Fiafia ʼi He Maʼuli Faka Famili
ʼE ʼi ai koa he ʼu famili ʼe fiafia moʼoni?
ʼE fealagia feafeaʼi koa?
ʼE koutou ʼiloʼi koa he ʼu famili ʼe logo tahi pea mo fiafia ohage ko nātou ʼaē ʼi te kiʼi pepa ʼaenī? ʼI te ʼu faʼahi fuli ko te famili kua kamata maveuveu. Ko te mavete ʼa te taumātuʼa, te mole maʼu ʼo he gāue lelei, ko te taupau tokotahi ʼo he ʼu tamaliki, te lotomamahi — ko te ʼu meʼa fuli ʼaia ʼe pipiki ki te tupuʼaga ʼo te maveuveu ʼo he famili. Neʼe ʼui e te tagata sivi ʼo ʼuhiga mo te maʼuli faka famili: “ ʼI te temi nei, ko te ʼu fakakikite ʼo ʼuhiga mo te haʼele kovi ʼo te maʼuli faka famili kua māhani ia ki te hahaʼi fuli.”
He koʼe koa ia ʼaho nei kua tau te ʼu famili mo te ʼu fihifihia faigataʼa feiā? ʼE feafeaʼi koa ha kita fiafia ʼi he maʼuli faka famili?
Neʼe feafeaʼi te kamataʼaga ʼo te famili
Moʼo tali ki te ʼu fehuʼi ʼaia, ʼe ʼaoga ke tou ʼiloʼi te kamataʼaga ʼo te ʼohoana pea mo te famili. Heʼe kapau neʼe ʼi ai hona Tupuʼaga — ko te hahaʼi ʼe tonu anai ke nātou kumi ia ia moʼo nātou takitaki, heʼe ko ia pe ʼe ina ʼiloʼi te meʼa ʼaē ʼe lelei ke feala ai ke tou fiafia ke katoa ʼi he maʼuli faka famili.
Koia, tokolahi ʼe nātou manatu neʼe mole ʼi ai he Tupuʼaga ʼo te famili. Ko te tohi (The Encyclopedia Americana) neʼe ina ʼui fēnei: “Ko te kau popoto ʼe nātou manatu ko te ʼohoana neʼe kamata ʼaki te ʼu manu takitokolua ʼaē neʼe ʼuluaki fakatupu ia muʼa ʼo te tagata.” Kae, neʼe talanoa Sesu ki te fakatupu ʼo te tagata pea mo te fafine. Neʼe ina fakamuʼamuʼa te ʼuluaki fakamatala ʼa te Tohi-Tapu pea mo ʼui fēnei: “Ko te meʼa ʼaē neʼe fakatahiʼi e te ʼAtua, ke ʼaua naʼa veteki e te tagata!” — Mateo 19:4-6.
Pea neʼe moʼoni te tala ʼa Sesu. Ko te ʼAtua poto neʼe ina fakatupu te ʼuluaki tagata pea mo fakatuʼutuʼu ki he maʼuli faka famili fiafia. Ko te ʼAtua ʼaē neʼe ina fai te ʼuluaki ʼohoana pea mo ina ʼui age ki te tagata “ ʼe mavae anai te tagata mai tana tāmai pea mo tana faʼe, pea ʼe maʼua ia ke pipiki ki tona ʼohoana, pea ʼe tonu ia ke nā liliu ko he kakano pe e tahi.” (Senesi 2:22-24). Koia, ʼe feala koa ke hoko he ʼu fihifihia faka famili ia ʼaho nei ʼuhi ko te holi ki he ʼu faʼahiga maʼuli ʼe nātou maumauʼi te ʼu lekula ʼaē neʼe fakatuʼutuʼu e te Tupuʼaga ʼi tana Folafola, ko te Tohi-Tapu?
Ko te ala fea koa ʼaē ʼe fua lelei anai?
Lagi ʼe koutou ʼiloʼi pe foki, ko te mālama ʼaenī ʼe ina uga te manatu pe ʼaē kia kita pea mo tahi fai pe tana meʼa kia kita. “Ko te mānumānu ʼe ko he meʼa ʼe lelei”, ko te ʼui ʼaia ʼa te tagata gaohi paʼaga ki te kalasi maʼu pepa ʼi te fale ako ʼi Amelika. “ ʼE feala pe ha kotou mānumānu pea mo hoko atu pe takotou lelei ia koutou totonu.” Kae ko te kumi ʼo te ʼu koloā fakamālama ʼe mole ina taki ki he meʼa lelei. Ko te ʼu koloā fakamālama ʼe ko te ʼu meʼa tāfito ia ʼe nātou fakatupu maveuveu te maʼuli faka famili koteʼuhi ʼe nātou veteki te ʼu vāhaʼa ʼo te tagata pea mo fakapuli te temi mo te falā ʼa te hahaʼi. Kae tou vakaʼi age pe muʼa te ʼu tāʼaga lea e lua ʼi te Tohi-Tapu ʼe na tokoniʼi mai tatou ke tou ʼiloʼi te meʼa ʼaē ʼe maʼuhiga ki totatou fīmālie.
“ ʼE lelei age he pa meʼa kai lau ʼakau ʼi he potu ʼe maʼu ai te ʼofa, ʼi he pipi neʼe fafaga ke sino ʼi te fale manu pea mo he loto fehiʼa ʼe maʼu ai.”
“ ʼE lelei age he moʼi pane magemage pea mo he tokalelei ʼe maʼu ai, ʼi he loto fale ʼe fonu ai he ʼu sakilifisio ʼo te ke.”
Tāʼaga Lea 15:17; 17:1, “Today’s English Version.”
ʼE mole koa la ko he ʼu palalau mālohi ʼaia! Koutou fakakaukau age muʼa ki te maʼuli ʼo te malamanei mo ka na pau ko te famili fuli ʼe nātou maʼuliʼi te ʼu meʼa tāfito ʼaia! ʼE toe foaki e te Tohi-Tapu te taki maʼuhiga ʼo ʼuhiga mo te aga ʼaē ke tahi fai e te hahaʼi ʼi te maʼuli faka famili. Tou vakaʼi age muʼa te ʼu fakatuʼutuʼu ʼe ina foaki mai.
Te ʼu tagata ʼohoana: ‘ ʼE tonu ke ʼofa te kau tagata ki ʼonatou ʼohoana, ohage pe ko ʼonatou ʼu sino tonu.’ — Efesi 5:28-30.
ʼE nounou, kae maʼuhiga ʼaupito! ʼE toe tala e te Tohi-Tapu ki te tagata ke ‘fakaʼapaʼapa ki tona ʼohoana’. (1 Petelo 3:7.) ʼE ina fai te faʼahi ʼaia, ʼi hana tokaga tāfito kia ia, hona fakapelepeleʼi, loto mahino ki ai, pea ʼe tokaga ke fīmālie. ʼE ina toe tokagaʼi mo ʼana tonu pea mo fagono ki ai (Vakaʼi ia Senesi 21:12). ʼI takotou manatu ko te ʼu famili fuli ʼe mole lelei anai koa mo ka na pau ko te tagata ʼe ina gaohi lelei tona ʼohoana ohage pe ko tona loto ʼaē ke gaohi lelei mo ia? — Mateo 7:12.
Te ʼu fafine ʼohoana: “Ko te fafine ʼe maʼua ke ʼi ai hana fakaʼapaʼapa lahi ki tona ʼohoana.” — Efesi 5:33.
ʼE kau te fafine ki te fīmālie ʼo te famili ʼi hana tokoni ki tona ʼohoana ʼi tana fai ʼaē ʼo tona ʼu maʼua faigataʼa. Neʼe ko te fakatuʼutuʼu ʼaia ʼa te ʼAtua ʼi tana fakatupu te fafine ko he “tokoni ke liliu ko hona faka katoa”. (Senesi 2:18.) ʼE koutou leleiʼia koa te tapuakina ʼo he maʼuli faka famili mokā ko te fafine ʼe ina fakahā tana fakaʼapaʼapa ki tona ʼohoana ʼi hana lagolago ki tana ʼu tonu pea mo gāue fakatahi mo ia ki te ʼu fakatuʼutuʼu faka famili?
Te tagata mo te fafine ʼi te ʼohoana: “Ko te ʼu tagata mo te ʼu fafine ke nātou fefakahagatonuʼaki ia nātou.” — Hepeleo 13:4, TEV.
Ka ʼe nā maʼuli taumātuʼa agatonu, ko tonā maʼuli faka famili ʼe maʼuhiga ʼaupito. Ko te tono ʼe ina tautau maumauʼi te maʼuli faka famili (Tāʼaga Lea 6:27-29, 32). Koia ʼe fakaloto mālohi fakapotopoto ai tatou e te Tohi-Tapu fēnei: “Ke ke maʼuli fiafia mo tou ʼohoana pea ke ke maʼu tou fiafia pea mo te taʼahine neʼe ʼohoana mo koe (...). Koteā te tupuʼaga ia ʼo tau foaki tou ʼofa anai ki he tahi fafine?” — Tāʼaga Lea 5:18-20, TEV.
Te tāmai mo te faʼe: “Akoʼi [takotou fānau] ʼi te ala ʼaē ʼe lelei kia [nātou].” — Tāʼaga Lea 22:6.
Kapau ʼe tokaga tuʼumaʼu te ʼu mātuʼa ki te fānau, ʼe mahino ia ko te maʼuli faka famili ʼe haʼele lelei anai. ʼIo, ʼe fakaloto mālohiʼi e te Tohi-Tapu te ʼu mātuʼa ke nātou akoʼi tanatou fānau ʼaki te ʼu fakatuʼutuʼu poto ‘mokā heheka ʼi te loto fale, mokā haʼeʼele ʼi te ala, mokā momoe pea mokā ʼaʼala ake’. (Teutalonome 11:19.) ʼE toe ʼui e te Tohi-Tapu, ke fakahā e te ʼu mātuʼa tonatou ʼofa ki tanatou fānau ʼo nātou akonakiʼi nātou. — Efesi 6:4.
Te fānau: “Fānau, koutou fakalogo ki ʼakotou ʼu mātuʼa ʼi te fakatahi mo te ʼAliki.” — Efesi 6:1.
ʼE moʼoni, ʼe meʼa noaʼi te lao ʼi te mālama ʼaenī, ʼo mole faigafua takotou fakalogo tuʼumaʼu ki ʼakotou ʼu mātuʼa. Kae, ʼi takotou manatu ʼe mole lelei age koa te fai ʼo te meʼa ʼaē ʼe ʼui mai e te Tupuʼaga ʼo te famili? ʼE ina ʼiloʼi te meʼa ʼaē ʼe lelei ke fai ʼo ʼuhiga mo he maʼuli faka famili fīmālie. Koia ke koutou faiga fakakinau pea mo fakamalotoloto te fakalogo ki ʼakotou ʼu mātuʼa. Koutou tekeʼi fakamālohi te ʼu fakahāla fuli ʼo te malamanei ʼo ʼuhiga mo te meʼa ʼaē ʼe kovi. — Tāʼaga Lea 1:10-19.
Kapau ko te hahaʼi fuli ʼo te famili ʼe nātou maʼuliʼi te tokoni ʼa te Tohi-Tapu, ko te maʼuli faka famili ʼe lelei anai. ʼO mole gata ʼaki pe he maʼuli faka famili lelei ʼi te temi nei kae ʼe ina toe maʼu mo te ʼamanaki ʼaē ki he temi taulekaleka ka haʼu ʼi te mālama foʼou ʼaē neʼe fakapapau mai ki ai te ʼAtua (2 Petelo 3:13; Fakahā 21:3, 4). Koia, koutou fakamāhani ʼo ako fakatahi faka famili te Tohi-Tapu! Ko te toko miliona famili ʼi te kele katoa neʼe nātou maʼu te taki ʼaē ʼe paki mai ʼi te tohi taulekaleka ʼaē ko te: “E Feala Keke Mauli O Heegata Ite Palatiso Ite Kele”.
Gata pe mokā ʼe fakahā, ko te ʼu vaega ʼo te Tohi-Tapu neʼe toʼo mai te Saintes Écritures — Traduction du monde nouveau.