ʼE Gāue Feafeaʼi Te ʼu Laumālie Kiā Tatou?

1. He koʼe ʼe tonu ke tou mahino ki te gāue ʼa te kau ʼāselo?

ʼI TE agamāhani ka tou fia feʼiloʼiʼaki mo he tahi, ʼe tou faigaʼi ke tou ʼiloʼi tona famili. Pea ʼe toe feiā pe mo kapau ʼe tou fia ʼiloʼi ia Sehova ʼAtua, ʼe tonu ke tou ʼiloʼi tona famili ʼaē ʼe faʼufaʼu e te kau ʼāselo. ʼI te Tohi-Tapu, ʼe fakahigoaʼi te kau ʼāselo ko “te ʼu foha . . . ʼo te ʼAtua.” (Sopo 38:7) Kae koteā tanatou ʼu gāue ʼi te fakatuʼutuʼu ʼa te ʼAtua? Neʼe nātou fai koa he ʼu gāue ʼi te hisitolia ʼo te hahaʼi ʼo te temi muʼa? ʼE nātou takitaki koa tokotou maʼuli? Kapau koia, pea ʼe nātou takitaki feafeaʼi?

2. Neʼe feafeaʼi te fakatupu ʼo te kau ʼāselo, pea neʼe nātou toko fia?

² ʼI te Tohi-Tapu, ʼe lahi ʼaupito te ʼu vaega ʼe talanoa ai ʼo ʼuhiga mo te kau ʼāselo. Tou vakaʼi age muʼa he ʼu vaega ʼe talanoa ai ʼo ʼuhiga mo nātou, ke feala hatatou mahino lelei age ki te kau ʼāselo. Neʼe feafeaʼi te fakatupu ʼo te kau ʼāselo? ʼE ʼui fēnei iā Kolose 1:16 (MN ): “ ʼAki ia [Sesu Kilisito] neʼe fakatupu ia meʼa fuape ʼi te lagi pea mo te kele.” Koia, ko te ʼu laumālie fuli ʼaē ʼe higoaʼi ko te kau ʼāselo, neʼe fakatupu takitokotahi nātou e Sehova ʼAtua ʼaki tona ʼAlo ʼuluaki tupu. Neʼe ko ʼāselo e toko fia ʼaē neʼe fakatupu? ʼE ʼui ʼi te Tohi-Tapu, neʼe fakatupu te kau ʼāselo e lauʼi teau miliona, pea ko nātou fuli ʼe nātou mālolohi ʼaupito.​—Pesalemo 103:20.a

3. Koteā ʼaē ʼe ʼui mai iā Sopo 38:​4-7 ʼo ʼuhiga mo te kau ʼāselo?

³ ʼE ʼui ʼi te Folafola ʼa te ʼAtua, te Tohi-Tapu, ʼi te temi ʼaē neʼe fakatupu ai te kele, ko “te ʼu foha fuli ʼo te ʼAtua neʼe nātou kalaga he ʼu fakavikiviki.” (Sopo 38:​4-7) Koia ʼi muʼa ʼo te fakatupu ʼo te tagata mo te kele neʼe kua fualoa te tupu ʼa te kau ʼāselo. Pea ʼi te vaega ʼaia, ʼe toe ʼasi mai ʼe feala ki te kau ʼāselo ke nātou logoʼi he ʼu meʼa ʼi ʼonatou loto, heʼe ʼui neʼe nātou “kalaga fakafiafia fakatahi.” Koutou fakatokagaʼi ʼe ʼui ko “te ʼu foha fuli ʼo te ʼAtua” neʼe nātou fakafiafia fakatahi. ʼI te temi ʼaia, ko te kau ʼāselo fuli neʼe nātou kau ki te foʼi famili logo tahi ʼaē neʼe tauhi kiā Sehova ʼAtua.

TE TOKONI ʼA TE KAU ʼĀSELO PEA MO TANATOU PUIPUI TE HAHAʼI

4. Koteā ʼaē ʼe ʼui ʼi te Tohi-Tapu ʼo ʼuhiga mo te tokaga ʼa te kau ʼāselo agatonu ki te ʼu gāue ʼa te tagata?

⁴ Talu tanatou sisio ki te fakatupu ʼo te ʼuluaki taumātuʼa, ko te ʼu laumālie agatonu ʼe nātou tōkakaga ki te tuputupu ʼo te hahaʼi ʼi te kele pea mo te fakahoko ʼo te fakatuʼutuʼu ʼa te ʼAtua. (Tāʼaga Lea 8:​30, 31; 1 Petelo 1:​11, 12) Kae ʼaki te temi, neʼe fakatokagaʼi leva e te kau ʼāselo kua lahi ia te hahaʼi ʼaē ʼe mole kei fia tauhi ki tonatou Tupuʼaga ʼofa. ʼE mahino ia neʼe ko he meʼa fakatupu lotomamahi ki te kau ʼāselo agatonu. Kae ka liliu mai he tokotahi kiā Sehova, pea “e i ai te fakafiafia ia mua o te kau aselo.” (Luka 15:10) Mai tona ʼaluʼaga ʼaē ʼe tokaga ʼaupito te kau ʼāselo ki te maʼuli fīmālie ʼo te hahaʼi ʼaē ʼe tauhi ki te ʼAtua, koia ʼe tou mahino ai ki tonatou fakaʼaogaʼi tuʼa lahi e Sehova moʼo fakamālohiʼi pea mo puipui tana ʼu kaugana agatonu ʼaē ʼi te kele. (Hepeleo 1:​7, 14) Tou vakaʼi age muʼa te ʼu faʼifaʼitaki ʼo ʼuhiga mo te faʼahi ʼaia.

5. ʼI te Tohi-Tapu, ko te ʼu faʼifaʼitaki fea ʼaē ʼe hā ʼaki mai ai te tokoni ʼa te kau ʼāselo?

⁵ Neʼe tokoni ia te kau ʼāselo e toko lua ʼo hāofaki ia te tagata agatonu ko Lote pea mo tona ʼu ʼofafine mai te fakaʼauha ʼo te ʼu kolo agakovi ko Sotoma mo Komola. (Senesi 19:​15, 16) ʼI te ʼu sēkulō ki muli age, neʼe lī te polofeta ko Taniela ki te luo ʼo te ʼu laione, kae neʼe mole lavea pea neʼe ina ʼui fēnei: “Ko toku ʼAtua neʼe ina fekauʼi mai tana ʼāselo pea neʼe ina māpunuʼi te gutu ʼo te ʼu laione.” (Taniela 6:22) ʼI te ʼuluaki sēkulō ʼo totatou temi, neʼe hāofaki e te ʼāselo ia te ʼapositolo ko Petelo mai te fale pilisoni. (Gaue 12:​6-11) Pea neʼe fakaloto mālohiʼi e te kau ʼāselo ia Sesu ʼi te kamata ʼo tana minisitelio ʼi te kele. (Maleko 1:13) Pea ʼi te ʼosi mate pe ʼo Sesu, neʼe ʼasi te ʼāselo kiā Sesu pea neʼe ina “fakalotomalohiʼi ia [ia].” (Luka 22:43) Neʼe tuʼa lahi te fakaloto mālohiʼi ʼo Sesu e te kau ʼāselo ʼaia!

6. (a) Ia ʼaho nei, ʼe puipui feafeaʼi e te kau ʼāselo te hahaʼi ʼa te ʼAtua? (b) Ko te ʼu fehuʼi fea ʼaē ka tou tali anai kiai?

⁶ Ia ʼaho nei, ʼe mole kei hā te kau ʼāselo ki te hahaʼi ʼa te ʼAtua. Logola tatatou mole sisio kiā nātou, kae ko te kau ʼāselo mālohi ʼa te ʼAtua ʼe kei nātou puipui pe tana hahaʼi, tāfito la mai te tuʼutāmaki fakalaumālie. ʼE ʼui fēnei ʼi te Tohi-Tapu: “ ʼE nofo te ʼāselo ʼa Sehova ʼo ʼātakai ia nātou ʼaē ʼe nātou manavasiʼi kiā te ia, pea ʼe ina hāofaki nātou.” (Pesalemo 34:7) He koʼe ʼe tonu ke tou lotomālohi ʼi te ʼu palalau ʼaia? Koteʼuhi ʼe ʼi ai te ʼu laumālie agakovi ʼe nātou fia fakaʼauha tatou! Ko ai te ʼu laumālie ʼaia? Ko ai ʼaē neʼe ina fakatupu nātou? E feafeaʼi tanatou fia fakahalaʼi tatou? Moʼo tali ki te ʼu fehuʼi ʼaia, tou vakaʼi fakanounou muʼa te meʼa ʼaē neʼe hoko ʼi te kamataʼaga mai ʼo te hisitolia ʼo te tagata.

TE ʼU LAUMĀLIE ʼAĒ ʼE FAKAFEAGAI KIĀ TATOU

7. ʼE kaugamālie feafeaʼi te hahaʼi ʼaē kua fakamaliu e Satana?

⁷ Ohage ko tona fakahā ʼi te Kapite 3 ʼo te tohi ʼaenī, ko te tahi ʼāselo neʼe fia pule ki ʼihi ʼāselo pea neʼe fakafeagai leva ia ki te ʼAtua. Ki muli age, ko te ʼāselo ʼaia neʼe fakahigoaʼi ko Satana te Tevolo. (Apokalipesi 12:9) Hili kiai sēkulō e 16 ʼi tana ʼosi kākāʼi ia Eva, neʼe teitei pe ke ina fakamaliu te hahaʼi fuli mai te ʼAtua, gata pe ki te kau agatonu e tokosiʼi, ohage ko Apele, mo Enoke pea mo Noe.​—Hepeleo 11:​4, 5, 7.

8. (a) Neʼe liliu feafeaʼi ʼihi ʼāselo ko te ʼu temonio? (b) Ke feala hanatou hāo ʼi te Tulivio ʼi te temi ʼo Noe, koteā ʼaē neʼe tonu ke fai e te ʼu temonio?

⁸ ʼI te temi ʼo Noe, neʼe fakafeagai mo ʼihi ʼāselo kiā Sehova. Neʼe nātou tuku tonatou nofoʼaga ʼaē ʼi te famili ʼo te ʼAtua ʼi selo, kae nātou hifo ifo ki te kele, ʼo nātou kofuʼi tonatou ʼu sinoʼi tagata. Koteā tona tupuʼaga? ʼE tou lau fēnei iā Senesi 6:2: “Ko te ʼu foha ʼo te ʼAtua moʼoni neʼe nātou tokagaʼi ko te ʼu ʼofafine ʼo te ʼu tagata, ʼe nātou finemui; pea neʼe nātou toʼo maʼa nātou tonatou ʼu ʼohoana, iā nātou fuli ʼaē neʼe nātou filifili.” Kae neʼe mole tuku e Sehova ʼAtua ke hoholo te ʼu aga ʼa te kau ʼāselo ʼaia pea mo tanatou fakahalaʼi te hahaʼi. Koia neʼe ina fakatō ia te tulivio lahi ki te kele moʼo fakaʼauha te kau agakovi fuli, kae ina hāofaki pe tana ʼu kaugana agatonu. (Senesi 7:​17, 23) Pea ʼi te temi ʼaia, ko te kau ʼāselo ʼaē neʼe fakafeagai, peʼe ko te ʼu temonio, neʼe nātou līaki leva tonatou ʼu sinoʼi tagata kae nātou toe liliu ki te lagi ko te ʼu laumālie. Neʼe nātou liliu ʼi te temi ʼaia ko he ʼu ʼāselo ʼe lagolago ki te Tevolo, ʼaē neʼe liliu ko “te pule o te u temonio.”​—Mateo 9:34.

9. (a) Koteā ʼaē neʼe hoko ki te ʼu temonio ʼi tanatou toe liliu ki te lagi? (b) Koteā ʼaē ka tou vakaʼi anai ʼo ʼuhiga mo te ʼu temonio?

⁹ ʼI te temi ʼaē neʼe toe liliu ai te kau ʼāselo talagataʼa ki te lagi, ohage ko tonatou pule ko Satana, neʼe mole kei feala kiā nātou ke nātou kau ki te foʼi famili ʼāselo ʼa te ʼAtua. (2 Petelo 2:4) Logola ʼe mole kei feala ke nātou kofuʼi he ʼu sinoʼi tagata, kae ʼe kei feala pe tanatou fakahalaʼi te hahaʼi. Koia ʼaki te tokoni ʼo tana kau temonio, ko Satana “ ʼe ina fakahēʼi te kele kātoa.” (Apokalipesi 12:​9, MN; 1 Soane 5:19) ʼO feafeaʼi? ʼE fakaʼaogaʼi tāfito e te kau temonio ia te ʼu meʼa moʼo fakahēʼi te hahaʼi. (2 Kolonito 2:11) Tou vakaʼi age muʼa te ʼu meʼa ʼaia.

ʼE FAKAHĒʼI FEAFEAʼI TE HAHAʼI E TE ʼU TEMONIO?

10. Koteā te ʼu meʼa faifakalauʼakau?

¹⁰ Moʼo fakahēʼi te hahaʼi, ʼe fakaʼaogaʼi e te ʼu temonio ia te ʼu meʼa faifakalauʼakau. Ko te ʼu meʼa faifakalauʼakau ʼaia ʼe ko te felogoi mo te ʼu temonio, peʼe kita felogoi fakahagatonu mo nātou peʼe kita fai ʼaki he tahi ʼe fakafelogoi mo nātou. ʼE tauteaʼi ʼi te Tohi-Tapu ia te ʼu meʼa faifakalauʼakau, pea ʼe ina fakatokaga mai ke tou fakamamaʼo mai te ʼu meʼa fuli ʼe pipiki kiai. (Kalate 5:​19-21) ʼE fakaʼaogaʼi e te ʼu temonio ia te ʼu meʼa faifakalauʼakau ohage ko te ʼu mounu ʼaē ʼe fakaʼaogaʼi e te kau tautai. ʼE lahi te ʼu mounu kehekehe ʼe fakaʼaogaʼi e te kau tautai moʼo puke ʼaki te ʼu faʼahiga ika kehekehe. ʼO toe feiā mo te ʼu laumālie agakovi ʼe nātou fakaʼaogaʼi te ʼu faʼahiga meʼa faifakalauʼakau kehekehe moʼo fakahalaʼi te hahaʼi fuape.

11. Koteā te fai fakakikite, pea he koʼe ʼe tonu ke tou fakamamaʼo mai ai?

¹¹ ʼE fakaʼaogaʼi e te kau temonio ia te mounu ʼaē ko te fai fakakikite. Koteā te fai fakakikite? ʼE ko te faigaʼi ʼaē ke kita ʼiloʼi te ka haʼu peʼe ko he ʼu meʼa ʼe mole kita ʼiloʼi. Ko te ʼu faʼahiga fai fakakikite ohage la ko te fakakikite ʼo he meʼa ʼaki te ʼu fetuʼu, te fai fakakikite ʼaki te ʼu kate, mo te fakaʼaogaʼi ʼo he ʼu meʼa moʼo ʼiloʼi ʼo te ka haʼu, mo te lau ʼo te ʼu laini ʼo te nima, pea mo te kumi ʼo te ʼu misitelio peʼe ko he ʼu fakaʼiloga ʼi te ʼu moemisi. ʼI te manatu ʼa te tokolahi, ʼe mole feala ke tou tuʼutāmaki ʼi te fai fakakikite, kae ʼe fakahā ʼi te Tohi-Tapu ko te hahaʼi ʼaē ʼe fai fakakikite ʼe nātou gāue fakatahi mo te ʼu laumālie agakovi. ʼE ʼui iā Gaue 16:​16-18 (MN ), ko te “temonio fai fakakikite” neʼe ina faka fealagia ki te taʼahine ke fai “tana fai fakakikite.” Kae ʼi te temi ʼaē neʼe kapu ai te temonio ʼi tona sino, neʼe mole kei lava fai fakakikite.

12. He koʼe ʼe feala ke tou tuʼutāmakiʼia mo kapau ʼe tou fia felogoi mo te kau mate?

¹² Ko te tahi mounu ʼe fakaʼaogaʼi e te ʼu temonio moʼo fakahēhē te hahaʼi, ʼe ko tanatou fakaneke ia te hahaʼi ke nātou felogoi mo te kau mate. ʼI te agamāhani, ko te hahaʼi ʼaē ʼe lotomamahi heʼe kua mate honatou kāiga, ʼe kākāʼi nātou ʼo ʼuhiga mo te hahaʼi ʼaē kua mamate. ʼE lagi fakahā age anai e he tahi ʼe faifakalauʼakau he logo makehe peʼe lagi palalau anai ʼaki he leʼo ʼe tatau mo ia ʼaē kua mate. Koia ʼaē ʼe fakatui ai te tokolahi, ko te kau mate ʼe kei nātou māʼuʼuli, pea kapau ʼe nātou felogoi mo te kau mate, ʼe feala anai ke nātou tokoni age kiā nātou ʼaē kei māʼuʼuli ke nātou kātakiʼi tonatou ʼu mamahi. Kae ko te taʼi “fakaloto fīmālie” ʼaia ʼe hala ʼosi ia pea ʼe fakatupu tuʼutāmaki. Koteā tona tupuʼaga? Heʼe ko te kau temonio ʼe nātou lava faʼifaʼitakiʼi te leʼo ʼo te hahaʼi ʼaē kua mamate, pea mo fakahā age he logo ki te hahaʼi faifakalauʼakau ʼo ʼuhiga mo ia ʼaē kua mate. (1 Samuele 28:​3-19) Tahi ʼaē meʼa, ohage ko tona fakahā ʼi te Kapite 6, ko te kau mamate ʼe mole kei nātou māʼuʼuli. (Pesalemo 115:17) Koia ko “he tahi ʼe ʼalu ki he tagata ʼe palalau mo te kau mate,” kua fakahēʼi ia ia e te ʼu laumālie agakovi pea ʼe fakafeagai ia ki te finegalo ʼo te ʼAtua. (Teutalonome 18:​10, 11; Isaia 8:19) Koia, koutou tōkakaga ʼo fakafeagai ki te mounu fakatupu tuʼutāmaki ʼaia ʼe fakaʼaogaʼi e te ʼu temonio.

13. Koteā ʼaē kua hoko ki te tokolahi ʼaē ki muʼa atu neʼe nātou mātataku ki te kau temonio?

¹³ Ko te ʼu laumālie agakovi ʼe nātou fakahēʼi te hahaʼi pea mo toe fakamatakuʼi foki nātou. Ia ʼaho nei, kua ʼiloʼi e Satana pea mo tana kau temonio ʼe kei toe ‘honatou kiʼi temi nounou’ ʼi muʼa ʼo tonatou fakaʼauha, koia ʼi te temi nei kua nātou ʼāsili agakovi age ʼosi. (Apokalipesi 12:​12, 17) Ko te toko lauʼi afe hahaʼi ki muʼa atu neʼe nātou māʼuʼuli mātataku ʼi te ʼaho fuli ki te ʼu laumālie agakovi ʼaia, kae ʼi te temi nei kua nātou ʼāteaina mai te mataku ʼaia. Koteā ʼaē neʼe nātou fai ke feala hanatou ʼāteaina mai ai? Koteā ʼe lava fai e he tahi ʼe kau ʼi te ʼu gaohi meʼa faifakalauʼakau?

E FEAFEAʼI HATATOU FAKAFEAGAI KI TE ʼU LAUMĀLIE AGAKOVI?

14. Ohage ko te kau Kilisitiano ʼo te ʼuluaki sēkulō ʼi Efeso, ʼe tou lava ʼāteaina feafeaʼi mai te ʼu laumālie agakovi?

¹⁴ ʼE fakahā mai ʼi te Tohi-Tapu peʼe feafeaʼi hatatou fakafeagai ki te ʼu laumālie agakovi pea koteā ʼaē ʼe tonu ke tou fai ke feala hatatou ʼāteaina mai iā nātou. Koutou vakaʼi te faʼifaʼitaki ʼa te kau Kilisitiano ʼo te ʼuluaki sēkulō ʼi te kolo ʼo Efeso. ʼI muʼa ʼo tanatou liliu ko te kau Kilisitiano, ko ʼihi iā nātou neʼe nātou faifakalauʼakau, kae koteā ʼaē neʼe nātou fai ʼi te temi ʼaē neʼe nātou tuku ai te ʼu faʼahi ʼaia? ʼE ʼui fēnei ʼi te Tohi-Tapu: “Tokolahi ia nātou ʼaē neʼe nātou fai te ʼu meʼa fakatemonio, neʼe nātou tānaki tanatou ʼu tohi pea nātou tutu iā muʼa ʼo te hahaʼi fuli.” (Gaue 19:​19, MN ) Ko te kau Kilisitiano foʼou ʼaia, ʼaki tanatou tutu tanatou ʼu tohi fakatemonio, neʼe nātou tuku mai he faʼifaʼitaki lelei kiā nātou ʼaē ʼe nātou fia fakafeagai ki te ʼu laumālie agakovi ia ʼaho nei. Ko te hahaʼi ʼaē ʼe nātou fia tauhi kiā Sehova, ʼe tonu ke nātou līaki te ʼu meʼa fuli ʼaē ʼe pipiki ki te ʼu meʼa faifakalauʼakau, ohage la ko te ʼu tohi, te ʼu nusipepa, te ʼu ʼata, te ʼu pāki, pea mo te ʼu hiva ʼaē ʼe nātou fakamataleleiʼi te ʼu meʼa faifakalauʼakau, ʼo tupu ai hatatou fia fai kiai pea mo hatatou leleiʼia. ʼE toe ʼi ai mo te ʼu kiʼi meʼa ʼaē ʼe tau ʼe ʼihi ʼi tonatou kia peʼe nātou feʼaveʼaki mo nātou ohage ko he ʼu meʼa moʼo puipui ʼo nātou mai te ʼu temonio.​—1 Kolonito 10:21.

15. Moʼo fakafeagai ki te ʼu laumālie agakovi, koteā ʼaē ʼe tonu ke tou fai?

¹⁵ ʼI te ʼu taʼu ki muli age ʼi te ʼosi tutu e te kau Kilisitiano ʼo Efeso tanatou ʼu tohi faifakalauʼakau, neʼe tohi fēnei e te ʼapositolo ko Paulo: “Ko tatatou tau . . . ʼe [ko he] fakafeagai ki te ʼu mālohi fakalaumālie agakovi.” (Efeso 6:​12, MN ) Kae neʼe mole tuku noaʼi feiā nātou e te kau temonio. Neʼe nātou faiga aipe ke nātou fakahalaʼi ʼaupito age ia nātou. Koia, neʼe koteā te tahi age meʼa ʼaē neʼe tonu ke fai e te kau Kilisitiano ʼaia? Neʼe ʼui fēnei e Paulo: “Kae tāfito foki, ke koutou toʼo te meʼa tali tau lahi ʼo te tui, ʼaē ʼe feala ai anai ke koutou matehi ʼaki te ʼu mahafu kakaha fuli ʼa te agakovi [ko Satana].” (Efeso 6:​16, MN ) Kapau ʼe mālohi tatatou meʼa tali tau ʼo te tui, pea ʼe mālohi age anai mo tatatou fakafeagai ki te ʼu laumālie agakovi.​—Mateo 17:20.

16. ʼE tou lava fakamālohiʼi feafeaʼi tatatou tui?

¹⁶ ʼE tou lava fakamālohiʼi feafeaʼi tatatou tui? ʼAki tatatou ako ia te Tohi-Tapu. ʼE fakalogo te mālohi ʼo he kaupā ki te mālohi ʼo tona ʼu fakatafito. ʼO toe feiā pe, ʼe fakalogo tāfito te mālohi ʼo tatatou tui ki te mālohi ʼo tona fakatafito, ʼaē ko te ʼatamai mālama totonu ʼo te Folafola ʼa te ʼAtua, ia te Tohi-Tapu. Kapau ʼe tou lau pea mo ako te Tohi-Tapu ʼi te ʼaho fuli, pea ʼe mālohi anai tatatou tui. Ohage ko he kaupā mālohi, ko te taʼi tuʼi ʼaia ʼe ina puipui anai tatou mai te ʼu fakahala ʼa te ʼu laumālie agakovi.​—1 Soane 5:5.

17. Koteā ʼaē ʼe tonu ke tou fai moʼo fakafeagai ki te ʼu laumālie agakovi?

¹⁷ Koteā te tahi age meʼa neʼe tonu ke fai e te kau Kilisitiano ʼo Efeso? Neʼe ʼaoga kiā nātou he tahi puipui koteʼuhi neʼe nātou nonofo ʼi te kolo neʼe lahi ʼaupito ai te ʼu gaohi meʼa fakatemonio. Koia neʼe ʼui age e Paulo kiā nātou: “ ʼAki he ʼu faʼahiga faikole kehekehe pea mo he ʼu kole mamahi, koutou faikole ʼi te temi fuli ʼaki te laumālie.” (Efeso 6:​18, MN ) ʼE tou toe māʼuʼuli mo tatou ʼi te mālama ʼe lahi ai te ʼu gaohi meʼa fakatemonio, koia ʼe maʼuhiga ai ke tou faikole mālohi kiā Sehova ke ina puipui tatou ke feala hatatou fakafeagai ki te ʼu laumālie agakovi. ʼIo, ʼe tonu ke tou fakaʼaogaʼi te huafa ʼo Sehova ʼi tatatou ʼu faikole. (Tāʼaga Lea 18:10) Koia, ʼe tonu ke tou haga faikole ki te ʼAtua ke ina “haofaki [tatou] mai te [“agakovi,” MN ],” ia Satana te Tevolo. (Mateo 6:13) ʼE fakalogo anai ia Sehova ki te ʼu faikole fakamalotoloto ʼaia.​—Pesalemo 145:19.

18, 19. (a) He koʼe ʼe tou ʼiloʼi papau ʼe tou mālo anai ʼi tatatou tauʼi ia te ʼu laumālie agakovi? (b) Koteā te fehuʼi ʼaē ka tou tali anai kiai ʼi te kapite ʼaē ka hoa mai?

¹⁸ ʼE agakovi ʼaupito te ʼu laumālie agakovi, kae ʼe mole tonu ke tou mātataku ia nātou mo kapau ʼe tou fakafeagai ki te Tevolo pea mo tou fakaōvi ki te ʼAtua ʼo tou fai Tona finegalo. (Sakopo 4:​7, 8) ʼE tuʼakoi ia te mālohi ʼo te ʼu laumālie agakovi. Neʼe fakatūʼā nātou ʼi te temi ʼo Noe, pea ʼe nātou fakatalitali nei ki tonatou fakaʼauha ʼi te ka haʼu. (Suta 6) Tou toe manatuʼi, ʼe puipui tatou e te kau ʼāselo mālohi ʼa Sehova. (2 Hau 6:​15-17) ʼE fiafia ʼaupito te kau ʼāselo ʼaia ʼi tanatou sisio mai ʼe tou lava tauʼi te ʼu laumālie agakovi. ʼE feala hatatou ʼui ʼe fakaloto mālohiʼi tatou e te kau ʼāselo agatonu. Koia, tou fakaōvi kiā Sehova pea mo tana kau ʼāselo agatonu. ʼOfa pe ke tou tekeʼi te ʼu faʼahiga faifakalauʼakau fuli pea mo tou maʼuliʼi tuʼumaʼu te tokoni ʼa te Folafola ʼa te ʼAtua. (1 Petelo 5:​6, 7; 2 Petelo 2:9) Pea ʼe tou lava falala ʼe tou mālo anai ʼi tatatou tau ʼo fakafeagai ki te ʼu laumālie agakovi.

¹⁹ Kae he koʼe neʼe tuku e te ʼAtua ke māʼuʼuli te ʼu laumālie agakovi pea ke maʼuli mamahi ʼaupito ia te hahaʼi ʼuhi ko te agakovi? ʼE tou tali anai ki te fehuʼi ʼaia ʼi te kapite ʼaē ka hoa mai.