Ko Te Kau Ki Te Fakatahi Faka Tisitilike “Manavasiʼi Faka Lotu”
KO TE ʼu kaugana ʼa Sehova ʼi te temi muʼa neʼe fakamaʼua kia nātou e te Lao ʼa Moisese ke nātou fakatahitahi ʼo tuʼa tolu ʼi te taʼu ʼo ʼuhiga mo he ʼu ʼaho lafeti. Neʼe ko he ʼu lakaga fakafiafia pea mo fakatuputupu ʼi te faʼahi fakalaumālie.—Teutalonome 16:16.
ʼO tatau aipe mo te ʼu kaugana ʼa Sehova ʼi te temi ʼaenī ʼe nātou fakatahitahi ʼo tuʼa tolu ʼi te taʼu: ʼi te fakatahi makehe ʼaho tahi, ʼi te fakatahi fakakolo e ʼaho lua, pea mo te fakatahi faka tisitilike e ʼaho tolu peʼe ʼaho fā. Lolotoga te taʼu gāue 1994, ko te ʼu kau Fakamoʼoni ʼa Sehova ʼe nātou fakatahitahi anai ʼi te Fakatahi Faka Tisitilike ko tona kupu tafito “Manavasiʼi Faka Lotu.”
Ko te Folafola ʼa te ʼAtua ʼe mole ina tuku mai he lotolotolua ʼo ʼuhiga mo te maʼuhiga ʼo te manavasiʼi faka lotu. Ko te taʼi manavasiʼi ʼaia e tuʼa 200 tona tuʼu ʼi te Folafola ʼa te ʼAtua. Ko te manavasiʼi faka lotu ʼe ko he taupau, ohage pe ko tona fakahā mai ia Tāʼaga Lea 16:6: “ ʼI te manavasiʼi kia Sehova ʼe maliu ai he tahi mai te kovi.” Koia, ʼe tou lau ia Pesalemo 111:10 ko te manavasiʼi faka lotu ko te kamataʼaga ʼaia ʼo te poto!
ʼE feala hatatou ʼui ko te ʼu faʼahi e lua ʼo te manavasiʼi faka lotu. ʼUluaki, ko te taʼi manavasiʼi ʼaia ʼe tupu mai te ʼofa. ʼE tou manavasiʼi naʼa koviʼia tatou e te ʼAtua koteʼuhi e lahi totatou ʼofa ʼaē kia te ia. (Tāʼaga Lea 27:11) Tahi ʼaē meʼa, ko te poto ʼe ina tokoniʼi anai tatou ke ia tatou te manavasiʼi faka lotu, koteʼuhi ʼe tou ʼiloʼi ko te ʼAtua ʼe “ko te afi kakaha” kia nātou fuli ʼaē ʼe nātou maʼuliʼi te ʼu aga ʼaē ʼe kovi.—Hepeleo 12:29.
ʼI tatatou Fakatahi Faka Tisitilike ʼaē ko tona kupu tāfito “Manavasiʼi Faka Lotu,” ʼe tou maʼu ai anai he ako pea mo he ʼu palalau fakaloto mālohi moʼo fakatuputupu ʼo tatatou manavasiʼi faka lotu. Ko te taʼi ako ʼaia ʼe foaki mai anai ʼaki te ʼu akonaki, te ʼu faʼifaʼitaki, pea mo te gaoʼi, ʼo feiā aipe mo te ʼu fakamatala.
Ohage pe ko te fakatotonu neʼe fai ki te kau Iselaele ʼi te temi muʼa ke ʼaua naʼa nātou ʼolo feiā pe ki tanatou ʼu fakatahi, mo tatou foki ʼe tou fia kau anai ki te fiafia pea mo te fua lelei ʼo tatatou ʼu fakatahi. (Teutalonome 16:17) ʼE feala ke tou fai te faʼahi ʼaia ʼaki tatatou fakahā ʼo tatatou fakaʼapaʼapa ki te fakaafe ʼa Sehova. ʼO feafeaʼi? ʼAki tatatou ʼōmai fakatomuʼa, ʼe tou tokaga fakalelei ai anai ki te ʼu akonaki, ʼo tou kau mo totatou loto katoa ki te hiva ʼo te ʼu katiko. Ke ʼaua naʼa tou fai palalau peʼe tou feʼaluʼaki lolotoga te polokalama. ʼE tou loto anai ke lahi tatatou kau ki te ʼu gāue. ʼE lahi te ʼu faʼahiga gāue ʼe fakatuʼutuʼu ʼo ʼuhiga mo te Fakatahi, koia ʼe fakamaʼua ai kia tatou takitokotahi ke tou lagolago ki te ʼu gāue ʼaia. ʼE tou fia foaki anai he falā ko hatatou ʼu meʼa ʼofa ʼo ʼuhiga mo te ʼu tapuakina lahi ʼe tuku mai e Sehova kia tatou.
Ke fai e te ʼu kaugana fuli ʼa Sehova he ʼu fakatuʼutuʼu ʼi te temi nei ke nātou kau ki te Fakatahi Faka Tisitilike ʼaho tolu ko tona kupu tāfito “Manavasiʼi Faka Lotu,” mai tona kamataʼaga ʼaki te katiko ʼi te Feliaono uhu ʼo aʼu ki te faikole fakaʼosi ʼi te ʼAhotapu hoʼatā.