Ko Sehova Neʼe Tokaga Lelei Kia ʼAu

KO TE kamata ʼo taku tauhi kia Sehova neʼe mole hage ko te fai māhani. Neʼe ʼau lahi ʼi te koga meʼa matamatalelei ʼo te koga fenua mamaʼo ʼi te potu tokelau ʼo Niusila, ʼe nofoʼi tafito e te hahaʼi Maori ohage ko ʼau. Lolotoga taku tahi fagona ʼi te hosi ʼi te tahi ʼaho, neʼe fakaōvi mai kia ʼau toku tēhina mataʼi tama ko Ben. Neʼe ko te taʼu ʼaia ʼo te 1942, ʼi te fakaōvi ki te temi momoko. Neʼe ʼau taʼu 27 pea ʼi te lakaga ʼaia neʼe ʼau kau ki te ’Ēkelesia ʼo Pilitania.

Lolotoga ʼaia te ʼu taʼu, ko Ben neʼe ina tau lau te ʼu tohi ʼa te tuʼi fakamāu ko Rutherford, ʼaē neʼe ko te pelesita ʼo te sosiete Watch Tower, pea neʼe ina maʼu tana tohi mai te pilo tāfito ʼo te Sosiete ʼi Niusila ʼe faka ʼui age ke ina fakaafe te hahaʼi ki he koga meʼa ke nātou fai fakatahi ai te ʼaho ʼo te Fakamanatu ʼo te ʼAliki. Pea koia, neʼe ko Ben neʼe ina faiga ki he tahi ke nā fai te gāue ʼaia. ʼO haga mai ʼaia kia ʼau, neʼe ʼui e Ben: “Ko koe anai ka ke fai te gāue ʼaia.” Kua ʼau fiafia, ʼo ʼui maʼa ʼaku kua ʼau maʼu te ʼu kalitate feʼauga moʼo te fahaʼi ʼaia — ʼi toku ʼuhiga ʼaē neʼe ʼau tauhi lotu lelei ʼi toku ʼēkelesia ʼāfea — neʼe ʼau tali.

ʼI te afiafi ʼo te ʼaho ʼo te Fakamanatu ʼo te ʼAliki, neʼe lagi ko te toko 40 hahaʼi neʼe nātou fakatahi ki te ʼapi ʼo Ben ki te ʼaho ʼo te Fakamanatu ki te mate ʼo totatou ʼAliki, pea neʼe mole ʼi ai pe la he tahi ia nātou ʼaia neʼe ko he Fakamoʼoni ʼa Sehova. Hoko taku tau mai, ko toku tēhina mataʼi tama neʼe ina fakatoʼo mai te pepa ʼo te akonaki. Neʼe ʼau molehi te hiva ʼaē neʼe kua fakatuʼutuʼu pea neʼe ʼau faka ʼui ki te māʼā ʼo Ben ke ina kamata te fakatahi ʼaki te faikole. Pea neʼe ʼau kamata te akonaki, ʼaē ʼe fakatuʼutuʼu ko te ʼu fehuʼi pea ʼe fai tona ʼu tali ʼo fakatafito ki te Tohi-Tapu. Neʼe kau te patele ʼo te nofoʼaga ʼi te fakatahi pea neʼe ina tautau motuhi te akonaki ʼaki tana ʼu fehuʼi, kae neʼe tali ʼaki pe te ʼu kogaʼi Tohi-Tapu ʼe tuʼu ʼi te akonaki.

ʼE ʼau manatuʼi neʼe ʼi ai te fehuʼi ʼi te akonaki neʼe talanoa ki te temi ʼo te taʼu ʼaē ke fakamanatu ai te ʼaho ʼaia. Pea neʼe ko he meʼa fakafiafia he neʼe ko te hahaʼi fuli ʼaē neʼe kau ʼi te fono neʼe nātou sisio ki tuʼa ʼo nātou sio ki te māhina ʼi tana tuʼu katoa. Pea ʼe mahino ia, ko te ʼaho ʼaia neʼe ko te ʼaho 14 ʼo Nisani.

ʼI afiafi leva! Neʼe hola fā te fai ʼo te fakatahi ʼaia! Neʼe lahi te ʼu fehuʼi neʼe lagaʼi pea neʼe tali ʼaki te Tohi-Tapu. ʼI taku toe manatuʼi te temi ʼaia, ʼe ʼau ʼiloʼi neʼe mole feala ke hoko he meʼa ʼo feiā kia ʼau mo ka na pau neʼe mole fai ʼaki te tokaga ʼofa ʼa Sehova — logope neʼe mole heʼeki ʼau papitema ke faka ʼuhiga ko ʼau ko he Fakamoʼoni ʼi te lakaga ʼaia. Koia, ʼi te afiafi ʼo te ʼaho Fakamanatu ʼo te taʼu 1942, neʼe ʼau maʼu ai te ʼuhiga ki toku maʼuli.

Te kamataʼaga ʼo toku maʼuli

Neʼe ʼau tupu ʼi te taʼu 1914. Ia māhina ʼaia e fā ʼi muʼa ʼo taku tupu neʼe mate taku tamai, pea ʼe ʼau manatuʼi neʼe mamahi toku loto ki te kau tamaliki ʼaē ʼe ʼi ai tanatou ʼu tāmai ʼe ʼoʼofa ia nātou. Neʼe ko he meʼa neʼe hāla ʼi toku maʼuli. Ki taku faʼe ko te maʼuli kae mole hona ʼohoana neʼe ko he meʼa ia ʼe faigataʼa, pea neʼe faigataʼa ʼaupito ʼaki te ʼu fua ʼa te ʼUluaki Tau faka malamanei.

ʼI taku kei tūpulaga, neʼe ʼau ʼohoana mo te taʼahine ʼe higoa ko Agnes Cope, pea neʼe ko toku kau fagona ʼaia ia taʼu e 58. ʼI te kamata neʼe ma fakatahi ke ma maʼu he lelei ʼi tomā maʼuli. Ko taku gāue fakakelekele neʼe haʼele kovi ʼuhi ko te taʼi laʼā. Neʼe maʼu toku ʼu holaʼaga ʼi te ʼu faigaoʼi, kae ʼi muʼa ʼo te ʼaho Fakamanatu ʼo te taʼu 1942, neʼe mole he ʼuhiga moʼoni ʼo toku maʼuli.

Fagonogono ki toku famili

Hili te ʼaho Fakamanatu ʼaia, neʼe ʼau ako fakalelei te Tohi-Tapu, mo ʼau palalau mo ʼihi ʼi toku ʼu tēhina ki te ʼu tohi faka tohi-tapu ʼe ta e te Sosiete Watch Tower. ʼI sepetepeli 1943 ko te kau Fakamoʼoni ʼa Sehova, mai te ʼu koga meʼa kehe, neʼe nātou ʼomai ʼo mamata tomatou nofoʼaga ʼaē ʼe to kehe. Neʼe hoko ai tamatou palalau loaloaga. ʼI taku ʼiloʼi ʼaē ʼe nātou mavae anai ʼi te ʼapogipogi uhu, neʼe ʼau fehuʼi age: “Koteā ʼaē ʼe ina tāʼofi ʼau ke ʼau papitema nei?” Ko ʼoku tēhina e lua pea mo ʼau neʼe mātou papitema ʼi te vai ʼi te hola tahi vaelua ʼo te uhu.

Hili ai, neʼe lahi taku feʼaluʼaki moʼo fagonogono ki ʼoku ʼu famili. Ko ʼihi neʼe nātou tali lelei, pea kia nātou ʼaia neʼe ʼau fakatafito taku ʼu fai palalau kia Mateo kapite 24. Ko ʼihi neʼe mole nātou tali, pea kia nātou ʼaia neʼe ʼau fakaʼaoga te ʼu palalau ʼa Sesu ki te kau Faliseo ʼaē ʼe fakamatala ia Mateo kapite 23. ʼAki te temi neʼe ʼau liliu ʼo faiva ʼi te palalau, ʼo mulimuli ki tatatou Tāmai ʼaē ʼi selo ʼaē ʼe agaʼofa pea ʼe ia ia te ʼofa. — Mateo 5:​43-45.

ʼI te kamata neʼe fakafeagai toku ʼohoana ki taku faiga ʼi taku tauhi kia Sehova. Kae, neʼe fakavilivili pe ia ʼo kau mo ʼau, pea ʼi tesepeli 1943 neʼe papitema ai ʼo liliu ai ko hoku tokoni. Neʼe ko te toko nima ʼo tomatou kolo ko Waima neʼe papitema ʼi te ʼaho ʼaia. Ko te tokolahi ʼo te hahaʼi ʼo te kau faka mafola ʼo te Puleʼaga ʼo tomatou koga meʼa ko te toko hiva.

Te ʼu tapuakina logope te fakafeagai

Lolotoga te taʼu 1944 neʼe toe ʼaʼahi mātou e te ʼu tēhina mai te koga meʼa kehe, pea ʼi te lakaga ʼaia neʼe nātou fai te fakatuʼutuʼu ke akoʼi mātou ki te minisitelio ʼaē ko te ʼalu ʼi te ʼu ʼapi. Koteʼuhi he kua ʼiloga tamatou tuʼu mālohi ʼi te koga meʼa, pea ko te fakafeagai ʼa te kau fakafofoga ʼo te keletiate neʼe kua mālohi (Soane 15:20). Neʼe tau hoko ai te ʼu felogoi mo te ʼu patele ʼo te koga meʼa, pea neʼe tau iku ki te ʼu felāveʼi palalau loaloaga ki te ʼu akonaki. Kae ko Sehova neʼe ina tuku te mālo, pea ko ʼihi ʼo te koga meʼa, ʼo kau ai toku tokolua, neʼe nātou ʼo ki te tokaga ʼofa ʼa Sehova.

Neʼe fakatuʼu te kokelekasio ʼi Waima ʼi sūnio 1944. Ko te fakataga faka lotu pea mo te loto fehiʼa neʼe kua hikihiki ake ia. Neʼe mole kei tali ke fai he ʼavaifo ʼa te kau Fakamoʼoni ʼa Sehova ʼi te tanuma ʼo te kolo. ʼAki te temi ko te fakafeagai neʼe kovi ʼaupito. He neʼe maumauʼi mo te ʼu koloā. Ko taku motokā pea mo te tauʼaga ʼo taku motokā neʼe tutu ʼo puli noa ʼosi. Kae logope te fahaʼi ʼaia, ʼaki te tapuakina ʼa Sehova mole heʼeki hili ki ai māhina e tolu, neʼe kua feala tamatou toʼo hamatou saliote. Pea neʼe ʼau tau fakaʼaoga te saliote moʼo ʼave toku famili ʼaē ʼe tuputupu ki te ʼu fono.

Ko te tuputupu ʼo te hahaʼi neʼe faka ʼuhiga ko he maʼua fakavilivili ke fakalahi tomatou fonoʼaga ʼaē pea neʼe tupu ai tamatou fakatotonu ke laga he Fale ʼo te Puleʼaga ʼi Waima. Ko te hoki hokoe te laga ʼo te Fale ʼo te Puleʼaga ʼi Niusila. Hili ʼaia māhina e fā, ko te ʼu ʼuluaki ulu ʼakau neʼe taʼaga ʼi te ʼaho 1 ʼo tesepeli 1949, pea neʼe ko te fakatahi lahi pea mo te ʼuluaki avahi ʼa te fale neʼe fai ʼi te fale foʼou e lapalasi 260. ʼI te ʼu temi ʼaia neʼe kua hage pe ia kua ʼosi hoko, ʼaki te tokoni ʼa Sehova.

Ko he ʼu fakaʼiloga lelei ʼo te tokaga ʼa Sehova

ʼUhi ko te hahaʼi ʼo te kau faka mafola ʼo te Puleʼaga ʼi te potu tokelau ʼo Niusila ʼaē ʼe hoko tuʼumaʼu aipe tona tuputupu, ʼaki te ʼaʼahi ʼa te ʼu taupau ʼo te silikosikilipisio, neʼe nātou fai te fakamālohi ki te ʼolo ʼo gāue ʼi te fahaʼi ʼaē ʼe lahi ai tona ʼaoga. Neʼe ʼau tali te fahaʼi ʼaia, pea ʼi te taʼu 1956, ko ʼau mo toku famili neʼe mātou mavae ki Pukekohe, ʼi te potu toga ʼo Auckland. Neʼe mātou gāue ai kia taʼu e 13. — Vakaʼi ia Gāue 16:9.

Ko fakahāʼaga e lua ʼo te tokaga ʼa Sehova lolotoga ʼo te temi ʼaia neʼe ʼau taupau maʼu. Lolotoga taku gāue ki te minisipalite ko he tagata fetuku meʼa pea mo he tagata gāue ʼi te ʼu masini, neʼe fakaafe ʼau ki te ako kia vāhaʼa e fā ko te Ako faka minisitelio ʼo te Puleʼaga ʼe fai ʼi te filiale ʼo te Sosiete Watch Tower ʼi Auckland. Neʼe ʼau faka ʼui ʼoku vāhaʼa e fā ke ʼau mavae ʼuhi ko te fahaʼi ʼaia, ko te pule neʼe ina ʼui mai: “Faiʼaki. ʼE ʼau fakaʼamu ke lahi te hahaʼi ʼe hage ko koe. Ka ke toe liliu mai anai, pea ke afe mai muʼa ki toku pilo.” Hoko taku ʼaʼahi ki tona pilo, neʼe ina lī mai te totogi ki te vāhaʼa ʼaia e fā ʼaē neʼe mole ʼau gāue ai. Koia, neʼe ʼaoga te totogi ko te ʼu maʼua ʼo toku famili. — Mateo 6:33.

Ko te ʼuluaki fakahāʼaga ʼaia ʼo tana tokaga. Ko te lua fakahāʼaga ʼo tana tokaga neʼe fakaʼiloga ʼi te hoko ʼo tamā hu, ia ʼau pea mo toku ʼohoana ki te gāue pionie katoa ʼi te taʼu 1968. Neʼe ma toe tuku aipe tamā falala kia Sehova koteʼuhi ke tokoni mai, pea neʼe hoko. ʼI te tahi ʼosi ʼinu kafe ʼi te tahi uhu, ko toku ʼohoana neʼe ina avahi te ʼaisi pea neʼe mole ina maʼu he tahi meʼa age, gata pe ki te meʼa vali pane. “Sarn, mole hatā meʼa kai. ʼE ta ʼolo ʼo faka mafola ia ʼaho nei?” ko tana ʼui ʼaia. Koteā taku tali? “Ei!”

ʼI tamā ʼuluaki matapā, ko te ʼu hahaʼi ʼo te ʼapi ʼaia neʼe nātou tali te ʼu tohi ʼaē neʼe ma tuku age, pea nātou agaʼofa mai ʼo nātou foaki mai ia foʼi moa e 12. Ko te lua ʼapi ʼaē neʼe ma ʼaʼahi neʼe ina foaki mai te ʼu meʼa mata — kumaras (te ʼu kumala), te ʼu choux fleurs, pea mo te ʼu kalote. ʼI te ʼaho pe ʼaia, neʼe ma liliu ki fale ʼaki te tahi ʼu meʼa kai ko te moʼi pipi pea mo te meʼa vali pane ʼi te ʼaho ʼaia. Neʼe ma fakamoʼoni ki te ʼu palalau ʼa Sesu kia māua: “Koutou vakavakaʼi lelei te ʼu manu lele ʼo te lagi, heʼe mole nātou to magisi, pea ʼe mole nātou utu magisi, pea ʼe mole nātou tānaki ki he ʼu faleoko; kae fafaga nātou e takotou Tāmai ʼe ʼi selo. ʼE mole koa la maʼuhiga age koutou ia nātou?” — Mateo 6:26.

He gāue ʼi he fenua matāpule

Ko Rarotonga ʼi te ʼu motu ʼo Lalotoga! Neʼe ko te telituale ʼaia neʼe tuku mai kia māua e pionie makehe ʼi te taʼu 1970. Neʼe liliu ko tomā nofoʼaga ʼi ai ki te ʼu taʼu e fā ka hoa mai ki ai. Ko te ʼu ʼuluaki fihifihia neʼe tau mo māua neʼe ko te ako ʼo te lea. ʼAki te lea faka maori ʼo Niusila ʼe teitei tatau pea mo te lea faka maori ʼo te motu ʼo Lalotoga, neʼe feala taku fai taku ʼuluaki akonaki ʼi te ʼosi ʼo vāhaʼa e nima, hili ʼaia tamā tau ki te motu.

ʼI te motu ʼo Lalotoga, neʼe ʼi ai te kau faka mafola ʼo te Puleʼaga pea neʼe mole he koga meʼa ke mātou felāveʼi ki ai. ʼO toe tali pe ki tamatou faikole, ko Sehova neʼe tokaga aipe ki tomā maʼua. Hoko te tahi fai palalau pea mo te tagata fakatau koloā neʼe maʼu ai te moʼi kele ke lue, pea hili ʼaia te taʼu neʼe fakatuʼu ai te kiʼi fale pea mo te Fale ʼo te Puleʼaga e lapalasi 140. Mai ai neʼe mātou maʼu ai te ʼu tapuakina, ʼo faka kolōliaʼi ia Sehova.

Ko te meʼa ʼaē neʼe fakaʼiloga makehe ai te hahaʼi neʼe ko tanatou tali kāiga. Ko te meʼa neʼe tau hoko, lolotoga te minisitelio, ʼe tau foaki mai te ʼu meʼa ʼinu pea neʼe ko he meʼa lelei ia ki te ʼaele ʼo te fenua ʼaē ʼe ʼaele vela pea hahauʼia. Pea neʼe ma tau maʼu ʼi tamā liliu mai ki fale te ʼu siaina, te ʼu leosi, te ʼu mago, pea mo te ʼu foʼi moli neʼe tuku ʼi te muʼa matapā pea ʼe mole ʼiloʼi pe ko ai neʼe ina haga ʼo tuku mai te ʼu meʼa ʼaia.

ʼI te 1971 ko toku ʼohoana pea mo ʼau, ʼo kau ai mo te toko tolu ʼi te kau faka mafola mai Rarotonga, neʼe mātou folau ki te motu ʼo Aitutaki, ʼaē ʼe makehe ʼaki tona tai matamatalelei. Neʼe mātou maʼu ai te ʼu hahaʼi ʼe nātou leleiʼia te Folafola ʼa te ʼAtua pea neʼe kamata ai te ʼu ako faka tohi-tapu e fā, ʼo hoko tamatou liliu ki Rarotonga neʼe hoholo aipe te fai ʼo te ʼu ako faka tohi-tapu ʼaia ʼaki te faitohi. ʼAki te temi, ko te ʼu hahaʼi ako faka tohi-tapu ʼaia ʼo Aitutaki neʼe papitema, pea neʼe fakatuʼu te kokelekasio ʼi ai. ʼI te taʼu 1978 ko te lua Fale ʼo te Puleʼaga ʼi te motu ʼo Lalotoga neʼe fakatuʼu ʼi ai. Ko Sehova ʼe hoko atu aipe tana fakatupu tamatou to pulapula pea mo tona fakavai. — 1 Kolonito 3:​6, 7.

Neʼe ʼau maʼu te pilivilesio ʼaē ko te ʼaʼahi te ʼu motu e hogofulu ʼi te ʼatu motu ʼaia, ʼo ʼau tau fai ʼi te faigataʼaʼia. Ko te folau vaka ki Atiu ia kilometa e 180 neʼe maʼua ke ma fai ʼaho e ono ʼuhi ʼaē ko te ʼu matagi lalahi pea mo te ʼu tai lalahi (Vakaʼi ia 2 Kolonito 11:26). Ko te meʼa kai neʼe fakaʼutaʼuta pea tokolahi ia nātou neʼe folau mo ʼau neʼe nātou fatu kovi, pea neʼe ʼau fakafetaʼi kia Sehova ki tana tokaga, ʼaē ʼo kaku ai ki te tau haohaoa ki te tauʼaga.

ʼI te 1974 neʼe mole nātou tuku mai he fakagafua ke ma nonofo ʼi te motu ʼo Rarotonga, ʼo tupu ai tamā liliu ki Niusila. Kae ʼaki te temi neʼe ko kokelekasio e tolu ʼo te ʼu motu ʼaia neʼe lagaʼi.

Te tahi ʼu pilivilesio lalahi atu ʼo te selevisi pea mo te ʼahiʼahi

Hoko te liliu ki Niusila, ko te matapā foʼou ʼo te fealagia neʼe avahi (1 Kolonito 16:9). Neʼe kumi e te Sosiete he tahi ki te fakaliliu ʼo Te Tule Leʼo pea mo ʼihi tohi faka tohi-tapu ki te lea faka maori ʼo te motu ko Lalotoga. Neʼe tuku mai kia ʼau te pilivilesio ʼaia, pea neʼe ʼau nofo ʼi te tuʼulaga ʼaia ʼo aʼu mai ki te ʼaho nei. Neʼe ʼau tau ʼaʼahi te ʼu tēhina ʼo te ʼu motu ʼo Lalotoga, ʼuluaki ohage he taupau silikosikilipisio pea fakamuli ko he fetogi ʼo te taupau faka tisitilike.

ʼI te tahi ʼu ʼahiʼahi, ko te tēhina ko Alex Napa, te pionie makehe mai Rarotonga, neʼe ʼalu pe mo ʼau ki te folau e ʼaho 23. Pea neʼe ko te folau ʼaia neʼe ina ʼave māua ki Manahiki, Rakahanga, pea Penrhyn — te ʼu motu ʼi te potu tokelau ʼo Lalotoga. ʼI te ʼu motu, ko Sehova neʼe ina haga ʼo taki aipe te loto ʼo te ʼu hahaʼi ʼo te ʼu fenua ke nātou foaki homatou nofoʼaga pea mo tali fakalahi te ʼu tohi faka tohi-tapu (Fakatatau kia Gāue 16:15). ʼI te ʼu motu ʼaia, ʼe mahu te ʼu sifa, pea ʼe lahi te ʼu lakaga ko te hahaʼi ʼe nātou foaki mai te ʼu lopa ko he totogi ki te gāue ʼaē ko te fagonogono ʼi te mālamanei. Koia, neʼe mātou tuku age te ʼu lopa fakalaumālie, kae nātou foaki mai ʼe nātou te ʼu lopa moʼoni. — Fakatatau kia Mateo 13:​45, 46.

Kua ʼi ai te koga meʼa ʼo te malamanei ʼe matamatalelei! Koutou fakafuafua te taʼi aga lalahi ʼe maʼanu fakatahi ʼi te tokalelei mo te tamaliki! Pea ko he meʼa taulekaleka te lagi ʼi te pōʼuli! Ko he meʼa moʼoni te ʼu palalau ʼa te tagata fai pesalemo: “Ko he ʼaho ʼe hoko ʼatu ki te tahi ʼaho ʼe ina fakamafisi te lea, pea ko he po ʼe hoko ʼatu ki he tahi po ʼe ina fakahā te mālama.” — Pesalemo 19:2.

Koia, neʼe hoko te meʼa ʼi te taʼu hiva ki muli atu ko te ʼahiʼahiʼi moʼoni ʼo tamā agatonu. Ko toku ʼohoana neʼe ʼave ki te lopitali ʼuhi ko te toto ʼe puna ʼi tona ʼuto. Neʼe maʼua foki ke tafa, kae ko te tōketā neʼe mole ina tali ke fai te tafa kae mole fakaʼaoga te toto. Ko toku ʼohoana pea mo ʼau neʼe mole pe feala ke ma tali te fahaʼi ʼaia, ko te ʼuhi ʼe fakafeagai ki te lao ʼa te ʼAtua. Kae ʼi te fakakaukau ʼa te tōketā ʼe ina fai te tafa, neʼe ina ʼui ʼe feala, ʼaki te toto kia meʼa fuli ki te hāofaki ʼo te maʼuli.

Ko toku ʼohoana neʼe fakaʼaluʼalu ʼo kovi, pea neʼe kua tuku ia ki te fahaʼi ʼaē ʼe lahi ai anai te leʼoleʼo ki ai, ko te ʼu ʼaʼahi ki ai kua fakaʼutaʼuta. Ko te meʼa neʼe hoko ki ai kua faka aʼu ʼo mole kei logo koteʼuhi ko te meʼa ʼe mātakitaki ʼi te ʼu loto taliga. Neʼe mole kei ʼiloʼi he meʼa ke fai. Hili ʼaia taku tahi ʼaʼahi ko te tōketā neʼe muli mai ia ʼau ʼo aʼu ki taku motakā, ʼo faiga ai ʼo ina ʼui ko te tafa ʼo toku ʼohoana ʼe feala pe ke hāo mo kapau ʼe ai te toto. Pea neʼe ina faigaʼi mai kia ʼau ke ʼau haga ʼo tali. Kae logope te fahaʼi ʼaia ko toku ʼohoana pea mo ʼau neʼe ma tuku pe tamā falala kia Sehova — logope ko te fakalogo ki tana ʼu lao ʼe feala ke iku ai ki te mate.

ʼE puna’maʼuli pe, ki te fakaʼiloga lelei ʼo te maʼuli ʼo toku ʼohoana. ʼI taku aʼu atu ʼi te tahi ʼaho, neʼe ʼau maʼu atu ʼe heka ʼi tona palepale ʼe lautohi. ʼI te ʼu ʼaho ʼe hoa mai ki ai neʼe kamata tana fagonogono ki te ʼu hahaʼi mahahaki ʼi ʼona tafa pea mo te ʼu hahaʼi faifaitoʼo. Neʼe kumi mai ʼau ke ʼau ʼalu age ki te pilo ʼo te tōketā fai tafa. “ ʼE moʼoni, ko koe ia ko te tagata manuʼia ia! ʼI tamatou manatu kua lelei te mahaki ʼo tou ʼohoana.” Neʼe ko te ʼui ʼaia ʼo te tōketā fai tafa. Mole ʼiloʼi pe neʼe feafeaʼi, ko te mālohi ʼo te toto ʼi tona ʼu ʼua kua haʼele lelei, ʼe mole kei mālohi fau. Ko toku ʼohoana pea mo ʼau neʼe ma fakafetaʼi fakatahi kia Sehova, pea ma fakafoʼou tamā faiga ke hikihiki atu tamā gāue ʼi te faka mafola.

ʼI te temi nei neʼe toe hinoʼi ʼau ke ʼau ʼalu ʼo gāue ʼi te motu ʼo Lalotoga pea mo Rarotonga. Ko he pilivilesio ʼe tapuakina ia! Ka ma fakasiosio ki muli ia, toku ʼohoana pea mo ʼau ko he fakafetaʼi ia kia Sehova ʼi tana tokaga aipe kia māua ʼo laka ʼi te ʼu taʼu ʼaē e 50 ʼi te gāue. ʼI te fahaʼi ʼo te ʼu koloā, neʼe mole tuku noaʼi māua. ʼI te fahaʼi fakalaumālie, neʼe mole pe feala te lau ʼo te ʼu tapuakina fakalaumālie. Ko he fakaʼiloga neʼe ko te hahaʼi ʼo toku famili neʼe nātou tali te moʼoni. ʼE feala haku lau ʼo laka ʼi te 200 ia nātou kua papitema ko he kau Fakamoʼoni ʼa Sehova ʼi te temi nei, ʼo kau ai toku hōloga totonu e 65. ʼE ʼi ai taku foha lahi ʼe kau ʼi te famili ʼo te Petele ʼo Niusila; kae ko taku ʼofafine mo tona ʼohoana mo tana ʼu tamaliki e lua ʼe nātou kau ki te ʼu gāue fakatuʼu filiale. — 3 Soane 4.

Ka ʼau toe sio ki muʼa, ʼe ʼau leleiʼia te ʼamanaki ko te maʼuli ʼi te palatiso ʼaē, ʼi te kele katoa, ko te matalelei ʼaia ʼe laka anai ia ʼi te koga meʼa matamatalelei ʼaē neʼe ʼau tupu ai. Ko he pilivilesio anai ʼaē ko taku toe sio ki taku faʼe pea mo taku tāmai ʼi te toe fakatuʼuake pea ʼe ʼau fakahā age anai kia nātou te totogi, te Puleʼaga, pea mo te ʼu fakaʼiloga fuli ʼa te tokaga ʼa Sehova.

Ko toku loto faiga, ʼaki te ʼiloʼi ʼaē ʼe tokaga mai ia Sehova kia ʼau, ʼe hage ko te meʼa neʼe ʼui e te tagata fai pesalemo ia Pesalemo 104:​33: “ ʼE ʼau hiva anai kia Sehova lolotoga toku maʼuli; ʼe ʼau fai anai he ʼu hiva ki toku ʼAtua lolotoga te temi ʼaē ʼe ʼau maʼuli ai.” — Fakamatala e Sarn Wharerau.

[Paki ʼo te pasina 28]

Ko te ʼuluaki Fale ʼo te Puleʼaga neʼe fakatuʼu ʼi Niusila, ʼi te taʼu 1950.