Ko Te Kau Fakamoʼoni ʼa Sehova ʼi Te Malamanei Katoa—Te Lepupilika ʼo Filipine

KO TE ʼu motu ʼaia e 7 083 ʼe nātou faʼufaʼu te Lepupilika ʼo Filipine ʼe ko te ʼu potu māʼoluga ʼaia ʼo te atu moʼuga ʼe lōmaki tona koga.a Pea ko te toko 62 000 000 hahaʼi ʼo Filipine ʼe nātou leleiʼia te palalau ki te ʼu faʼahi ikehekehe. Ko te faʼahiga maʼuli ʼaia ʼe ina fakatupu ʼaki he gāueʼaga ʼe foha ki te fai faka mafola ʼo te Puleʼaga.

Ko Te Faka Mafola ʼi Te Faleako

ʼI te motu ʼo Masbate, neʼe fealagia ki te tūpulaga ʼo te ʼu faleako lalahi tana fagonogono ki tana fafine faiako pea mo tana kalasi lolotoga te sivi. ʼE fēnei tana fakamatala:

“Ko te kupu ʼo te sivi, ‘Kapau ʼe ʼofa te ʼAtua ia ʼau, ʼe mole ina tuku mai anai he ʼu faigataʼaʼia peʼe ina tuku ke ʼau mamahi.’ ʼI te temi ʼaē neʼe sivi ai e te fafine faiako ʼamatou ʼu pepa, neʼe ina fakatokagaʼi ko te kau ako fuli neʼe nātou fakamoʼoni fuli ki te faʼahi ʼaia, gata pe ko ʼau neʼe mole ʼau fakamoʼoni ki te faʼahi ʼaia. Neʼe faka fealagia mai e taku fafine faiako ke ʼau fakamahino te tupuʼaga ʼo taku faka lākahalaʼi te faʼahi ʼaia. Neʼe ʼau ʼui ʼe mole ko te ʼAtua ʼaē ʼe ina tuku mai te ʼu faigataʼaʼia, logope ʼe ina tuku te ʼu mamahi pea mo fakagafua ke ʼahiʼahiʼi tatou. ʼAki taku fakaʼaogaʼi te Tohi-Tapu, ʼaē ʼe ʼau ʼave tuʼumaʼu pe ki te faleako, neʼe ʼau fakamahino ki te kalasi te ʼu kupu ia 1 Soane 4:8, ‘Ko te ʼAtua ʼe ʼofa.’ ʼI te ʼosi ʼo taku fakamahinohino, neʼe kua tonu tahi taku fafine faiako mo ʼau, pea neʼe ina tātā te laupapa, pea mo ʼui fēnei: ‘ ʼE tonu ia Marilou.’ Neʼe ko ʼau pe neʼe ʼau maʼu te tali ʼaē ʼe tonu ki te fehuʼi ʼaia pea neʼe ʼau mau te nota ʼaē ʼe lelei age.”

Ko Te Logo ʼo Te Puleʼaga ʼe ʼi Te Potu Fuli

Lolotoga tana gāue faka mafola ʼi te ʼu ʼapi ʼi te tahi koga fenua ʼo Filipine, neʼe felāveʼi te tuagaʼane pionie katoa (ko he tahi ʼe fai faka mafola te logo lelei ʼi te temi katoa) mo te fafine ko ʼana ʼu tamaliki liliki e tolu. Neʼe fia logo te fafine ki te logo lelei ʼo te Puleʼaga, pea neʼe faigafua te kamata ʼo te ako faka Tohi-Tapu mo ia. Logope te mole leleiʼia e tona ʼohoana ke ina ako te Tohi-Tapu, tāfito mo te kau Fakamoʼoni ʼa Sehova, neʼe hoko atu pe te ako.

Neʼe hiki e te tagata tona famili ki te tahi kolo, ʼaki tana manatu ʼaē ʼe fakagata ai anai te fakatahi ʼo tona ʼohoana mo te kau Fakamoʼoni. Kae neʼe mole fualoa pea neʼe nātou maʼu te fafine ʼaia, pea neʼe ina toe hoko atu tana ako faka Tohi-Tapu. ʼIo, ko te meʼa ʼaia neʼe fakatupu ʼita ki tona ʼohoana. Neʼe ʼalu ai mo tona ʼita ki tana gāue, ʼo ina fakahā te ʼu meʼa ʼaē ʼi tona loto ki te tagata neʼe haʼu kia te ia ke gaohi tana motokā. Ko te meʼa ʼaē neʼe mole ina ʼiloʼi e te tagata, ko te client ʼaia neʼe ko te Fakamoʼoni ʼa Sehova.

Neʼe fakamahino age e te Fakamoʼoni ko he manuʼia lahi ʼe feala ke maʼu e tona famili fuli mo kapau ʼe hoko atu e tona ʼohoana tana ako faka Tohi-Tapu. ʼE feala ai hana maʼuliʼi te ʼu fakatuʼutuʼu faka Tohi-Tapu ʼi te loto fale. Neʼe toe ʼui age foki ʼe feala pe ke fua manuʼia ki te tagata ʼohoana totonu hana ako ʼo ʼuhiga mo te Puleʼaga ʼo te ʼAtua.

Koteā te meʼa neʼe hoko ai ʼi te fai palalau ʼaia? Kua lahi age te faʼifaʼitaliha ʼa te ʼohoana ʼo te tagata tana ako te Tohi-Tapu, pea neʼe fakatotonu ai te tagata ke nātou toe liliu ki tonatou ʼapi ʼāfea. ʼI ai neʼe lelei te tuputupu fakalaumālie ʼa te fafine ʼo aʼu ai mo tana liliu ko te kaugā fagona ʼe fai faka mafola kae mole heʼeki papitema. Neʼe tali foki e tona ʼohoana te ako faka Tohi-Tapu, pea kua kamata ʼolo te famili katoa ki te ʼu fono faka Kilisitiano.

[Nota ʼi te lalo pasina]

[Talanoa ʼo te pasina 8]

TE FAKAʼALUʼALU ʼO TE FENUA

ʼI Te Taʼu Gāue 1993

TE LAHI ʼO TE KAU FAI FAKA MAFOLA: 116 576

KO TE FAKAFUAFUA Ko te Fakamoʼoni e 1 maʼa te toko: 549

TE HAHAʼI ʼI TE ʼAHO ʼO TE FAKAMANATU: 357 388

TE LAHI ʼO TE KAU PIONIE: 22 705

TE ʼU AKO FAKA TOHI-TAPU: 94 370

TE LAHI ʼO TE KAU PAPITEMA: 7 559

TE LAHI ʼO TE ʼU KOKELEKASIO: 3 332

TE TUʼUʼAGA ʼO TE FILIALE: MANILA

[Paki ʼo te pasina 9]

ʼE fua lelei te fagonogono ʼi te lapalasi fakatauʼaga meʼa kai

[Paki ʼo te pasina 9]

Ko te filiale ʼo te Sosiete Watchtower ʼi Manila