Ko Te ʼOhoana Ko Te Fakatafitoʼaga Koa ʼo Te Fīmālie?
“Kua ʼāteaina ia ke ʼohoana mo he tahi ʼe loto ki ai, ʼi te ʼAliki pe. Kae, ʼe lagi fīmālie age pe ia, ʼi taku manatu, kapau ʼe maʼuli tokotahi.” — 1 Kolonito 7:39, 40.
1. ʼE feafeaʼi koa ia te fakamatala e te Tohi-Tapu te ʼaluʼaga ʼo Sehova, pea koteā koa te ʼu meʼa neʼe ina fai maʼa tana ʼu meʼa maʼuli?
KO SEHOVA ko te “ ʼAtua fiafia”. (1 Timoteo 1:11.) ʼI tona ʼuhiga foaki ʼofa “ ʼo te ʼu meʼa lelei pea mo te mōlaga matalelei fuli”, neʼe ina foaki ki tana ʼu meʼa maʼuli takitokotahi — te ʼu tagata kelekele pea mo te kau ʼaselo — te meʼa ʼaē ʼe ʼaoga kia nātou ʼo ʼuhiga mo te tauhi kia te ia fakafiafia (Sake 1:17). Koia ʼaē, ohage ko te hiva ʼa te manu lele, te ʼu faigaoʼi ʼa te kiʼi kuli, ʼe fakamoʼoni aipe ko Sehova ʼaē neʼe ina fakatupu te ʼu manu ke nātou fiafia ʼi tonatou ʼu nofoʼaga neʼe tuku ki ai. Koia ʼaē, neʼe lea fakatuketuke ai ia te tagata pesalemo, ʼo fēnei: “Ko te ʼu fuʼu ʼakau ʼo Sehova kua makokona nātou, te ʼu cèdres ʼo Lipani ʼaē neʼe ina to.” — Pesalemo 104:16.
2. a) Koteā ʼaē neʼe fakahā e Sesu ʼi tana fiafia ʼaē ʼo ʼuhiga mo tana fai te finegalo ʼo tana Tāmai? b) Koteā te ʼu tupuʼaga ʼaē ʼe tonu ai ke fiafia te kau tisipulo ʼa Sesu?
2 Ko Sesu Kilisito ‘ko te fakatātā totonu ʼo te ʼuhiga ʼo Sehova’. (Hepeleo 1:3.) Koia, ʼe mole fakaʼofolele tona higoaʼi ʼaē ko te “fiafia pea ko te Tuʼi ʼulu tokokotahi”. (1 Timoteo 6:15.) Neʼe ina tuku mai te faʼifaʼitakiʼaga mālohi ʼo ʼuhiga mo te fai ʼo te finegalo ʼo te ʼAtua, ʼaē ʼe maʼuhiga age ʼi te meʼa kai, pea ko te fiafia moʼoni ia ʼaia. ʼE toe fakahā mai e Sesu kia tatou, ʼe maʼu te fiafia ʼi te manavasiʼi ʼaē ki te ʼAtua, ko tona ʼuhiga ko he fakaʼapaʼapa fakamalotoloto pea mo he mataku naʼa lave kovi he meʼa kia te ia (Pesalemo 40:8; Isaia 11:3; Soane 4:34). ʼI te liliu mai “fakafiafia” ʼa tana kau tisipulo e 70 kia te ia ʼi te ʼosi fagonogono ʼo te Puleʼaga, neʼe “tekelili ʼi te loto fiafia ʼi te laumālie maʼoniʼoni” ia Sesu. ʼI tana fakaʼilo tana fiafia ki tana Tāmai ʼaki te faikole, neʼe mafuli age leva ki tana kau tisipulo ʼo ina ʼui age kia nātou: “Manuʼia te ʼu mata ʼaē ʼe sio ki te meʼa ʼaenī ʼe koutou sisio ki ai! Koteʼuhi ʼe ʼau ʼui atu kia koutou, tokolahi te kau polofeta pea mo te ʼu hau neʼe nātou holi ke nātou sisio ki te ʼu meʼa ʼaē ʼe koutou sisio ki ai, kae neʼe mole nātou sisio nātou ki ai, pea mo fagono ki te ʼu meʼa ʼaē ʼe koutou fagono ki ai, kae neʼe mole nātou fagono nātou ki ai.” — Luka 10:17-24.
Te ʼu tupuʼaga ʼo te fiafia
3. Koteā te ʼu tupuʼaga ke tou fiafia ai?
3 ʼE mole fiafia koa ʼotatou ʼu mata ʼi te sio ki te ʼu meʼa ʼaē ʼe felōgoʼi mo te Folafola ʼa Sehova pea mo tana ʼu fakatuʼutuʼu ʼi te temi fakaʼosi ʼaenī? ʼE mole tou tekelili koa ʼi te fiafia ʼi tatatou mahino ki te ʼuhiga ʼo te ʼu lea faka polofeta ʼaē neʼe mole mahino ki ai te kau polofeta pea mo te ʼu hau agatonu ʼo te temi ʼāfea, ohage ko Isaia, Taniela pea mo Tavite? ʼE mole tou fiafia koa ʼo ʼuhiga mo te tauhi ki te ʼAtua fiafia, ia Sehova, ki te takitaki mālohi ʼa te Tuʼi fiafia, totatou Hau ko Sesu Kilisito? ʼE moʼoni pe foki ʼe tou fiafia!
4, 5. a) Ke fiafia tuʼumaʼu tatatou tauhi kia Sehova, koteā koa te ʼu meʼa ʼe tonu ke ʼaua naʼa tou fai? b) Koteā koa te ʼu meʼa ʼaē ʼe tokoni ki te fiafia, pea koteā te fehuʼi ʼe fai tupu mai te faʼahi ʼaia?
4 Kapau ʼe tou nonofo fiafia ʼi te tauhi ki te ʼAtua, ʼaua naʼa tou fai ʼe tatou totonu he ʼu fakatuʼutuʼu ʼo ʼuhiga pea mo te maʼu ʼaē ʼo te fīmālie. ʼE faigafua ki te ʼu meʼa ʼaia tanatou fakapōʼuliʼi tatatou ʼu fakakaukau, koteʼuhi ʼe kau te ʼu meʼa ʼaia ki te ʼu koloā fakamālama, te faʼahiga maʼuli mānumānu, pea mo ʼihi age pe ʼu meʼa fēnei. ʼE mole heʼeki ʼi ai hina tahi kua ina maʼu te “fiafia” mai te ʼu meʼa ʼaia, heʼe ko te mālama ʼe fakalaka ia. — 1 Soane 2:15-17.
5 Tokolahi ʼi te kau kaugana ʼa Sehova ʼe nātou ʼiloʼi te ikuʼaga ʼo te ʼu fakatuʼutuʼu ʼaia, ʼe mole nātou foaki mai te fīmālie moʼoni. Ko totatou Tāmai pe ʼaē ʼi selo tokotahi, ʼaē ʼe ina foaki mai te ʼu meʼa fakalaumālie pea mo te ʼu meʼa fakasino ʼe tokoni ki te fīmālie moʼoni ʼo tana ʼu kaugana. ʼE ko he loto fakafetaʼi ʼe tou maʼu anai ʼo ʼuhiga mo te meʼa kai fakalaumālie ʼaē ʼe ina foaki mai ʼaki “te tagata agatonu pea mo poto”! (Mateo 24:45-47.) ʼE tou toe fakafetaʼi foki ki te meʼa kai fakasino pea mo ʼihi age ʼu meʼa fakakelekele ʼe tou maʼu mai te nima ʼo te ʼAtua ʼofa. Pea ʼe ʼi ai foki mo te meʼa ʼofa taulekaleka ʼaē ko te ʼohoana pea mo te ʼu lelei ʼo te maʼuli faka famili. ʼE mole fakapuna’maʼuli ʼi te fiafia ʼaē ʼo te loto ʼo Naomia ki tanā ʼu taʼahine vitua ʼaē ʼe ʼiloga mai ʼi tana ʼu lea ʼaenī: “Ke foaki atu e Sehova he meʼa ʼofa, pea ke koulua tahi maʼu hona nofoʼaga ʼi te ʼapi ʼo tona ʼohoana!” (Lute 1:9). ʼIo, ko te ʼohoana ʼe ko he tafitoʼaga ia ʼo he fīmālie lahi. Kae, ko te ʼohoana pe koa la ia ʼaē ʼe fakatafito ki ai moʼo maʼu ʼo he maʼuli fīmālie? Ko te kau tūpulaga ʼe ʼaoga tāfito ke fakakaukau lelei ʼo ʼuhiga mo te faʼahi ʼaia.
6. Mai te Senesi, koteā te tupuʼaga tāfito ʼo te fakatuʼutuʼu ʼo te ʼohoana?
6 ʼE fakamatala fēnei e te Tohi-Tapu te kamataʼaga ʼo te ʼohoana: “Pea neʼe fakatupu e te ʼAtua ia te tagata ko tona paki, ʼaki te paki ʼo te ʼAtua neʼe ina fakatupu; neʼe ina fakatupu nāua ko te tagata pea mo te fafine. Pea, ko te ʼAtua neʼe ina tapuakiʼi nāua pea folafola age te ʼAtua ʼo fēnei: ‘Koulua fanaunau, pea koulua liliu ʼo hahaʼi, pea koulua fakafonu te kele, pea koulua puleʼi.’ ” (Senesi 1:27, 28). Neʼe fēnei te fakatuʼutuʼu ʼa Sehova te ʼohoana, ʼaki ia Atama ʼe tutupu ai anai ʼihi ʼu tagata, ʼo lahi ai te hahaʼi ʼe maʼuʼuli. Kae ko te ʼohoana ʼe mole gata ʼaki pe ia ʼi te faʼahi ʼaia.
“ ʼI te ʼAliki pe”
7. Koteā te fakatuʼutuʼu neʼe fai e te pateliaka faitotonu, moʼo fakahoko ʼo te ʼohoana ʼo tona foha?
7 Kapau ko Sehova ko te Tupuʼaga ʼo te ʼohoana, ʼe tau mo ia ke ina fakatotonu te ʼu ʼaluʼaga ʼaē ke ʼohoana ai tana ʼu kaugana ke nātou fiafia ai. ʼI te temi ʼo te kau pateliaka, neʼe tapuʼi mālohi te ʼohoana ʼaē mo te ʼu hahaʼi ʼaē ʼe mole ʼatolasio kia Sehova. Neʼe fakapapau e Apalahamo ʼaki ia Sehova, ki tana tagata kaugana ko Eliasea, ʼe mole ina fili anai ʼi te kau Kananeane he hoa maʼa tona foha ko Isaake. Neʼe folau mamaʼo ia Eliasea, pea mo ina fai fakalelei te ʼu fakatotonu ʼa Apalahamo ʼi te ʼaluʼaga ʼo tana kumi ‘te fafine ʼaē neʼe fili e Sehova maʼa te foha ʼo tona pule’. (Senesi 24:3, 44.) Koia, neʼe ʼohoana ai leva ia Isaake pea mo Lepeka. ʼI te temi ʼaē neʼe fili ai e tonā foha ko Esaü te ʼu fafine mai te hahaʼi Itite ko te kau pagani, neʼe “ko he ʼu matapuna fakaloto mamahi ia kia Isaake pea mo Lepeka.” — Senesi 26:34, 35; 27:46; 28:1, 8.
8. Koteā te tapu ʼaē neʼe fakamaʼua e te fuakava ʼo te Lao, pea koteā tona tupuʼaga?
8 ʼI te fuakava ʼo te Lao, neʼe tapuʼi te ʼohoana ʼa te ʼu tagata pe ʼe ko te ʼu fafine mo ʼihi ʼu hahaʼi kananeane. Neʼe fakatotonuʼi fēnei e Sehova tana hahaʼi: “ ʼAua naʼa ke nonoʼo ia koe kia nātou ʼaki he ʼohoana. ʼAua naʼa ke foaki tou ʼofafine ki tona foha pea ʼaua naʼa ke toʼo tona ʼofafine maʼa tou foha. Koteʼuhi ʼe ina fakamafuli anai tou foha ia te ʼau, pea ʼe nātou tauhi anai ki ʼihi ʼatua; pea ko te hāūhāū ʼo Sehova ʼe hoko moʼoni anai kia koutou pea ʼe ina faka ʼauha fakafokifā anai ia koe.” — Teutalonome 7:3, 4.
9. Koteā te tokoni ʼe fai e te Tohi-Tapu ki te kau kilisitiano ʼo ʼuhiga mo te ʼohoana?
9 Tatau aipe ʼi te kokelekasio faka kilisitiano, ko te ʼohoana pea mo te hahaʼi ʼaē ʼe mole ʼatolasio kia Sehova ʼe mole ko he meʼa ʼe lelei. Neʼe fakaloto mālohiʼi e te ʼapositolo ko Paulo tana kau feʼao kilisitiano, ʼo fēnei: “ ʼAua naʼa koutou kauga fatogia fakatahi mo te hahaʼi ʼaē ʼe mole tui heʼe mole ʼalu tahi. Koteʼuhi, ʼe fakatahi feafeaʼi te faitotonu pea mo te meʼa noaʼi ʼo te lao? Pe ʼe feafeaʼi te felōgoʼi ʼa te mālama pea mo te fakapōʼuli? Pea, ʼe felōgoʼi feafeaʼi ia Kilisito pea mo Peliale? Pe ʼe ko te vahe fea ʼaē ʼe fakatahi ai te tagata tui mo ʼaē ʼe mole tui?” (2 Kolonito 6:14, 15). ʼE ʼaoga te tokoni ʼaenī ki te ʼu faʼahi kehekehe kae tāfito ʼo ʼuhiga mo te ʼohoana. ʼE mahino pe te fakatotonu ʼa Paulo ʼo ʼuhiga mo te ʼu kaugana fuli ʼa Sehova, ʼe tonu pe ke nātou ʼohoana mo he tahi “ ʼi te ʼAliki pe”. — 1 Kolonito 7:39, Traduction du monde nouveau, ta fakapilitānia ʼi te ʼu kumi aga, nota.
Ka ʼe mole feala he ʼohoana “ ʼi te ʼAliki”
10. Koteā ʼaē neʼe fai e te kau kilisitiano selipatea tokolahi, pea koteā te fehuʼi ki ai?
10 Tokolahi ʼi te kau kilisitiano kei selipatea neʼe nātou fili ke nātou muliʼi te faʼifaʼitaki ʼa Sesu Kilisito ʼo nātou taupau te nofo selipatea. Pea, ʼi te mole maʼu ʼi te temi nei he hoa ʼe ʼofa ki te ʼAtua pea mo ke ʼohoana “ ʼi te ʼAliki”, tokolahi ʼi te kau kilisitiano agatonu neʼe nātou tuku tanatou falala kia Sehova ke feala hanatou taupau aipe tonatou nonofo selipatea ʼi hanatou ʼohoana mo he tahi ʼe mole tui. ʼE faka fua e te laumālie ʼo te ʼAtua ia nātou te ʼu fua ohage ko te fiafia, te tokalelei, te tui, te loto taʼofi, ke feala ai kia nātou tanatou taupau he nofo selipatea maʼa (Kalate 5:22, 23). Ia nātou ʼaē ʼe nātou faʼa kātakiʼi te ʼahiʼahi ʼaia ʼo ʼuhiga mo tanatou pipiki ki te ʼAtua, ʼe lahi ia nātou ko te ʼu tuagaʼane kilisitiano ʼe mātou ʼoʼofa ʼaupito kia nātou. ʼI te ʼu fenua kehekehe ʼo te kele, ʼe tokolahi age pe te ʼu tuagaʼane ʼi te ʼu tēhina pea ko nātou tāfito ʼaē ʼe nātou fai te gāue faka mafola. ʼIo, “ ʼe fakahā totonu e Sehova te folafola; ko nātou fafine ʼe fagonogono te logo lelei ko he foʼi tau lahi”. (Pesalemo 68:11.) ʼI te temi nei, tokolahi ʼi te ʼu kaugana ʼa te ʼAtua ʼe mole heʼeki nātou ʼohoana, ʼe nātou agatonu koteʼuhi ʼe nātou ‘tuku tanatou falala kia Sehova mo tonatou loto katoa, pea ko ia, ʼe ina taki fakalelei ʼonatou ʼu ala’. (Tāʼaga Lea 3:5, 6.) Kae kia nātou ʼaē ʼe mole feala ke ʼohoana ʼi te temi nei “ ʼi te ʼAliki”, ʼe mole nātou fiafia koa?
11. Koteā koa ʼaē ʼe ʼiloʼi papau e te kau kilisitiano ʼaē ʼe nonofo selipatea ʼuhi ko tanatou fakaʼapaʼapa ki te ʼu lekula faka tohi-tapu?
11 Tou manatuʼi foki ko tatou ko te kau Fakamoʼoni ʼo te ʼAtua fiafia, ia Sehova, ʼaki te takitaki ʼa te Tuʼi fiafia, ko Sesu Kilisito. ʼE tonu koa ke ʼui ko Sehova pea mo Kilisito e nā tuku anai ke maʼuʼuli malaʼia ia te ʼu fafine pe ʼe ko te ʼu tagata kilisitiano ʼaē ʼe nātou maʼuliʼi lelei te ʼu fakatuʼutuʼu ʼo te Tohi-Tapu ʼo ʼuhiga mo te nofo selipatea, ʼuhi heʼe mole nātou maʼu honatou hoa “ ʼi te ʼAliki”? Kailoa ia. Koia, ko tona fakanounou, ʼe feala tatatou fiafia mokā ʼe mole tou ʼohoana. ʼE foaki mai e Sehova te fiafia moʼoni mokā kua tou ʼohoana pe ʼe kei tou nonofo selipatea.
Te tafitoʼaga ʼo te fīmālie moʼoni
12. ʼO ʼuhiga mo te ʼohoana, koteā ʼaē ʼe hinoʼi mai e te ʼaluʼaga ʼo te kau ʼaselo talagataʼa?
12 Ko te ʼohoana ʼe mole ko te tafitoʼaga ia ʼo te fīmālie ʼo nātou fuli ʼe kaugana ki te ʼAtua. Ohage la ko te kau ʼaselo. Ia muʼa ʼo te tulivio, neʼe holi te kau ʼaselo ki te meʼa ʼaē ʼe tapuʼi kia nātou ʼe maʼuʼuli fakalaumālie, ʼi tanatou mole tali te fakatuʼutuʼu ʼaia, neʼe nātou kofuʼi te ʼu sinoʼi tagata ke feala ai hanatou ʼohoana mo he ʼu fafine. ʼI tanatou mole “taupau maʼu tonatou tuʼulaga ʼuluaki”, ko te ʼAtua “neʼe ina taupau nātou ʼi he ʼu haʼi heʼe gata, ʼi te fakapōʼuli mātotolu, ki te fakamāu ʼo te ʼaho lahi”. (Suta 6; Senesi 6:1, 2.) ʼE ʼiloga lelei mai ai, ko te ʼAtua neʼe mole fakatuʼutuʼu ia ke ʼohoana te kau ʼaselo. Pea ko te ʼohoana neʼe mole ko te tafitoʼaga pe ia ʼo tonatou fiafia.
13. He koʼe koa ʼe fiafia te kau sagato ʼaselo, pea koteā tona ʼuhiga ki te ʼu kaugana fuli ʼa te ʼAtua?
13 Pea, ko te kau ʼaselo agatonu ʼe fiafia nātou. Neʼe fakatuʼu e Sehova te ʼu tafitoʼaga ʼo te kele “ ʼi te lotolotoiga ʼo te maholo fiafia ʼa te kau fetuʼu ʼo te māfoatā pea mo te ʼu kalaga fakatahi ʼa te ʼu Foha [fakaʼaselo] ʼo te ʼAtua”. (Sopo 38:7, Tohi-Tapu ʼo Selusalemi.) Koteā te tupuʼaga ʼo te fiafia ʼo te kau sagato ʼaselo? Heʼe ko te kau ʼaselo ʼaia, ʼe nātou kaugana tuʼumaʼu kia Sehova, “ ʼonatou fakalogo ki te leʼo ʼo tana folafola” ke hoko aipe ʼi te temi ʼaia. ʼE nātou fiafia ‘ ʼi tanatou fai te meʼa ʼaē ʼe lelei kia te ia’. (Pesalemo 103:20, 21, Traduction du monde nouveau, ta fakapilitānia ʼi te ʼu kumi aga, nota.) ʼIo, ko te fiafia ʼa te kau sagato ʼaselo, ʼe tupu mai tanatou kaugana ʼagatonu ʼaē kia Sehova. ʼO toe feiā aipe ʼo ʼuhiga mo te fīmālie moʼoni ʼa te ʼu tagata foki. ʼO ʼuhiga mo te kau kilisitiano fakanofo ʼaē kua ʼohoana, ʼe nātou kaugana fakafiafia ʼi te temi nei kia Sehova, heʼe ka fakatuʼuake nātou ʼe mole kei ʼi ai honatou maʼuli faka taumātuʼa ʼi te lagi, kae ʼe nātou fiafia aipe ʼi tonatou ʼuhiga ʼaselo ʼo fai te finegalo ʼa te ʼAtua. Koia, pe ʼe kua tou ʼohoana pe ʼe kailoa, ko te ʼu kaugana ʼagatonu fuli ʼa Sehova ʼe nātou fiafia, heʼe ko te tafitoʼaga moʼoni ʼo te fīmālie, ko te kaugana ʼagatonu ʼaē ki te Tupuʼaga.
“Ko te meʼa ʼe lelei age ia ʼi te ʼu foha pea mo te ʼu taʼahine”
14. Koteā te fakapapau faka polofeta neʼe foaki age ki te kau eunuques ʼo te Iselaele ʼāfea, pea he koʼe koa ʼe feala ke mata faikehe?
14 Kapau nei ʼe mole ʼohoana he kilisitiano agatonu, ko te ʼAtua ʼe ina haga aipe ʼo fai he ʼu fakatuʼutuʼu ke fiafia. Ko te ʼu palalau faka polofeta ʼaē neʼe fai ki te kau eunuques ʼi te temi ʼāfea ʼo Iselaele, ʼe fakaloto mālohiʼi aipe nātou: “Heʼe koʼeni te lea ʼa Sehova ʼo ʼuhiga mo te kau eunuques ʼaē ʼe nātou taupau taku ʼu sapato pea mo nātou fili te meʼa ʼaē ʼe ʼau leleiʼia, pea mo nātou taʼofi taku fuakava: ‘ ʼE ʼau foaki anai kia nātou ʼi toku ʼapi pea mo taku ʼu kaupā he nofoʼaga pea mo he higoa, he meʼa ʼe lelei age ia ʼi te ʼu foha pea mo te ʼu taʼahine. ʼE ʼau foaki anai kia nātou he higoa ki he ʼu temi heʼe gata, he higoa ʼe mole toe pulihiʼi anai ʼi he temi.’ ” (Isaia 56:4, 5). Lagi ʼi tatatou manatu, ko te ʼAtua ʼe ina fakapapau age he fafine pea mo he ʼu fānau moʼo taupau tonatou higoa. Kae neʼe ina fakapapau age ia “te meʼa ʼe lelei age ia ʼi te ʼu foha pea mo te ʼu taʼahine”: ko he higoa ʼe tologa ʼi tona ʼapi.
15. Koteā tatatou ia ʼui ʼo ʼuhiga mo te fakahoko ʼo Isaia 56:4, 5?
15 Kapau ʼe tou sio ʼi te kau Eunuques ʼaia he fakatā faka polofeta ʼo ʼuhiga pea mo te “Iselaele ʼo te ʼAtua”, ʼe nātou fakafofoga te kau kilisitiano fakanofo ʼaē neʼe nātou maʼu te nofoʼaga tologa ʼi te ʼapi fakalaumālie ʼo Sehova, pe ʼe ko te fale lotu (Kalate 6:16). ʼIo, ko te lea faka polofeta ʼaia ʼe hoko moʼoni anai ki te kau eunuques tui lelei ʼo te Iselaele ʼāfea ʼaē ka fakatuʼuake anai. Kapau ʼe nātou tali te sakilifisio fai fakalelei ʼo Kilisito pea mo haga fili te meʼa ʼaē ʼe leleiʼia e Sehova, ʼe nātou maʼu anai “te higoa heʼe gata” ʼi te mālama foʼou neʼe fakapapau e Sehova. Ko te lea faka polofeta ʼaia ʼe toe tau mo te “tahi ʼu ōvi” ʼaē ʼi te temi fakaʼosi, ʼe nātou līaki te ʼu fiafia ʼe maʼu mai te ʼohoana pea mo te fanaunau moʼo gāue katoa kia Sehova (Soane 10:16). Lagi ʼe tokolahi ia nātou ʼe mamate selipatea pe ʼe mole hanatou ʼu fānau. Kae kapau ʼe nātou mamate agatonu, ʼe nātou maʼu anai ʼi te toe fakatuʼuake “te meʼa ʼe lelei age ia ʼi te ʼu foha pea mo te ʼu taʼahine”: ko he higoa “ ʼe mole toe pulihiʼi anai ia ʼi he temi” ʼi te mālama foʼou.
Ko te ʼohoana ʼe mole ko te tafitoʼaga pe ia ʼo te fīmālie
16. He koʼe koa ʼe feala ta kita ʼui, ko te ʼohoana ʼe mole ina foaki mai tuʼumaʼu te fimālie?
16 Ko ʼihi ʼe nātou manatu ko te fīmālie ʼe pipiki tāfito ki te ʼohoana. Kae ʼe tou ʼiloʼi pe foki ia ʼaho nei, ʼi te ʼu kaugana pe ʼaē ʼa Sehova, ko te ʼohoana ʼe mole maʼu aipe te fīmālie. ʼE tokoni te ʼohoana ki ʼihi ʼu fihifihia, kae ʼe ina toe lagaʼi pe ʼihi ʼu fihifihia, lagi ʼe faigataʼa age tona fakatokatoka ʼi te ʼu fihifihia ʼaē ʼa te kau selipatea. Neʼe ʼui e Paulo ko te ʼohoana ʼe ina fakatupu ‘te ʼu mamahi ʼi te kakano’. (1 Kolonito 7:28.) Ko he tahi kua ʼohoana ʼe ‘tuʼania’ pea mo ‘hoha’. ʼE faigataʼa kia ia te fai ʼo “te tauhi katoa ki te ʼAliki, ʼe mole fakaleluʼi ia”. — 1 Kolonito 7:33-35.
17, 18. a) Koteā te meʼa neʼe fakatokagaʼi e te ʼu taupau feʼaluʼaki? b) Koteā koa te tokoni neʼe fai e Paulo, pea he koʼe koa ʼe maʼuhiga tona muliʼi?
17 Ko te ʼohoana pea mo te nofo selipatea ko te ʼu meʼa ʼofa mai te ʼAtua (Lute 1:9; Mateo 19:10-12). Ke fua lelei te ʼu meʼa ʼaia e lua, ko te faikole fakamalotoloto ʼe maʼuhiga ʼaupito. Neʼe fakatokagaʼi e te ʼu taupau feʼaluʼaki, ʼe tokolahi te kau Fakamoʼoni ʼe nātou ʼohoana tūpulaga, pea mo nātou maʼu tanatou ʼu fānau kae mole heʼeki feala ke nātou fai ʼonatou ʼu maʼua ʼo ʼuhiga mo te faʼahi ʼaia. Ko te ʼu ʼohoana ʼaia ʼe mole fualoa. Ko ʼihi ʼe lava tonatou ʼu ʼohoana, kae ʼe mole nātou maʼu hona fua lelei. Ohage ko te tohi ʼa te pilitania ko William Congreve, ko nātou ʼaē ʼe fia ʼohoana fakavilivili “ ʼe nātou fakahemala anai”.
18 Neʼe toe fakahā e te kau taupau feʼaluʼaki faka silikosikilipisio, ko te kau tēhina tūpulaga ʼe nātou tuʼania te gāue ʼi te Petele pe ʼe ko te kau ki te Ako faka minisitelio ʼuhi ko te maʼua ʼaē ke nonofo selipatea ʼi he ʼu kiʼi temi siʼisiʼi pe. Kae, ʼe tokoniʼi mai e te ʼapositolo ko Paulo ke ʼaua naʼa ʼohoana ia muʼa ‘ ʼo te temi mātala ʼo tona taʼu’, ko tona ʼuhiga ko te ʼu ʼuluaki holi ʼo te sino kua toka (1 Kolonito 7:36-38). Ko te ʼu taʼu ʼaē ʼe mole ʼohoana ai te kilisitiano ʼaia, ʼe faka faigafua ai tana maʼu ʼo he poto pea mo he fakasiosio tonu ʼo ʼuhiga mo he fakatuʼutuʼu ki he fili ʼo hona hoa pe ʼe nofo selipatea.
19. Koteā ta kita manatu mokā ʼe mole maʼuhiga tāfito kia tatou hatatou ʼohoana?
19 Tokolahi ia tatou kua fakalaka ʼi te temi mātala ʼo tona taʼu, pea mo ʼona ʼu holi fakasino mālohi. ʼE feala pe foki hatatou fakakaukau ki te ʼu lelei ʼo te ʼohoana, kae ʼi te temi nei ʼe tou maʼuli ʼi te meʼa lelei ko te nonofo selipatea. Lagi ʼe sio mai pe foki ia Sehova ki tatatou tauhi lelei kia te ia ʼi totatou ʼaluʼaga faka selipatea, ʼo mole heʼeki ʼaoga tāfito kia tatou hotatou hoa heʼe feala leva ke tou tuku ai ʼihi ʼu pilivilesio ʼi tana gāue. Kapau ko te ʼohoana ʼe mole ko he fihifihia maʼuhiga kia tatou pea ʼe tou fiafia aipe ʼi te nonofo selipatea, ko te ʼAtua ʼe ina kauhaki anai he meʼa maʼa tatou. Koia ʼaē, tou haga tui ʼe kauhaki anai ia ʼo ʼuhiga mo te meʼa ʼaē ʼe ʼaoga kia tatou. Ko te fīmālie tāfito ʼe maʼu mai te agavaivai ʼo te tali te meʼa ʼaē ʼe ina foaki mai maʼa tatou, ohage ko te ʼu tēhina sutea ‘neʼe nātou tali pea mo faka kolōlia ia te ʼAtua’ ʼi tana fakagafua ke fakahemala te kau Senitile mai tanatou ʼu aga neʼe nātou fai. — Gāue 11:1-18.
20. a) Koteā te tokoni ʼe foaki ʼo ʼuhiga mo te nofo selipatea ki te kau kilisitiano tūpulaga? b) Koteā te puani tāfito ʼe moʼoni ʼo ʼuhiga mo te fīmālie?
20 ʼIo, ko te ʼohoana ʼe feala ko te tafitoʼaga ʼaia ʼo te fīmālie, kae ʼe toe feala pe foki ke ina fakatupu he ʼu fihifihia. ʼE mahino papau: Ko te ʼohoana ʼe mole ko te ala pe ʼaia e tahi ʼe taki ki te fīmālie. Kua ʼosi pe te meʼa fuli ʼi te vakaʼi, ʼe lelei ke ʼeva fualoa muʼa te kau kilisitiano tūpulaga pea mo fakaʼaoga te ʼu taʼu ʼaia moʼo kaugana kia Sehova pea mo tuputupu ʼi te faʼahi fakalaumālie. Māʼia aipe la te taʼu pe ʼe ko te ʼu lelei fakalaumālie, ko te puani tāfito ʼaia ʼe moʼoni ʼo ʼuhiga mo nātou fuli ʼaē kua foaki katoa tonatou maʼuli ki te ʼAtua: ko te fīmālie moʼoni ʼe tou maʼu ʼi te tauhi agatonu kia Sehova.
ʼE feafeaʼi anai ha kotou tali?
◻ He koʼe koa ʼe fiafia te kau kaugana ʼa Sehova?
◻ He koʼe koa ko te ʼohoana ʼe mole ko te tafitoʼaga ʼaia ʼo he fīmālie lahi ia?
◻ Ka fili he hoa ʼo ʼuhiga mo te ʼohoana, koteā ʼaē ʼe fakamaʼua ki te hahaʼi ʼa Sehova?
◻ He koʼe ko he manatu lelei te fakamoʼoni ʼaē ko te kau kilisitiano ʼaē ʼe nonofo selipatea ʼe nātou fiafia?
◻ Koteā koa ʼaē ʼe tonu ke tou fakamoʼoni ki ai ʼo ʼuhiga mo te ʼohoana pea mo te fīmālie?