Ko Te ʼu Fehuʼi ʼAnatou ʼe Lautohi

Ko Sakalia, te tāmai ʼa Soane Patita, neʼe liliu koa ia ʼo tuli pea mo gutumate, ohage ko te ʼui mai ʼaē ia Luka 1:62?

ʼI te ʼu manatu ʼa ʼihi, neʼe liliu ia Sakalia ʼo tuli. ʼE tou lau ʼi te tohi ʼo te Tohi-Tapu: “ ʼE nātou fakahigoaʼi ānai [te tamasiʼi] ko Sakalia, ʼaki te higoa ʼo tana tāmai. Kae neʼe tali age tana faʼe pea mo ina ʼui age: ‘Kailoa, ʼe higoa ia ko Soane.’ Ko ia neʼe nātou ʼui age ai: ‘ ʼE mole he tahi ʼi tou ʼu kāiga ʼe higoa feiā.’ Pea nātou kamokamo ki tana tāmai pe ʼe koteā tona loto ʼo ʼuhiga mo te higoa ʼo tana tamasiʼi. Neʼe ina kole age ke ʼavage he maka faitohi pea neʼe ina tohi ai: ‘Ko tona higoa ko Soane.’ ” — Luka 1:59-63.

Kae, ʼe mole he fahaʼi ʼo te tohi ʼaia ʼe ʼui mai ai ko Sakalia neʼe tuli ia lolotoga he temi.

Ki muʼa atu, neʼe fakahā e te ʼaselo ko Kapeliele kia Sakalia ʼe tupu ānai te tamasiʼi ʼo fakahigoa ko Soane. ʼAki tona kua mātua, neʼe faigataʼa te tui ʼa Sakalia ki te fahaʼi ʼaia. Neʼe tali age e te ʼaselo ki ai: “ ʼE ke fakalogologo ānai, ʼo mole feala hau palalau ʼo aʼu ki te hoko ʼo te ʼu meʼa ʼaia, he neʼe mole ʼe ke tui ki taku ʼu palalau, ʼe hoko ānai ʼi te temi neʼe ʼau faka tuʼakoi ki ai.” (Luka 1:13, 18-20). Neʼe mole ʼui age e te ʼaselo ʼe mole feala ānai ke logo ia Sakalia, kae neʼe ʼina ʼui age ʼe mole feala ānai tana palalau.

Neʼe hoko atu te tohi ʼo fēnei: “ ʼI tana hu mai ki tuʼa [ʼi te fale tapu], neʼe mole kei feala tana palalau kia nātou [ki te hahaʼi ʼaē neʼe nonofo ʼo talitali], pea nātou mahino ai leva neʼe sio ia ki te meʼa fakatalakitupua ʼi te fale tapu; pea neʼe ina fai age te ʼu fakaʼiloga kia nātou, kae neʼe mole kei feala hana palalau.” (Luka 1:22). Ko te kupu faka keleka ʼaē ʼe fakaliliu ʼi heni ki te “tuli” ko tona ʼuhiga kua noa ia ʼo ʼuhiga mo te palalau, te logo, pe ʼe ko te ʼu fahaʼi ʼaia ʼe lua (Luka 7:22). Koteā koa te meʼa ka hoko kia Sakalia? Tou vakaʼi te meʼa neʼe hoko ʼi te temi ʼaē neʼe feala ai tana palalau. “ ʼI te temi pe ʼaia, neʼe ava ai tona gutu pea neʼe feala ai te gaūgaūe ʼo tona ʼalelo, pea kamata ai tana palalau, ʼo faka kolōlia ki te ʼAtua.” (Luka 1:64). ʼE feala ke tou mahino ai neʼe gata ʼaki pe tana palalau ʼaē neʼe mole kei feala kia Sakalia.

ʼI te fahaʼi ʼaia, he koʼe neʼe fai fehuʼi age nātou “ ʼaki te ʼu fakaʼiloga kia [Sakalia] pe koteā tona loto ki te higoa ʼo [tana tamasiʼi]”? Ko ʼihi ia nātou ʼaē ʼe nātou fakaliliu te ʼu tohi neʼe nātou fakaliliu te vaega ʼaenī ʼaki “ ʼi te palalau ʼaki te ʼu fakaʼiloga” pe ʼe “ ʼaki te ʼu nima”.

Neʼe mole kei feala te palalau ʼa Sakalia mai te temi ʼaē neʼe palalau age ai te ʼaselo kia ia, ko ia neʼe palalau ai ia ʼaki tona ʼu nima. Koʼeni te faʼifaʼitaki, neʼe ina “fai te ʼu fakaʼiloga” kia nātou ʼaē neʼe nonofo ʼi te fale tapu (Luka 1:21, 22). Ki muli mai, ʼi tana kole he maka faitohi, ʼe lagi neʼe ina ina fai he ʼu fakaʼiloga ʼaki tona ʼu nima (Luka 1:63). Ko ia ʼaia ko nātou ʼaē neʼe nonofo ʼi tona ʼu tafa lolotoga te temi ʼaē neʼe mole feala ai tana palalau, neʼe nātou palalau mo ia ʼaki ʼonatou ʼu nima.

Kae, ko te ʼu fakaʼiloga ʼaē ʼe tuʼu ia Luka 1:62 ʼe ʼi ai tona fakamatala. Ko Elisapeta neʼe hoki palalau nei pe ia ʼo ʼuhiga mo te fehuʼi ʼaē ki te higoa ʼo tana tamasiʼi. ʼO mole fakafeagai nātou ki ai kae nātou fai te ʼaluʼaga ia ʼo te meʼa ʼaē ʼe tonu ke fai: ko te fehuʼi ki tona ʼohoana pe koteā tana tonu. Neʼe nātou fai te meʼa ʼaia ʼaki he fakaʼiloga ʼaki tonatou ʼulu pe ʼe ko tonatou ʼu nima. ʼAki tanatou mole tohi tanatou fehuʼi ke lau e Sakalia ʼe hā mai ai neʼe logo ia ki te ʼu palalau ʼo tona ʼohoana. Ko ia, ko he gaūgaūe pe ʼo te ʼulu pe ʼe ko he fakaʼiloga tatau ʼe na fakamahino ai pe te fahaʼi ʼaenī: ‘ ʼE lelei, kua mātou (logo ʼo feiā pe mo koe, Sakalia) ki te palalau ʼa Elisapeta, kae koteā koa tau tonu fakaʼosi ʼo ʼuhiga mo te higoa ʼo te tamasiʼi?’

Pea ki muli mai ʼo te temi ʼaia, neʼe hoko te tahi milakulo, ko he meʼa fakaofoofo. “ ʼI te temi pe ʼaia, neʼe ava ai tona gutu pea neʼe feala ai te gaūgaūe ʼo tona ʼalelo, pea kamata ai tana palalau, ʼo faka kolōlia ki te ʼAtua.” (Luka 1:64). Neʼe mole ʼaoga ia ke palalau ʼo ʼuhiga mo tana logo mo kapau neʼe mole mate tona fahaʼi ʼaia.