Neʼe Haofaki Ia Nātou He Neʼe Natou Fakalogo Ki Te ʼu Fakatokaga
NEʼE fakakikite e Sesu Kilisito ia te fakaʼosi ʼo te tauhi ʼa te kau Sutea, ʼaē neʼe fai tāfito ʼi te fale lotu ʼaē neʼe tuʼu ʼi Selusalemi. Neʼe mole ina fakahā age he temi ʼe hoko ai anai te ʼaho fakaʼosi. Kae neʼe ina fakahāhā age te ʼu meʼa ʼaē kā hoko anai ʼi muʼa ʼo tona fakaʼauha. Neʼe ina toe fakaloto mālohiʼi tana ʼu tisipulo ke natou nonofo ʼalaʼala, ke feala hanatou feholaki kei tautonu mai te tuʼutāmaki.
Neʼe fakakikite fēnei e Sesu: “Kā kotou sisio anai ʼe ā takatakai ia Selusalemi e he ʼu kautau neʼe faka ʼapitaki-tau, pea ke kotou ʼiloʼi kua ovi mai tona maumau.” Neʼe ina toe ʼui fēnei: “Kā kotou sisio anai ki te meʼa fakalialia ʼaē ʼe ina fakatupu te maumau . . . ʼe tuʼu ʼi he potu tapu, . . . pea ko nātou ʼaē [ʼe] nonofo . . . ʼi Sutea ke feholaki ki te ʼu moʼuga.” Neʼe fakaloto mālohiʼi e Sesu tana kau tisipulo ke ʼaua naʼa natou toe liliu ki muli moʼo haofaki tonatou ʼu koloa faka mālama. Ke feala hanatou hao ʼi te mate, ʼe tonu ke natou foimo feholaki.—Luka 21:20, 21; Mateo 24:15, 16.
ʼI te taʼu 66 ʼo totatou temi, ʼi tanatou fia fakagata te fakafeagai ʼaē neʼe kua fualoa tona fai, neʼe taki e Cestius Gallus ia te foʼi kautau Loma ʼo ʼohofi ia Selusalemi. Neʼe natou hūfi te kolo pea mo natou nofoʼi te ʼu tafaʼaki ʼo te fale lotu. ʼE mole maʼu he palalau moʼo fakamatala te maveuveu ʼaē neʼe hoko ʼi te loto kolo. Neʼe mahino kiā nātou ʼaē neʼe nonofo ʼalaʼala ia te ʼamanaki hoko mai ʼo te fakaʼauha. Kae neʼe kei feala koa hanatou feholaki? Fokifā pē kua mavae ia Cestius Gallus pea mo tana ʼu kautau. Ko te kau Sutea ʼaē neʼe fakafeagai ki te puleʼaga Loma neʼe natou tuli ia nātou. Neʼe ko te temi tonu lā ʼaia ke natou feholaki ai mai Selusalemi pea mo Suta!
ʼI te taʼu ʼaē neʼe hoa mai kiai, neʼe toe liliu mai te ʼu foʼi kautau Loma, kae ʼi te temi ʼaia neʼe kua taki mai leva te ʼu foʼi kautau e Vespasien pea mo tona foha ko Titus. Neʼe tau ia te fenua kātoa. ʼI te kamata ʼo te taʼu 70 ʼo totatou temi, neʼe laga e te kau Loma ia te ʼā ʼaki he ʼu pou kua fakamata ʼo natou ʼā takatakai ia Selusalemi. Neʼe mole kei feala ki he tahi ke hola mai te kolo ki tuʼa. (Luka 19:43, 44) ʼI te loto kolo, neʼe kua fematematehiʼaki pē te hahaʼi. Pea ko nātou ʼaē neʼe mole mamate ʼi te faʼahi ʼaia, neʼe matehi ia nātou e te kau Loma, pe neʼe natou hao kae pilisoniʼi ia nātou. Neʼe maumauʼi kātoa te kolo pea mo tona fale lotu. ʼE ʼui e te tagata fai hisitolia ko Josèphe, neʼe ko te toko tahi miliona tupu kau Sutea ʼaē neʼe mamate ai. Pea ko te fale lotu neʼe mole toe laga ia.
Kanapau lā neʼe kei nonofo he kau Kilisitiano ʼi Selusalemi ʼi te taʼu 70 ʼo totatou temi, neʼe lagi matehi mo nātou peʼe faka ʼaunofo ia nātou ohagē ko te hahaʼi fuli. Kae ʼe fakamatala e te ʼu tagata fai hisitolia ʼo te temi muʼa, neʼe fakalogo ia te kau Kilisitiano ki te fakatokaga ʼa te ʼAtua, pea neʼe natou feholaki mai Selusalemi pea mo Suta ʼo ʼolo ʼo fenonoʼi ʼi te ʼu moʼuga ʼaē neʼe tuʼu ʼi te potu ʼesitē ʼo Solotane. Ko ʼihi neʼe natou ʼolo ki Pela, ko te koga meʼa ʼi Pelea. Neʼe natou mavae ʼi Suta ʼo mole natou toe liliu mai ki te kolo ʼaia. ʼI tanatou fakalogo ki te fakatokaga ʼaē neʼe foaki age e Sesu neʼe mole fakaʼauha ai ia nātou.
ʼE Kotou Fakalogo Koa Ki Te ʼu Fakatokaga ʼAē ʼe Moʼoni?
ʼI te kua lahi ʼo te ʼu logo ʼe mole honatou fakamoʼoni, kua tokolahi te hahaʼi ʼe mole kei natou fia faka maʼuhigaʼi ia te ʼu fakatokaga fuli. Kae kapau ʼe natou tokagaʼi te ʼu fakatokaga pea ʼe feala pē ke natou hao ai.
ʼI te taʼu 1975, ʼi Siaina, neʼe tala ʼe hoko anai ia te mafuike. Neʼe fai e te kau takitaki ʼo te puleʼaga ia te ʼu puleʼaki, pea neʼe fakalogo kiai te hahaʼi, ʼo hao ai ia te ʼu toko lauʼi afe hahaʼi.
ʼI te māhina ʼo ʼApelili 1991, ʼi Filipine, neʼe ʼui e te hahaʼi ʼaē ʼe nonofo ʼi te vaʼe Moʼuga ʼo Pinatubo, ko te moʼuga afi neʼe ina fakamapuhipuhi te kakapu mo te ʼu lefulefu. Hili ʼaia māhina e lua kiai, pea neʼe tala e te Pilo ʼaē ʼe ina sivi te ʼu moʼuga afi pea mo te ʼu mafuike, ia te ʼamanaki mapuhi ʼa te moʼuga afi. Neʼe foimo fai atu aipē ia te ʼu fakatuʼutuʼu moʼo fetuku te ʼu toko lauʼi hogofulu afe hahaʼi ki te tahi ʼu koga meʼa tokalelei. ʼI te ʼuhu ʼo te ʼaho 15 ʼo Sūnio, neʼe hoko te toe pāʼulu ʼo mafisi ai te ʼu kilometa kipi e valu ʼo te ʼu eveeve efu, ʼo tō ifo ki te ʼu koga meʼa ʼi te ʼu tafaʼaki. ʼI te fakalogo ʼa te hahaʼi ki te fakatokaga, neʼe hao ai ia te ʼu toko lauʼi afe hahaʼi.
ʼE fakahā mai ʼi te Tohi-Tapu ia te fakaʼosi ʼo te tuʼu ʼo te ʼu faʼahiga meʼa ʼaenī. ʼE tou māʼuʼuli nei ʼi te ʼu ʼaho fakamuli. ʼE kotou nonofo ʼalaʼala koa ʼi te kua vave hoko mai ʼo te ʼaho ʼaia? ʼE kotou faiga koa ke kotou nonofo ʼi tuʼa ʼo te koga meʼa ʼaē kā tuʼutāmaki? ʼI tatatou ʼiloʼi ʼe tou māʼuʼuli nei ʼi te temi maʼuhiga, ʼe kotou fakatokaga koa ki te hahaʼi ke natou nonofo ʼalaʼala mo nātou?
[Paki ʼo te pasina 20]
Ko te fakalogo ʼa te hahaʼi ki te fakatokaga, neʼe hao ai ia te tokolahi ʼi te temi ʼaē neʼe pāʼulu ai te Moʼuga ʼo Pinatubo
[Paki ʼo te pasina 21]
Ko te kau Kilisitiano ʼaē neʼe natou fakalogo ki te fakatokaga ʼa Sesu neʼe natou hao ʼi te temi ʼaē neʼe fakaʼauha ai ia Selusalemi ʼi te taʼu 70 ʼo totatou temi