FEHUʼI 9
ʼE Tonu Koa Ke Au Tui Ki Te Evolisio?
KOTEA ʼAE KA KE FAI ANAI?
Fakakaukauʼi muʼa te aluʼaga ʼaeni: Ko Alex ʼe mole kei ina iloʼi he meʼa ke tui ki ai. Koteʼuhi neʼe tui tuʼumaʼu pe ia Alex ki te ʼAtua pea mo te fakatupu. Kaʼe ia ʼaho nei, ʼe ui e tana tagata faiako ki te biologie, ko te evolisio ʼe moʼoni pea ʼe fakatafito ki te ʼu fekumi fakasienesia. Neʼe mole loto ia Alex ke ui age ʼe vale. Koia ʼae ʼe ina ui ai kia ia totonu, ‘Kapau kua fakamoʼoni ia te kau popoto ki te evolisio, ko ai ia au ke au fakafeagai kia natou?’
Ka na pau la neʼe ko koe ia Alex, ʼe ke tui anai koa ki te evolisio ʼuhi pe he ʼe tuʼu ʼi te ʼu tohi ako?
FAKAKAUKAUʼI MUʼA
ʼE tui ʼihi ki te fakatupu kaʼe ko ʼihi ʼe tui ki te evolisio. Pea ʼi te agamahani, ʼe natou ui ʼe natou tui ki he meʼa, kaʼe ʼe mole natou iloʼi lelei pe koʼe ʼe natou tui ki ai.
ʼE tui ʼihi ki te fakatupu ʼuhi pe he neʼe akoʼi age ʼi te ʼekelesia.
ʼE tui ʼihi ki te evolisio ʼuhi pe he neʼe akoʼi age ʼi te ʼu fale ako.
KO FEHUʼI ʼE ONO ʼE TONU KE VAKAʼI
ʼE ui fenei ʼi te Tohi-Tapu: “Nee fau te u fale fuli e he tahi, kae ko ae nee ina fau te u mea fuli ko te Atua.” (Hepeleo 3:4) ʼE ko he agafakapotopoto koa hatatou tui ki ai?
Ko te ui ʼae neʼe mole ʼi ai he Tupuʼaga, ʼe hage pe ia ʼe tou ui neʼe mole he tahi neʼe ina laga te ʼapi ʼaeni
ʼE UI E ʼIHI: Neʼe tupu ia te ʼatulaulau mai he paʼulu neʼe hoko fakafokifa.
1. Kotea ʼae neʼe tupu mai ai te paʼulu?
2. Ko te manatu fea ʼae ʼe fakapotopoto, ko meʼa fuli neʼe tupu fakafokifa peʼe ko meʼa fuli neʼe fakatupu e he tahi?
ʼE UI E ʼIHI: Ko te tagata neʼe haʼu mai te manu.
3. Kapau neʼe haʼu te tagata mai te manu, ohage la ko te geli, he koʼe ʼe ʼi ai he toe kehekehe ʼo te tagata mo te geli ʼi te faʼahi ʼo te ʼatamai?
4. He koʼe koa ʼe faigataʼa hatatou mahino ki te faʼahiga faʼufaʼu mo te agaaga ʼo ʼihi meʼa maʼuli ʼae ʼi te kele?
ʼE UI E ʼIHI: Ko te evolisio neʼe hoko moʼoni.
5. Ko ia ʼae ʼe tui moʼoni ki te evolisio, neʼe ina fai koa he ʼu fekumi moʼo fakamoʼoni ki ai?
6. Ko te toko fia koa ʼae ʼe tui ki te evolisio ʼuhi pe he neʼe ui age ko te hahaʼi popoto fuli ʼe tui ki ai?
“Kapau ʼe ke haʼele ʼi te vao matuʼa pea ʼe ke sio ki he ʼapi matalelei, ʼe ke manatu anai koa ‘neʼe fetokaʼi te ʼu fuʼu ʼakau ʼo laga ai he ʼapi?’ Kailoa ia, ʼe mole ke manatu feia anai, koteʼuhi ʼe mole ko he agafakapotopoto ʼaia. Koia, ʼe tonu anai koa ke tou tui ko te ʼatulaulau neʼe tupu fakafokifa pe?”—Julia.
“Fakafuafua age muʼa mo kapau ʼe ui atu e he tahi neʼe hoko te paʼulu ʼi te fale ta tohi. Neʼe pa valevale te vai tohi ki te ʼu kaupa fuli ʼo te fale ta tohi, pea fokifa pe kua faʼufaʼu ai he tikisionalio. ʼE ke tui anai koa ki ai?”—Gwen.
HE KOʼE KOA ʼE AU TUI KI TE ʼATUA?
ʼE fakalotomalohiʼi koe ʼi te Tohi-Tapu ke ke fakaʼaogaʼi tou “ ʼatamai.” (Loma 12:1, MN) Ko tona fakaʼuhiga ʼe mole tonu ke ke tui ki te ʼAtua ʼuhi pe
KO TE MEʼA ʼAE ʼE KE LOGOʼI (ʼE hage kia au ʼe ʼi ai he malohi ʼe maʼoluga age)
KO TAU AGAʼI FENUA (ʼE au maʼuli ʼi te lotolotoiga ʼo te hahaʼi lotu)
KO TE AKO MAI ʼAU MATUʼĀ (Neʼe akoʼi au e ʼaku matuʼā ke au tui ki te ʼAtua kaʼe mole ki he tahi age meʼa)
ʼE tonu ke ke maʼu he ʼu tupuʼaga lelei ʼo tau tui ki te ʼAtua.
“Ka fakamahino mai e te tagata faiako ʼi te fale ako pe ʼe feafeaʼi te gaue ʼo totatou sino, ʼe au tui papau ai ʼe ʼi ai moʼoni te ʼAtua. Kua fakatuʼutuʼu pe ʼotatou koga sino takitahi ki tana gaue. Pea maʼia mo te ʼu faʼahi ʼae ʼe liliki, ʼe maʼuhiga. ʼE gaue tuʼumaʼu pe totatou sino, kaʼe ʼe mole tou tokagaʼi pe la. Ko te sino ʼo te tagata ʼe fakatalakitupua.”—Teresa.
“Ka au sio ki he foʼi vaka tulisi peʼe ko he motoka, ʼe au feʼekeʼaki fenei: ‘Ko ai ʼae neʼe ina faʼu?’ Moʼo faʼu he motoka ʼe maʼua ki ai he hahaʼi ʼe popoto. Koteʼuhi ʼe lahi ʼona kiʼi piesi liliki ʼe tonu ke lelei tona fakapikipiki ke haʼele ai te motoka. Koia kapau neʼe faʼu he motoka e he tahi, pea ʼe toe feia foki mo te tagata.”—Richard.
“ ʼI te lahi ʼae ʼo taku ako ia te sienesia, neʼe toe lahi age ai taku mole kei tui ki te evolisio. . . . Kia au ʼe faigafua age takita tui ki te ʼAtua ʼi takita tui ki te evolisio.”—Anthony.
FAKAKAUKAUʼI MUʼA
Logo la neʼe fai te ʼu fekumi lolotoga ni lauʼi taʼu, kaʼe ʼe heʼeki maʼu e te kau popoto he fakamahino ʼo ʼuhiga mo te evolisio ke feala hanatou manatu tahi ki ai. Kapau ʼe mole logo tahi te kau popoto ʼo ʼuhiga mo te evolisio, ʼe hala koa tau fakafeagai ki te manatu ʼaia?