Koteā ʼAē Kā Hoko Anai Ki Te ʼu Lotu?

1. ʼE lelei koa te ʼu lotu fuli?

ʼE ʼi ai te ʼu hahaʼi ʼe tauhi fakamālotoloto ʼi te ʼu lotu fuli. ʼE ko he logo ʼe lelei hatatou ʼiloʼi ʼaē ko te ʼAtua ʼe sio ki te ʼu faʼahiga hahaʼi ʼaia pea mo tokaga kiā nātou. Kae neʼe fakaʼaogaʼi ia te ʼu lotu moʼo fakahoko ia te ʼu gāue ʼe kovi. (2 Kolinito 4:3, 4; 11:13-15) Ohagē ko tona ʼui ʼi te ʼu talalogo, ʼe kau ʼihi lotu ki te ʼu agamālohi fakamataku, te matehi ʼo te hahaʼi ʼo he lanu, te ʼu tau, pea mo te gaohi koviʼi ʼo te tamaliki. ʼE ko he meʼa ʼe fakalotomamahi ia ki te hahaʼi ʼaē ʼe natou tui fakamālotoloto ki te ʼAtua!​—Lau ia Mateo 24:3-5, 11, 12.

Ko te lotu moʼoni ʼe fakavikiviki ki te ʼAtua kae ko te ʼu lotu hala ʼe fehiʼa ai te ʼAtua. ʼE natou akoʼi te ʼu manatu ʼe mole haʼu mai te Tohi-Tapu, ohagē lā ko te ʼu akonaki hala ʼo ʼuhiga mo te ʼAtua pea mo te mate. Kae ʼe loto ia Sehova ke ʼiloʼi e te hahaʼi ia te moʼoni ʼo ʼuhiga mo ia.​—Lau ia Ekelesiasi 9:5, 10; 1 Timoteo 2:3-5.

2. Koteā ʼaē kā hoko anai ki te ʼu lotu?

Ko te meʼa lelei foki, heʼe ʼiloʼi e te ʼAtua ia te ʼu lotu ʼaē ʼe natou ʼui ʼe natou ʼoʼofa kiā te ia kae ʼi tona fakahagatonu ʼe natou manako ki te mālama ʼa Satana. (Sakopo 4:4) ʼE fakahigoa e te Folafola ʼa te ʼAtua ia te ʼu lotu hala fuli ko “Papilone Lahi.” Ko Papilone, neʼe ko te kolo ʼi te temi muʼa, ʼaia neʼe kamata ai ia te lotu hala ʼi te hili ʼo te Tulivio ʼi te temi ʼo Noe. Kua vave pē te pulihi e te ʼAtua ia te ʼu lotu ʼaē ʼe natou kākāʼi pea mo puleʼi fakamālohi ia te hahaʼi.​—Lau ia Apokalipisi 17:1, 2, 5, 16, 17; 18:8.

Kae ʼe mole galoʼi e Sehova ia te ʼu hahaʼi ʼaē ʼe tauhi fakamālotoloto ʼe mavetevete ʼi te ʼu lotu hala ʼo te mālamanei. ʼE ina fakatahiʼi ia te ʼu hahaʼi ʼaia ʼaki tana akoʼi age kiā nātou ia te moʼoni.​—Lau ia Mikea 4:2, 5.

3. Koteā ʼaē ʼe tonu ke fai e te hahaʼi ʼaē ʼe tauhi fakamālotoloto?

ʼE tokaga ia Sehova kiā nātou ʼaē ʼe natou fia fai ia te meʼa ʼaē ʼe moʼoni pea mo lelei. ʼE ina uga ia nātou ke natou mavae mai te ʼu lotu hala. Ko nātou ʼaē ʼe natou ʼoʼofa ki te ʼAtua ʼe natou tali lelei ke natou fai he ʼu fetogi moʼo fakafiafia ʼo te ʼAtua.​—Lau ia Apokalipisi 18:4.

ʼI te temi ʼo te kau ʼapositolo, neʼe tali fakafiafia e te hahaʼi ʼaē ʼe tauhi fakamālotoloto ia te logo lelei ʼaē neʼe fakamafola age. Neʼe natou ako mai ia Sehova te faʼahiga maʼuli ʼe foʼou. Pea ko te faʼahiga maʼuli ʼaia ʼe fakafiafia age, pea ʼe ʼi ai tona ʼuhiga pea mo tona ʼamanaki lelei. ʼE ko he faʼifaʼitaki lelei ʼaia maʼa tātou iā ʼaho nei, koteʼuhi neʼe natou tali ia te logo lelei ʼo natou fakamuʼamuʼa ia Sehova ʼi tonatou maʼuli.​—Lau ia 1 Tesalonika 1:8, 9; 2:13.

ʼE tali e Sehova ki tona fāmili ʼaē ʼe tauhi kiā te ia, ia nātou ʼaē kua mavae mai te ʼu lotu hala. Kapau ʼe ke tali lelei ia te fakaafe fakafiafia ʼa Sehova pea ʼe ke kaumeʼa lelei anai mo ia. ʼE ke maʼu anai he fāmili ʼofa foʼou ʼe tauhi kiā Sehova pea mo te maʼuli heʼegata.​—Lau ia Maleko 10:29, 30; 2 Kolinito 6:17, 18.

4. ʼE foaki feafeaʼi anai e te ʼAtua ia te fiafia ki te kele kātoa?

Ko te fakamāu ʼaē kā fai ki te ʼu lotu hala ʼe ko he logo lelei ia. ʼE ina fakafīmālieʼi anai ia te kele kātoa mai te ʼu pule fakamālohi. ʼE mole toe fakahēhē anai pea mo fakamaveuveu ʼi he temi e te ʼu lotu hala ia te hahaʼi. Ko nātou fuli ʼaē ʼe māʼuʼuli ʼi te lagi pea mo te kele, ʼe fakatahiʼi anai ia nātou ʼi te tauhi ki te ʼAtua moʼoni pē e tahi.​—Lau ia Apokalipisi 18:20, 21; 21:3, 4.