ʼE Feafeaʼi Mo Kapau ʼe Fakaneke Au Ki He ʼu Aga Heʼe ʼAoga?

KOTEA ʼAE KA KE FAI ANAI?

Fakakaukauʼi age muʼa te aluʼaga ʼaeni: ʼE kei mahina lua pe te fakatahi ʼa Heather mo Mike. Kaʼe ʼe hage ia kia Heather kua fualoa tanā feiloʼiʼaki. ʼE nā fefaitohiʼaki tuʼumaʼu ʼi te telefoni, mo fetelefoniʼaki lolotoga ni hola. Pea ʼi te lakaga ʼaeni, ʼe mole kei loto ia Mike ke gata ʼaki pe tanā faipalalau.

Lolotoga te ʼu mahina ʼaia ʼe lua, neʼe nā fetapikiʼaki pe pea mo feʼumaʼaki. Kia Heather ʼe feʼauga ai pe ia. Kaʼe ʼe mole ina loto foki ke nā mavete. Koteʼuhi ʼi tana fakatahi mo Mike, neʼe ina logoʼi ʼe mole kei tatau mo he tahi pea kua lelei pe ia meʼa fuli kia ia. Pea ʼe ina ui, ‘ ʼE ma femanakoʼaki mo Mike . . .’

Kapau kua feala hau fakatahi mo he taʼahine peʼe ko he tama pea mo ka na pau la ʼe ke tau mo te aluʼaga ʼo Heather, kotea ʼae ka ke fai anai?

FAKAKAUKAUʼI MUʼA

Kapau ʼe ke kake ʼi he fuʼu ʼakau pea ʼe ke faiga ke ke lele ohage ko he manulele, ʼe ke tuʼutamaki ai anai. ʼE toe feia pe anai mo kapau ʼe ke talagataʼa ki te ʼu lekula ʼo ʼuhiga mo te aga ʼae ʼe tonu ke fai. Ohage la, ko te lekula ʼaeni: “Fakamamao mai te feauaki [peʼe mai te ʼu aga heʼe ʼaoga].”—1 Tesalonika 4:3.

Kotea te ʼu fua ʼo te talagataʼa ki te fakatotonu ʼaia? ʼE ui fenei ʼi te Tohi-Tapu: “Ko ʼae ʼe ina fai te ʼu aga heʼe ʼaoga, ʼe agahala ia ki tona sino totonu.” (1 Kolonito 6:18, MN) ʼO feafeaʼi?

Neʼe maʼu e te kau popoto, ko te tokolahi ʼi te kau tupulaga ʼae neʼe kua momoe mo he tahi kaʼe heʼeki ʼohoana, neʼe natou tau mo te ʼu fua kovi ʼaeni

• FAKAHEMALA. ʼE kaugā malie te kau tupulaga neʼe natou fai ni aga heʼe ʼaoga ʼi muʼa ʼo hanatou ʼohoana, pea neʼe natou fakahemala ki ʼamuli.

• LOTOLOTOLUA. ʼI he ʼosi momoe ʼa he tama mo he taʼahine, ʼe nā tahi maʼu te manatu ʼaeni: ‘Ko ai ʼape ʼae neʼe kua momoe mo ia ʼaeni?’

• FAIHALA. ʼI tona fakahagatonu, ko he taʼahine ʼe ina leleiʼia pe he tama ʼe ina puipui anai ia ia ʼi he tama ʼe haʼu pe ke ina moeʼi. Pea ko he tama, ʼe mole ʼofa anai ia ki he taʼahine ʼe faigafua.

• Te manatu tafitō: Kapau ʼe ke fai he aga heʼe ʼaoga kaʼe heʼeki ke ʼohoana, ʼe puli ai tou mata gafua. (Loma 1:24) Kaʼe ʼe mole tonu ke ke meʼa noaʼi tou sino, koteʼuhi ʼe maʼuhiga.

ʼE tonu ke ke lototoʼa ʼo ke ‘fakamamaʼo mai te ʼu aga heʼe ʼaoga.’ (1 Tesalonika 4:3) Koteʼuhi ko te nofoʼaga fakataumatuʼa ʼe hoki feala pe mo kapau kua ke ʼohoana. Pea ʼe lahi ai anai tou fiafia. ʼE mole ke fakahemala anai pea ʼe mole ke lotohoha anai koteʼuhi neʼe ke nofo maʼa.—Taaga Lea 7:22, 23; 1 Kolinito 7:3.

KOTEA TAU MANATU?

• Ko he tahi ʼe ʼofa moʼoni ia koe, ʼe ina fai anai koa he meʼa ke tuʼutamaki ai tou maʼuli fakasino mo mamahi ai tou loto?

• Ko he tahi ʼe ʼofa moʼoni ia koe, ʼe ina fai anai koa he meʼa ke fua kovi ai ʼau felogoʼi ʼae mo te ʼAtua?—Hepeleo 13:4.