Ko He Logo Neʼe Fufu Kaʼe Kua Tou Fiafia ʼi Tona Iloʼi

Neʼe kua tala atu koa e he tahi he kiʼi logo ʼe mole iloʼi e he tahi?—a ʼE talanoa ʼi te Tohi-Tapu ʼo ʼuhiga mo he logo makehe neʼe fufu pea ʼe haʼu mai te ʼAtua. ʼE ui ʼe ko he logo ʼe fufu koteʼuhi neʼe mole iloʼi e he tahi. Maʼia mo te kau ʼaselo neʼe natou fia iloʼi pe kotea te logo ʼaia. ʼE ke fia iloʼi koa te logo ʼaia neʼe fufu?—

Kua fualoa ki muʼa atu, neʼe fakatupu e te ʼAtua te ʼuluaki tagata pea mo te ʼuluaki fafine. Neʼe nā higoa ko Atama mo Eva. Neʼe foaki e te ʼAtua kia naua hona nofoʼaga matalelei, neʼe higoa ko te ʼoloto ʼo Eteni. Ka na pau la neʼe fakalogo ia Atama mo Eva ki te ʼAtua, neʼe feala kia naua mo ʼanā fanau ke natou fakaliliu te kele katoa ko he palatiso ohage ko te ʼoloto ʼaia. Pea neʼe feala hanatou maʼuʼuli ʼo heʼe gata ʼi te palatiso ʼaia. Kaʼe ʼe ke manatuʼi pe kotea ʼae neʼe fai e Atama mo Eva?—

Neʼe talagataʼa ia Atama mo Eva ki te ʼAtua pea ko te tupuʼaga la ʼaia ʼo tatatou mole maʼuʼuli ia ʼaho nei ʼi te palatiso. Kaʼe neʼe tala e te ʼAtua, ʼe ina fakaliliu anai te kele katoa ke matalelei, pea ʼe maʼuʼuli anai ʼo heʼe gata te hahaʼi fuli pea mo natou fiafia. ʼE ina fakahoko feafeaʼi anai ia te faʼahi ʼaia? Lolotoga he temi loaloaga, neʼe mole iloʼi e te hahaʼi. Neʼe ko he meʼa ia neʼe fufu.

ʼI te temi ʼae neʼe haʼu ai Sesu ki te kele, neʼe ina akoʼi ki te hahaʼi pe kotea ia te logo ʼaia neʼe fufu. Neʼe ina ui, ko te logo ʼaia neʼe fufu neʼe ko te Puleʼaga ʼo te ʼAtua. Neʼe ina ui ki te hahaʼi ke natou faikole ke hoko mai te Puleʼaga ʼaia. Pea ko te Puleʼaga ʼaia ka ina fakaliliu te kele ko he palatiso matalelei.

ʼE ke fiafia koa ʼi tau iloʼi ia te logo ʼaia neʼe fufu?— Ke ke manatuʼi, ʼe ko natou pe ʼae ʼe fakalogo kia Sehova ka maʼuʼuli anai ʼi te Palatiso. ʼE fakamatala mai ʼi te Tohi-Tapu te ʼu hisitolia ʼo te ʼu tagata mo te ʼu fafine neʼe natou fakalogo kia Sehova. ʼE ke fia iloʼi lelei koa ia natou ʼaia?— Ta vakaʼi pe ko ai ʼihi ia natou ʼaia pea mo feafeaʼi hatā mulimuli ki tanatou faʼifaʼitaki.