Te ʼu Fehuʼi ʼa Te Kau Lautohi

Kapau ko te pelepitelo ʼāfea ʼaē ʼe higoa ko Melekiseteke neʼe ko te tagata moʼoni, he koʼe koa ʼe ʼui e te Tohi-Tapu neʼe mole ʼi ai “hona hāko”?

Ko te talanoa ʼaia ʼe tuʼu ia Hepeleo 7:3. Koutou fakatokagaʼi te vaega ʼi tona kapite katoa:

“Koteʼuhi ko te Melekiseteke ʼaia, hau ʼo Salemi, pelepitelo ʼo te ʼAtua Māʼoluga, ʼaē neʼe felāveʼi mo Apalahamo, ʼi tana liliu ʼaē mai tana matehi te ʼu hau pea mo ina tapuakina, ia ia ʼaē neʼe foaki age ki ai te hogofulu ʼo te vahe fuli, ʼaē ko tona ʼuhiga ʼuluaki, ‘ko te hau ʼo te faitotonu’ pea ko ia foki ko te hau ʼo Salemi, ko tona faka ʼuhiga ‘ko te hau ʼo te tokalelei’. ʼI te mole ʼi ai hana tāmai, hana faʼe, hona hāko, he kamataʼaga ʼo tona ʼu ʼaho peʼe ko te fakaʼosi ʼo tona maʼuli, kae neʼe hage ko te ʼAlo ʼo te ʼAtua, ʼe nofo ia ʼo pelepitelo ʼo heʼegata.” — Hepeleo 7:1-3.

Ohage ko tona fakahā, ko Melekiseteke neʼe ko te tagata moʼoni ohage pe ko Apalahamo, ʼaē neʼe kua felogoi totonu ki ai (Senesi 14:17-20; Hepeleo 7:4-10). Koia, neʼe ʼi ai te ʼu mātuʼa ʼa Melekiseteke, tana tāmai mo tana faʼe, pea lagi neʼe ʼi ai mo tona hōloga. Koia ʼi tona ʼuhiga tagata, neʼe ʼi ai tona hākoga. Neʼe ina ʼiloʼi foki te mate. ʼO ʼuhiga mo te faʼahi ʼaia, ko Melekiseteke neʼe mate ohage ko tona hā ʼi te talanoa ʼa te ʼapositolo ko Paulo ia Loma 5:12, 14. Kae koteʼuhi ʼe mole tou ʼiloʼi te temi ʼaē neʼe mate ai ia Melekiseteke pea mo te temi ʼaē neʼe gata ai tana tauhi ʼi tona ʼuhiga pelepitelo, ʼo ʼuhiga mo te faʼahi ʼaia ʼe mole tou ʼiloʼi he gataʼaga ʼo tana tauhi.

ʼI tana tohi ʼaē ki te kau Hepeleo, neʼe fai e Paulo te ʼu fakamatala ʼo ʼuhiga mo Melekiseteke ʼi tana talanoa ʼaē ki te tuʼulaga ʼa Sesu Kilisito ʼi tona ʼuhiga pelepitelo lahi. ʼI tana talanoa kia Melekiseteke ohage ko he fakatā ʼa Sesu ʼi te tuʼulaga faka pelepitelo ʼaia, neʼe ʼui fēnei e Paulo: “Ko Sesu (...) neʼe liliu ʼo pelepitelo lahi ohage ko tana fai e Melekiseteke.” (Hepeleo 6:20). E feafeaʼi te faka ʼuhiga ʼo te talanoa ʼaenī?

E lagi neʼe mahino kia Paulo ʼe mole ʼi ai he ʼu kiʼi fakamatalatala ʼo ʼuhiga mo te tohi hāko ʼa Melekiseteke — ʼo ʼuhiga mo tana ʼu kui peʼe ko tona hōloga mo kapau neʼe ʼi ai. Ko te talanoa ʼaia ʼe mole gata pe ki te fakamatala faka tohi-tapu. Koia, ʼi te faʼahi ʼaē neʼe ʼiloʼi e Paulo peʼe ko tatou, ʼe feala ke tou ʼui tonu ko Melekiseteke “neʼe mole ʼi ai hona hāko” (Les Saintes Écritures — Traduction du monde nouveau; American Standard Version), “neʼe mole he hākoga ʼo ʼona” (W. J. Conybeare), peʼe “neʼe mole ʼi ai hona hāko faka famili”. — J. B. Phillips.

Neʼe feafeaʼi koa te hage ʼa Sesu ko te talanoa ʼaenī? ʼIo, ʼe tou ʼiloʼi ko te Tāmai ʼa Sesu ko Sehova ʼAtua pea ko tana faʼe (ʼi te kele) neʼe ko Malia mai te telepi ʼo Suta. Kae, neʼe ʼi ai te ʼu ʼaluʼaga tatau ia Melekiseteke pea mo Sesu. Neʼe feafeaʼi te tatau ʼo te ʼu ʼaluʼaga ʼaia? Ko Sesu neʼe mole ko he tahi neʼe haʼu mai te telepi ʼo Levi, te telepi ʼo te kau pelepitelo ʼo te fenua ʼo Iselaele. Kailoa, ko Sesu neʼe mole liliu ko he pelepitelo tupu mai he hākoga fakatagata. Neʼe toe feiā aipe mo Melekiseteke, neʼe mole liliu ko he pelepitelo “ ʼo mulimuli ki te lao ʼo he folafola ʼe fakatafito ki te kakano”, ko tona faka ʼuhiga, ke tupu ʼi he telepi pea mo he famili ʼo he kau pelepitelo (Hepeleo 7:15, 16). Neʼe mole liliu ia Sesu ko he pelepitelo ʼuhi ko tana tāmai neʼe ko he pelepitelo, kae ko Sesu “neʼe higoaʼi tonu e te ʼAtua ko he pelepitelo lahi ohage ko tana fai e Melekiseteke”. — Hepeleo 5:10.

Pea tahi, neʼe mole ʼi ai he hōloga ʼa Sesu peʼe ko hona ʼu fetogi ki tona tuʼulaga faka pelepitelo. ʼI tona faka ʼuhiga foki la ʼaia, neʼe mole ʼi ai hona hāko. ʼE ina fakahoko anai ʼo talu ai tana gāue faka pelepitelo ʼi tona ʼuhiga fai akonaki ʼaoga. Neʼe talanoa ia Paulo ki te gāue ʼaia ʼo talu ai, ʼi tana ʼui fēnei:

“[Ko Sesu] koteʼuhi ʼe haga maʼuli ʼo heʼegata, ʼe mole hona fetogi. Koia, ʼe feala ai foki hana hāofaki ia nātou ʼaē ʼe fakaōviōvi ki te ʼAtua ʼaki ia ia, koteʼuhi ʼe maʼuli tuʼumaʼu moʼo hūfaki nātou.” — Hepeleo 7:24, 25.

Koia, ko tatatou fakatokagaʼi te ʼu palalau ʼa Paulo ia Hepeleo 7:3 ʼe mole tonu pe ko he koga ʼo te ʼatamai mālama ʼaē ʼe tou taupau. ʼE tonu ke ina fakamālohiʼi tatatou leleiʼia te fakatuʼutuʼu ʼofa ʼaē neʼe fai e Sehova maʼa tatou ke tou maʼu te fakamolemole ʼo te agahala ʼo heʼegata pea mo tana fakatuʼutuʼu ke ina foaki mai kia tatou he tokoni mo he takitaki ʼo talu ai.