Kapite Hogofulu-Ma-Tolu
Ko Te Toe Hahaʼi Tokolahi ʼi Muʼa ʼo Te Hekaʼaga Faka Hau ʼo Sehova
1. (a) Koteā ʼaē ʼe tonu ke hoko ki te kau kaugana ʼa te ʼAtua ʼaē neʼe maʼuʼuli ʼi muʼa ʼo te temi ʼo Kilisito, pea mo te toko 144 000, ʼi muʼa ʼo hanatou maʼu tonatou fakapale? (b) Koteā te faigamālie ʼaē ka foaki anai ki “te toe hahaʼi tokolahi” ʼaē ʼe maʼuʼuli ʼi te temi ʼaenī?
KO TE kau kaugana agatonu ʼa Sehova talu mai ia Apele ʼo aʼu kia Soane Patita, neʼe nātou fakamuʼamuʼa ʼi tonatou maʼuli ia te finegalo ʼo te ʼAtua. Kae kua nātou mamate fuli, ʼo fakatalitali ki te fakatuʼuake ʼi te kele, ʼi te mālama foʼou. Ko te toko 144 000 ʼaē ka fakatahi anai mo Kilisito ʼi te Puleʼaga ʼo te ʼAtua ʼaē ʼi selo, ʼe tonu foki ke nātou mamate ʼi muʼa ʼo tanatou maʼu tonatou fakapale. Kae ʼe fakahā mai ia Apokalipesi 7:9, lolotoga te ʼu ʼaho fakamuli, koia ʼi te temi ʼaenī, ʼe ʼi ai anai “te toe hahaʼi tokolahi” mai te ʼu puleʼaga fuape, ʼe mole nātou mamate anai, kae ʼe nātou maʼu te ʼamanaki ke nātou maʼuli ʼo heʼegata ʼi te kele. ʼE koutou kau koa ia nātou ʼaia?
Kua ʼIloʼi Te Toe Hahaʼi Tokolahi
2. Koteā te ʼu meʼa ʼaē neʼe tou mahino kiai, ke feala ai hatatou ʼiloʼi lelei pe ko ai te toe hahaʼi tokolahi ʼo Apokalipesi 7:9?
2 ʼI te 1923, neʼe mahino ki te kau kaugana ʼa Sehova ko “te ʼu ōvi” ʼo te lea fakatātā ʼa Sesu ia Mateo 25:31-46, pea mo te “tahi ʼu ōvi” ʼaē neʼe talanoa kiai ia Soane 10:16, ʼe ko he ʼu hahaʼi ʼe feala anai ke nātou maʼuʼuli ʼo heʼegata ʼi te kele. ʼI te 1931, neʼe nātou mahino ai ko te hahaʼi ʼaē ʼe fakaʼiloga tonatou ʼu laʼe ia Esekiele 9:1-11, ʼe kau mo nātou ki te ʼu hahaʼi ʼaē ʼe nātou maʼu te ʼamanaki ke nātou maʼuʼuli ʼi te kele. Pea ʼi te 1935 neʼe nātou mahino ai ko te toe hahaʼi tokolahi ʼe nātou kau ki te kalasi ʼo te tahi ʼu ōvi ʼaē neʼe talanoa kiai ia Sesu. ʼI te temi nei, ko te toe hahaʼi tokolahi pea mo ʼofaina ʼaia, ʼe nātou toko lauʼi miliona.
3. He koʼe ʼe mole feala ke tou ʼui, ko te “tutuʼu ia muʼa ʼo te hekaʼaga faka hau” ʼe mole faka ʼuhiga ki he kalasi ʼe ʼalu anai ki te lagi?
3 Ia Apokalipesi 7:9, ʼe mole tohi ai ko te toe hahaʼi tokolahi ʼe nātou tutuʼu ʼi te lagi. Ko tanatou “tutuʼu ia muʼa ʼo te hekaʼaga faka hau” ʼo te ʼAtua, ʼe mole fakamaʼua kiai ke nātou tutuʼu ʼi te lagi. Ko tona faka ʼuhiga pe, ʼe sio te ʼAtua kia nātou. (Pesalemo 11:4) Ka fakatatau te toe hahaʼi tokolahi, ʼaē “ ʼe mole feala tona lau e he tahi,” mo te toko 144 000 ia Apokalipesi 7:4-8 pea mo Apokalipesi 14:1-4, ʼe hā ʼaki mai ko te toe hahaʼi tokolahi ʼe mole ko he kalasi ʼe ʼalu anai ki te lagi.
4. (a) Koteā “te mamahi lahi” ʼaē ka hāo ai anai te toe hahaʼi tokolahi? (b) Ia Apokalipesi 7:11, 12, ko ai ʼaē ʼe ina sioʼi te toe hahaʼi tokolahi pea mo fakatahi mo nātou ʼo atolasio ki te ʼAtua?
4 ʼE ʼui fēnei ia Apokalipesi 7:14 ʼo ʼuhiga mo te toe hahaʼi tokolahi: “ ʼE ko nātou ʼaē ʼe ʼōmai mai te mamahi lahi.” ʼE moʼoni ʼe nātou hāo anai ʼi te toe mamahi lahi ʼaia ka ʼiloʼi anai e te malamanei katoa. (Mateo 24:21) ʼAki he loto fakafetaʼi ʼe nātou fakamoʼoni anai neʼe hāofaki nātou e te ʼAtua pea mo Kilisito, pea ko te kau agatonu fuli ʼaē ʼi te lagi, ʼe nātou fakatahi anai kia nātou ʼaki he leʼo e tahi ʼo ʼui fēnei: “Ameni! Ke foaki ki totatou ʼAtua ʼo talu ai, te tapuakina, mo te kolōlia, mo te poto, mo te fakafetaʼi, mo te fakaʼapaʼapa, mo te mālohi pea mo te māʼoluga ʼo talu ai. Ameni.”—Apokalipesi 7:11, 12.
ʼE Tāu Mo Nātou Te Hāofaki
5. E feafeaʼi hatatou ʼiloʼi te ʼu meʼa ʼaē ʼe fakamaʼua mai, ke tou kau ʼi te toe hahaʼi tokolahi?
5 Ko te hāofaki ʼo te toe hahaʼi tokolahi lolotoga te toe mamahi lahi, ʼe ʼalutahi mo te ʼu lekula faitotonu ʼa Sehova. ʼE fakahāhā lelei e te Tohi-Tapu te ʼu agaaga ʼo nātou ʼaē ka hāofaki anai. Koia ko nātou ʼaē ʼe ʼoʼofa ki te faitotonu, kua feala ia ʼi te temi nei, ke nātou gāue ki tonatou hāofaki. Koteā ʼaē ʼe tonu ke nātou fai?
6. He koʼe ʼe tau mo feʼauga ke tou fakatatau te toe hahaʼi tokolahi ki he faga ōvi?
6 Ko te ʼu ōvi ʼe nātou agamālū pea mo fakalogo. Koia ʼi te temi ʼaē neʼe ʼui ai e Sesu, ʼe ʼi ai tana tahi ʼu ōvi ʼe mole nātou kau ʼi te kalasi ʼaē ka ʼolo ki te lagi, neʼe fia talanoa ʼo ʼuhiga mo he ʼu hahaʼi ʼe nātou fia maʼuʼuli anai ʼo heʼegata ʼi te kele, pea mo nātou fia fakalogo ki tana ʼu akonaki. Neʼe ʼui maʼana: “ ʼE fakalogo taku ʼu ōvi ki toku leʼo, pea ʼe ʼau ʼiloʼi ia nātou, pea ʼe nātou mulimuli ia te ʼau.” (Soane 10:16, 27) ʼE ko he ʼu hahaʼi ʼe nātou fakalogo moʼoni pea mo talagafua kia Sesu, ʼo nātou liliu ko hana ʼu tisipulo.
7. Ko te ʼu kalitate fea ʼaē ʼe tonu ke gāueʼi e te ʼu tisipulo ʼa Sesu?
7 Koteā te tahi ʼu kalitate ʼe tonu ke gāueʼi e te ʼu tisipulo ʼa Sesu? ʼE tali fēnei ʼi te Folafola ʼo te ʼAtua: “Koutou līaki tokotou ʼulugaaga ʼāfea ʼaē ʼe ʼalutahi mo takotou aga ʼāfea pea . . . koutou kofuʼi te ʼulugaaga foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.” (Efeso 4:22-24) Koia ʼe tonu foki ke nātou gāueʼi te ʼu kalitate ʼaē ʼe nātou fakamālohiʼi te logo tahi ʼo te ʼu kaugana ʼo te ʼAtua—“te ʼofa, te fiafia, te tokalelei, te kātaki fualoa, te lotoʼofa, te agalelei, te tui, te agamālū, te loto lolomi.”—Kalate 5:22, 23.
8. Koteā ʼaē ka hoko anai ki te toe hahaʼi tokolahi ʼaē ʼe lagolago ki te toe ʼa te kau fakanofo?
8 Ko te toe hahaʼi tokolahi ʼe nātou lagolago ki te kiʼi tokosiʼi ʼo nātou ʼe nātou ʼamanaki ki te maʼuli ʼi te lagi, ʼaē ʼe nātou takitaki te gāue fai faka mafola. (Mateo 24:14; 25:40) Ko te tahi ʼu ōvi ʼe nātou fai te lagolago ʼaia, logola ʼe nātou ʼiloʼi ʼe nātou felāveʼi anai mo he ʼu fakafeagai, koteʼuhi ʼi te kamata ʼo te ʼu ʼaho fakamuli ʼaenī, ko Kilisito Sesu pea mo tana kau ʼaselo neʼe nātou kapu ia Satana pea mo tana kau temonio mai te lagi. Neʼe tupu ai te ‘malaʼia ki te kele koteʼuhi kua hifo mai kia tatou te Tevolo, ʼaki he ʼita lahi, heʼe ina ʼiloʼi kua nounou tona temi.’ (Apokalipesi 12:7-12) ʼE toe fakaʼāsili e Satana tana ʼu fakafeagai ki te kau kaugana ʼo te ʼAtua, ʼi te ōvi mai ʼo te fakaʼosi ʼo te tuʼu ʼaenī.
9. ʼE lava lelei koa ia te faka mafola ʼo te logo lelei e te ʼu kaugana ʼo te ʼAtua, pea koteā tona tupuʼaga?
9 Logola te ʼu fakafeagai mālohi, kae ʼe haga tuputupu aipe te gāue fai faka mafola. Neʼe ko te toko lauʼi afe kau fai faka mafola ʼo te Puleʼaga, ʼi te fakaʼosi ʼo te ʼUluaki Tau Faka Malamanei, pea ʼi te temi nei kua nātou toko lauʼi miliona, koteʼuhi neʼe fakapapau fēnei e Sehova: “Ko te ʼu mahafu tau fuli ʼaē ka faʼu anai moʼo fakafeagai kia te koe ʼe mole lava anai.” (Isaia 54:17) ʼO feiā mo te tagata ʼi te ʼuluaki sēkulō, neʼe kau ʼi te Telepinale Lahi ʼa te kau Sutea, neʼe ina fakamoʼoni ʼe mole feala ke fakagata te gāue ʼa te ʼAtua. Neʼe ina ʼui fēnei ki te kau Faliseo ʼo ʼuhiga mo te kau tisipulo: “ ʼAua naʼa koutou fai he meʼa kia nātou; (koteʼuhi kapau ko te fakatuʼutuʼu ʼaia peʼe ko te gāue ʼaia ʼe haʼu mai te tagata, ʼe holoʼi anai; kae kapau ʼe haʼu mai te ʼAtua, ʼe mole feala anai ke koutou holoʼi) naʼa meʼa age ia, ʼe lagi koutou hage anai ko he ʼu tagata ʼe nātou tau ʼo fakafeagai ki te ʼAtua.”—Gaue 5:38, 39.
10. (a) Koteā ʼaē ʼe fakatā e “te fakaʼiloga” ʼaē ʼe fai ki te toe hahaʼi tokolahi? (b) ʼE fakalogo feafeaʼi te ʼu kaugana ʼa te ʼAtua ki te “leʼo ʼe haʼu mai te lagi”?
10 ʼI hona ʼaluʼaga fakatā, ʼe fai he fakaʼiloga ki te toe hahaʼi tokolahi ke feala ke hāofaki nātou. (Esekiele 9:4-6) Ko “te fakaʼiloga” ʼaia ʼe ko te fakamoʼoni ʼe kua nātou foaki tonatou maʼuli kia Sehova, kua nātou papitema ko he ʼu tisipulo ʼa Sesu, pea ʼe nātou faiga mālohi ke nātou maʼu he ʼulugaaga ohage ko ʼaē ʼa Kilisito. ʼE nātou fakalogo ki te “leʼo ʼe haʼu mai te lagi” ʼe ina ʼui ʼo ʼuhiga mo te lotu hala, te kautahi faka malamanei ʼa Satana: “Koutou mavae mai ia te ia, e taku hahaʼi, mo kapau ʼe mole koutou fia kau mo ia ki tana ʼu agahala, pea mo kapau ʼe mole koutou fia maʼu he vahe ʼo tona ʼu tautea.”—Apokalipesi 18:1-5.
11. ʼE faka maʼuhigaʼi feafeaʼi e te toe hahaʼi tokolahi, ko nātou ko te ʼu kaugana ʼa Sehova?
11 Tahi ʼaē neʼe ʼui fēnei e Sesu ki tana ʼu tisipulo: “ ʼAki te meʼa ʼaia, ʼe ʼiloʼi anai e te hahaʼi fuli ko koutou ko taku ʼu tisipulo, mo kapau ʼe koutou femaʼuʼaki te ʼofa.” (Soane 13:35) ʼE nātou kehekehe mo te hahaʼi tauhi ʼo te ʼu lotu ʼo te malamanei, ʼaē ʼe nātou fematehiʼaki ʼi te tau, pea ʼi te agamāhani ʼe tupu te faʼahi ʼaia ʼuhi pe heʼe kehekehe tonatou fenua! ʼE ʼui fēnei e te Folafola ʼo te ʼAtua: “Ko te ʼu fānau ʼa te ʼAtua mo te ʼu fānau ʼa te Tevolo, ʼe ʼiloga ʼaki te meʼa ʼaenī: ko ʼaē ʼe mole ina haga fai te faitotonu ʼe mole haʼu ia mai te ʼAtua, ʼo tatau pe mo ia ʼaē ʼe mole ʼofa ki tona tēhina. . . . ʼE tonu ke tou feʼofaʼofani; ʼo mole hage ko Kaino ʼaē neʼe haʼu mai te agakovi, pea neʼe ina matehi tona tēhina.”—1 Soane 3:10-12.
12. ʼI te mamahi lahi, koteā ʼaē ka fai anai e Sehova ki te ʼu ‘ ʼakau’ faka lotu ʼaē ʼe nātou fakatupu he ʼu fua kovi?
12 Neʼe ʼui fēnei e Sesu: “Ko te ʼakau lelei fuli pe, ʼe fua ʼaki te ʼu fua matalelei, kaʼe ko te ʼakau popo fuli pe ʼe fua ʼaki te ʼu fua ʼe kovi; ko he ʼakau lelei ʼe mole feala ia ke kovi ʼona fua, pea ko he ʼakau kovi ʼe mole feala ia ke matalelei ʼona fua. Ko te ʼakau fuli pe ʼe mole fua ʼaki he ʼu fua matalelei, ʼe taʼaga anai pea laku ia ki te afi. Koia, ʼe koutou ʼiloʼi anai te ʼu tagata ʼaia ʼi tonatou ʼu fua.” (Mateo 7:17-20) Ko te ʼu fua ʼo te ʼu lotu ʼo te malamanei, ʼe hā ʼaki mai ʼe ko ‘he ʼu ʼakau’ popo, kua vave fakaʼauha e Sehova ʼi te mamahi lahi.—Apokalipesi 17:16.
13. ʼE fakahā feafeaʼi e te toe hahaʼi tokolahi ʼe nātou “tutuʼu ia muʼa ʼo te hekaʼaga faka hau” ʼa Sehova, ʼi te logo tahi?
13 ʼE fakatokagaʼi mai ia Apokalipesi 7:9-15 he ʼu faʼahi ʼe feala ai te hāofaki ʼo te toe hahaʼi tokolahi. ʼAki he logo tahi, ʼe nātou “tutuʼu ia muʼa ʼo te hekaʼaga faka hau” ʼa Sehova, moʼo lagolago ki tana pule faʼitaliha ʼi te ʼatulaulau. Neʼe nātou “fō tonatou ʼu kofu loloa pea mo nātou fakahihina ʼi te taʼataʼa ʼo te Akeno,” ko tona faka ʼuhiga ʼe nātou fakamoʼoni ko te sakilifisio ʼa Sesu ʼe ina fakamolemole tanatou ʼu agahala. (Soane 1:29) Kua nātou foaki tonatou maʼuli ki te ʼAtua, pea neʼe nātou fakahā te faʼahi ʼaia ʼi tanatou papitema ʼi te vai. Koia kia mata ʼo te ʼAtua, ʼe nātou maʼa, ko tona fakatātā ʼaia ʼo tonatou ʼu kofu loloa hina, pea “ ʼe nātou foaki kia te ia te tauhi fakataputapu ʼi te ʼaho mo te po.” ʼE koutou sio koa ki he ʼu faʼahi ʼe tonu ke koutou hikihiki ai tokotou maʼuli ke ʼalutahi lelei mo te fakamatala ʼaia?
Te ʼu Fua Lelei ʼi Te Temi Nei
14. Koteā te ʼu fua lelei makehe ʼaē kua maʼu ʼi te temi nei e te ʼu kaugana ʼa Sehova?
14 Lagi kua koutou sio ki te ʼu fua lelei makehe ʼaē kua maʼu e te hahaʼi ʼaē ʼe tauhi kia Sehova. Ohage la, ʼi te temi ʼaē neʼe fakahā atu ai te ʼu fakatuʼutuʼu faitotonu ʼa Sehova, neʼe mahino ai kia koutou ʼe ʼi ai te ʼamanaki taulekaleka ki te ka haʼu. ʼI te temi nei kua ʼi ai te fakatuʼutuʼu moʼoni ʼi tokotou maʼuli—ke koutou tauhi ki te ʼAtua moʼoni, ʼaki te ʼamanaki taulekaleka ʼo te maʼuli heʼegata ʼi te palatiso ʼi te kele. Ei, ko te Hau ko Sesu Kilisito, “ ʼe ina taki anai [te toe hahaʼi tokolahi] ki he ʼu matapuna vai ʼo te maʼuli.”—Apokalipesi 7:17.
15. ʼO ʼuhiga mo te ʼu faʼahi faka politike pea ʼo ʼuhiga mo te ʼu aga, koteā te ʼu fua lelei ʼaē ʼe maʼu e te kau Fakamoʼoni ʼa Sehova ʼi tanatou maʼuliʼi te ʼu pelesepeto ʼa te Tohi-Tapu?
15 Ko te tahi fua lelei taulekaleka ʼaē kua maʼu e te toe hahaʼi tokolahi, ʼe ko te ʼofa, te logo tahi, pea mo te felogoi tahi ʼa te ʼu kaugana ʼa Sehova ʼi te kele katoa. ʼUhi ko tatatou kai fuli ki te meʼa kai fakalaumālie e tahi, koia ʼe tou fakalogo fuli ki te ʼu lao pea mo te ʼu pelesepeto ʼaē ʼe tuʼu ʼi te Folafola ʼa te ʼAtua. Ko te tupuʼaga ʼaia ʼo tatatou mole mavetevete ʼi te ʼu manatu faka politike, pea mo fakafenua. Tahi ʼaē meʼa, ʼe tou mulimuli lelei ki te ʼu lekula maʼuhiga ʼaē ʼe fakamaʼua e te ʼAtua ki tana hahaʼi. (1 Kolonito 6:9-11) Koia ko te hahaʼi ʼa Sehova, ʼe mole nātou ʼiloʼi te ʼu fihi, te mavetevete, pea mo te ʼu aga heʼeʼaoga ʼaē ʼe ʼiloga ʼi te mālama ʼaenī, kae ʼe nātou maʼu te faʼahi ʼaē ʼe tou lava fakahigoaʼi ko te palatiso fakalaumālie. Koutou vakaʼi tona fakamatala ia Isaia 65:13, 14.
16. Logola te ʼu fihifihia ʼaē ʼe hoko māhani ʼi te maʼuli, ko te ʼamanaki fea ʼaē ʼe maʼu e te toe hahaʼi tokolahi?
16 Kailoa, ʼe mole haohaoa te ʼu hahaʼi kaugana ʼa Sehova. Pea ʼe nātou felāveʼi mo te ʼu fihifihia ʼaē ʼe hoko māhani ʼi te mālama ʼaenī, ohage la ko he ʼu temi faigataʼa, peʼe nātou vikitima ʼi te ʼu tau ʼo te ʼu puleʼaga. ʼE nātou mahahaki, mo maʼuli mamahi, pea mo mamate. Kae ʼe nātou faka tui ʼi te mālama foʼou, ko te ʼAtua “ ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe pulihi anai ia; ʼe mole toe ʼi ai anai he putu, he kekē, he mamahi.”—Apokalipesi 21:4.
17. Tatau aipe peʼe koteā ʼaē ʼe hoko kia tatou ʼi te temi nei, koteā te ka haʼu taulekaleka ʼaē ʼe ʼamanaki kiai ia nātou ʼaē ʼe nātou tauhi ki te ʼAtua moʼoni?
17 Tatau aipe ia ʼaho nei, kapau ʼe koutou mamate, mate matuʼa, mate mahaki, mate fakaʼī, peʼe mate fakataga, ʼe fakatuʼuake anai koutou e Sehova ʼi te Palatiso. (Gaue 24:15) Pea ʼe hoko atu anai takotou kai ki te ʼu meʼa kai fakalaumālie lolotoga te ʼu Taʼu e Afe ʼo Te ʼAfio Hau ʼa Kilisito. ʼE toe lahi ake anai takotou ʼofa ki te ʼAtua, mokā koutou sio anai ki te hoko faka kolōlia ʼo tana ʼu fakatuʼutuʼu, pea mokā koutou sio anai ki te ʼu tapuakina fakasino ʼaē ka ina foaki anai. (Isaia 25:6-9) ʼI ka haʼu taulekaleka leva ʼaē ka maʼu e te hahaʼi ʼa te ʼAtua!
Fakamanatu
• Koteā te ʼaluʼaga fakaofoofo ʼaē ʼe fakapipiki e te Tohi-Tapu ki te toe hahaʼi tokolahi?
• Kapau ʼe tou fia kau moʼoni ki te toe hahaʼi tokolahi ʼaē ʼe ʼofa makehe ki ai te ʼAtua, koteā ʼaē ʼe tonu ke tou fai?
• ʼE maʼuhiga feafeaʼi kia koutou te ʼu tapuakina ʼaē kua maʼu ʼi te temi nei e te toe hahaʼi tokolahi, pea mo te ʼu tapuakina ʼi te ka haʼu ʼi te mālama foʼou ʼo te ʼAtua?
[Paki ʼo te pasina 123]
ʼAki he logo tahi, ko te lauʼi miliona hahaʼi ʼo te toe hahaʼi tokolahi ʼe nātou atolasio ki te ʼAtua moʼoni