Ako 16

Takotou Fakatotonu ʼAē Ke Koutou Tauhi Ki Te ʼAtua

Koteā ʼaē ʼe tonu ke koutou fai ke koutou liliu ai ko he kaumeʼa ʼo te ʼAtua? (1, 2)

E feafeaʼi te momoli ʼo tokotou maʼuli ki te ʼAtua? (1)

Ko te temi fea ʼaē ʼe tonu ai ke koutou papitema? (2)

ʼE koutou lava maʼu feafeaʼi te mālohi ʼaē ke koutou nofo agatonu ki te ʼAtua? (3)

1. Ke koutou liliu ko he kaumeʼa ʼo te ʼAtua, ʼe tonu ke koutou maʼu he ʼatamai mālama lelei ʼo ʼuhiga mo te moʼoni ʼo te Tohi-Tapu (1 Timoteo 2:​3, 4), ke koutou tui ki te ʼu meʼa ʼaē neʼe koutou ako (Hepeleo 11:⁠6), ke koutou fakahemala ʼi takotou ʼu agahala (Gāue 17:​30, 31), pea ke koutou līaki tokotou maʼuli ʼāfea. (Gāue 3:19) Pea ʼe tonu ai leva ke uga koutou e tokotou ʼofa ʼaē ki te ʼAtua ke koutou momoli tokotou maʼuli kia te ia. Ko tona faka ʼuhiga, ʼe koutou faikole ʼo fakahā age kia ia, ʼe koutou momoli kia ia tokotou maʼuli, moʼo fai ʼo tona finegalo.​—⁠Mateo 16⁠:24; 22:⁠37.

2. ʼI takotou ʼosi momoli tokotou maʼuli ki te ʼAtua, ʼe tonu ke koutou papitema. (Mateo 28:​19, 20) Ko te papitema ʼe ina fakahā ki te hahaʼi fuli kua koutou momoli tokotou maʼuli kia Sehova. Koia, ko te papitema ʼe faka tuʼakoi pe kia nātou ʼaē kua feala hanatou fakatotonu ke nātou tauhi ki te ʼAtua. Ka papitema he tahi, ʼe uku tona sino katoa ki te vai.a​—⁠Maleko 1:​9, 10; Gāue 8:⁠36.

3. ʼI takotou ʼosi momoli ʼo tokotou maʼuli, ʼe loto anai e Sehova ke koutou mulimuli ki te fakapapau ʼaē neʼe koutou fai. (Pesalemo 50:14; Tagata Tānaki 5:​4, 5) ʼE faigaʼi anai e te Tevolo ke ina fakagata takotou tauhi ʼaē kia Sehova. (1 Petelo 5:⁠8) Kae ke koutou fakaōvi ki te ʼAtua ʼi te faikole. (Filipe 4:​6, 7) Koutou ako tana Folafola ʼi te ʼaho fuli. (Pesalemo 1:​1-3) Koutou nonofo ōvi ki te kokelekasio. (Hepeleo 13:17) Kapau ʼe koutou haga fai te ʼu meʼa fuli ʼaia, pea ʼe koutou maʼu ai anai te mālohi ʼaē ke koutou nonofo agatonu ai ki te ʼAtua. ʼE feala ai leva ke koutou fai ʼo talu ai te ʼu meʼa ʼaē ʼe fakamaʼua atu e te ʼAtua!

[Nota]