Te Utu ʼo Te Kau Atolasio

NEʼE foaki age ki te ʼapositolo ko Soane te fakakikite maʼuhiga ʼaupito ʼo ʼuhiga mo te ʼu ʼaluʼaga fakaofo ʼaē ka hoko ʼi “te ʼaho ʼo te ʼAliki”. Neʼe sio fakatomuʼa ki te lagi ki te ʼAliki ko Sesu Kilisito kua haʼele ake ʼi te hōsi hina, ʼo fakatata ko he tau totonu, pea kua ʼalu “fakatoʼa pea moʼo fakaʼosi tana mālo”. Ko te ʼuluaki meʼa ʼaē neʼe ina fai neʼe haga ʼo toloʼaki te fili ʼo te ʼAtua, ko Satana, ʼi te lagi ʼo li ifo ki te takafoli ʼo te kele. Ko Satana neʼe ina tali ʼo hohaʼasi ki te malamanei ʼo kovi ʼosi ʼaki—he ʼu fakapō, he ʼu hoge, pea mo he ʼu mahaki—, ʼo fakatata ʼaki te ʼu tagata heka hosi ʼe heheka ake ʼi tanatou ʼu hosi lanu kehekehe: kula, ʼuli pea mo nefunefu (Fakahā 1:10; 6:1-8; 12:9-12). Ko te ʼu malaʼia ʼaia neʼe kamata ʼi te taʼu 1914 pea mo ʼasili kovi pe ʼo aʼu ki totatou temi. Pea, kua vave iku ki tonatou ikuʼaga ki te ʼaho fakamataku ʼaē neʼe palalau ki ai Sesu ʼo ʼina ʼui fēnei: “kote mamahi o aho aia e matuaki lahi aupito, e molemo hona tatau ia ʼi te temi mua, mo te temi nei, pea mo te temi ki muli”.—Mateo 24:3-8, 21, T.T.K.

ʼE fakahoko feafeaʼi koa te ʼu meʼa ʼaia ki te kau ʼatolasio ʼa Sehova ʼi te temi ʼaia? Ia Fakahā kapite 7, vaega 1 ki te 10, ʼe palalau ki te kau ʼaselo mālohi “ ʼe natou taʼofi maʼu” te ʼu matagi ʼo te ʼauha ʼo aʼu ki te tānaki ʼo te kau ʼatolasio ʼaia. Talu mai te taʼu 1914, ko te toega ʼo te toko 144 000 hahaʼi ʼo te Iselaele fakalaumālie ʼaē ʼe kei toe ʼi te kele kua tānaki. Pea ʼe toe tānaki foki mo “te toe hahaʼi tokolahi mai te fenua kehekehe, mo te faʼahiga kehekehe, mo te potu kehekehe, mo te lea kehekehe”. Kua toko miliona te hahaʼi kua kau ʼi te hahaʼi tokolahi ʼaia. Pea ʼe leleiʼia ia natou ia muʼa ʼo te hekaʼaga hau ʼo te ʼAtua koteʼuhi he neʼe natou maʼuliʼi te tui ki te totogi ʼo te toto ʼo Sesu, ʼaē neʼe matehi ohage ko he ōvi heʼe agahala. “Pea neʼe natou hiva mo te leʼo lahi ʼo ʼui maʼa natou: ‘ko te fakamaʼuli ʼe tou maʼu mai totatou ʼAtua, ʼe ʼafio ʼi te nofoʼaga, pea mo te ʼAkeno’ ”. Ko te kau ʼatolasio faiva ʼaia ʼe natou haga ʼui “Haʼu!” ki niʼihi atu, ʼaē ʼe tʼanaki ke hʼaofaki natou lolotoga “te mamahi lahi”.—Fakahā 7:14-17; 22:17.

“ ʼI te kele katoa”

ʼI te kau ʼatolasio faiva ʼaia ʼe feala te ʼui: “ ʼI te kele katoa kua mafola ai tonatou leʼo, pea ko tanatou ʼu akonaki kua kaku ki te ʼu potu taupotu ʼo te kele ʼaē ʼe nofoʼi” (Loma 10:18). Ko tanatou gāue faʼa kataki neʼe tapuakiʼi ʼo fua lelei ʼosi. Ohage la:

ʼI Mexico ʼi te temi nei ko te toko 335 965 kau ʼatolasio faiva ʼo Sehova, ko tona fakatupu ko te toko 100 000 tupu ia taʼu pe ʼe tolu! He koʼe ʼe tupu lahi feiā? Ko te talanoa ʼaeni ʼe hoko ʼe feala hana fakamahino mai. Ko te tagata tupulaga ʼe higoa ko Aurelio neʼe ko te tagata tauhi misa ʼi te ʼekelesia katolika. Ka ʼomai pe te kau Fakamoʼoni ʼa Sehova ki te kolo, ʼe ina ta te ʼu pele ʼo te ʼekelesia moʼo fakaloto vaivaiʼi ia natou ʼaē ʼe fia logo. Pea ʼi te tahi ʼaho, neʼe ina toʼo tana Tohi-Tapu katolika, ko te Tohi-Tapu ʼo Selusalemi pea ina kamata tona lau, kae neʼe mole mahino ia ki te meʼa ʼaē ʼe ina lau. Pea ki muli mai, neʼe fetaulaki mo tona kaumeʼa ʼaki te Tohi-Tapu Traduction du monde nouveau ʼe ina ʼefi. Ko Aurelio neʼe ina munaʼi tona kaumeʼa pea, ʼe ina ʼui age ko tana Tohi-Tapu ʼe hala, neʼe ina ʼave ia ia ki tona ʼapi ʼo fakahā age ki ai te Tohi-Tapu “moʼoni”. Pea ʼui age ʼe tona kaumeʼa: “Lau ia Ekesote kapite 20”, pea ʼalu ia.

Ko te tagata taupau misa neʼe ina kamata lau Ekesote kapite 1 ʼo aʼu ki te kapite 20, vaega 4 pea mo 5. Neʼe ina puna’maʼuli ʼi te talanoa ʼa tana Tohi-Tapu katolika ʼo ʼuhiga mo te ʼu fakatata. ʼI te ʼaho tapu ki muli mai, ʼi te ʼosi ʼo te misa, neʼe ina fakahā age ki te patele te ʼu vaega ʼaē ʼe palalau ʼo ʼuhiga mo te u fakatata. Neʼe ʼui age e te patele mo ia la, ʼe ina fakaʼaogaʼi pe te ʼu fakatata; kae ʼe mole ʼatolasio ki ai. ʼI tana sio ʼaē ʼe mole leleiʼia e Aurelio tana tali, neʼe haga leva te patele ʼo mofele ia ia ʼe ako mo te kau Fakamoʼoni ʼa Sehova. Ko Aurelio neʼe ina ʼui age ko te loʼi, pea ina toe ʼui age: “Kae ʼi te temi nei, ʼe ʼau ʼalu ʼo fai!”

Pea ʼi te toe ʼomai ʼa te kau Fakamoʼoni ʼa Sehova ki te kolo, ko Aurelio neʼe ʼalu ia ʼo palalau mo natou pea ina kamata ʼo ako te Tohi-Tapu. Neʼe mavae leva ia ʼi tana gāue ʼi te ʼekelesia pea ʼi te ʼu mahina e tolu ki muli mai, neʼe ina maʼuliʼi te ʼu aga tāfito ʼaē ʼe fakamaʼua ke kau ʼi te minisitelio mo te kau Fakamoʼoni ʼa Sehova. Ko te ʼuluaki ʼapi ʼaē neʼe ʼaʼahi ki ai, ko te ʼapi o te patele, ʼaē neʼe mole tui ki tona ʼu mata ʼi tana sio ki te tagata tauhi misa ʼafea kua liliu ko he tagata faka mafola ʼo te Puleʼaga. Ko te patele neʼe ina fakamatakuʼi ia ia ke fakamavae ʼi te ʼekelesia. Kae ʼui age ia ʼe Aurelio ʼe mole maʼuhiga ia, he kua mavaʼe ʼosi ia ʼi te ʼekelesia. Tokolahi ʼo te kolo ʼaia neʼe kua ako ʼaki te kau Fakamoʼoni ʼa Sehova pea neʼe fakaloto mālohiʼi ʼaki te faʼifaʼitakiʼaga ʼa Aurelio. Ko Aurelio mo te toko 21 ʼo te kolo ʼaia neʼe papitemaʼi ʼi te fakatahi faka tisitilike fakaʼosi. ʼI te vave ʼo te tuputupu ʼi te telituale ʼaia, neʼe ko te tagata ʼafea pe e tahi neʼe maʼu moʼo vakaʼi ʼaki te kutuga ʼaia te ʼu fehuʼi ʼaē ʼe fai kia natou ʼe fia papitema.

“Kua mafola ai tonatou leʼo”

ʼE mole feala ha kita hola ʼi te faka mafola ʼo te Puleaʼaga. Ko te tagata Italia katolika neʼe fiu ʼi te ʼu ʼaʼahi tuʼumaʼu ʼa te kau Fakamoʼoni ʼa Sehova. Pea ʼi te haga ʼo tana Sosiete ʼo hiki ia ia ki Sigapole, neʼe ina ʼui ʼe mole natou toe fakahalaga age ānai. Kae, neʼe puna’maʼuli, ʼi tana toe maʼu pe te kau Fakamoʼoni ʼi ai. Pea neʼe ina maʼu te ʼu kuli kaikai e lua moʼo tauʼi ʼo te kau Fakamoʼoni ʼaē ka ʼomai. Pea ko te ʼu fafine Fakamoʼoni e lua neʼe ʼomai ʼo faka mafola ʼi tona ʼapi, pea ʼoho mai ai te ʼu kuli. Ko te ʼu fafine neʼe matataku pea nā feholaki, pea nā aʼu ki te ala magalua, ʼona tahi toʼo te ala. ʼO maʼu ai te tahi Fakamoʼoni e te tahi kuli, ʼi tona mataku neʼe ina toʼo te ʼu kaupepa e lua ʼi tana kato pea ina ai ki te gutu ʼo te kuli. Pea ʼi te meʼa ʼaia, neʼe tuʼu te kuli, ʼo takafoli pe ʼi te tuagaʼane, pea liliu ki tona ʼapi.

Pea ʼi te vahaʼa ki muli mai, neʼe toe ʼomai pe te ʼu Fakamoʼoni ʼaia ʼe lua ʼo ʼaʼahi te tahi ʼapi ʼi te muʼa ʼapi pe ʼo te tagata ʼaia. Pea ko te tagata ʼaē ʼa ia te ʼu kuli neʼe ʼi tona ʼoloto, pea, puna’maʼuli te ʼu fafine, ʼe ina fakamālo age, pea ina fakaafe nāua ke ʼomai ki tona ʼapi. Neʼe ina ʼui age kia nāua neʼe mole heʼeki palalau mo he kau Fakamoʼoni ʼa Sehova pe ʼe lau hanatou ʼu tohi. Kae neʼe puna’maʼuli ʼi tana maʼu te ʼu kaupepa ʼi te gutu ʼo tana tahi kuli. ʼI te po ʼaia neʼe ina lau te ʼu kaupepa pea neʼe lave lelei kia ia. Neʼe ko ia, ko te katolika talu mai tana tupu, neʼe ina fakahā tona holi ke ako te Tohi-Tapu ʼaki te kau Fakamoʼoni ʼa Sehova.

Kae ko te tagata ʼaia ʼe tonu foki ia ke toe liliu ki Italia, neʼe fai te ʼu fakatuʼutuʼu ki te kau Fakamoʼoni ʼa Sehova ke ako mo natou ʼi tona fenua. Pea ko ia pea mo tona ʼohoana kua nā kamata tatuʼu ki te ʼu fono, ko te patele ʼo te ekelesia ʼe ʼita pea ina fakafeagaagai kia nāua ʼaki he ʼu fakamataku. ʼI te haga ʼa he tahi ʼo tutu tona ʼoloto, ko te taumātuʼa neʼe nā motuhi fuli tona ʼu nonoʼo ʼaki te ʼEkelesia. Ko te tagata ʼaia ʼe ina ʼui nei: “Neʼe ku ʼau ʼalu ʼo faka mafola ki te tokolahi ʼo toku famili, koteʼuhi heʼe ʼau loto ke natou ʼiloʼi ko Sehova ko te ʼAtua moʼoni pe e tahi.”

“Kua kaku ki te ʼu potu taupotu ʼo te kele ʼaē ʼe nofoʼi”

Ko te tahi talanoa ʼo te malamanei ʼe ina fakahā mai ko te logo ʼo te Puleʼaga ʼe lave ki te hahaʼi pea ʼe tokoni ʼo fetogi ia natou. Lolotoga te ako ʼo te fakamamahani ki te faka fānau, ko te Fakamoʼoni ʼi ʼOsitalalia neʼe felāveʼi mo te fafine ʼe lahi tana ʼu aga ʼe kovi pea neʼe fakafisi ʼosi ki te tuku ʼo tana sikaleti lolotoga tana faitama. Ko te fafine Fakamoʼoni neʼe hohaʼa ʼi tana aga. Pea neʼe nā fānau fakatahi ʼi te lopitali e tahi, pea ʼe faigamalie ke nā palalau. ʼE hā mai ko te fafine neʼe lahi tona ʼu faigataʼa ia ʼi tona kei tahine, pea ko tona ʼohoana kua vave mavete. Pea, ʼi tana mavae ʼi te lopitali, ko te Fakamoʼoni neʼe ʼalu ʼo fakasiosio ki te fafine pea ina kamata ako te Tohi-Tapu mo ia, ʼo fakaʼaoga te Tohi Comment sʼassurer une vie de famille heureuse.

Ko te ʼohoana ʼo te fafine neʼe kua fualoa tana faikole ki te ʼAtua ke tokoni age ke ina maʼu te lotu moʼoni, ʼo ina toe ʼui: “Kae mole ko te kau Fakamoʼoni ʼa Sehova!” Kae, ʼi tana ʼiloʼi ʼaē ʼe ako tona ʼohoana mo te kau Fakamoʼoni, neʼe ina kamata fai te ʼu fehuʼi pea neʼe fakaafe ke kau ki te ako. Ko te meʼa ʼaia neʼe ina fai, pea kamata vave pe tana kau ki te ʼu fono ʼo te kokelekasio. ʼI te temi nei, ko nʼaua taumʼatuʼa kua nʼa papitema pea, ko tana maʼuli faka taumātuʼa neʼe haʼele lelei ai leva ia.

Ko te ʼu ako ʼo te Tohi-Tapu ʼi te ʼu ʼapi ʼaē ʼe fakatafito ki te ʼu taʼi tohi ʼaia ʼe faka aʼu ki te tānaki ʼo he kau ʼatolasio foʼou ke tokolahi. ʼI te ʼu fenua ʼaē neʼe ʼi ai te kau Fakamoʼoni ʼa Sehova neʼe tonu ke natou tau mo te ʼu maveuveu, te ʼu tau sivili, pe ʼe ko te ʼu tapuʼi neʼe fai e te ʼu puleʼaga, ko te gāue ʼako Tohi-Tapu neʼe tupu lahi ʼosi. Ko te tau sivili ʼaē neʼe ina fakamole ia Angola lolotoga te ʼu taʼu neʼe fualoa, ko te kau Fakamoʼoni neʼe natou mamahi ʼaupito ʼi te ʼu fakapopula. ʼI te kamata ʼo te taʼu ʼaeni kua ʼosi, ko te kau faka mafola takitokotahi neʼe natou teitei taki te ʼu ako Tohi-Tapu e tolu, kae neʼe mole lahi hanatou ʼu tohi faka tohi-tapu. Ko te kau taupau feʼaluʼaki ʼe natou ʼolo ʼo ʼaʼahi ʼi te ʼaho fuli ki he kutuga fai faka mafola, ʼe natou fakatokatoka te gāue faka mafola lolotoga ʼo te ʼaho pea mo te ʼu fono ʼi te ʼu afiafa fuli! Ko he fiafia lahi ʼi te fakaʼosi ʼo te ʼu faigataʼa ia pea mo te ʼu tane e 42, ko te ʼu tohi faka tohi-tapu neʼe aʼu mai Afilika Saoute! Gali, ko te ʼofa ʼo te ʼu tehina ʼaia ʼe toe “tuputupu ake aipe toutou ofa mo toutou poto i te mea fua pe,” heʼe ʼi te temi nei, kua feala leva hanatou “iloi ai te mea e lelei ake.” (Filipe 1:9, 10, T.T.K.) Ko he fakaʼeke ia kia natou ʼaē ʼe lahi ʼaupito tanatou ʼu tohi faka tohi-tapu ke natou fakaʼaoga fakalelei te ʼu meʼa fuli ʼaē ʼe foaki mai ʼe Sehova ʼi tona ʼofa!—1 Timoteo 4:15, 16.

Ko te fiafia ʼo te kau ʼatolasio āgatonu ʼe fakamanatuʼi mai kia tatou e te ʼu kupu ʼa Sesu ʼi tana Akonaki ʼi te moʼuga: “Amusia ae e masisiva ko tonatou loto, koteuhi kua ia natou. (. . . ) Amusia ae fai ki ai te fakataga, uhi ko tonatou agatonu, he kua ia natou (. . . ) ke koutou fiafia ai pea fiafia lahi aupito, koteuhi e lahi i he aho outou totogi i selo” (Mateo 5:3-12, T.T.K.) Ko he utu lelei kua kamata tānaki ʼi Angola!

‘I te tahi ʼu koga meʼa ʼo te kele, ko te ʼu tapuʼi ʼa te ʼu puleʼaga ki te gāue ʼo te kau Fakamoʼoni ʼa Sehova neʼe toe faka ʼateaina pe ʼe neʼe tofo. Neʼe ʼui ʼe Sesu ʼi tona temi: “ ʼIo, ko te utu taʼu e lahi, kae ko te kau gāue ʼe veliveli.” (Mateo 9:37) Ko te moʼoni ʼaia ia ʼaho nei! ʼE tonu ke tokolahi ʼi te gāue ʼaia. ʼE tou fiafia he ko totatou ʼatolasio ʼe kau ki te fakatānaki ʼo te utu taʼu. ʼE mole he fiafia lahi ia ʼaho nei ʼi te kele ʼaē ko te fakaʼofa ʼo he gāue fakaleleʼi pea mo fua lelei kia Sehova ʼAtua.

Kae kotea koa ʼaē ʼe ina ʼeke te kau ʼatolasio ʼa Sehova ʼo fakahā tonatou fiafia pea mo tanatou faiva? Ko te meʼa ʼaeni ka tou vakaʼi.