Te ʼu Paki ʼo Te Kele Neʼe Fakapapau

Koutou Mamata Ki Te Fenua, ʼo Feiā Foki Mo Tana ʼu Ōvi!

KO TE ʼu kilisitiano ʼe lauʼi afe neʼe nātou mamata ki te Kele ʼo te fakapapau ʼaki te manatu ʼaē, kapau ʼe nātou sisio anai ki te ʼu koga meʼa ʼaē neʼe hoko ai te ʼu faʼahiga meʼa kehekehe, ʼe ia nātou he mahino lelei pea mo loloto age ʼo ʼuhiga mo te Tohi-Tapu. Neʼe mole nātou fai hala.

Pe neʼe koutou folau totonu ki ai pe neʼe gata ʼaki pe takotou fakakaukauʼi ʼi takotou lau te ʼu tohi pe ʼe ko he ʼu alatike ʼo ʼuhiga mo te fenua ʼaia, neʼe koutou mamata koa ki te ʼu ōvi? ʼE lagi ʼe koutou fehuʼi anai pe koteā tonatou ʼuhiga mo te Kele ʼo te fakapapau. ʼE tonu ke ʼiloʼi neʼe ko te ʼu meʼa ʼaia neʼe kau tāfito ki te maʼuli ʼo nātou ʼi temi ki muʼa, koia ko takotou mamata ki te Kele ʼo te fakapapau ʼe mole katoa anai ia mo kapau neʼe mole koutou felāveʼi mo ni ʼu ōvi.

ʼE feala ke kamata takotou mamata ʼi te ʼu paki ʼo te pasina ʼaenī, heʼe ko te ʼu ōvi ʼe tou felāveʼi anai ʼi te temi nei ʼi te fahaʼi ʼaia ʼe tatau pe ia mo te ʼu ōvi ʼo te temi muʼaa. Ko tonatou hiku ʼe laulahi mo mamafa ko te gako (Levitike 7:3; 9:19). Ko tonatou fulu ʼe mātotolu pea ʼe hihina. Kae, ʼe tou manatuʼi ko te faga ōvi ʼaē ʼa Sakopo neʼe ko te ‘ ʼu ōvi pulepule pea lanu, pea mo te ʼu ōvi ʼe lanu meʼa’. — Senesi 30:32.

Ko te hisitolia ʼaia ʼe hā mai ai ko te tagata ʼaē ʼe ʼi ai tana faga ōvi ʼe faka ʼuhiga ia ko he tagata maʼu koloā (Senesi 30:43). ʼE tou lau ʼo ʼuhiga mo Sopo: “Ko tana ʼu koloā manu ko te ʼu ōvi e fitu afe, pea mo te ʼu kamelo e tolu afe, pea mo te ʼu taluaʼi pipi e nima geau, pea mo te ʼu asino e nima geau; (...) [neʼe] liliu ia ko te tagata maʼu koloā ia nātou fuli ʼo te Potu hahake.” (Sopo 1:3; 42:12). ʼE tou manatuʼi foki ko Napale neʼe ʼi ai tana ʼu ōvi e 3 000 pea mo tana ʼu tao e 1 000. ʼI takotou manatu, koteā koa tona tuʼulaga pea mo tona talatuʼu ʼi te ʼu ʼaho ʼo Tavite (1 Samuele 25:2)? Kae, he koʼe koa ko he faga manu ʼaia neʼe ko te koloā lahi?

Koteʼuhi ʼaki te ʼu ōvi ʼe maʼu ai e te tagata tauhi ōvi he ʼu koloa maʼuhiga. Ko te fuluʼi akeno ʼe ko te koloā ʼaia ʼe fakafoʼou tuʼumaʼu. Ia Tāʼaga Lea 31:13, 21, 22 ʼe ina fakahā mai pe neʼe feafeaʼi te gāueʼi ʼe he fafine agapoto pea mo faʼa gāue te fuluʼi akeno moʼo teuteuʼi ai ʼo tona famili pe ʼe moʼo totogi (Sopo 31:20). ʼI te fakatauʼaga ko te fuluʼi akeno ko te ʼuluaki koloā maʼuhiga ʼaia. ʼE hā te fahaʼi ʼaia ʼi te manatu ʼaē ʼo ʼuhiga mo te hau moapite “neʼe liliu ʼo tagata tauhi akeno, pea neʼe ina totogi ki te hau ʼo Iselaele te ʼu asino e teau afe pea mo te ʼu akeno tagata e teau afe neʼe mole heʼeki tele”. (2 Hau 3:4.) ʼIo, ko te mātolu ʼo te fulu ʼo te ʼu manu ʼaia ‘neʼe mole heʼeki tele’ ʼe kau ki te maʼuhiga ʼo te ʼu manu ʼaia.

Ko te ʼu manu tagata, te ʼu tao tagata, ʼe feala ke ʼi ai honatou ʼu tala fakatalakitupua, ohage ko tona hā mai ʼi te paki ʼe tou sisio ki ai ʼi te fahaʼi ʼaenī. ʼE mole koutou manatuʼi koa neʼe fakaʼaogaʼi te tala ʼo te tao moʼo fakahāhā ʼo te ʼaho ʼo te Jubilé (Levitike 25:8-10)? ʼE ko te ʼu tala loloto mo tatau ʼe fakaʼaogaʼi moʼo ta ʼo te pele pe ʼe moʼo taki ʼonatou ʼaē ʼe ʼolo ʼo tau. — Kau Fakamāu 6:34; 7:18, 19; Soele 2:1.

ʼE tou mahino ai foki ko te maʼuli ʼo ia ʼaē ʼe ʼi ai hana faga ōvi ʼe fua lelei ia, koteʼuhi ko te ōvi ʼe tuʼu ʼi te lisi ʼo te ʼu manu maʼa ʼaē ʼe feala ke fakaʼaogaʼi e te kau Iselaele moʼo kai (Teutalonome 14:4). Ko te kakano (ʼo te akeno pe ʼe ʼo te asino) neʼe haka vai pe neʼe faka loti. Ko te akeno ʼaē ʼe faka loti ʼe ko te meʼa kai tāfito ʼaia ʼo te Pasikate ʼi te taʼu fuli (Ekesote 12:3-9). Pea, ko te ʼu akeno ʼe nātou maʼu tuʼumaʼu ai te huʼa pipi, ko hanatou meʼa ʼinu pe neʼe nātou fakaliliu ko he folomasi. — 1 Samuele 17:17, 18; Sopo 10:10; Isaia 7:21, 22.

Kae ko tatatou mamata ki te ʼu ōvi ʼe mole katoa ia mokā ʼe mole tou sisio ki te felōgoʼi tahi ʼa te faga manu pea mo tanatou tagata tauhi ōvi. Ko he tagata tauhi ōvi agatonu ʼe tokaga lelei ia ki tana ʼu ōvi. Ohage ko te ʼui mai e Sesu, ʼe nātou ʼiloʼi te leʼo ʼo tanatou tagata tauhi ōvi pea ʼe nātou tokagaʼi mokā pāuʼi age nātou ʼaki tonatou higoa (Soane 10:3, 4). Kapau ʼe puli he manu, ko te tagata tauhi ōvi manavaʼofa ʼe ina faigaʼi ʼo kumi tana manu ʼaia. ʼI te temi ʼaē ʼe ina maʼu ai tana manu, ʼe ina hili ki ʼona ʼu fuga ʼuma ʼo ʼave ki te faga ōvi. — Luka 15:4, 5.

ʼAki tana maʼuliʼi te fahaʼi ʼaia neʼe fakatatau ai e Tavite ia ia ki he ōvi ko tona Tauhi ōvi ko Sehova. Neʼe taupau lelei ia Tavite, ohage ko he ʼu ōvi neʼe leʼoleʼo mai te ʼu manu fekaʼi. Ko te ʼu ōvi ʼe feala ke nātou fakalogo ki tonatou taki ʼe tonatou tagata tauhi ōvi ʼe tokaga lelei kia nātou. Kapau ʼe nātou lāvevea, ʼe ina faitoʼo nātou, lagi ʼaki he lolo moʼo fakamalū. Ko te aga ʼaia ʼe kehe mo te ʼu aga ʼo te ʼu tagata pule ʼo Iselaele ia Esekiele 34:3-8, koteʼuhi ʼe nātou fakamuʼamuʼa pe ia nātou!

Ko te Tohi-Tapu ʼe tuʼu ʼi ai te ʼu manatu ʼe lahi faka polofeta pea mo te ʼu fakatā ʼo te ʼu ōvi. Koia, ʼe ko te mamata ki te ʼu ōvi ʼo te Kele ʼo te fakapapau, ko te ʼiloʼi lelei ʼo nātou, ʼe feala ai ke loloto takotou mahino ki te ʼu kupu ʼaē “kiʼi faga ōvi”, “ko te Akeno ʼo te ʼAtua” pea “mo te tahi ʼu ōvi”. — Luka 12:32; Soane 1:36; 10:16.

[Nota ʼi te lalo pasina]

[Haʼuʼaga ʼo te paki pasina 24]

Pictorial Archive (Near Eastern History) Est.

[Haʼuʼaga ʼo te paki pasina 25]

Garo Nalbandian