Ko Te Maʼuli ʼo Te Kau Faka Mafola ʼo Te Puleʼaga

Ko Te Kau Toe Ako ʼo Niselia Neʼe Tapuakiʼi ʼUhi Ko Tanatou Agatonu

NEʼE tohi e te ʼapositolo ko Paulo: “Kapau ko he feala, — ʼe fakalogo pe kia koutou, — ke ia koutou te tokalelei mo te tagata fuli pe.” (Loma 12:18). Ko te kau toe ako ʼo te kau Fakamoʼoni ʼa Sehova ʼo Niselia ʼe nātou fakaʼaoga te tokoni ʼaenī, logope honatou fakatagai. Koteā te meʼa neʼe hoko ai? Neʼe tapuakiʼi nātou e Sehova.

◻ Neʼe ʼi ai te tagata faiako neʼe lahi tona fehiʼa ki te kau Fakamoʼoni ʼa Sehova. Lolotoga te tahi fakatahi ʼo te uhu, neʼe ina pāuʼiʼi te kau Fakamoʼoni fuli ki muʼa pea neʼe ina fakatotonu age ke nātou hiva te hiva faka puleʼaga. Neʼe nātou fakafisi ʼo nātou fakahā age ʼe nātou fia tauhi pe ʼaki he loto katoa ki te ʼAtua. Neʼe haga ai te tagata faiako ʼo toʼo fuli nātou ki tuʼa pea ina fakatotonu age ke nātou huo. Lolotoga te temi ʼaia, ko te tahi kau toe ako neʼe hoko aipe tanatou ako.

Neʼe ʼi ai te tagata ʼo te kau Fakamoʼoni neʼe ina toʼo te kiʼi kaupepa L’école et les Témoins de Jéhovah pea neʼe ina foaki ki te tagata faiako, ʼo fakamahino age te ʼuhiga ʼo te mole kau ʼa te kau Fakamoʼoni ʼa Sehova ki te ʼu meʼa faka politike. Kae, ko te tagata faiako neʼe fakafisi ia ki te palalau ki te fahaʼi ʼaia pea neʼe mole ina tali te kiʼi kaupepa. Kae, neʼe ina fakamamafaʼi te tūʼa ʼo te kau toe ako.

Ko te kau Fakamoʼoni ʼaia neʼe hoko aipe tanatou tali te tūʼa pea neʼe haga huo pe nātou māʼia mo te puli ʼa te tagata faiako. Pea hoko te tahi ʼaho ko te tagata faiako neʼe nono pea neʼe ina lama nātou kae lolotoga gāue pea mo hiva te ʼu katiko ʼo te Puleʼaga. Ko te meʼa ʼaē neʼe sio ki ai, neʼe fakaʼiloga ia te ia, neʼe ina haga ʼo fakaliliu te kau Fakamoʼoni ki te ʼu kalasi, ʼo fakahā ai tana puna’maʼuli ki tanatou ʼu aga. Koteā leva te meʼa neʼe hoko? Ko te tagata faiako kua fai nei tana ako faka tohi-tapu pea mo te kau Fakamoʼoni ʼa Sehova!

Ko te kau tamaliki ako ʼaia neʼe tapuakiʼi nātou ʼuhi ko tanatou agatonu kia Sehova pea mo tanatou muliʼi tana ʼu fakatuʼutuʼu. — Tāʼaga Lea 10:22.

◻ Ko Lute mo ʼona ʼu kau fafine neʼe tapuakiʼi mo nātou ʼuhi ko tanatou mulimuli ki te ʼu fakatotonu ʼa Sehova ʼaē “ ʼe mole kau mo te malamanei”. (Soane 17:16.) Ko Lute neʼe taʼu 18, pea neʼe kamata tana gāue pionie mai tona taʼu 12. Ko ia mo ʼihi kau Fakamoʼoni ʼa Sehova neʼe hoko kia nātou te fakafeagai mai te kau ako ʼo te fale ako lahi ʼuhi ko tanatou fakafisi ki te hivaʼi ʼo te hiva faka puleʼaga. Neʼe ʼi ai te tagata faiako neʼe fia felāveʼi mo te ʼu mātuʼa ʼa te kau taʼahine. ʼI te tuku ifo ʼo te ʼu fakamahino ʼaki te kau pepa L’école, ko te tagata faiako neʼe ina tali leleiʼi ia, neʼe mole ina toe fakatupu kovi ki te kau ako.

Hoko te tahi ʼaho, neʼe ko te fafine faiako mai Initia neʼe ina haga ʼo tauveleʼi pea neʼe ina fakatūʼa te taʼahine ia muʼa ʼo te kalasi ʼuhi ʼaē ko tana mole hivaʼi te hiva faka puleʼaga. Ko te taʼahine ʼaia neʼe ina fakahā lelei te ʼuhiga ʼo tana tui pea ko te fafine faiako mo ia neʼe nā ʼolo ʼo vakaʼi te pule ʼo te fale ako. ʼI tana tau ki ai, neʼe fakatokagaʼi e te taʼahine Fakamoʼoni te nofo ʼa te tokoni ʼo te pule. Meʼa faikehe, ko te pule pea mo tona tokoni neʼe nā kamata kokolo nāua. Pea haga age leva te pule ki te fafine faiako ʼo ina ʼui age: “Fafine, ʼaua tau fakamamahi ki te ʼu taʼahine ʼaē. Māʼia mo tau matehi nātou, ʼe nātou leleiʼia age te mate ki te toʼo ʼo te hiva. Neʼe mole heʼeki ke logo koe ki he talanoa ʼo ʼuhiga mo nātou?” Ko te fafine pule mo tona tokoni neʼe nā palalau ʼo ʼuhiga mo te tui pea mo te faʼa kātaki ʼa te kau Fakamoʼoni ʼa Sehova. Pea haga age leva ki te taʼahine, ko te fafine pule neʼe fai fakalelei ki te meʼa ʼaē neʼe hoko kia te ia. Pea ina ʼui age ki ai: “Haga hoko tau tui. ʼE ʼau leleiʼia tau lotu mo tau aga faʼa kātaki ʼaē ʼe ke fai ʼi heni pea mo tuʼa.” Ki muli mai, ko te fafine faiako ʼaia neʼe fai fakalelei age ki te taʼahine Fakamoʼoni, ʼo ina fakahā age te kua mahino leva ki ai te ʼuhiga ʼo te mole kau ʼo te kau Fakamoʼoni ki te ʼu meʼa faka politike.

Ko te kau tamaliki ʼaia neʼe mulimuli ki te faʼifaʼitaki ʼo te ʼu Hepeleo e tolu ʼaē neʼe mole tuku tanatou agatonu kia Sehova ʼo tulolo ki he fakatātā, ʼo feiā mo Taniela, neʼe mole fakagata tana faikole kia Sehova. Ko te ʼu tagata ʼaia neʼe tapuakiʼi e Sehova ʼuhi ko tanatou muliʼi aipe te ʼu lao faitotonu ʼa te ʼAtua. — Taniela, kapite 3 pea mo te 6.