AKO 10
ʼE Ke Lava ʼIloʼi Feafeaʼi Te Lotu Moʼoni?
1. ʼE ko he lotu moʼoni pē koa ia e tahi?
“Koutou tokaga ki te kau polofeta kaka.”—MATEO 7:15
Neʼe akoʼi e Sesu ki ʼana tisipulo te lotu pē e tahi, ʼaē ko te lotu moʼoni. ʼE hagē ko he ala ʼe ʼalu ki te maʼuli heʼegata. Neʼe ʼui e Sesu: “E toko sii natou ae e natou mau” te ala ʼaia. (Mateo 7:14) ʼE tali e te ʼAtua ia te tauhi pē ʼaē ʼe fakatafito ki tana Folafola ʼaē ʼe moʼoni. Ko nātou fuli ʼaē ʼe kau ki te tauhi moʼoni ʼe natou logotahi ʼi te tui e tahi.—Lau ia Soane 4:23, 24; 14:6; Efeso 4:4, 5.
Vakaʼi Te ʼAta ʼE Tali Koa e Te ʼAtua Te ʼu Tauhi Fuli?
2. Koteā ʼaē neʼe ʼui e Sesu ʼo ʼuhiga mo te kau Kilisitiano loi?
“E natou ui e natou iloi te Atua, kae e natou fakafisi kia ia i anatou gaue.”—TITO 1:16.
Neʼe fakatokaga e Sesu ʼe ʼulihi anai e te kau polofetā loi ia te Lotu Fakakilisitiano. ʼE nātou hagē mai ko he hahaʼi ʼe kau ki te tauhi moʼoni. ʼE ʼui e ʼanatou lotu ko nātou ko te kau Kilisitiano. Kae ʼe feala ke ke ʼiloʼi tonatou ʼuhiga totonu. ʼO feafeaʼi? Koteʼuhi ko te tauhi moʼoni pē ʼaē ʼe tou maʼu ai ia te kau Kilisitiano moʼoni, heʼe ʼiloga ʼi ʼonatou kalitātē pea mo ʼanatou aga.—Lau ia Mateo 7:13-23.
3. ʼE feafeaʼi hau ʼiloʼi ia nātou ʼaē ʼe kau ki te tauhi moʼoni?
Fakatokagaʼi ia te ʼu koga ʼaenī e nima:
Ko nātou ʼaē ʼe kau ki te tauhi moʼoni ʼe natou fakaʼapaʼapa ki te Tohi-Tapu heʼe maʼa nātou ʼe ko te Folafola ia ʼa te ʼAtua. ʼE natou faigaʼi mālohi ke natou maʼuliʼi ʼona lao. Koia, ʼe kehekehe pē ia te lotu moʼoni mo te ʼu lotu ʼaē ʼe fakatafito ki te ʼu manatu fakatagata. (Mateo 15:7-9) Ko nātou ʼaē ʼe kau ki te tauhi moʼoni ʼe mole natou fakamafola he meʼa kae natou fai he tahi age meʼa.—Lau ia Soane 17:17; 2 Timoteo 3:16, 17.
ʼE fakamaʼuhigaʼi e te kau tisipulo moʼoni ʼa Sesu ia te huafa ʼo te ʼAtua, ʼaē ko Sehova. Neʼe fakamaʼuhigaʼi e Sesu te huafa ʼo te ʼAtua ʼaki tana fakahā tona huafa ki te hahaʼi. Neʼe tokoni ki te hahaʼi ke natou ʼiloʼi te ʼAtua pea mo ina ako ia nātou ke natou faikole ke fakatapuhā te huafa ʼo te ʼAtua. (Mateo 6:9) ʼI te koga meʼa ʼaē ʼe ke nofo ai, ko te lotu fea ʼaē ʼe ina fakahā ki te hahaʼi ia te huafa ʼo te ʼAtua?—Lau ia Soane 17:26; Loma 10:13, 14.
Ko te kau Kilisitiano moʼoni ʼe natou fakamafola ia te Puleʼaga ʼo te ʼAtua. Neʼe fekauʼi ifo e te ʼAtua ia Sesu ke haʼu ʼo fakamafola ia te logo lelei ʼo ʼuhiga mo te Puleʼaga. Ko te Puleʼaga ʼo te ʼAtua ʼaē kā hau ai anai ia Sesu Kilisito, ʼe ko te ʼamanaki pē ʼaia e tahi maʼa te tagata. Neʼe haga palalau ia Sesu ki te Puleʼaga ʼo aʼu ki te ʼaho ʼo tona mate. (Luka 4:43; 8:1; 23:42, 43) Neʼe ina ʼui ko ʼana tisipulo ʼe natou fakamafola anai ia te Puleʼaga. Kapau ʼe haʼu he tahi ʼo palalau ʼatu kiā koe ʼo ʼuhiga mo te Puleʼaga ʼo te ʼAtua, ʼi tau manatu ko te lotu fea ʼaē ʼe kau kiai?—Lau ia Mateo 24:14.
Ko te kau tisipulo ʼa Sesu ʼe mole natou kau ki te mālama agakovi ʼaenī. ʼE feala ke ke ʼiloʼi ia nātou heʼe mole natou kau ki te politike pea mo te ʼu tokakovi fakasōsiale. (Soane 17:16; 18:36) Pea ʼe mole natou faʼifaʼitakiʼi ia te ʼu aga ʼaē ʼe kovi ʼo te mālamanei.—Lau ia Sakopo 4:4.
ʼE fefakahāʼaki e te kau Kilisitiano moʼoni ia he ʼofa ʼe makehe. ʼE natou ako ʼi te Folafola ʼa te ʼAtua te fakaʼapaʼapa ki te ʼu lanu kehekehe. Ko te ʼu lotu hala ʼe natou lagolago mālohi ki te ʼu tau fakapuleʼaga, kae ko nātou ʼaē ʼe kau ki te tauhi moʼoni ʼe natou fakafisi ki te faʼahi ʼaia. (Mikea 4:1-3) ʼE natou foaki tonatou temi pea mo ʼonatou koloa moʼo tokoni pea mo fakalotomālohiʼi ʼo ʼihi.—Lau ia Soane 13:34, 35; 1 Soane 4:20.
4. ʼE feala koa ke ke fakahā mai pe kofea ia te lotu moʼoni?
Ko te lotu fea ʼaē ʼe ina fakatafito ʼana akonaki fuli ki te Folafola ʼa te ʼAtua pea mo fakamaʼuhigaʼi tona huafa? Ko te lotu fea ʼaē ʼe ina fakamafola ko te Puleʼaga ʼo te ʼAtua ʼe ko te ʼamanaki pē ʼaia e tahi maʼa te tagata? Ko te hahaʼi fea ʼaē ʼe natou maʼuliʼi te ʼofa pea mo fakafisi ki te ʼu tau? Koteā tau manatu ki te ʼu fehuʼi ʼaia?—Lau ia 1 Soane 3:10-12.