela 2:44 ʼe ina ʼui fēnei: “ ʼI te ʼu temi ʼo te ʼu hau ʼaia [ʼaē ʼe nātou pule ʼi te temi nei], ko te ʼAtua ʼo selo ʼe ina fakatuʼu anai he puleʼaga [ʼi selo] ʼe mole toe pulihi anai, pea ʼe mole toe foaki anai te puleʼaga ʼaia ki he tahi atu hahaʼi [ko te pule fakatagata ʼe mole toe fakagafua anai]. ʼE ina [ko te Puleʼaga ʼo te ʼAtua] laliki anai pea ina faka ʼauha anai te ʼu puleʼaga fuli ʼaia, pea ʼe tuʼu anai ia ʼo heʼegata.” — Bible de Jérusalem.

14. Fakahā mai he ʼu lelei ʼe hoko anai ʼi te pulihi ʼo te pule fakatagata.

¹⁴ ʼI te ʼosi faka ʼauha ʼo te ʼu puleʼaga fuli neʼe fakafeagai ki te ʼAtua, ko te Puleʼaga ʼo te ʼAtua ʼe pule katoa anai ki te kele. ʼI tona fakatuʼu ʼaē ʼi te lagi, ʼe mole toe fakahehema anai ia ʼe he tagata. Ko te pule ʼe tuʼu anai ia ʼi te fahaʼi ʼaē neʼe tuʼu ai ʼi te kamataʼaga, ʼi selo, ia tafa ʼo te ʼAtua. Pea ʼi te fai anai ʼo te pule ʼa te ʼAtua ki te kele katoa, ʼe mole toe ʼi ai anai he tahi ʼe toe hehe ʼuhi ko te lotu hāla, pe ko te ʼu filosofia fakatagata peʼe ko te ʼu manatu faka politike. ʼE mole toe tali anai te ʼu meʼa ʼaia. — Mateo 7:15-23; Fakahā, ʼu kapite 17 ki te 19.

[Nota]

[Paki ʼo te pasina 18]

ʼI tana nofo ʼaē ʼi te kele, neʼe fakamālōlō e Sesu te ʼu mahaki pea neʼe ina fakatuʼuake te ʼu mate ko tana fakahā ʼaia te meʼa ʼaē ka ina fai anai ʼi te mālama foʼou.

[Paki ʼo te pasina 19]

Ko te Puleʼaga ʼo te ʼAtua ʼaē ʼe ʼi selo ʼe ina faka ʼauha anai te faʼahiga pule fuli pe ʼe fia faka ʼāteaina mai ia te ia.