Tou Faiga Ke Mahino Gafua

Te Meʼa ʼAe Neʼe Fai e Sesu

ʼATA VITEO: ʼE Fakaʼaogaʼi e Sesu He Faʼifaʼitaki Moʼo Fakaha Te ʼOfa ʼo Sehova

1. Sioʼi te ʼATA VITEO, peʼe lau ia Mateo 6:25-27. Pea tali ki te ʼu fehuʼi ʼaeni:

1. Kotea te faʼifaʼitaki neʼe toʼo e Sesu moʼo fakaha ʼe tou maʼuhiga kia Sehova?

2. Logo la ʼe lahi te ʼu faʼahi ʼe iloʼi e Sesu ʼo ʼuhiga mo te ʼu manulele, kae kotea pe ʼae neʼe talanoa ki ai? He koʼe ʼe lelei te faʼahiga faiako ʼaia?

Kotea ʼAe ʼe Tou Ako Mai Ai?

2. Ka tou faiako, tou faiga ke mahino gafua he ʼe feala ki te ako ke ina taʼofi maʼu te ʼu manatu ʼae ʼe ke ui age pea mo malave ki tona loto.

Faʼifaʼitakiʼi Ia Sesu

3. ʼAua naʼa lahi fau tau palalau. ʼAua naʼa ke palalau ki te ʼu koga fuli kua ke iloʼi kae nofo pe ʼi te ʼu manatu ʼae ʼe kolua ako. Ka ke fai he fehuʼi ki tau ako, tuku he temi ke ina tali atu. Kapau ʼe mole ina iloʼi peʼe mole alu tahi tana tali mo te Tohi-Tapu, toe fai age he tahi ʼu fehuʼi. Ka kua mahino pe ki te manatu tafito, fakalaka koe.

4. Fakaʼaogaʼi te aluʼaga ʼae kua iloʼi e tau ako moʼo tokoni ki ai ke mahino ki he manatu foʼou. Ohage la, ʼi muʼa ʼo takolua vakaʼi te kapite ki te fakatuʼuake, toe vakaʼi fakanounou pe kotea neʼe ina ako ʼo ʼuhiga mo te aluʼaga ʼo te kau mate.

5. Filifili leleiʼi ʼau faʼifaʼitaki. ʼI muʼa ʼo he toʼo ʼo he faʼifaʼitaki, fai te ʼu fehuʼi ʼaeni:

1. ‘ ʼE faigafua koa?’

2. ‘ ʼE mahino vave koa ki ai te ako?’

3. ‘ ʼE tokoni koa ki te ako ke ina manatuʼi te manatu tafito peʼe ina manatuʼi pe te faʼifaʼitaki?’