Tou Palalau Fakahagatonu

Te Meʼa ʼAe Neʼe Fai e Sesu

ʼATA VITEO: Ko Sesu Mo Te Tagata Maʼu Koloa

1. Sioʼi te ʼATA VITEO, peʼe lau ia Maleko 10:17-22. Pea tali ki te ʼu fehuʼi ʼaeni:

1. Kotea te ʼu kalitate neʼe tokagaʼi e Sesu ʼi te tagata ʼaia?

2. He koʼe ʼe feala ke tou ui neʼe ʼofa mo palalau fakahagatonu ia Sesu?

Kotea ʼAe ʼe Tou Ako Mai Ai?

2. Ka tou fia tokoni ki te kau ako ke natou tuputupu, ʼe tonu ke tou ʼoʼofa pea mo toe palalau fakahagatonu kia natou.

Faʼifaʼitakiʼi Ia Sesu

3. Tokoni ki tau ako ke ina fai mo fakahoko hana ʼu fakatuʼutuʼu.

1. Fakaʼaogaʼi te manatu ʼaeni “Taku Fakatuʼutuʼu” ʼi te tohi Ke Ke Fiafia ʼo Heʼe Gata.

2. Tokoni ki tau ako pe ʼe feafeaʼi hana fakahoko mamalie tana ʼu fakatuʼutuʼu.

3. Vikiʼi tuʼumaʼu ia ia ki tana ʼu faiga.

4. Vakaʼi te ʼu faigataʼaʼia ʼae ʼe mole tuputupu ai, pea tokoni ki ai ke ina lava tauʼi.

1. Kapau ʼe mole tuputupu tau ako, fai te ʼu fehuʼi ʼaeni:

   • ‘He koʼe ʼe mole tuputupu?’

   • ‘Kotea ʼe feala ke au fai moʼo tokoni ki ai?’

2. Kole kia Sehova ke ina tuku atu te lototoʼa ke ke palalau fakahagatonu ki tau ako ʼo ʼuhiga mo te fihifihia pea ke ke fai ʼaki he agalelei.

5. Fakagata te ako ʼae ʼe mole tuputupu.

1. ʼE tuputupu he ako mo kapau . . . .

   • ʼe ina maʼuliʼi te meʼa ʼae ʼe ina ako,

   • ʼe kau ki te ʼu fono pea mo palalau ki te moʼoni,

   • pea ʼe ina fakaha leva ʼi he temi kua fia liliu ko he Fakamoʼoni ʼa Sehova.

2. Koʼeni te aluʼaga ʼe feala ke ke fai mo kapau ʼe mole fai e te ako he ʼu faiga:

   • Fehuʼi age ki ai pe kotea ʼae ʼe ina taʼofi ia ia ke tuputupu.

   • Fakamahino age ki ai ʼaki he agalelei pe koʼe ʼe ke fakagata muʼa te ako.

   • Fakaha fakahagatonu age te meʼa ʼe tonu ke ina fai ke toe toʼo tana ako ʼi he ʼaho.