Neʼe Feafeaʼi Koa Te Maʼuli ʼi Te Palatiso?

Neʼe lahi ʼaupitō te ʼu meʼa lelei ʼaē neʼe foaki age e Sehova kiā Atama pea mo Eva. Senesi 1:28

Neʼe fakatupu e Sehova te ʼuluaki fafine, ia Eva, pea neʼe ina foaki age te fafine ʼaia kiā Atama ke liliu ko tona ʼohoana.—Senesi 2:21, 22.

Neʼe fakatupu nāua e Sehova mo tonā ʼu ʼatamai haohaoa, ʼo fēia mo tonā ʼu sino haohaoa, neʼe heʼeki nā agahala.

Ko tonā nofoʼaga Fakapalatiso neʼe ko te ʼōloto ʼo Eteni: ko he koga meʼa taulekaleka, mo tona ʼu vaitafe, mo te ʼu fuʼu ʼakau ʼaē ʼe maʼu ai tona ʼu fua pea mo te faga manu.

Neʼe palalau age Sehova kiā nāua pea mo ina akoʼi nāua. Kanapau lā neʼe nā fakalogo kiā te ia, ʼe nā maʼuli anai ʼo talu ai ʼi te Palatiso ʼi te kele.

Ko te fuʼu ʼakau pē e tahi ʼaē neʼe ʼui age e te ʼAtua kiā nāua ke mole nā kai kiai. Senesi 2:16, 17

Neʼe fakahā age e Sehova kiā Atama mo Eva te fuʼu ʼakau pē e tahi pea mo ʼui age kiā nāua kapau ʼe nā kai tona fua, pea ʼe nā mamate anai.

Ko te tahi ʼāselo ʼi te ʼu ʼāselo ʼa te ʼAtua neʼe fakafeagai kiā te ia. Ko te ʼāselo agakovi ʼaia, ʼe ko Satana te Tēvolo.

Neʼe mole loto e Satana ke fakalogo ia Atama mo Eva kiā Sehova. Koia neʼe ina fakaʼaogaʼi ai te gata ke palalau kiā Eva, ke ina ʼui age kapau ʼe kai ia Eva ki te fuaʼi ʼakau ʼe mole mate anai ia, kae ʼe hagē anai ia ko te ʼAtua. ʼE mahino ia, neʼe ko te loi.—Senesi 3:1-5.