Ko Ai ʼAē Neʼe Fakalogo ʼi Te Tulivio? Ko Ai ʼAē Neʼe Mole Fakalogo?

Neʼe kaugamālie ia nātou ʼaē neʼe natou fai te ʼu aga ʼe kovi ʼi te temi ʼo Noe. Senesi 6:5

Neʼe maʼu fānau ia Atama mo Eva, pea neʼe kaugamālie te hahaʼi ʼi te kele. ʼAki te temi, ko ʼihi ʼāselo neʼe natou mulimuli ki te agatuʼu a Satana.

Neʼe natou hihifo mai ki te kele pea neʼe natou kofuʼi tonatou ʼu sinoʼi tagata ke feala ai hanatou ʼohoana mo te ʼu fafine ʼo te kele. Neʼe fānauʼi e te ʼu fafine ʼaia tanatou ʼu tama neʼe aga fekai ʼaupitō pea mo mālolohi.

Neʼe fonu ai te mālama ʼaki te hahaʼi neʼe natou fai te ʼu aga ʼe kovi. ʼE tala fēnei ʼi te Tohi-Tapu: “Ko te agakovi ʼa te tagata kua lahi ʼaupitō ʼi te kele pea ko te ʼu fakakaukau fuli ʼo tona loto neʼe kovi tuʼumaʼu pē ia.”

Neʼe fakalogo ia Noe ki te ʼAtua pea neʼe ina faʼu te ʼaleka. Senesi 6:​13, 14, 18, 19, 22

Ko Noe neʼe ko te tagata agalelei. Neʼe tala e Sehova kiā Noe ʼe Ina fakaʼauha anai te hahaʼi agakovi ʼaki he tulivio.

Neʼe toe ʼui age e te ʼAtua kiā Noe ke ina faʼu he foʼi vaka ʼe lahi ʼaupitō, neʼe fakahigoaʼi ko te ʼaleka, pea ke ina fakahū ki loto tona fāmili pea mo te faga manu kehekehe.

Neʼe fakatokagaʼi e Noe ki te hahaʼi te ʼamanaki hoko mai ʼo te Tulivio, kae neʼe mole natou fia fakalogo. Ko ʼihi neʼe natou vāʼi ia Noe, pea ko ʼihi neʼe fēhihiʼa kiā ia.

ʼI te kua ʼosi ʼaē ʼo te faʼu ʼo te ʼaleka, neʼe fakahū e Noe te faga manu ki te loto ʼaleka.