ʼE Lava Feafeaʼi Ke Fiafia Tou Fāmili?

1. He koʼē ʼe maʼuhiga tāfito te ʼohoana ki te manūʼia ʼo te fāmili?

Ko te ʼu logo lelei ʼe haʼu mai ia Sehova ʼaē ko te ʼAtua fiafia, pea ʼe loto ia ke fiafia te ʼu fāmili. (1 Timoteo 1:11) ʼE ko ia ʼaē neʼe ina fakatuʼutuʼu te ʼohoana. ʼE maʼuhiga tāfito te ʼohoana ʼi te lao ki te fiafia ʼo te fāmili koteʼuhi ʼe ina fakatupu ʼi te ʼu mātuʼa pea mo te fānau he loto fīmālie.

ʼE feafeaʼi te ʼohoana ki te ʼAtua? ʼE loto ia ke liliu te ʼohoana ko he fakatahi ʼa he tagata pea mo he fafine ʼe hoholo tuʼumaʼu. Ko nātou ʼaē ʼe fia fakalogo ki te ʼAtua ʼe tonu ke natou fakaʼapaʼapa ki te ʼu lao ʼo tonatou fenua ʼo ʼuhiga mo te tohi ʼo te ʼu ʼohoana. (Luka 2:1, 4, 5) ʼE loto ia Sehova ke fenofoleleiʼaki te taumātuʼa. (Hepeleo 13:4) ʼE fehiʼa ki te māvete ʼohoana. (Malakia 2:16) Kae ʼe ina fakagafua ki he Kilisitiano ke māvete pea mo toe ʼohoana mo he tahi kehe mo kapau neʼe tono tona ʼohoana.​—Lau ia Mateo 19:3-6, 9.

2. ʼE tonu ke feafeaʼi te felōgoi ʼa te taumātuʼa?

Neʼe fakatupu e Sehova ia te tagata pea mo te fafine ke nā fetokoniʼaki ʼi te maʼuli fakataumātuʼa. (Senesi 2:18) ʼI tona ʼuhiga pule ʼo te fāmili, ʼe tonu ki te tagata ke tokaga ki te maʼuli fakasino ʼo tona fāmili pea mo akoʼi ia nātou ke natou ʼiloʼi te ʼAtua. ʼE tonu ke ina fakamuʼamuʼa tona ʼohoana ʼi tonā maʼuli fakataumātuʼa. Ko te taumātuʼa ʼe tonu ke nā feʼofaʼaki pea mo fefakaʼapaʼapaʼaki. Mai tona ʼaluʼaga ʼaē ko te ʼu taumātuʼa fuli ʼe nātou heʼe haohaoa, ʼe feala anai ke natou maʼu te maʼuli fakafāmili fiafia mo kapau ʼe natou ako te fefakamolemoleʼaki.​—Lau ia Efeso 4:31, 32; 5:22-25, 33; 1 Petelo 3:7.

3. Koteā ʼaē ʼe tonu ke kolua fai mo kapau ʼe mole kei lelei takolua felōgoi fakataumātuʼa?

Kapau ʼe kolua felāveʼi mo he ʼu fihifihia ʼi tokolua maʼuli fakataumātuʼa, ʼe tonu ke kolua faigaʼi ke kolua felōgoi tahi ʼi te ʼofa. (1 Kolinito 13:4, 5) Ko te Folafola ʼa te ʼAtua ʼe mole ina tokoniʼi he taumātuʼa ke nā tahi nonofo moʼo fakatokatoka ʼo te ʼu fihifihia ʼo tonā maʼuli fakataumātuʼa.​—Lau ia 1 Kolinito 7:10-13.

4. ʼU fānau, koteā ʼaē ʼe loto kiai te ʼAtua maʼa koutou?

ʼE loto ia Sehova ke kotou maʼuli fiafia. ʼE ina foaki atu he ʼu tokoni ke ʼaoga kiā koutou ʼi tokotou temi tūpulaga. ʼE ina loto ke kotou fakaʼaogaʼi te poto pea mo te ʼu meʼa ʼaē kua mahino kiai ʼakotou mātuʼa. (Kolose 3:20) ʼE loto ia Sehova, tokotou Tupuʼaga, ke kotou fiafia ʼi te fai ʼo tona finegalo pea mo ʼaē ʼo tona ʼAlo.​—Lau ia Ekelesiasi 12:1-3; Mateo 19:13-15; 21:15, 16.

5. ʼU mātuʼa, ʼe feafeaʼi hakolua faigaʼi ke fiafia ʼakolua fānau?

ʼE tonu ke kolua gāue mālohi moʼo foaki he meʼa kai, he nofoʼaga, pea mo he ʼu mutuʼi meʼa ki ʼakolua fānau. (1 Timoteo 5:8) Kae ke fiafia ʼakolua fānau, ʼe ʼaoga ke kolua akoʼi ia nātou ke natou ʼoʼofa ki te ʼAtua pea mo natou tuku ke ina akoʼi ia nātou. (Efeso 6:4) Ko takolua fakahā tokolua ʼofa ʼaē ki te ʼAtua ʼe feala ke malave ki te loto ʼo takolua tamasiʼi. ʼE feala ke maʼu e takolua tamasiʼi he ʼu faʼahiga sio ʼe lelei mo kapau neʼe fakatafito tona akoʼi ki te Folafola ʼa te ʼAtua.​—Lau ia Tetelonome 6:4-7; Taaga Lea 22:6.

ʼE fua lelei anai ki ʼakolua fānau mo kapau ʼe kolua fakalotomālohiʼi pea mo vikiʼi ia nātou. Kae ʼe toe ʼaoga foki ke fakatonutonuʼi pea mo akonakiʼi ia nātou. Ko te faʼahiga ako ʼaia ʼe ina puipui ia nātou mai he ʼu aga ʼe feala ke fakatupu kovi kiā nātou. (Taaga Lea 22:15) Kae ʼe mole tonu ke fefeka fau te akonaki ʼaia.​—Lau ia Kolose 3:21.

ʼE lahi te ʼu tohi neʼe tā e te kau Fakamoʼoni ʼa Sehova moʼo tokoni ki te ʼu mātuʼa pea mo ʼanatou fānau. Ko te ʼu tohi ʼaia ʼe fakatafito ki te Tohi-Tapu.​—Lau ia Pesalemo 19:8, 12.