Te ʼu Fehuʼi ʼa Te Kau Lautohi
Koteā te maʼua ʼa te kau kilisitiano ki te fakamamalieʼi ʼo te tefu ʼo totatou nofoʼaga — te kele, te vai, pea mo te ʼaele?
ʼI totatou ʼuhiga kau Fakamoʼoni ʼa Sehova, ʼe ʼi ai totatou pikipikiga mālohi ki te ʼu fihifihia ʼe tau mo totatou nofoʼaga ia te kele. ʼO laka ʼi te hahaʼi tokolahi, ʼe tou fiafia neʼe ko te kele neʼe fakatupu ke maʼa, ko he nofoʼaga haohaoa maʼa he famili fakatagata haohaoa (Senesi 1:31; 2:15-17; Isaia 45:18). ʼE tou falala ʼe haga anai te ʼAtua ʼo “maumauʼi ia nātou ʼaē ʼe nātou maumauʼi te kele”. (Fakahā 11:18.) Koia ʼe tonu ai ki tatatou ʼu faiga ke fakafuafua pea ke tonu ke ʼaua naʼa fakahoko atu te maumauʼi ʼo te kele e te tagata. Koutou fakatokagaʼi te kupu ʼaē “tonu”. Pea ʼe toe to tonu ʼi te faʼahi ʼo te Tohi-Tapu ke tou tokaga naʼa tou faka fealagia te ʼu gāue pea mo te ʼu meʼa ʼaē ki te fakamaʼa ʼo te kele ke liliu ko he meʼa ʼe tou tokaga tāfito ki ai.
Koʼe pe la te tagata ʼe ʼi ai te ʼu meʼa ʼe ina laku: te ʼu fekau. Ohage la ko te tuputupu, ko te gaohi ʼo te meʼa kai pea mo tona kai ʼe fakatupu ai te ʼu ʼotaʼota ʼe popo (Pesalemo 1:4; Luka 3:17). Ko te ʼu ika tunu ʼaē neʼe gaohi e Sesu ʼi tona toe fakatuʼuake maʼa tana kau tisipulo neʼe ko te meʼa neʼe fai ʼaki te ʼahu, pea mo te lefulefu pea mo te ʼu ʼotaʼotaʼi huiʼi ika (Soane 21:9-13). Neʼe fakatuʼutuʼu te ʼu ʼaluʼaga ʼi te kele moʼo fakatokatoka ʼo te ʼu faʼahiga meʼa ʼaia.
Ko te hahaʼi ʼa Sehova ʼe mole tonu ke maʼuli galogalo ʼo ʼuhiga mo te fihifihia (te tefu ʼo te kele) ʼe tau mo te kele. Ko Sehova neʼe ina fakamaʼua tana hahaʼi ʼi te temi muʼa ke nātou fai he fakatuʼutuʼu ʼo ʼuhiga mo te fakamaʼa ʼo te ʼu fekau magisi, pea ko te ʼu fakatuʼutuʼu ʼaia ʼe lelei ki te fakamaʼa ʼo te kele pea ʼe maʼuhiga ki te fakamaʼa fakasino (Teutalonome 23:9-14). Pea ʼi tatatou ʼiloʼi ʼaē ʼo tana manatu ʼo ʼuhiga mo nātou ʼe nātou maumauʼi te kele, ʼe tonu anai ke tou tokakaga ʼo faigaʼi ke tou fakamaʼa totatou nofoʼaga. ʼE tou tokakaga anai ʼo tae te ʼu ʼotaʼota peʼe ko te ʼu fekau, kae tāfito te ʼu meʼa ʼaē ʼe fakatupu kovi ki te kele. ʼE tou kaugā gāue fakalelei anai ki te ʼu faiga ʼaē ʼe fai moʼo fakamaʼa ʼo te kele, kae ʼe tou fai tāfito anai mo kapau ko he meʼa ʼe fakamaʼua e Sesale (Loma 13:1, 5). Pea ko ʼihi hahaʼi ʼe nātou fai te ʼu fakatuʼutuʼu ke nātou toʼo ʼāteaina pe te ʼu meʼa ʼaē ʼe nātou ʼiloʼi ʼe popo gafua ʼi te fakaʼaogaʼi ʼo he ʼu meʼa ʼe toe kau anai ki te ʼu moʼuga ʼotaʼota ʼi te kele peʼe ʼi te lalo tai.
Ko te fakahoko atu ʼo te pikipikiga ʼo te kilisitiano ʼi te faʼahi ʼaia, ʼa ia ʼāteaina pe, gata pe foki mokā ko he meʼa ʼe fakamaʼua e te lao. ʼE hā lelei, ʼi tana maʼu mai te ʼu logo (ʼi te ʼu nusipepa, peʼe ʼi te televisio, peʼe ʼi te latio) ʼe to gafua te tagata heʼehaohaoa ki te hele ʼaē ko te tokaga fakavale ki te faʼahi ʼaia. ʼE lagi ʼe tau te tokoni ʼaenī ʼa Sesu: “Tuku takotou fakamāu, koteʼuhi ke ʼaua naʼa fakamāuʼi koutou. (...) He koʼe ia ʼe ke sioʼi koe te mohuku ʼaē ʼe ʼi te mata ʼo tou tēhina, ka mole ke tokaga koe ki te lalago ʼaē ʼe ʼi tou mata ʼo koe?” (Mateo 7:1, 3). Ko te taupau maʼu ʼo te tokoni ʼaia ʼi totatou ʼatamai ʼe ko he tokoni ia ke ʼaua naʼa galo ia tatou ʼihi ʼu meʼa maʼuhiga.
Neʼe fēnei te tohi ʼa te polofeta ko Selemia: “ ʼE ʼau ʼiloʼi pe, ê Sehova, ʼe mole ʼa te tagata ʼaē mai te kele te taki ʼo tona ala. ʼE mole ʼa te tagata ʼaē ʼe haʼele te fili ʼo tona ala.” (Selemia 10:23). Ko te mole ʼiloʼi ʼaē ʼo te fakatuʼutuʼu ʼaia ʼaē neʼe felāveʼi ai leva te tagata mo te “ ʼu temi maʼuhiga ʼaupito pea mo faigataʼa” ʼaē ʼe fakahā mai ia 2 Timoteo 3:1-5. Pea ko te meʼa ʼaē ʼe fakamatala e te ʼAtua ia Fakahā 11:18 ʼe ina fakamoʼoni ko te ʼu faiga ʼa te tagata moʼo molehi ʼi te kele te ʼu fihifihia maʼuhiga ʼe tau mo te kele (te maumauʼi ʼo te kele), ʼo kau ai te tefu, ʼe mole pe feala ke katoa tona lelei. ʼE feala pe ke lelei ʼi ʼihi ʼu potu ʼo te kele, kae ko te puleʼaki fakamuli ʼe haʼu ia mai te ʼAtua.
ʼUhi ko te faʼahi ʼaia, ʼe tou tuku tatatou ʼu faiga pea mo totatou mālohi ki te puleʼaki fakaʼatua, ʼi hatatou faigaʼi ke tou fakafimālie he ʼu meʼa ʼe mole tou ʼiloʼi totonu. ʼI te potu ʼaia, ʼe tou muliʼi te faʼifaʼitaki neʼe tuku mai e Sesu, ʼaē neʼe ko te temi loaloaga neʼe ina fakaʼaogaʼi ki te minisitelio ʼaē “ko te fakamoʼoni ki te moʼoni”. (Soane 18:37.) Neʼe mole haga Sesu ia ʼo fafaga te mālama peʼe ina fakamālōlō te ʼu fihifihia faka sosiale ʼo te malamanei — ohage la ko te tefu — neʼe ina hinoʼi te puleʼaki katoa ki te ʼu fihifihia ʼe tau mo te malamanei. — Soane 6:10-15; 18:36.
Ko totatou ʼofa ʼaē kia nātou ʼe kaugā nonofo mo tatou ʼaē ka ina uga tatou ke ʼaua naʼa tou ʼulihi te kele, te ʼaele, peʼe ko te ʼu meʼa ʼo te vai, ʼe tou haga fakamoʼoni ai ki te moʼoni. Ko te meʼa ʼaia ʼe maʼua ke akoʼi te hahaʼi ke nātou maʼuliʼi te moʼoni faka tohi-tapu pea ke ʼaua naʼa nātou ʼulihi tonatou sino ʼaki te suluka, te ʼinu fakavale ʼo te kava, peʼe ko te fakaʼaogaʼi ʼo te toloke. Ohage ko te miliona hahaʼi foʼou neʼe nātou liliu ko te kau tisipulo, neʼe nātou akoʼi te ʼu aga ʼo te fakamaʼa pea mo te fakaʼapaʼapa ki ʼihi. Koia ko te gāue faka mafola neʼe ʼaoga ia ki te fakasiʼisiʼi ʼo te fihifihia lahi ʼo te temi nei ia te tefu. Kae ʼe laka atu ia, ko te kau tisipulo faka kilisitiano ʼe nātou faigaʼi nei ke nātou fetogi tanatou ʼu ʼuhigaʼi tagata pea mo tanatou aga ke tau mo nātou ia te hu ki te palatiso fakakelekele maʼa ʼe foaki anai e te ʼAtua ki tana kau ʼatolasio moʼoni.